ಕನ್ನಡ ಕಥೋಲಿಕ ಬೈಬಲ್
1 : ಮರಣ
ತನ್ನ ಆಸ್ತಿಪಾಸ್ತಿಯಲ್ಲಿ ನಿಶ್ಚಿಂತೆ
ಯಿಂದಿರುವವನಿಗೆ
ತಳಮಳವಿಲ್ಲದೆ ಎಲ್ಲದರಲ್ಲು
ಸಮೃದ್ಧವಾಗಿರುವವರಿಗೆ
ಇನ್ನೂ ತಿಂದು ಕುಡಿಯಲು ಆಸಕ್ತಿಯುಳ್ಳವನಿಗೆ
ಮರಣವೇ, ನೆನೆಯಲು ನೀನೆಷ್ಟು
ಕಹಿಯಾಗಿರುವೆ !
2 : ಆದರೆ ಮರಣವೇ, ನಿನ್ನಾಗಮನದ ತೀರ್ಪು
ಸುಸ್ವಾಗತವೇ:
ಗತಿಹೀನರಿಗೆ, ಬಲಗುಂದಿದವರಿಗೆ, ವೃದ್ಧರಿಗೆ,
ಎಲ್ಲದರಲು ತೊಂದರೆ ತಾಪತ್ರಯಗಳಿಗೆ
ಈಡಾಗಿರುವವರಿಗೆ,
ತೀವ್ರ ಅಸಮಾಧಾನದಿಂದಿರುವವರಿಗೆ
ತಾಳ್ಮೆಗೆಟ್ಟವರಿಗೆ.
3 : ಮರಣತೀರ್ಪಿಗೆ ನೀನು ಹೆದರದಿರು
ನಿನ್ನ ಹಿಂದೆ ಬಂದವರನು, ಮುಂದೆ
ಬರಲಿರುವವರನು ಗಮನಿಸು.
4 : ಎಲ್ಲಾ ಜೀವಿಗಳಿಗೆ ಸರ್ವೇಶ್ವರನಿತ್ತಿರುವ
ತೀರ್ಪು ಅದು
ಅದನ್ನು ನೀನು ನಿರಾಕರಿಸುವುದೆಂತು?
ವರ್ಷಹತ್ತಾಗಲಿ, ನೂರಾಗಲಿ, ಸಾವಿರವಾಗಲಿ
ನಿನ್ನ ಜೀವನದಾ ವಿಚಾರವೇ ಇರದು
ಪಾತಾಳದಲಿ.
5 : ಪಾಪಾತ್ಮರ ಸಂತತಿ
ಪಾಪಾತ್ಮರ ಮಕ್ಕಳು ಹೇಸತಕ್ಕವರು
ಅವರು ದುರ್ಜನರ ಸಹವಾಸದಲ್ಲೇ
ಬೆಳೆದವರು.
6 : ಪಾಪಾತ್ಮರ ಮಕ್ಕಳ ಆಸ್ತಿ ಹಾಳಾಗುವುದು
ಅವರ ಪೀಳಿಗೆ ಯಾವಾಗಲು ಅವಮಾನಕ್ಕೆ
ಗುರಿಯಾಗುವುದು.
7 : ಅಧರ್ಮಿಯಾದ ತಂದೆಯನ್ನು
ಮಕ್ಕಳು ದೂಷಿಸುವಂಥವರೇ
ಏಕೆಂದರೆ ಅವರು ಅವಮಾನ
ಸಹಿಸಬೇಕಾಗುವುದು ಅವನಿಂದಲೇ.
8 : ಮಹೋನ್ನತ ದೇವರ ಧರ್ಮಶಾಸ್ತ್ರವನ್ನು
ತ್ಯಜಿಸಿದ ದುರ್ಜನರೇ,
ಅಯ್ಯೋ, ಧಿಕ್ಕಾರ ನಿಮಗೆ !
9 : ನೀವು ಹುಟ್ಟಿದರೆ ಶಾಪಕ್ಕಾಗಿ ಹುಟ್ಟುತ್ತೀರಿ
ಸತ್ತರೆ ಪಾಪದ ಪಾಲಿಗಾಗಿ ಸಾಯುತ್ತೀರಿ.
