ಕನ್ನಡ ಕಥೋಲಿಕ ಬೈಬಲ್
1 : ಹೆತ್ತವರಿಗೆ ಮಾಡಬೇಕಾದ ಕರ್ತವ್ಯಗಳು
ಮಕ್ಕಳೇ, ನಿಮ್ಮ ತಂದೆಯಾದ ನನ್ನ
ಮಾತನು ಕೇಳಿರಿ
ನೀವು ಸುರಕ್ಷಿತವಾಗಿರಲು ಅದರಂತೆ ನಡೆಯಿರಿ.
2 : ಸರ್ವೇಶ್ವರ, ಮಕ್ಕಳಿಗಿಂತ ಮಿಗಿಲಾಗಿ ತಂದೆಗೆ
ಗೌರವ ನೀಡಿದ್ದಾರೆ
ಗಂಡುಮಕ್ಕಳ ಮೇಲೆ ತಾಯಿಗೆ
ಅಧಿಕಾರವನ್ನು ಅನುಗ್ರಹಿಸಿದ್ದಾರೆ.
3 : ತಂದೆಯನ್ನು ಸನ್ಮಾನಿಸುವವನು ತನ್ನ ಪಾಪಕ್ಕೆ
ಪ್ರಾಯಶ್ಚಿತ್ತ ಮಾಡಿದವನಂತೆ;
4 : ತಾಯಿಯನ್ನು ಗೌರವಿಸುವವನು,
ನಿಧಿ ಶೇಖರಿಸಿಟ್ಟುಕೊಂಡವನಂತೆ.
5 : ತಂದೆಯನ್ನು ಗೌರವಿಸುವವನಿಗೆ ತನ್ನ ಸ್ವಂತ
ಮಕ್ಕಳಿಂದ ಆಗುವುದು ಸಂತೋಷ
ಅವನು ಪ್ರಾರ್ಥನೆ ಮಾಡುವಾಗಲೆಲ್ಲ
ದೊರಕುವುದವನಿಗೆ ಪ್ರತ್ಯುತ್ತರ.
6 : ತಂದೆಯನು ಗೌರವಿಸುವವನು ಬದುಕುವನು
ಬಹುಕಾಲ
ಸರ್ವೇಶ್ವರನಿಗೆ ವಿಧೇಯನಾಗಿರುವವನು
ತಾಯಿಗೆ ಬರಮಾಡುವನು ಸಮಾಧಾನ.
7 : ಅಂಥವನು ಸರ್ವೇಶ್ವರನಿಗೆ ಸೇವೆ
ಮಾಡುವಂತೆಯೆ
ಮಾಡುವನು ಸೇವೆ ಹೆತ್ತವರಿಗೆ.
8 : ಹೆತ್ತವರನ್ನು ಸನ್ಮಾನಿಸು ನಿನ್ನ ನಡೆನುಡಿಗಳಿಂದ
ಹೀಗೆ ನಿನಗೆ ದೊರಕುವುದು ಆಶೀರ್ವಾದ
ಆತನಿಂದ.
9 : ತಂದೆಯ ಆಶೀರ್ವಾದ ಮಕ್ಕಳ ಮನೆಯನ್ನು
ಸ್ಥಿರಗೊಳಿಸುತ್ತದೆ
ತಾಯಿಯ ಶಾಪ ಅವುಗಳ ಅಸ್ತಿವಾರವನ್ನೇ
ಕಿತ್ತುಹಾಕುತ್ತದೆ.
10 : ಹಿಗ್ಗದಿರು, ತಂದೆಗೆ ಅವಮಾನವಾಗುವಾಗ
ತಂದೆಯ ಅವಮಾನ ನೀಡದು ನಿನಗೆ ಸನ್ಮಾನ.
11 : ಮನುಷ್ಯನಿಗೆ ಗೌರವ ಲಭಿಸುವುದು ತಂದೆಯ
ಘನತೆಯಿಂದ
ಅವಮಾನದಲ್ಲಿ ಬದುಕುವ ತಾಯಿ, ಮಕ್ಕಳಿಗೆ
ಕಳಂಕ.
12 : ಮಗನೇ, ನಿನ್ನ ಮುಪ್ಪಿನ ತಂದೆಗೆ
ಸಹಾಯಕನಾಗಿರು
ಅವನು ಬದುಕುವವರೆಗೆ ಅವನ ಮನಸ್ಸನು
ನೋಯಿಸದಿರು.
13 : ತಾಳ್ಮೆಯಿಂದಿರು ಅವನ ಬುದ್ಧಿ ಮಂಕಾದಾಗ
ಅವನನ್ನು ಹೀನೈಸಬೇಡ ನೀನು
ಬಲವಂತನಾಗಿರುವಾಗ.
14 : ತಂದೆಗೆ ಮಾಡಿದ ಉಪಶಮನ ಅಳಿದು
ಹೋಗದು
ಬದಲಿಗೆ, ನಿನ್ನ ಪಾಪಕ್ಕೆ ಪ್ರಾಯಶ್ಚಿತ್ತವಾಗಿ
ಪರಿಣಮಿಸುವುದು.
15 : ದೇವರು ಅದನ್ನು ಸ್ಮರಿಸಿಕೊಳ್ಳುವರು
ನೀನು ಕಷ್ಟಕ್ಕೆ ಗುರಿಯಾದಾಗ
ಬಿಸಿಲಿನಲ್ಲಿ ಮಂಜಿನಂತೆ, ಕರಗುವುವು
ನಿನ್ನ ಪಾಪಗಳೆಲ್ಲ.
