ಕನ್ನಡ ಕಥೋಲಿಕ ಬೈಬಲ್
1 : ಈ ಕೆಳಗಿನ ವಿಷಯಗಳನ್ನು ಕುರಿತು
ನಾಚಿಕೊಳ್ಳಬೇಡ
ಯಾರ ದಾಕ್ಷಿಣ್ಯಕ್ಕೋಸ್ಕರವೂ ಪಾಪದಲ್ಲಿ
ಬೀಳಬೇಡ:
2 : ಮಹೋನ್ನತನ ಧರ್ಮಶಾಸ್ತ್ರ ಹಾಗು ಆತನ
ಒಡಂಬಡಿಕೆ ಕುರಿತು
ದುರ್ಜನರಿಗೆ ಕೊಡಬೇಕಾದ ನ್ಯಾಯವಾದ
ತೀರ್ಪು ಕುರಿತು;
3 : ಪಾಲುಗಾರನಿಂದ, ಹಾದಿಕಾರನಿಂದ
ತೆಗೆದುಕೊಳ್ಳಬೇಕಾದ ಲೆಕ್ಕ ಕುರಿತು
ಸ್ನೇಹಿತರ ಆಸ್ತಿಯಿಂದ ಕೊಡಬೇಕಾದ ಪಾಲು
ಕುರಿತು;
4 : ನ್ಯಾಯವಾದ ಬಟ್ಟು, ತಕ್ಕಡಿ ಕುರಿತು
ಬಹಳವಾಗಲಿ, ಅಲ್ಪವಾಗಲಿ, ಬರುವ
ಸಂಪಾದನೆ ಕುರಿತು;
5 : ವ್ಯಾಪಾರದಿಂದ ಬರುವಂಥ ನ್ಯಾಯವಾದ
ಆದಾಯ ಕುರಿತು
ಮಕ್ಕಳನ್ನು ಶಿಸ್ತಿನ ಪ್ರಕಾರ ತಿದ್ದುವುದನ್ನು
ಕುರಿತು
ತಪ್ಪಿತಸ್ಥ ಆಳಿಗೆ ರಕ್ತ ಬರುವಷ್ಟು
ಹೊಡೆಯುವುದನ್ನು ಕುರಿತು.
6 : ದುಷ್ಟ ಹೆಂಡತಿಯಿದ್ದರೆ, ಬೀಗ ಹಾಕುವುದು
ಒಳಿತು,
ಬಹಳ ಕೈಗಳು ಆಡುತ್ತಿದ್ದರೆ, ಮುಚ್ಚಿಡುವುದು
ಮೇಲು.
7 : ನೀನು ಕೊಡುವುದನ್ನು ಅಂಕೆತೂಕಗಳಿಂದ
ಕೊಡು;
ಕೊಡುವುದನ್ನೂ ತೆಗೆದುಕೊಳ್ಳುವುದನ್ನೂ
ಬರೆದಿಡು.
8 : ಬುದ್ಧಿ ಹೇಳಲು ನಾಚಬೇಡ ದಡ್ಡನಿಗೆ,
ಮೂರ್ಖನಿಗೆ
ಯುವಕನೊಂದಿಗೆ ವಾದಿಸುವ
ಹಣ್ಣುಮುದುಕನಿಗೆ.
ಆಗ ನೀನು ಸುಶಿಕ್ಷಿತನಾಗುವೆ
ಸಕಲಮಾನವರಿಗೂ ಸಮ್ಮತನಾಗುವೆ.
9 : ಮಗಳ ಬಗ್ಗೆ ತಂದೆಯ ಚಿಂತೆ
ಮಗಳಿಗೆ ಗೊತ್ತಿಲ್ಲದೆಯೆ ತಂದೆ
ನಿದ್ದೆಗೆಡುತ್ತಾನೆ:
ಆಕೆಯ ಚಿಂತೆ ನಿದ್ರೆಯನ್ನು ಹಾರಿಸಿಬಿಡುತ್ತದೆ.
