ಕನ್ನಡ ಕಥೋಲಿಕ ಬೈಬಲ್
1 : ಸರ್ವೇಶ್ವರಾ, ನನ್ನ ಜೀವಕ್ಕೆ
ತಂದೆಯೂ ಒಡೆಯನೂ
ಆಗಿರುವಾತನೇ,
ನನ್ನನ್ನು ತೊರೆದುಬಿಡಬೇಡ,
ಮಾತುಗಳಿಂದ ನಾನು ಮೋಸಹೋಗುವಂತೆ
ನನ್ನನ್ನು ಕೈಬಿಡಬೇಡ,
ಅವುಗಳಿಂದ ನಾನು ನಾಶವಾಗುವಂತೆ.
2 : ನನ್ನ ಆಲೋಚನೆಗಳನ್ನು
ಹತೋಟಿಯಲ್ಲಿಡುವವರಾರು?
ನನ್ನ ಹೃದಯಕೆ ಜ್ಞಾನ ಶಿಕ್ಷಣ
ನೀಡುವವರಾರು?
ಅಂಥವರಿದ್ದರೆ ನನ್ನ ತಪ್ಪುಗಳನ್ನು ದಂಡಿಸಿ
ತಿದ್ದುಕೊಳ್ಳಬಹುದಿತ್ತು
ನನ್ನ ಪಾಪಗಳನ್ನು ತಡೆಗಟ್ಟಿ ನಿಲ್ಲಿಸಬಹುದಿತ್ತು.
3 : ಆಗ ನನ್ನ ಅಜ್ಞಾನ ಬೆಳೆಯುವುದಿಲ್ಲ;
ನನ್ನ ಪಾಪಗಳು ಹೆಚ್ಚುವುದಿಲ್ಲ
ನನ್ನ ವಿರೋಧಿಗಳ ಎದುರಿನಲ್ಲಿ
ನಾನು ಬಿದ್ದು ಹೋಗುವುದಿಲ್ಲ
ನನ್ನ ಶತ್ರು ನನ್ನನ್ನು ಕಂಡು ಹಿಗ್ಗುವುದಿಲ್ಲ.
4 : ಸರ್ವೇಶ್ವರಾ, ನನ್ನ ಜೀವಕ್ಕೆ ತಂದೆಯೂ
ಒಡೆಯನೂ ಆಗಿರುವಾತನೇ,
ಸೊಕ್ಕಿನ ಕಣ್ಣುಗಳನ್ನು ಕೊಡಬೇಡ ನನಗೆ.
5 : ದುರಭಿಲಾಶೆಗಳನ್ನು ನನ್ನಿಂದ
ದೂರಮಾಡು.
6 : ಹೊಟ್ಟೆಬಾಕತನವಾಗಲಿ, ಕಾಮತೃಷೆಯಾಗಲಿ
ನನ್ನನ್ನು ವಶಮಾಡಿಕೊಳ್ಳದಿರಲಿ
ಒಪ್ಪಿಸಬೇಡ ನನ್ನನ್ನು ನಾಚಿಕೆಗೇಡಿನ
ಮನೋಭಾವಕ್ಕೆ ಈಡಾಗಿ.
7 : ಆಣೆಯಿಡುವುದು ಬೇಡ
ಮಕ್ಕಳೇ, ನಾಲಗೆಯ ಹತೋಟಿಯ ಬಗ್ಗೆ
ಕೇಳಿ, ನಾ ಹೇಳುವುದನ್ನು:
ನಾಲಗೆಯನ್ನು ಬಿಗಿಹಿಡಿಯುವವನು
ಮೋಸಹೋಗಲಾರನು.
8 : ಪಾಪಿಯು ಸಿಕ್ಕಿಬೀಳುವನು
ತನ್ನ ಮಾತುಗಳಿಂದಲೇ
ದೂಷಕನೂ ಗರ್ವಿಷ್ಠನೂ ಮುಗ್ಗರಿಸುವರು
ಅವುಗಳಿಂದಲೇ.
9 : ನಿನ್ನ ಬಾಯಿಗೆ ರೂಢಿಮಾಡಿಸಬೇಡ
ಆಣೆಯಿಡುವುದನ್ನು
ಚಟವಾಗಿಸಬೇಡ ಹೀಗೆ ಪರಮಪಾವನನ
ಹೆಸರೆತ್ತುವುದನ್ನು.
