ಕನ್ನಡ ಕಥೋಲಿಕ ಬೈಬಲ್
1 : ಸುಜ್ಞಾನವೇ ದೈವಾಜ್ಞೆಗಳ ಗ್ರಂಥ
ಸದಾಕಾಲಕ್ಕೂ ಸ್ಥಿರವಾದ ಧರ್ಮಶಾಸ್ತ್ರ.
ಪಡೆಯುವರು ಸಜೀವ ಅದನ್ನು
ಪ್ರಾಮಾಣಿಕವಾಗಿ ಪಾಲಿಸುವವರು;
ಅದನ್ನು ಬಿಟ್ಟುಬಿಡುವವರು ಸಾಯುವರು.
2 : ಇಸ್ರಯೇಲೇ, ಹಿಂದಿರುಗಿ ಬಾ, ಸುಜ್ಞಾನವನ್ನು
ಸ್ವೀಕರಿಸು,
ಅದರ ಪ್ರಕಾಶದಲ್ಲಿ ಬೆಳಕಿನತ್ತ ಪ್ರವರ್ಧಿಸು.
3 : ನಿನ್ನ ಗೌರವವನ್ನು ಇನ್ನೊಬ್ಬನಿಗೆ
ಸಲ್ಲಗೊಡಬೇಡ
ನಿನ್ನ ಸೌಲಭ್ಯಗಳನ್ನು ಅನ್ಯಜನರಿಗೆ
ಬಿಟ್ಟುಬಿಡಬೇಡ.
4 : ಇಸ್ರಯೇಲೇ, ನಾವು ಧನ್ಯರು !
ದೇವರಿಗೆ ಪ್ರಿಯವಾದುದು ನಮಗೆ
ಬಯಲಾಗಿರುವುದು.
ಜೆರುಸಲೇಮಿನ ವಿಲಾಪ ಹಾಗು ಸಾಂತ್ವನ
5 : ನನ್ನ ಜನರೇ, ಧೈರ್ಯದಿಂದಿರಿ
ಇಸ್ರಯೇಲಿನ ಹೆಸರನ್ನು ನೀವು ಉಳಿಸಬಲ್ಲಿರಿ.
6 : ನೀವು ಅನ್ಯರಾಷ್ಟ್ರಗಳಿಗೆ ಮಾರಲ್ಪಟ್ಟಿರುವುದು
ವಿನಾಶಕ್ಕಾಗಿ ಅಲ್ಲ
ನೀವು ಶತ್ರುಗಳ ವಶವಾಗಿರುವುದು
ದೇವರನ್ನು ಸಿಟ್ಟಿಗೆಬ್ಬಿಸಿದ್ದರಿಂದ;
7 : ದೇವರನ್ನು ತೊರೆದು ದೆವ್ವಗಳಿಗೆ
ಬಲಿಯರ್ಪಿಸಿದ್ದರಿಂದ
ನಿಮ್ಮ ಸೃಷ್ಟಿಕರ್ತನ ಕೋಪವನ್ನು
ಕೆರಳಿಸಿದ್ದರಿಂದ;
8 : ನಿಮ್ಮನ್ನು ಸಾಕಿಸಲಹಿದ ನಿತ್ಯದೇವರನ್ನು
ಮರೆತದ್ದರಿಂದ
ನಿಮ್ಮನ್ನು ಪೋಷಿಸಿದ ಮಾತೆ ಜೆರುಸಲೇಮನ್ನು
ನೋಯಿಸಿದ್ದರಿಂದ.
9 : ನಿಮ್ಮ ಮೇಲೆ ಎರಗಲಿದ್ದ ದೇವಕೋಪವನ್ನು
ಆಕೆ ಹೀಗೆಂದು ಬಣ್ಣಿಸಿದಳು:
10 : ‘ಸಿಯೋನಿನ ನೆರೆಹೊರೆಯಲ್ಲಿ ವಾಸಿಸಿದವರೇ
ಕೇಳಿ:
ದೇವರು ನನ್ನ ಮೇಲೆ ಬರಮಾಡಿದ್ದಾರೆ
ಮಹಾಕಸ್ತಿ
ಶಾಶ್ವತರಾದ ದೇವರು ನನ್ನ ಪುತ್ರಪುತ್ರಿಯರ
ಮೇಲೆ
ಬರಮಾಡಿರುವ ಗಡೀಪಾರನ್ನು ನಾನು
ಅರಿತಿರುವೆ.