10 : ಮಣ್ಣಿನಿಂದಾದ ವಸ್ತುಗಳು ತಿರುಗಿ ಸೇರುವುವು
ಮಣ್ಣಿಗೆ
ಅದರಂತೆಯೇ ದುರ್ಜನರು ಶಾಪದಿಂದ
ಸೇರುವರು ನಾಶನಕ್ಕೆ.
11 : ಜನರ ಗೋಳಾಟ ಅವರ ದೇಹಕ್ಕಾಗಿ
ಪಾಪಾತ್ಮರ ಹೆಸರು ಹೋಗುವುದು
ಕಣ್ಮರೆಯಾಗಿ.
12 : ಒಳ್ಳೆಯ ಹೆಸರು
ಲಕ್ಷ್ಯವಿರಲಿ ನಿನ್ನ ಹೆಸರಿನತ್ತ !
ಬಂಗಾರದ ಸಾವಿರಗಟ್ಟಿಗಳಿಗಿಂತ ಅದು
ನೆಲೆಯಾಗಿ ಮುಂದುವರೆವುದು ಹೆಚ್ಚುಕಾಲ.
13 : ಒಳ್ಳೆಯ ಬಾಳಿನ ದಿನಗಳು
ಎಣಿಕೆಯಾಗುವುವು
ಆದರೆ ಒಳ್ಳೆಯ ಹೆಸರು ಶಾಶ್ವತವಾಗಿರುವುದು.
14 : ನಾಚಿಕೆ
ಮಕ್ಕಳೇ, ಶಿಕ್ಷಣವನ್ನು ಕಾಪಾಡಿಕೊಳ್ಳಿ
ಶಾಂತಿಯಿಂದ
ಏನು ಲಾಭ ಅಡಗಿಸಿಟ್ಟ ಜ್ಞಾನದಿಂದ,
ಹುದುಗಿರುವ ನಿಧಿಯಿಂದ?
15 : ತನ್ನ ಜ್ಞಾನವನು
ಮುಚ್ಚಿಟ್ಟುಕೊಳ್ಳುವವನಿಗಿಂತಲೂ
ತನ್ನ ಅಜ್ಞಾನವನು
ಮುಚ್ಚಿಟ್ಟುಕೊಳ್ಳುವವನೇ ಮೇಲು.
16 : ಆದುದರಿಂದ ನನ್ನ ಮಾತಿಗೆ ಮನ್ನಣೆ
ಕೊಡಬಲ್ಲಿರಾ?
ಎಲ್ಲಾ ಬಗೆಯ ನಾಚಿಕೆಯನ್ನು
ಅಡಗಿಸಿಡುವುದು ಒಳಿತಲ್ಲ:
ನಿಜವಾಗಿ ಎಲ್ಲಾ ಸಂಗತಿಗಳು ಎಲ್ಲರಿಗೂ
ಸಮ್ಮತವಾಗಿರುವುದಿಲ್ಲ.
17 : ನಾಚಿಕೆಪಡು, ಕೆಟ್ಟನಡತೆಗಾಗಿ
ತಂದೆತಾಯಿಗಳ ಮುಂದೆ
ಆಡಿದ ಸುಳ್ಳಿಗಾಗಿ ಅರಸನ ಹಾಗು ಮಹಾತ್ಮರ
ಮುಂದೆ;
18 : ಮಾಡಿದ ತಪ್ಪಿಗಾಗಿ ನ್ಯಾಯಾಧಿಪತಿಯ
ಹಾಗು ಅಧಿಕಾರಿಗಳ ಮುಂದೆ
ಎಸಗಿದ ಅಧರ್ಮಕ್ಕಾಗಿ ದೇವಸಭೆಯ ಹಾಗು
ಜನಕೂಟದ ಮುಂದೆ.
19 : ನಾಚಿಕೆಪಡು, ಅನ್ಯಾಯದ ವ್ಯವಹಾರಕ್ಕಾಗಿ
ಪಾಲುಗಾರನ ಹಾಗು ಸ್ನೇಹಿತನ ಮುಂದೆ.
