ಕನ್ನಡ ಕಥೋಲಿಕ ಬೈಬಲ್
1 : ಮೋಶೆ
ಆ ಯಕೋಬನ ಸಂತತಿಯಿಂದ ಬರ
ಮಾಡಿದನು ದಯಾಶೀಲನೊಬ್ಬನನ್ನು,
ದೇವರಿಗೂ ಮಾನವರಿಗೂ ಪ್ರಿಯನಾದ
ವ್ಯಕ್ತಿಯೊಬ್ಬನನ್ನು,
ಅವನೇ ಮೋಶೆ ಎಂಬವನು, ಪೂನ್ಯ ಸ್ಮರಣೆಗೆ
ಯೋಗ್ಯನಾದವನು.
2 : ಇವನನ್ನು ಏರಿಸಿದನು ಮಹಿಮಾಪದವಿಗೆ
ವೈರಿಗಳೂ ಭಯಪಡುವಂಥ ಘನತೆಗೆ.
3 : ಇವನ ಬಾಯಿಮಾತಿನ ಮೂಲಕವಾಗಿ
ಸರ್ವೇಶ್ವರ ನಡೆಸಿದನು ಅದ್ಭುತಗಳನ್ನು
ಅನಿರೀಕ್ಷಿತವಾಗಿ
ಘನತೆಗೇರಿಸಿದವನನ್ನು ಅರಸರುಗಳ
ಎದುರಿನಲ್ಲಿ
ಕೊಟ್ಟನವನಿಗೆ ತನ್ನ ನಿಬಂಧನೆಗಳನ್ನು ತನ್ನ
ಜನರ ಹಿತಕ್ಕಾಗಿ
ತೋರಿಸಿದನು ತನ್ನ ಮಹಿಮಾ ಪ್ರಭಾವವನ್ನು
ಅವನಿಗಾಗಿ.
4 : ಇವನ ಸತ್ಯಸಾತ್ವಿಕತೆಗಳಿಗಾಗಿ ಇವನನ್ನು
ಪ್ರತಿಷ್ಠಿಸಿದನಾತ
ಸಕಲ ಮಾನವರಲ್ಲಿ ಇವನನ್ನೇ
ಆಯ್ದುಕೊಂಡನಾತ.
5 : ಇವನು ಕೇಳುವಂತೆ ಮಾಡಿದನು
ತನ್ನ ವಾಣಿಯನ್ನು
ಕಾರ್ಗತ್ತಲಿಗೆ ಕೊಂಡೊಯ್ದು, ಮುಖಾಮುಖಿ
ಯಾಗಿ ಕೊಟ್ಟನವನಿಗೆ ಆಜ್ಞೆಗಳನ್ನು
ಜೀವದಾಯಕ ಹಾಗು ಜ್ಞಾನದಾಯಕ
ನಿಯಮವದು
ಯಕೋಬನೊಡನೆ ಮಾಡಿಕೊಂಡ
ಒಡಂಬಡಿಕೆಯದು
ಇಸ್ರಯೇಲರಿಗೆ ಬೋಧಿಸಬೇಕಾಗಿದ್ದ
ನ್ಯಾಯವಿಧಿಗಳವು.
6 : ಆರೋನ
ಅನಂತರ ಇವನಂತೆ ಪೂಜ್ಯ ಆರೋನನನ್ನು
ಮೇಲಕ್ಕೆತ್ತಲಾಯಿತು
ಇವನು ಮೋಶೆಯ ಅಣ್ಣನೂ
ಲೇವಿಯ ಕುಲದವನೂ ಆಗಿದ್ದನು.
7 : ಸರ್ವೇಶ್ವರ ನಿತ್ಯ ಒಡಂಬಡಿಕೆಯೊಂದನ್ನು
ಸ್ಥಾಪಿಸಿದ ಇವನೊಂದಿಗೆ
ತನ್ನ ಜನರ ಹಿತಕ್ಕಾಗಿ ಯಾಜಕತ್ವವನ್ನು
ಅನುಗ್ರಹಿಸಿದ ಇವನಿಗೆ
ಅಲಂಕರಿಸಿದ ಇವನನ್ನು ಸುಂದರವಾದ
ಆಭರಣಗಳಿಂದ
ಸಿಂಗರಿಸಿದನು ಪ್ರತಿಭಾಯುತ
ನಿಲುವಂಗಿಯಿಂದ.
