ಅಜರ್ಯ

1 : ಹನನ್ಯ, ಮಿಶಾಯೇಲ್ ಹಾಗು ಅಜರ್ಯ ಎಂಬವರು ದೇವರನ್ನು ಸ್ತುತಿಸುತ್ತಾ ಸರ್ವೇಶ್ವರನ ಗುಣಗಾನ ಮಾಡುತ್ತಾ ಬೆಂಕಿಯ ನಡುವೆ ತಿರುಗಾಡುತ್ತಿದ್ದರು.
2 : ಆಗ ಅಜರ್ಯನು ಬೆಂಕಿಯ ನಡುವೆ ನಿಂತುಕೊಂಡು ಗಟ್ಟಿಯಾಗಿ ಕೂಗಿ ಹೀಗೆಂದು ಪ್ರಾರ್ಥನೆ ಮಾಡಿದ:
3 : ನಮ್ಮ ಪೂರ್ವಜರ ದೇವರಾದ ಹೇ, ಸರ್ವೇಶ್ವರಾ, ನೀವು ಸ್ತುತ್ಯಾರ್ಹರು, ವಂದನೀಯರು ನಿಮ್ಮ ನಾಮ ಸದಾ - ಸರ್ವದಾ ಮಹಿಮಾಯುತ.
4 : ನೀವು ನಮಗೆ ಗೈದವುಗಳೆಲ್ಲ ಧರ್ಮಸಮ್ಮತವಾದುವು ನಿಮ್ಮ ಕಾರ್ಯ, ಸತ್ಯ, ನಿಮ್ಮ ಮಾರ್ಗ, ನ್ಯಾಯ; ನಿಮ್ಮ ತೀರ್ಪು, ಯಥಾರ್ಥ.
5 : ನೀವು ನಮ್ಮ ಮೇಲೂ ನಮ್ಮ ಪೂರ್ವಜರ ಶ್ರೀನಗರವಾದ ಜೆರುಸಲೇಮಿನ ಮೇಲೂ ಬರಮಾಡಿರುವುದೆಲ್ಲ ಸರಿಯಾದುವು. ನಮ್ಮ ಪಾಪದ ನಿಮಿತ್ತ, ಸತ್ಯ ಹಾಗೂ ನ್ಯಾಯವಾದುದನ್ನೆ ಬರಮಾಡಿದ್ದೀರಿ!
6 : ಏಕೆಂದರೆ ನಿಮಗೆ ವಿಮುಖರಾಗಿ ಪಾಪ ಮಾಡಿದೆವು, ದ್ರೋಹಗೈದೆವು, ಎಲ್ಲ ವಿಷಯದಲ್ಲೂ ತಪ್ಪುಮಾಡಿದೆವು.
7 : ನಿಮ್ಮ ಆಜ್ಞೆಗಳನ್ನು ಆಲಿಸಲಿಲ್ಲ, ಪಾಲಿಸಲಿಲ್ಲ ನಮ್ಮ ಒಳಿತಿಗಾಗಿ ಕಟ್ಟಳೆಯಿಟ್ಟವುಗಳನ್ನು ನಡೆಸಲಿಲ್ಲ.
8 : ನೀವು ನಮ್ಮ ಮೇಲೆ ಬರಮಾಡಿರುವುದೆಲ್ಲವೂ ನಮಗೆ ವಿಧಿಸಿದ ಪ್ರತಿಯೊಂದು ಶಿಕ್ಷೆಯೂ ಯಥಾರ್ಥವಾಗಿಯೇ ಇವೆ.
9 : ಧರ್ಮಹೀನರಾದ ವೈರಿಗಳ ಕೈಗೆ ಅತ್ಯಂತ ನಾಸ್ತಿಕರಾದವರ ಕೈಗೆ ನಮ್ಮನ್ನು ಒಪ್ಪಿಸಿಬಿಟ್ಟಿದ್ದೀರಿ. ಜಗದಲ್ಲೇ ದುಷ್ಟನೂ ಅನೀತಿವಂತನೂ ಆದವನ ಕೈಗೆ ನಮ್ಮನ್ನು ಕೊಟ್ಟಿದ್ದೀರಿ.