11 : ಮುದದಿಂದ ನಾನಿವರನ್ನು ಸಲಹಿದೆ
ದುಃಖದಿಂದ ಕಣ್ಣೀರಿಡುತ್ತಾ ಕಳುಹಿಸಿಕೊಟ್ಟೆ.
12 : ನಾನೊಬ್ಬ ವಿಧವೆ, ಹಲವರಿಂದ ನಿರಾಕೃತಳು
ನನ್ನನ್ನು ನೋಡಿ ಯಾರೂ ಆನಂದಿಸಬಾರದು:
ದೇವರ ಧರ್ಮಶಾಸ್ತ್ರವನ್ನು ಬಿಟ್ಟು ನನ್ನ
ಮಕ್ಕಳು ದೂರಸರಿದರು
ಅವರ ಪಾಪಕೃತ್ಯಗಳ ನಿಮಿತ್ತ ನಾನು
ಹಾಳುಬೀಳಬೇಕಾಯಿತು.
13 : ದೇವರ ನಿಬಂಧನೆಗಳನ್ನು ಅವರು
ಗಮನಕ್ಕೆ ತಂದುಕೊಳ್ಳಲಿಲ್ಲ
ದೇವರ ಆಜ್ಞಾಮಾರ್ಗವನ್ನು ಕೈಗೊಳ್ಳಲಿಲ್ಲ
ಅವರ ರಕ್ಷಣಾಪಥದಲ್ಲಿ ನಡೆಯಲಿಲ್ಲ.
14 : ಸಿಯೋನಿನ ನೆರೆಹೊರೆಯವರೇ, ಬನ್ನಿ
ನಿತ್ಯದೇವರಿಂದ ನನ್ನ ಮಕ್ಕಳು
ಗಡೀಪಾರಾದುದನ್ನು ನೆನಪಿಗೆ ತಂದುಕೊಳ್ಳಿ.
15 : ಅವರಿಗೆ ವಿರುದ್ಧ ಒಂದು ರಾಷ್ಟ್ರವನ್ನಾತ
ಬರಮಾಡಿದ
ಅದು ಅನ್ಯಭಾಷೆಯನ್ನಾಡುವ ಮಾನಹೀನ
ಜನಾಂಗ
ವೃದ್ಧರಿಗೆ ಮರ್ಯಾದೆತೋರದ,
ಮಕ್ಕಳಿಗೂ ಕನಿಕರಿಸದ ಜನ.
16 : ವಿಧವೆಯ ಮುದ್ದುಮಕ್ಕಳನ್ನು ಎಳೆದೊಯ್ದರು
ಅವಳ ಪುತ್ರಿಯರನ್ನು ಕಿತ್ತುಕೊಂಡುಹೋದರು
ಅವಳನ್ನು ಒಬ್ಬಂಟಿಗಳನ್ನಾಗಿ ಬಿಟ್ಟು
ತೆರಳಿದರು.
17 : ನಾನಾದರೋ, ನಿಮಗೆ ಹೇಗೆ ತಾನೆ ನೀಡಲಿ
ನೆರವು?
18 : ಈ ಸಂಕಟ ಬರಮಾಡಿದಾತನೇ ಬಿಡಿಸುವನು
ವೈರಿಯಿಂದ ನಿಮ್ಮನು.
19 : ಹೋಗಿ, ಮಕ್ಕಳೇ, ನಿಮ್ಮ ಹಾದಿಹಿಡಿದು
ಹೋಗಿ
ನಾನು ಉಳಿದಿದ್ದೇನೆ ಜನಶೂನ್ಯಳಾಗಿ.