8 : ಬಲಪಡಿಸಿದವನನ್ನು ಪೂರ್ಣ ಗೌರವದಿಂದ
ಹೊದಿಸಿದ ನಾರುಮಡಿಯ ಒಳವಸ್ತ್ರ
ನಿಲುವಂಗಿಗಳಿಂದ
‘ಏಫೋದು’ ಎಂಬ ಗಂಭೀರ ತೊಡಿಗೆಯಿಂದ.
9 : ಚಿನ್ನದ ದಾಳಿಂಬ ಹಾಗು ಗೆಜ್ಜೆಗಳಿದ್ದವು
ಅವನಾ ನಿಲುವಂಗಿಗೆ
ನಡೆದುಹೋಗುವಾಗ ಸದ್ದು ಮಾಡುವುದಕ್ಕೆ
ದೇವಾಲಯದಲ್ಲಿ ಸೇವೆ ಮಾಡುವಾಗ ಶಬ್ದ
ಕೇಳಿಸುವುದಕ್ಕೆ
ತನ್ನ ಜನಾಂಗದವರಾ ಶಬ್ದ ಕೇಳಿ
ನೆನಪಿಗೆ ತಂದುಕೊಳ್ಳಲಿಕ್ಕೆ.
10 : ಶೃಂಗರಿಸಿದವನನ್ನು ಸರ್ವೇಶ್ವರ
ಚಿನ್ನದ, ನೀಲ ಮತ್ತು ಊದವರ್ಣದ
ದಾರದಿಂದ
ಕಸೂತಿಯವರು ತಯಾರಿಸಿದ
ದೀಕ್ಷಾವಸ್ತ್ರದಿಂದ
ಅದರೊಂದಿಗೆ ದೈವನಿರ್ಣಯಗಳನ್ನು
ಸೂಚಿಸುವಂಥ
‘ಊರಿಮ್’ ಮತ್ತು ‘ತುಮ್ಮಿಮ್’ಗಳಿಂದ.
11 : ಶೃಂಗರಿಸಿದ ಕಸೂತಿ ಕೆಲಸದವರು
ತಯಾರಿಸಿದ,
ಹುರಿಮಾಡಿದ ಕಡುಗೆಂಪು ವರ್ಣದ ದಾರದಿಂದ;
ಇಸ್ರಯೇಲ್ ಕುಲಗಳ ಪ್ರಕಾರ ಜ್ಞಾಪಕಾರ್ಥ
ಅಕ್ಷರಗಳನ್ನು ಕೊರೆಯಿಸಿದ;
ಮುದ್ರಾರತ್ನದಂತೆ ಕೆತ್ತಿಸಿದ, ಅಕ್ಕಸಾಲಿಗನಿಂದ
ಕುಂದಣದಲ್ಲಿ ಕಟ್ಟಿಸಿದ ರತ್ನಗಳಿಂದ.
12 : ಇರಿಸಿದನು ಆತನ ಮೇಲೆ ಚಿನ್ನದ ಕಿರೀಟ,
ಪೂಜಾಪೇಟ
ಕೆತ್ತಿಸಿದನು ಅದರ ಮೇಲೆ “ಸರ್ವೇಶ್ವರನಿಗೆ
ಮೀಸಲು” ಎಂಬ ಪ್ರತಿಷ್ಠಿತ ವಾಕ್ಯ.
ಎಂಥ ಗೌರವಾನ್ವಿತ ಅಲಂಕಾರ!
ಸುಂದರವಾಗಿ ಕಂಗೊಳಿಸುವ ಅಮೂಲ್ಯ
ಕಸೂತಿ ಕೆಲಸ!
13 : ತತ್ಪೂರ್ವದಲ್ಲಿರಲಿಲ್ಲ ಇಂಥ ಸೊಗಸಾದ
ವಸ್ತುಗಳು
ಧರಿಸುವಂತಿರಲಿಲ್ಲ ಅವುಗಳನ್ನು
ಪರಕೀಯರಾರು
ಅವನ ಮಕ್ಕಳು ಹಾಗು ಸಂತಾನದವರು ಮಾತ್ರ
ಧರಿಸಬಹುದಾಗಿತ್ತು.