10 : ನಿಮ್ಮ ಶರಣರೂ ಭಕ್ತರೂ ಆದ ನಮಗೆ ನಾಚಿಕೆ, ನಿಂದೆ, ಅವಮಾನಗಳು ಕವಿದಿವೆ, ನಾವೀಗ ಬಾಯಿ ಮುಚ್ಚಿಕೊಳ್ಳಬೇಕಾಗಿದೆ.
11 : ಆದರೂ ನಿಮ್ಮ ನಾಮದ ಪ್ರಯುಕ್ತ ನಮ್ಮನ್ನು ಎಂದೆಂದಿಗೂ ತ್ಯಜಿಸಬೇಡಿ, ನಿಮ್ಮ ಒಡಂಬಡಿಕೆಯನ್ನು ರದ್ದುಗೊಳಿಸಬೇಡಿ.
12 : ನಿಮ್ಮ ಮಿತ್ರ ಅಬ್ರಹಾಮನ ನಿಮಿತ್ತ ನಿಮ್ಮ ದಾಸ ಇಸಾಕನ, ನಿಮ್ಮ ಭಕ್ತ ಯಕೋಬನ ಪ್ರಯುಕ್ತ ನಿಮ್ಮ ಕೃಪೆ ನಮ್ಮನ್ನು ಬಿಟ್ಟಗಲದಿರಲಿ.
13 : ಇವರಿಗೆ, “ನಿಮ್ಮ ಸಂತಾನವನ್ನು ಆಕಾಶದ ನಕ್ಷತ್ರಗಳಂತೆ ಸಮುದ್ರ ತೀರದ ಮರಳಿನಂತೆ ಅಸಂಖ್ಯವಾಗಿಸುವೆ” ಎಂದು ನೀವು ವಾಗ್ದಾನ ಮಾಡಿದಿರಲ್ಲವೆ?
14 : ಒಡೆಯಾ, ಉಳಿದ ರಾಷ್ಟ್ರಗಳಿಗಿಂತ ನಾವು ಕನಿಷ್ಟರಾಗಿಬಿಟ್ಟೆವು, ನಮ್ಮ ಪಾಪಗಳ ಕಾರಣ ಜಗದಲ್ಲಿನ ಹೀನಸ್ಥಿತಿಗೆ ಇಳಿದುಬಿಟ್ಟೆವು.
15 : ನಮಗೀಗ ರಾಜರಿಲ್ಲ, ಪ್ರವಾದಿಗಳಿಲ್ಲ, ನಾಯಕರಿಲ್ಲ; ಹೋಮವಿಲ್ಲ, ಬಲಿದಾನವಿಲ್ಲ, ನೈವೇದ್ಯವಿಲ್ಲ, ಧೂಪವಿಲ್ಲ. ಕಾಣಿಕೆಯನ್ನರ್ಪಿಸಿ ನಿಮ್ಮ ಕೃಪೆ ಪಡೆಯಲು ಸ್ಥಳವೂ ಇಲ್ಲ;
16 : ಆದರೂ ಪಶ್ಚಾತ್ತಾಪದ ಹೃದಯ, ದೀನಮನ ನಿಮಗೆ ಅಂಗೀಕೃತವಾಗಲಿ.
17 : ಹೋತಹೋರಿಗಳ, ಸಾವಿರಾರು ಕೊಬ್ಬಿದ ಕುರಿಮರಿಗಳ ದಹನಬಲಿದಾನದಂತೆ ನಮ್ಮೀ ಅಂತರಂಗದ ಬಲಿ ನಿಮಗಿಂದು ಅಂಗೀಕೃತವಾಗಲಿ. ಪೂರ್ಣ ಹೃದಯದಿಂದ ನಾವು ನಿಮ್ಮನ್ನು ಹಿಂಬಾಲಿಸುವಂತೆ ಅನುಗ್ರಹಿಸಿರಿ. ಏಕೆಂದರೆ ನಿಮ್ಮಲ್ಲಿ ನಂಬಿಕೆಯಿಡುವವರಿಗೆ ಆಶಾಭಂಗವಾಗುವುದಿಲ್ಲ.