16 : ತಂದೆಯನ್ನು ಕೈಬಿಡುವವನು
ದೇವದೂಷಕನಂತಿರುವನು
ತಾಯಿಯ ಕೋಪ ಕೆರಳಿಸುವವನು ದೇವರಿಂದ
ಶಾಪಗ್ರಸ್ಥನು.
17 : ವಿನಮ್ರತೆ
ಮಗನೇ, ಕರ್ತವ್ಯ ನಿರ್ವಹನೆಯಲ್ಲಿ
ವಿನಯದಿಂದ ವರ್ತಿಸುವಿಯಾದರೆ,
ದೇವರಿಗೆ ಯೋಗ್ಯರಾದವರ ಪ್ರೀತಿಗೆ
ನೀನೂ ಪಾತ್ರನಾಗುವೆ.
18 : ನೀನು ದೊಡ್ಡವನಾಗಿರುವಷ್ಟು ನಿನ್ನನ್ನೇ
ತಗ್ಗಿಸಿಕೊಂಡೆಯಾದರೆ
ದೇವರ ಸನ್ನಿಧಿಯಲ್ಲಿ ನಿನಗೆ ಗಿಟ್ಟುವುದು
ಕರುಣೆ.
19 : ಗಣ್ಯರೂ ಗರ್ವಿಗಳೂ ಅನೇಕರಿರುವರು
ದೇವರು ತಮ್ಮ ಗುಟ್ಟನ್ನು ದೀನರಿಗೆ ಬಯಲು
ಮಾಡುವರು.
20 : ಕಾರಣ, ಅಪೂರ್ವವಾದುದು ದೇವರ ಬಲ
ದೀನರಿಂದ ಆತನಿಗೆ ಸಲ್ಲುವುದು ಘನಮಾನ.
21 : ನಿನ್ನ ಕೈಯಲ್ಲಾಗದ ಕೆಲಸಕ್ಕೆ ಕೈಹಾಕಬೇಡ
ನಿನ್ನ ಶಕ್ತಿಗೆ ನಿಲುಕದವುಗಳನ್ನು ಹುಡುಕ
ಬೇಡ.
22 : ಆಲೋಚಿಸುತ್ತಿರು ನಿನಗೆ ಹೇಳಿದ ಕೆಲಸವನ್ನು
ಕುರಿತೇ
ಮುಚ್ಚುಮರೆಯಾದ ವಿಷಯಗಳು ಬೇಕಿಲ್ಲ
ನಿನಗೆ.
23 : ಅಧಿಕ ಪ್ರಸಂಗಿಯಾಗಿ ಕೈ ಹಾಕಬೇಡ ನಾನಾ
ಕಾರ್ಯಗಳಿಗೆ
ನಿನಗೆ ತಿಳಿಯಪಡಿಸಿದವುಗಳೇ ಮೀರಿವೆ
ಮಾನವನ ಗ್ರಹಿಕೆಗೆ.
24 : ಸ್ವಂತ ಅಭಿಪ್ರಾಯವನ್ನೆಚ್ಚಿಕೊಂಡು
ಹಿಡಿದಿಹರನೇಕರು ಅಡ್ಡಹಾದಿ
ಕೆಟ್ಟ ಭ್ರಮೆಯಿಂದ ತಪ್ಪಿ ಹೋಗಿದೆ
ಅವರ ಬುದ್ಧಿ.
25 : ಗರ್ವ
ಕಾಣಿಸುವುದಿಲ್ಲ ನಿನಗೆ, ಕಣ್ಣಿಲ್ಲದಿದ್ದರೆ
ತಿಳಿದವನಂತೆ ನಟಿಸಬೇಡ, ಅರಿವಿಲ್ಲದಿದ್ದರೆ.
26 : ಅಪಾಯದೊಂದಿಗೆ ಆಟವಾಡುವಾತನು
ಬೀಳುವನು ಅದರಲ್ಲೇ
ಹಟಮಾರಿ ಕಡೆಗೆ ಅನುಭವಿಸುವನು ಕೇಡನ್ನೇ.
27 : ಮೊಂಡುಹೃದಯಿಗೆ ತಪ್ಪದು ಕಷ್ಟದ ಭಾರ
ಪಾಪಾತ್ಮನು ಕೂಡಿಸುವನು ಪಾಪಕ್ಕೆ ಪಾಪ.
28 : ಖಂಡನೆಯಿಂದ ಗುಣವಾಗದು ಗರ್ವಿಗೆ
ದುಷ್ಟತನದ ಬಳ್ಳಿ ಬೇರೂರಿದೆ ಅವನಲ್ಲೇ.
29 : ವಿವೇಕ ಮನಸ್ಸುಳ್ಳವರು ಪಾಠ ಕಲಿಯುವರು
ಸಾಮತಿಗಳಿಂದ
ಲಕ್ಷ್ಯವಿಟ್ಟು ಕೇಳುವನು ಜ್ಞಾನಿ ಹೆಬ್ಬಯಕೆಯಿಂದ.
ಬಡವರಿಗೆ ದಾನಧರ್ಮ
30 : ಉರಿಯುವ ಬೆಂಕಿ ನಂದಿಹೋಗುವುದು
ನೀರಿನಿಂದ
ಪಾಪಕ್ಕೆ ಪ್ರಾಯಶ್ಚಿತ್ತ ದೊರಕುವುದು
ದಾನಧರ್ಮದಿಂದ.
31 : ಉಪಕಾರ ತೀರಿಸುವವನಿಗೆ ಯೋಚನೆಯುಂಟು
ಭವಿಷ್ಯದಲ್ಲಿ
ಆಧಾರ ಪಡೆಯುವನವನು ಪತನದ
ವೇಳೆಯಲ್ಲಿ.