14 : ಇವನು ತಪ್ಪದೆ ಅರ್ಪಿಸಬೇಕಾಗಿತ್ತು
ದಿನಕ್ಕೆ ಎರಡು ಬಾರಿ ದಹನಬಲಿಗಳನ್ನು.
15 : ಪ್ರತಿಷ್ಠಿಸಿದನು ಮೋಶೆ ಆರೋನನನ್ನು,
ಪವಿತ್ರ ತೈಲದಿಂದ ಅಭಿಷೇಕಿಸಿದವನನ್ನು
ಸರ್ವೇಶ್ವರನಿಗೆ ಸೇವೆ ಮಾಡುವುದಕ್ಕೂ
ಯಾಜಕ ಕಾರ್ಯಗಳನ್ನು ನಡೆಸುವುದಕ್ಕೂ
ಜನರನ್ನು ಆತನ ನಾಮದಲ್ಲಿ
ಆಶೀರ್ವದಿಸುವುದಕ್ಕೂ
ಶಾಶ್ವತ ಒಡಂಬಡಿಕೆಯಾಯಿತದು
ಆಕಾಶವಿರುವವರೆಗೂ
ಅವನಿಗೂ ಅವನ ಸಂತಾನಕ್ಕೂ.
16 : ಸರ್ವೇಶ್ವರನಿಗೆ ಬಲಿಯನ್ನು ಅರ್ಪಿಸುವುದಕ್ಕೆ
ಧೂಪ, ಸುಗಂಧಬಲಿಗಳನ್ನು
ಜ್ಞಾಪಕಾರ್ಥವಾಗಿ ಒಪ್ಪಿಸುವುದಕ್ಕೆ
ಜನರಿಗೋಸ್ಕರ ದೋಷಪರಿಹಾರ
ಮಾಡುವುದಕ್ಕೆ
ಜೀವಿಗಳಲ್ಲೆಲ್ಲಾ ಆತನನ್ನೆ
ಆಯ್ದುಕೊಳ್ಳಲಾಯಿತು.
17 : ಇಸ್ರಯೇಲರಿಗೆ ನಿಬಂಧನೆಗಳನ್ನು
ಬೋಧಿಸುವುದಕ್ಕೆ
ತನ್ನ ಧರ್ಮಶಾಸ್ತ್ರದ ಮೂಲಕ ಅವರಿಗೆ
ಜ್ಞಾನಪ್ರಕಾಶ ನೀಡುವುದಕ್ಕೆ
ಕೊಟ್ಟನವನಿಗೆ ಆಜ್ಞಾವಿಧಿನಿಯಮಗಳನ್ನು
ದೈವನಿರ್ಣಯದ ಒಡಂಬಡಿಕೆಗಳಲ್ಲಿ
ಅಧಿಕಾರವನ್ನು.
18 : ಪರಕೀಯರು, ದಾತಾನ – ಅಭೀರಾಮರು,
ಅವರ ಪಂಗಡದವರು,
ಕೋರಹನು ಹಾಗು ಅವನ ಗುಂಪಿನವರು
ಮರುಭೂಮಿಯಲ್ಲಿ ಅವನ ಮೇಲೆ
ಅಸೂಯೆಪಟ್ಟರು
ಬಹುಕೋಪರೌದ್ರದಿಂದ ಅವನ ಸುತ್ತ ಒಟ್ಟಾಗಿ
ಕೂಡಿಬಂದರು.
19 : ಇದು ಹಿಡಿಸಲಿಲ್ಲ ಸರ್ವೇಶ್ವರನ ಮನಸ್ಸಿಗೆ,
ದೃಷ್ಟಿಗೆ,
ಅವರನ್ನು ನಾಶಗೊಳಿಸಲು ಗುರಿಪಡಿಸಿದ ತನ್ನ
ಕೋಪಾಗ್ನಿಗೆ.
ಅದ್ಭುತವನ್ನು ನಡೆಸಿದನು ಅವರಿಗೆ
ವಿರುದ್ಧವಾಗಿ,
ಅವರಿಲ್ಲದಂತೆ ಮಾಡಿದ ಬೆಂಕಿಗೆ
ಆಹುತಿಯಾಗಿಸಿ.