18 : ಪೂರ್ಣ ಹೃದಯದಿಂದ ನಿಮ್ಮನ್ನೀಗ ಹಿಂಬಾಲಿಸುತ್ತೇವೆ ನಿಮ್ಮಲ್ಲಿ ಭಯಭಕ್ತಿಯಿಡುತ್ತೇವೆ ನಿಮ್ಮ ಸನ್ನಿಧಿಯನ್ನು ಮತ್ತೆ ಅರಸುತ್ತೇವೆ.
19 : ನಮ್ಮನ್ನು ನಿರಾಶೆಗೊಳಿಸಬೇಡಿ ನಿಮ್ಮ ಸೈರಣೆಗೆ ತಕ್ಕಂತೆ, ನಿಮ್ಮ ಕೃಪಾತಿಶಯದ ಪ್ರಕಾರ ನಮ್ಮ ಸಂಗಡ ವರ್ತಿಸಿ.
20 : ಸರ್ವೇಶ್ವರಾ, ನಿಮ್ಮ ಮಹತ್ಕಾರ್ಯಗಳ ಮೂಲಕ ನಮ್ಮನ್ನು ಬಿಡುಗಡೆಮಾಡಿ ನಿಮ್ಮ ಹೆಸರಿಗೆ ಹೊಸ ಕೀರ್ತಿ ಬರುವಂತೆ ಮಾಡಿ ನಿಮ್ಮ ದಾಸರಾದ ನಮಗೆ ಕೇಡು – ಬಗೆಯುವರೆಲ್ಲರು ವಿಸ್ಮಯಗೊಳ್ಳುವಂತೆ ಮಾಡಿ.
21 : ಅವರು ತಮ್ಮ ಶಕ್ತಿಸಾಮಥ್ರ್ಯವನ್ನು ಕುರಿತು ನಾಚಿಕೆಪಡಲಿ ಅವರ ಬಲ ಕುಂದಿಹೋಗಲಿ.
22 : ನೀವೇ ಅದ್ವಿತೀಯ ದೇವರು ವಿಶ್ವವ್ಯಾಪ್ತ ಮಹಿಮೆಯುಳ್ಳ ಸರ್ವೇಶ್ವರ ಎಂಬುದನ್ನು ಅವರು ಅರಿತುಕೊಳ್ಳಲಿ.
23 : ಅವರನ್ನು ಆವಿಗೆಯೊಳಗೆ ಹಾಕಿದ ಅರಸನ ಸೇವಕರು ಬೆಂಕಿಗೆ ಕಲ್ಲೆಣ್ಣೆ, ರಾಳ, ಸೆಣಬು, ಚಕ್ಕೆಗಳನ್ನು ಹಾಕಿ ಅದು ಹೆಚ್ಚುಹೆಚ್ಚಾಗಿ ಉರಿಯುವಂತೆ ಮಾಡುವುದನ್ನು ನಿಲ್ಲಿಸಲಿಲ್ಲ.
24 : ಆದುದರಿಂದ ಜ್ವಾಲೆ ಆವಿಗೆಯ ಮೇಲೆ ನಾಲ್ವತ್ತೊಂಬತ್ತು ಮೊಳ ಮೇಲಕ್ಕೇರಿತ್ತು.
25 : ಅದು ಹರಡಿಕೊಂಡು ಆವಿಗೆಯ ಸುತ್ತಲಿದ್ದ ಬಾಬಿಲೋನಿಯರನ್ನೆಲ್ಲ ಸುಟ್ಟು ಭಸ್ಮಮಾಡಿತು.