ಆಕೆ ಯುವತಿಯಾಗಿರುವಾಗ ವಯಸ್ಸೆಲ್ಲಿ
ಕಳೆದುಹೋಗುವುದೋ ಎಂಬ ಚಿಂತೆ,
ಮದುವೆಯಾದಾಗ ಎಲ್ಲಿ ಅಪಮಾನಕ್ಕೆ
ಗುರಿಯಾಗುವಳೋ ಎಂಬ ಚಿಂತೆ;
10 : ಕನ್ಯಾವಸ್ಥೆಯಲ್ಲಿ ಗರ್ಭಿಣಿಯಾಗಿ ಎಲ್ಲಿ
ಹೆತ್ತವರ ಮನೆಯಲೇ
ಉಳಿದು ಬಿಡುವಳೋ ಎಂಬ ಚಿಂತೆ,
ಗಂಡನಿರುವಾಗಲೂ ಎಲ್ಲಿ ಅಡ್ಡದಾರಿ
ಹಿಡಿಯುವಳೋ ಎಂಬ ಚಿಂತೆ,
ಮದುವೆಯಾದ ಮೇಲೆ ಎಲ್ಲಿ
ಬಂಜೆಯಾಗುವಳೋ ಎಂಬ ಚಿಂತೆ.
11 : ಮೊಂಡು ಮಗಳನ್ನು ಹದ್ದುಬಸ್ತಿನಲ್ಲಿಟ್ಟು
ಕಾಯಬೇಕು:
ನಿನ್ನ ಶತ್ರುಗಳೆದುರಿನಲಿ ನಿನ್ನನವಳು
ನಗೆಗೀಡುಮಾಡದಂತೆ
ಊರಲ್ಲಿ ಎಲ್ಲರು ಆಡಿಕೊಳ್ಳಲು
ಆಸ್ಪದವಾಗದಂತೆ
ಜನರಲ್ಲಿ ಅವಳು ಅಪಕೀರ್ತಿಗೊಳಗಾಗದಂತೆ
ಎಲ್ಲರ ಎದುರಿನಲ್ಲಿ ನಿನ್ನನ್ನು ಅವಮಾನಕ್ಕೆ
ಗುರಿಪಡಿಸದಂತೆ.
12 : ಚೆಲುವಿಕೆಗಾಗಿಯೇ ಯಾರನ್ನು
ದಿಟ್ಟಿಸಿ ನೋಡಬೇಡ
ಮಹಿಳೆಯರ ಮಧ್ಯೆ ಕುಳಿತುಕೊಳ್ಳಬೇಡ.
13 : ನುಸಿಬರುವುದು ಬಟ್ಟೆಯಿಂದ
ಹೆಂಗಸಿಗೆ ಕೆಟ್ಟತನ ಬರುವುದು
ಹೆಂಗಸರಿಂದ.
14 : ಗಂಡಸಿನ ಗಡಸುತನವೇ ಲೇಸು
ಸವಿಮಾತಿನ ಹೆಂಗಸಿಗಿಂತ
ನಿನ್ನನ್ನು ಅವಮಾನಕೆ ಗುರಿಪಡಿಸುವ
ಮಹಿಳೆಗಿಂತ.
15 : ಪ್ರಕೃತಿಯಲ್ಲಿ ಪರಮಾತ್ಮನ ಮಹಿಮೆ
ಸರ್ವೇಶ್ವರನ ಕೆಲಸಗಳನ್ನು ಕುರಿತು ಈಗ
ನೆನಪು ಮಾಡಿಕೊಡುತ್ತೇನೆ:
ನಾನು ಕಂಡ ಸಂಗತಿಗಳನ್ನು ವಿವರಿಸುತ್ತೇನೆ:
ಸರ್ವೇಶ್ವರನ ವಾಣಿಯ ಪ್ರಕಾರ
ಆತನ ಕಾರ್ಯ ನೆರವೇರಿದೆ
ಸೃಷ್ಟಿಸಮಸ್ತವೂ ಆತನ ಆಜ್ಞೆಗಳನ್ನು
ಅನುಸರಿಸುತ್ತವೆ.
16 : ಪ್ರಕಾಶಕೊಡುವ ಸೂರ್ಯ ಎಲ್ಲವನ್ನು
ದೃಷ್ಟಿಸುವನು
ಸರ್ವೇಶ್ವರನ ಕೆಲಸ ಆತನ ಮಹಿಮೆಯಿಂದ
ತುಂಬಿರುವುದು.