20 : ಶಾಂತಿಸಮಾಧಾನದ ಉಡುಪನ್ನು ತೆಗೆದಿಟ್ಟು
ಉಟ್ಟುಕೊಂಡಿದ್ದೇನೆ ಗೋಣಿತಟ್ಟು
ನಿತ್ಯನಿಗೆ ಮೊರೆಯಿಡುವೆ ಬದುಕಿರುವಷ್ಟು
ಕಾಲವು.
21 : ಮಕ್ಕಳೇ, ದೇವರಿಗೆ ಮೊರೆಯಿಡಿ,
ಇರಿ ಧೈರ್ಯದಿಂದ
ಆತನೇ ಬಿಡಿಸುವನು ವೈರಿಯ ಕೈಯಿಂದ,
ದಬ್ಬಳಿಕೆಯಿಂದ.
22 : ಅನಂತ ದೇವರು ನಿಮ್ಮನ್ನು ರಕ್ಷಿಸುವ ನಂಬಿಕೆ
ನನಗಿದೆ
ನಿಮ್ಮ ಉದ್ಧಾರಕರಾದ ಆ ನಿತ್ಯದೇವರ ಕರುಣೆ
ಬರಲಿದೆ ಇಷ್ಟರಲ್ಲೆ ನಿಮಗೆ
ಎಂತಲೇ, ಆ ಪರಮಪಾವನ ಸ್ವಾಮಿಯಿಂದ
ಸಂತೋಷವುಂಟಾಗಿದೆ ನನಗೆ.
23 : ಸಂಕಟದಿಂದ, ಕಣ್ಣೀರಿನಿಂದ ನಾ ನಿಮ್ಮನ್ನು
ಕಳುಹಿಸಿದೆ
ಹರ್ಷೋಲ್ಲಾಸದಿಂದ ದೇವರು ನಿಮ್ಮನ್ನೆ
ನನಗೆ ಕೊಡುವರು ಸದಾಕಾಲಕ್ಕೆ.
25 : ನೀವು ಗಡೀಪಾರಾದುದನ್ನು ಸಿಯೋನಿನ
ನೆರೆಯವರು ನೋಡಿದರು.
ಅಂತೆಯೇ ದೇವರು ನಿಮಗೆ ನೀಡುವ
ಉದ್ಧಾರವನ್ನು ಬೇಗನೆ ನೋಡುವರು.
ಅದು ಮಹಾಪ್ರಭಾವದಿಂದ, ನಿತ್ಯಪ್ರಕಾಶದಿಂದ
ನಿಮ್ಮ ಮೇಲೆ ಬರುವುದು.
25 : ಮಕ್ಕಳೇ, ದೇವರಿಂದ ಬಂದಿರುವ ಕೋಪವನು
ತಾಳ್ಮೆಯಿಂದ ಸಹಿಸಿಕೊಳ್ಳಿ
ನಿಮ್ಮನ್ನು ಹಿಂಸಿಸಿದ ವೈರಿಯ ವಿನಾಶವನ್ನು
ಬೇಗನೆ ನೋಡುವಿರಿ
ಅವನ ಕುತ್ತಿಗೆಯ ಮೇಲೆ ನೀವು ಕಾಲನ್ನಿಟ್ಟು
ತುಳಿಯುವಿರಿ.
26 : ನನ್ನ ಹಸುಳೆಗಳು ಕಾಡುದಾರಿಯಲ್ಲಿ ನಡೆದು
ಹೋಗಿರುವರು
ಹಿಂಡನ್ನೋ ಎಂಬಂತೆ ಶತ್ರುಗಳು ಅವರನ್ನು
ಅಟ್ಟಿಕೊಂಡು ಹೋದರು.
27 : ಮಕ್ಕಳೇ, ಧೈರ್ಯದಿಂದಿರಿ,
ಮೊರೆಯಿಡಿ ದೇವರಿಗೆ;
ಇದನ್ನೆಲ್ಲಾ ಬರಮಾಡಿದಾತ
ತಂದುಕೊಳ್ಳುವನು ನಿಮ್ಮನ್ನು ನೆನಪಿಗೆ.