26 : ಆದರೆ ಸರ್ವೇಶ್ವರನ ದೂತನು ಆವಿಗೆಯೊಳಗೆ ಇಳಿದು ಬಂದು, ಅಜರ್ಯ ಮತ್ತು ಅವನ ಸಂಗಡಿಗರ ಪಕ್ಕದಲ್ಲೇ ನಿಂತನು.
27 : ಅಗ್ನಿಜ್ವಾಲೆಯನ್ನು ಅವಿಗೆಯ ಹೊರಗೆ ಹೊಡೆದು ಅದರ ನಡುವೆ ತಣ್ಣಗಿರುವ ಸಿಳ್ಳುಗಾಳಿ ಬೀಸುವಂತೆ ಮಾಡಿದನು. ಈ ಕಾರಣ ಬೆಂಕಿಯ ಉರಿ ಅವರನ್ನು ಸೋಂಕಲಿಲ್ಲ; ಅವರಿಗೆ ಯಾವ ಹಾನಿಯಾಗಲಿ, ಕಷ್ಣವಾಗಲಿ ಉಂಟಾಗಲಿಲ್ಲ.
28 : ಆ ಮೂವರು ಯುವಕರು ಆವಿಗೆಯಿಂದಲೆ ದೇವರ ಗುಣಗಾನ ಮಾಡುತ್ತಾ, ಹೊಗಳುತ್ತಾ ಹೀಗೆಂದು ಸ್ತುತಿಸಿದರು:
29 : ನಮ್ಮ ಪೂರ್ವಜರ ದೇವರಾದ ಸರ್ವೇಶ್ವರಾ, ನೀವು ಪರಮಪೂಜ್ಯರು, ಎಂದೆಂದಿಗೂ ಮಹೋನ್ನತರು.
30 : ಮಹಿಮಾಯುತವಾದ ನಿಮ್ಮ ನಾಮ ಸ್ತುತ್ಯಾರ್ಹವಾದುದು, ಪರಮಪೂಜ್ಯವಾದುದು, ಎಂದೆಂದಿಗೂ ಮಹಾ ಘನತರವಾದುದು.
31 : ಪರಮ ವೈಭವದಿಂದ ಕೂಡಿದ ಮಂದಿರದಲ್ಲಿ ನೀವು ಸ್ತುತಿಸ್ತೋತ್ರಕ್ಕೆ ಪಾತ್ರರು: ನೀವು ಪರಮಪೂಜ್ಯರು, ಎಂದೆಂದಿಗೂ ಮಹೋನ್ನತರು.
32 : ಸಾಗರಾಧಿಗಳನ್ನು ಸಮೀಕ್ಷಿಸುವ ನಿಮಗೆ ಸ್ತೋತ್ರ! ಕೆರೂಬಿಗಳ ಮೇಲೆ ಆಸೀನರಾಗಿರುವ ನಿಮಗೆ ಸ್ತೋತ್ರ! ನೀವು ಪರಮ ಪೂಜ್ಯರು, ಎಂದೆಂದಿಗೂ ಮಹೋನ್ನತರು.
33 : ನಿಮ್ಮ ಸಾಮ್ರಾಜ್ಯದ ಸಿಂಹಾಸನದ ಮೇಲೆ ಮಂಡಿಸಿರುವ ನಿಮಗೆ ಸ್ತೋತ್ರ: ನೀವು ಪರಮ ಪೂಜ್ಯರು, ಎಂದೆಂದಿಗೂ ಮಹೋನ್ನತರು.
34 : ಗಗನ ಮಂಡಲದಲ್ಲಿ ಸ್ತೋತ್ರಪಾತ್ರರು: ನೀವು ಸ್ತುತ್ಯರು, ಎಂದೆಂದಿಗೂ ಮಹಿಮಾನ್ವಿತರು.
35 : ಸರ್ವೇಶ್ವರನ ಸಕಲ ಸೃಷ್ಟಿಗಳೇ, ಸರ್ವೇಶ್ವರನನ್ನು ಕೊಂಡಾಡಿ, ಅವರನ್ನು ಸ್ತುತಿಸಿ ಸದಾ ಸಂಕೀರ್ತಿಸಿ.