17 : ಸರ್ವೇಶ್ವರನ ಮಹತ್ಕಾರ್ಯಗಳನ್ನು
ವಿವರಿಸುವ ಶಕ್ತಿಯನ್ನು
ಆತ ಕೊಟ್ಟಿಲ್ಲ ತನ್ನ ದೇವದೂತರಿಗೂ.
ಎಲ್ಲವೂ ತನ್ನ ಮಹಿಮೆಯಲ್ಲೇ
ನೆಲೆಗೊಂಡಿರುವಂತೆ
ಸ್ಥಾಪಿಸಿದವ ಸರ್ವಶಕ್ತನಾದ ಸರ್ವೇಶ್ವರನೇ.
18 : ಮಹೋನ್ನತ ಸರ್ವೇಶ್ವರ ತಿಳಿದಿರುವನು
ಸರ್ವಜ್ಞಾನವನು, ಯುಗದ ಲಕ್ಷಣವನು;
ಎಂದೇ ಪರಿಶೋಧಿಸಿಹನು ಪ್ರಪಾತವನು,
ಹೃದಯವನು;
ಬಲ್ಲನಾತನು ಅವುಗಳ ತಂತ್ರಕುತಂತ್ರಗಳನು.
19 : ಪ್ರಕಟಪಡಿಸುವನು ಹಿಂದೆ ನಡೆದವುಗಳನು
ಮುಂದೆ ನಡೆಯುವಂಥವುಗಳನು
ಶ್ರುತಪಡಿಸಬಲ್ಲನಾತನು ಗುಪ್ತವಾದುವುಗಳ
ಸುಳಿವನು.
20 : ಯಾವ ಕಲ್ಪನೆಯೂ ಆತನಿಂದ
ತಪ್ಪಿಸಿಕೊಳ್ಳದು
ಯಾವ ಮಾತೂ ಆತನಿಗೆ ಮರೆಯಾಗಿರದು.
21 : ಯುಗಯುಗಾಂತರಕ್ಕೂ ಇರುವಾತನವನು
ತನ್ನ ಜ್ಞಾನದ ಮಹತ್ಕಾರ್ಯಗಳನು
ಕ್ರಮಪಡಿಸಿದರುವನು
ಅದಕ್ಕೆ ಯಾವುದನ್ನು ಕೂಡಿಸಲಿಲ್ಲ,
ಯಾವುದನ್ನು ಅದರಿಂದ ಕಳೆದಿಲ್ಲ
ಸಲಹೆಗಾರನ ಅಗತ್ಯವೂ ಆತನಿಗಿರಲಿಲ್ಲ.
22 : ಆಹಾ, ಆತನ ಕಾರ್ಯಗಳು ಎಷ್ಟು
ಅಪೇಕ್ಷಣೀಯ!
ಆತನ ಕೆಲಸಗಳು ಎಷ್ಟು ತೇಜೋಮಯ!
23 : ಇವೆಲ್ಲವು ಅವುಗಳ ಪ್ರಯೋಜನಕ್ಕನುಸಾರ
ಜೀವಿಸುತ್ತವೆ
ನಿತ್ಯಕ್ಕೂ ಉಳಿಯುತ್ತವೆ, ಆತನಿಗೆ
ವಿಧೇಯವಾಗಿರುತ್ತವೆ.
24 : ಎಲ್ಲ ಸಂಗತಿಗಳಿರುವುವು ದ್ವಂದ್ವವಾಗಿ
ಒಂದು ಇನ್ನೊಂದಕ್ಕೆ ಎದುರಾಗಿ
ಆತ ಯಾವುದನ್ನೂ ಮಾಡಿಲ್ಲ ಅಪೂರ್ಣವಾಗಿ.
25 : ವೈಶಿಷ್ಟ್ಯತೆಯಲ್ಲಿ ಒಂದು
ಪರಿಪೂರ್ಣಗೊಳ್ಳುತ್ತದೆ ಇನ್ನೊಂದರಿಂದ.
ಆತನ ಮಹಿಮೆಯನ್ನು ಪೂರ್ತಿಯಾಗಿ
ಗ್ರಹಿಸಲು ಯಾರಿಂದ ಸಾಧ್ಯ?