20 : ನಾಚಿಕೆಪಡು ಕಳ್ಳತನಕ್ಕಾಗಿ ನೀನು ವಾಸಿಸುವ
ಸ್ಥಳದ ಹಾಗು ಸತ್ಯ ಒಡಂಬಡಿಕೆಯ
ನಿಮಿತ್ತ.
ನಾಚಿಕೆಪಡು ಊಟಕ್ಕೆ ಕುಳಿತಿರುವಾಗ
ಮೊಳಕ್ಕೆ ಮೇಲೆ ಆತುಕೊಂಡುದಕ್ಕಾಗಿ.
21 : ನಾಚಿಕೆಪಡು ಕೊಡುವ ಮತ್ತು ಕೊಳ್ಳುವ
ವಿಷಯದಲ್ಲಿ ಮಾಡಿದ ಬಂಡತನಕ್ಕಾಗಿ.
ವಂದಿಸಬೇಕಾದವರ ಮುಂದೆ
ಮೌನತಾಳಿದುದಕ್ಕಾಗಿ.
22 : ನಾಚಿಕೆಪಡು ಸೂಳೆಯರ ಕಡೆಗೆ ದೃಷ್ಟಿ
ಹಾಯಿಸಿದ್ದಕ್ಕಾಗಿ.
ನಿನ್ನ ಬಳಗದವನಿಂದ
ಮುಖತಪ್ಪಿಸಿಕೊಂಡುದಕ್ಕಾಗಿ.
23 : ನಾಚಿಕೆಪಡು, ನೆರೆಯವರ ಕಾಣಿಕೆಯನ್ನಾಗಲಿ,
ಅದರ ಭಾಗವನ್ನಾಗಲೀ ತೆಗೆದಿಟ್ಟದ್ದಕ್ಕಾಗಿ.
ಮದುವೆಯಾದ ಸ್ತ್ರೀಯನ್ನು
ದಿಟ್ಟಿಸಿ ನೋಡಿದ್ದಕ್ಕಾಗಿ.
24 : ನಾಚಿಕೆಪಡು, ಒಬ್ಬನ ದಾಸಿಯೊಂದಿಗೆ
ಸಹವಾಸ ಮಾಡಿದ್ದಕ್ಕಾಗಿ,
ಸ್ನೇಹಿತರನ್ನು ಬಯ್ದು ಹಂಗಿಸಿದ್ದಕ್ಕಾಗಿ.
ಒಬ್ಬನ ದಾಸಿಯ ಹಾಸಿಗೆಯ ಬಳಿ
ಸುಳಿಯಬೇಡ
ಸ್ನೇಹಿತನಿಗೆ ಕೊಟ್ಟ ಮೇಲೆ ಹಂಗಿಸಬೇಡ.
25 : ನಾಚಿಕೆಪಡು, ಒಬ್ಬನ ದಾಸಿಯೊಂದಿಗೆ
ಸಹವಾಸ ಮಾಡಿದ್ದಕ್ಕಾಗಿ,
ಸ್ನೇಹಿತರನ್ನು ಬಯ್ದು ಹಂಗಿಸಿದ್ದಕ್ಕಾಗಿ.
ಒಬ್ಬನ ದಾಸಿಯ ಹಾಸಿಗೆಯ ಬಳಿ
ಸುಳಿಯಬೇಡ
ಸ್ನೇಹಿತನಿಗೆ ಕೊಟ್ಟ ಮೇಲೆ ಹಂಗಿಸಬೇಡ.
26 : ನಾಚಿಕೆಪಡು, ಕಿವಿಯಿಂದ ಕೇಳಿದ್ದನು,
ಬಾಯಿಂದ ಹೇಳಿದ್ದಕ್ಕಾಗಿ
ಗುಟ್ಟನು ರಟ್ಟು ಮಾಡಿದ್ದಕ್ಕಾಗಿ.
27 : ನಿಜವಾಗಿಯೂ ಲಜ್ಜಾವಂತನಾಗಿರುವೆ ಹೀಗೆ
ನಡೆದಲ್ಲಿ
ಆಗ ನಿನಗೆ ಕರುಣೆ ದೊರಕುವುದು ಎಲ್ಲರ
ದೃಷ್ಟಿಯಲ್ಲಿ.