36 : ದೇವರ ದಿವ್ಯದೂತರೇ, ಸರ್ವೇಶ್ವರನನ್ನು ಕೊಂಡಾಡಿ, ಅವರನ್ನು ಸ್ತುತಿಸಿ ಸದಾ ಸಂಕೀರ್ತಿಸಿ.
37 : ಆಕಾಶಗಳೇ, ಸರ್ವೇಶ್ವರನನ್ನು ಕೊಂಡಾಡಿ, ಅವರನ್ನು ಸ್ತುತಿಸಿ ಸದಾ ಸಂಕೀರ್ತಿಸಿ.
38 : ಆಕಾಶದ ಮೇಲಿರುವ ಸಕಲ ಜಲರಾಶಿಗಳೇ, ಸರ್ವೇಶ್ವರನನ್ನು ಕೊಂಡಾಡಿ, ಅವರನ್ನು ಸ್ತುತಿಸಿ ಸದಾ ಸಂಕೀರ್ತಿಸಿ.
39 : ಸರ್ವೇಶ್ವರನ ಸಕಲ ಶಕ್ತಿಗಳೇ, ಸರ್ವೇಶ್ವರನನ್ನು ಕೊಂಡಾಡಿ, ಅವರನ್ನು ಸ್ತುತಿಸಿ ಸದಾ ಸಂಕೀರ್ತಿಸಿ.
40 : ಸೂರ್ಯಚಂದ್ರರೇ, ಸರ್ವೇಶ್ವರನನ್ನು ಕೊಂಡಾಡಿ, ಅವರನ್ನು ಸ್ತುತಿಸಿ ಸದಾ ಸಂಕೀರ್ತಿಸಿ.
41 : ಆಕಾಶಮಂಡಲದಲ್ಲಿರುವ ನಕ್ಷತ್ರಗಳೇ, ಸರ್ವೇಶ್ವರನನ್ನು ಕೊಂಡಾಡಿ, ಅವರನ್ನು ಸ್ತುತಿಸಿ ಸದಾ ಸಂಕೀರ್ತಿಸಿ.
42 : ಮಳೆಮಂಜುಗಳೇ, ಸರ್ವೇಶ್ವರನನ್ನು ಕೊಂಡಾಡಿ, ಅವರನ್ನು ಸ್ತುತಿಸಿ ಸದಾ ಸಂಕೀರ್ತಿಸಿ.
43 : ಗಾಳಿಬಿರುಗಾಳಿಗಳೇ, ಸರ್ವೇಶ್ವರನನ್ನು ಕೊಂಡಾಡಿ, ಅವರನ್ನು ಸ್ತುತಿಸಿ ಸದಾ ಸಂಕೀರ್ತಿಸಿ.
44 : ಬೆಂಕಿ ಝಳಗಳೇ, ಸರ್ವೇಶ್ವರನನ್ನು ಕೊಂಡಾಡಿ, ಅವರನ್ನು ಸ್ತುತಿಸಿ ಸದಾ ಸಂಕೀರ್ತಿಸಿ.
45 : ಶೀತೋಷ್ಣಗಳೇ, ಸರ್ವೇಶ್ವರನನ್ನು ಕೊಂಡಾಡಿ, ಅವರನ್ನು ಸ್ತುತಿಸಿ ಸದಾ ಸಂಕೀರ್ತಿಸಿ.
46 : ಇಬ್ಬನಿ, ಹಿಮಪಾತಳೇ, ಸರ್ವೇಶ್ವರನನ್ನು ಕೊಂಡಾಡಿ, ಅವರನ್ನು ಸ್ತುತಿಸಿ ಸದಾ ಸಂಕೀರ್ತಿಸಿ.
47 : ಚಳಿ ಬೇಸಿಗೆಗಳೇ, ಸರ್ವೇಶ್ವರನನ್ನು ಕೊಂಡಾಡಿ, ಅವರನ್ನು ಸ್ತುತಿಸಿ ಸದಾ ಸಂಕೀರ್ತಿಸಿ.