20 : ಸರ್ವೇಶ್ವರ ನೀಡಿದ ಆರೋನನಿಗೆ
ಹೆಚ್ಚಿನ ಗೌರವವನ್ನು
ಅನುಗ್ರಹಿಸಿದವನಿಗೆ ಸ್ವಾಸ್ತ್ಯವನ್ನು
ಏರ್ಪಡಿಸಿದ ಬೆಳೆಯ ಪ್ರಥಮ ಫಲ
ಅವನಿಗೆ ಸಲ್ಲುವಂತೆ
ಅವನಿಗೇ ಮೊದಲು ಆಹಾರವು ಸಮೃದ್ಧಿಯಾಗಿ
ಒದಗುವಂತೆ.
21 : ತನಗೇ ಅರ್ಪಿತವಾದ ಬಲಿಯರ್ಪಣೆಗಳನ್ನು
ಕೊಟ್ಟನಾತನು ಇವನಿಗೂ ಇವನ ಸಂತಾನಕ್ಕೂ.
ಹೀಗೆ ಅವರು ಅವುಗಳನ್ನೇ ತಿನ್ನುವಂತೆ
ಆಯಿತು.
22 : ಆದರೆ ಅವನಿಗಿರಲಿಲ್ಲ ನಾಡಿನಲ್ಲಿ ಸ್ವಂತ ಆಸ್ತಿ,
ಇರಲಿಲ್ಲ ಪಾಲು ನಾಡಿನ ಜನರಲ್ಲಿ,
ಏಕೆಂದರೆ ಸರ್ವೆಶ್ವರನೇ ಆಗಿದ್ದ
ಅವನ ಪಾಲು ಹಾಗು ಆಸ್ತಿ.
23 : ಫೀನೆಹಾಸನು
ಎಲ್ಲಾಜಾರನ ಮಗ ಫೀನೆಹಾಸನು
ಮೂರನೆಯವನು ಸನ್ಮಾನ್ಯರಲ್ಲಿ,
ಆಸಕ್ತಿಯುಳ್ಳವನಾಗಿದ್ದನಾತ ಸರ್ವೇಶ್ವರನ
ಭಯಭಕ್ತಿಯಲ್ಲಿ.
ಧೈರ್ಯದಿಂದ ಎದ್ದುನಿಂತು ಪ್ರತಿಭಟಿಸಿದ
ಜನರು ಧರ್ಮಭ್ರಷ್ಠರಾದ ಸಮಯದಲ್ಲಿ.
ದೋಷಪರಿಹಾರ ಮಾಡಿದ ಇಸ್ರಯೇಲರ
ಪರವಾಗಿ.
24 : ಆದ್ದರಿಂದ ಸಮಾಧಾನ ಒಡಂಬಡಿಕೆ
ಮಾಡಲಾಯಿತು ಇವನೊಂದಿಗೆ
ಪವಿತ್ರಸ್ಥಾನದಲ್ಲಿ ಜರನ
ಮುಂದಾಳಾಗಿರುವಂತೆ
ಆತನಿಗೂ ಅವನ ಸಂತತಿಗೂ ಯಾಜಕತ್ವದ
ಶಾಶ್ವತ ಗೌರವ ದೊರಕುವಂತೆ.
25 : ಒಡಂಬಡಿಕೆ ಮಾಡಿಕೊಂಡ ಸರ್ವೇಶ್ವರ
ಯೆಹೂದಕುಲದ ಜೆಸ್ಸೆಯ ಮಗ
ದಾವೀದನೊಂದಿಗೆ
ಮಗನಿಂದ ಮಗನಿಗೆ ಅವರದೇ ಆಯಿತು
ಅರಸೊತ್ತಿಗೆ
ಅಂತೆಯೇ ಆರೋನನ ಸ್ವಾಸ್ತ್ಯ ಕೊಡಲಾಯಿತು
ಆತನ ಪೀಳಿಗೆಗೆ.
26 : ದೇವಜನರಲ್ಲಿದ್ದ ಒಳ್ಳೆಯವುಗಳು
ನಾಶವಾಗದಂತೆ
ತಲೆಮಾರಿನಿಂದ ತಲೆಮಾರಿಗೆ ಅವರ ಕೀರ್ತಿ
ಉಳಿಯುವಂತೆ
ನೀತಿಯಿಂದ ಅವರಿಗೆ ನ್ಯಾಯತೀರಿಸುವಂತೆ
ದೇವರು ನೀಡಲಿ ಸುಜ್ಞಾನವನ್ನು ನಿಮಗೆ.