28 : ದೇವರಿಗೆ ವಿಮುಖರಾಗಲು ಮನಸ್ಸು
ಮಾಡಿದಿರಿ
ಈಗ ಅವರಿಗೆ ಅಭಿಮುಖರಾಗಲು ಹತ್ತರಷ್ಟು
ಮನಸ್ಸುಮಾಡಿರಿ.
29 : ನಿಮಗೆ ಈ ವಿಪತ್ತನ್ನು ಬರಮಡಿದಾತನು
ನಿಮ್ಮ ಉದ್ಧಾರದೊಂದಿಗೆ ಶಾಶ್ವತ
ಸಂತಸವನ್ನುಂಟುಮಾಡುವನು.
ಜೆರುಸಲೇಮಿಗೆ ಸಹಾಯ ನಿಶ್ಚಯ
30 : ಜೆರುಸಲೇಮೇ, ಧೈರ್ಯದಿಂದಿರು
ನಿನ್ನನ್ನು ಹೆಸರಿಸಿದಾತ ನಿನಗೆ ಆದರಣೆ
ನೀಡುವನು.
31 : ನಿನಗೆ ಕಷ್ಟಕೊಟ್ಟವಳಿಗೆ, ನಿನ್ನ ಪತನದಲ್ಲಿ
ಹಿಗ್ಗಿದವಳಿಗೆ, ಇರಲಿ ಧಿಕ್ಕಾರ!
32 : ನಿನ್ನ ಮಕ್ಕಳನ್ನು ಕರೆದುಕೊಂಡವಳಿಗೆ,
ಗುಲಾಮರಾಗಿಸಿಕೊಂಡವಳಿಗೆ ಧಿಕ್ಕಾರ!
33 : ನಿನ್ನ ಪತನದಲ್ಲಿ ಉಲ್ಲಾಸಪಟ್ಟವಳು,
ನಿನ್ನ ಅಧೋಗತಿಯಲಿ ಹಿಗ್ಗಿದವಳು
ತನ್ನ ಅಳಿವಿಗಾಗಿ ವ್ಯಥೆಪಡಬೇಕಾಗುವುದು.
34 : ತನ್ನ ಜನಸಂಖ್ಯೆಯಲ್ಲಿ ಹೆಚ್ಚಳಪಟ್ಟವಳ
ಆನಂದವನ್ನು ತೆಗೆದುಬಿಡುವೆನು
ಅವಳ ಅಹಂಕಾರ ಗೋಳಾಟವಾಗಿ
ಮಾರ್ಪಡುವುದು.
35 : ಅವಳ ಮೇಲೆ ಬೆಂಕಿಯನ್ನು ಸುರಿಸುವನು
ನಿತ್ಯವಾಗಿರುವಾತ
ಅದು ಉರಿಯುತ್ತಲೇ ಇರುವುದು ಅಲ್ಲಿ
ಬಹುಕಾಲ,
ದೆವ್ವಗಳು ಬಂದು ನೆಲಸುವುವು ಅಲ್ಲಿ ಚಿರಕಾಲ.
36 : ಜೆರುಸಲೇಮೇ, ಪೂರ್ವಾಭಿಮುಖವಾಗಿ
ನೋಡು
ದೇವರಿಂದ ನಿನಗುಂಟಾಗುವ ಆನಂದವನ್ನು
ನಿರೀಕ್ಷಿಸು.
37 : ನೀನು ಒಮ್ಮೆ ಬೀಳ್ಕೊಟ್ಟ ನಿನ್ನ ಮಕ್ಕಳು
ಬರುವುದನ್ನು ನೋಡು
ಪರಮಪಾವನನು ನುಡಿದಂತೆ ಪೂರ್ವದಿಂದ
ಪಶ್ಚಿಮದವರೆಗೂ
ಅವರು ಕೂಡಿಬರುವರು, ದೇವರ ಪ್ರಭಾವದಲ್ಲಿ
ಹಿಗ್ಗುತಾ ಬರುವರು.