48 : ಮಂಜು ಹಿಮಗಡ್ಡೆಗಳೇ, ಸರ್ವೇಶ್ವರನನ್ನು ಕೊಂಡಾಡಿ, ಅವರನ್ನು ಸ್ತುತಿಸಿ ಸದಾ ಸಂಕೀರ್ತಿಸಿ.
49 : ಹಗಲು ಇರುಳುಗಳೇ, ಸರ್ವೇಶ್ವರನನ್ನು ಕೊಂಡಾಡಿ, ಅವರನ್ನು ಸ್ತುತಿಸಿ ಸದಾ ಸಂಕೀರ್ತಿಸಿ.
50 : ಬೆಳಕು ಕತ್ತಲುಗಳೇ, ಸರ್ವೇಶ್ವರನನ್ನು ಕೊಂಡಾಡಿ, ಅವರನ್ನು ಸ್ತುತಿಸಿ ಸದಾ ಸಂಕೀರ್ತಿಸಿ.
51 : ಮಿಂಚು ಮೋಡಗಳೇ, ಸರ್ವೇಶ್ವರನನ್ನು ಕೊಂಡಾಡಿ, ಅವರನ್ನು ಸ್ತುತಿಸಿ ಸದಾ ಸಂಕೀರ್ತಿಸಿ.
52 : ಧರಣಿಮಂಡಲವು ಸರ್ವೇಶ್ವರನನ್ನು ಕೊಂಡಾಡಿ, ಅವರನ್ನು ಸ್ತುತಿಸಿ ಸದಾ ಸಂಕೀರ್ತಿಸಿ.
53 : ಬೆಟ್ಟಗುಡ್ಡಗಳೇ, ಸರ್ವೇಶ್ವರನನ್ನು ಕೊಂಡಾಡಿ, ಅವರನ್ನು ಸ್ತುತಿಸಿ ಸದಾ ಸಂಕೀರ್ತಿಸಿ.
54 : ಇಳೆಯಲ್ಲಿ ಬೆಳೆಯುವ ಎಲ್ಲಾ ಗಿಡಮರಗಳೇ, ಸರ್ವೇಶ್ವರನನ್ನು ಕೊಂಡಾಡಿ, ಅವರನ್ನು ಸ್ತುತಿಸಿ ಸದಾ ಸಂಕೀರ್ತಿಸಿ.
55 : ಕಡಲು ಹೊಳೆಗಳೇ, ಸರ್ವೇಶ್ವರನನ್ನು ಕೊಂಡಾಡಿ, ಅವರನ್ನು ಸ್ತುತಿಸಿ ಸದಾ ಸಂಕೀರ್ತಿಸಿ.
56 : ಬುಗ್ಗೆ ಚಿಲುಮೆಗಳೇ, ಸರ್ವೇಶ್ವರನನ್ನು ಕೊಂಡಾಡಿ, ಅವರನ್ನು ಸ್ತುತಿಸಿ ಸದಾ ಸಂಕೀರ್ತಿಸಿ.
57 : ಜಲಚರಗಳೇ, ತಿಮಿಂಗಿಲಗಳೇ, ಸರ್ವೇಶ್ವರನನ್ನು ಕೊಂಡಾಡಿ, ಅವರನ್ನು ಸ್ತುತಿಸಿ ಸದಾ ಸಂಕೀರ್ತಿಸಿ.
58 : ಆಕಾಶದ ಪಕ್ಷಿಗಳೇ, ಸರ್ವೇಶ್ವರನನ್ನು ಕೊಂಡಾಡಿ, ಅವರನ್ನು ಸ್ತುತಿಸಿ ಸದಾ ಸಂಕೀರ್ತಿಸಿ.
59 : ಕಾಡು ಮೃಗಗಳೇ, ದನಕರುಗಳೇ ಸರ್ವೇಶ್ವರನನ್ನು ಕೊಂಡಾಡಿ, ಅವರನ್ನು ಸ್ತುತಿಸಿ ಸದಾ ಸಂಕೀರ್ತಿಸಿ.
60 : ಮಾನವ ಜನಾಂಗಗಳೇ, ಸರ್ವೇಶ್ವರನನ್ನು ಕೊಂಡಾಡಿ, ಅವರನ್ನು ಸ್ತುತಿಸಿ ಸದಾ ಸಂಕೀರ್ತಿಸಿ.
61 : ಇಸ್ರಯೇಲ್ ನಾಡೇ, ಸರ್ವೇಶ್ವರನನ್ನು ಕೊಂಡಾಡಿ, ಅವರನ್ನು ಸ್ತುತಿಸಿ ಸದಾ ಸಂಕೀರ್ತಿಸಿ.
62 : ಸರ್ವೇಶ್ವರನ ಯಾಜಕರೇ, ಸರ್ವೇಶ್ವರನನ್ನು ಕೊಂಡಾಡಿ, ಅವರನ್ನು ಸ್ತುತಿಸಿ ಸದಾ ಸಂಕೀರ್ತಿಸಿ.
63 : ಸರ್ವೇಶ್ವರನ ದಾಸರೇ, ಸರ್ವೇಶ್ವರನನ್ನು ಕೊಂಡಾಡಿ, ಅವರನ್ನು ಸ್ತುತಿಸಿ ಸದಾ ಸಂಕೀರ್ತಿಸಿ.
64 : ಸಜ್ಜನರ ಜೀವಾತ್ಮಗಳೇ, ಸರ್ವೇಶ್ವರನನ್ನು ಕೊಂಡಾಡಿ, ಅವರನ್ನು ಸ್ತುತಿಸಿ ಸದಾ ಸಂಕೀರ್ತಿಸಿ.
65 : ಸಂತರೇ, ದೀನಮನಸ್ಕರೇ, ಸರ್ವೇಶ್ವರನನ್ನು ಕೊಂಡಾಡಿ, ಅವರನ್ನು ಸ್ತುತಿಸಿ ಸದಾ ಸಂಕೀರ್ತಿಸಿ.
66 : ಹನನ್ಯ, ಅಜರ್ಯ, ಮಿಶಾಯೇಲರೇ ಸರ್ವೇಶ್ವರನನ್ನು ಕೊಂಡಾಡಿ, ಅವರನ್ನು ಸ್ತುತಿಸಿ ಸದಾ ಸಂಕೀರ್ತಿಸಿ. ಏಕೆಂದರೆ ಅವರು ಪಾತಾಳದಿಂದ ನಮ್ಮನ್ನು ಬಿಡುಗಡೆ ಮಾಡಿದ್ದಾರೆ; ಮರಣದ ಹಿಡಿತದಿಂದ ತಪ್ಪಿಸಿದ್ದಾರೆ; ಆವಿಗೆಯ ಮಧ್ಯೆಯಿಂದ, ಉರಿಯುವ ಜ್ವಾಲೆಯಿಂದ, ಹೌದು, ಬೆಂಕಿಯ ಒಡಲೊಳಗಿಂದ ನಮ್ಮನ್ನು ಬಿಡಿಸಿ ರಕ್ಷಿಸಿದ್ದಾರೆ.
67 : ಸರ್ವೇಶ್ವರಸ್ವಾಮಿಗೆ ಧನ್ಯವಾದ ಸಲ್ಲಿಸಿ! ಅವರು ಒಳ್ಳೆಯವರು, ಅವರ ಪ್ರೀತಿ ಶಾಶ್ವತ!
68 : ಸರ್ವೇಶ್ವರನನ್ನು ಆರಾಧಿಸುವವರೇ, ದೇವಾದಿದೇವರನ್ನು ಕೊಂಡಾಡಿ, ಅವರನ್ನು ಕೀರ್ತಿಸಿ, ಅವರಿಗೆ ಕೃತಜ್ಞತಾಸ್ತುತಿಗೈಯಿರಿ. ಅವರ ಪ್ರೀತಿ ಅನವರತ!