10 : ಪದೇಪದೇ ಪೆಟ್ಟುತಿನ್ನುವ ದಾಸನಲ್ಲಿ
ಯಾವಾಗಲೂ ಇರುತ್ತದೆ ಬಾಸುಂಡೆ;
ಅಂತೆಯೇ ದೇವರ ಹೆಸರೇಳಿ
ಆಣೆಯಿಡುವವನಲ್ಲಿ ಪಾಪದ ಕಲ್ಮಶ
ಇದ್ದೇ ಇರುತ್ತದೆ.
11 : ಸದಾ ಆಣೆಯಿಡುವವನು ದೋಷಭರಿತನು
ಪೀಡೆ ಅವನ ಮನೆಯನು ಬಿಟ್ಟಗಲದು
ಆಣೆ ತೀರಿಸದಿದ್ದರೆ ಪಾಪ ಅವನ
ಮೇಲಿರುವುದು
ಅದನ್ನು ಅಲಕ್ಷಿಸಿದರೆ ಆ ಪಾಪ
ಇಮ್ಮಡಿಯಾಗುವುದು.
ಮಾಡಿದ ಪ್ರಮಾಣ ವ್ಯರ್ಥವಾದರೂ,
ಆತ ದೋಷಿಯಾಗುವುದು ತಪ್ಪದು
ಅವನ ಮನೆ ತೊಂದರೆ ತಾಪತ್ರಯಗಳಿಂದ
ತುಂಬಿರುವುದು.
12 : ಕೆಟ್ಟ ಮಾತು
ಮರಣದಂತಿರುವ ಮಾತು ಒಂದಿದೆ
ಅಂಥದ್ದು ಕಾಣದಿರಲಿ ಯಕೋಬನ
ವಂಶದಲ್ಲೇ.
ಇಂಥ ಮಾತುಗಳು ದೂರವಾಗಿವೆ
ನೀತಿವಂತರಿಗೆ
ಅವರು ಹೊರಳಾಡುವುದಿಲ್ಲ ಪಾಪದೊಳಗೆ.
13 : ಹೊಲಸು ಮಾತಾಡುವ ಅಭ್ಯಾಸ ಕೂಡದು ಅಂಥ ಮಾತು ಪಾಪಮಯವಾಗಿರುವುದು.
14 : ನೀನು ದೊಡ್ಡವರ ಮಧ್ಯೆ ಕುಳಿತಿರುವಾಗ
ಜ್ಞಾಪಕಕೆ ಬರಲಿ ನಿನ್ನ ತಾಯಿತಂದೆ
ಮೈಮರೆತು ಮಾತಾಡಿ ಮೂರ್ಖನೆಂದು
ಕಂಡು ಬಂದೀಯೆ ಆ ಸಭಿಕರ ಮುಂದೆ
‘ನಾನು ಹುಟ್ಟದಿದ್ದರೆ ವಾಸಿಯಾಗಿತ್ತು’ ಎಂದು
ನಿನ್ನ ಜನ್ಮದಿನವನ್ನೇ ಶಪಿಸಿಕೊಂಡೀಯೆ!
15 : ಬೈಯುವ ಅಭ್ಯಾಸವುಳ್ಳವನಿಗೆ
ಸುಧಾರಣೆಯಾಗದು ಸಾಯುವವರೆಗೆ.
16 : ಮೋಹಪಾಪ
ಪಾಪದ ಮೇಲೆ ಪಾಪಕಟ್ಟಿಕೊಳ್ಳುವವರು
ಎರಡು ತರದ ಜನರು
ದೇವರ ಕೋಪವನ್ನು ತಮ್ಮ ಮೇಲೆ ಬರುವಂತೆ
ಮಾಡಿಕೊಳ್ಳುವವರು ಮೂರನೆಯವರು.
ಕಾಯ್ದ ಮನಸ್ಸು, ಉರಿಯುವ ಜ್ವಾಲೆ
ಆರಿಹೋಗವು ಸುಟ್ಟು ಬೂದಿಯಾಗುವವರೆಗೆ
ಸಂಬಂಧಿಕರೊಂದಿಗೆ ಜಾರತ್ವಗೈಯುವವನು
ಬಿಡನು ಅದನ್ನು ಕೊನೆಯವರೆಗೆ.
17 : ತಿನ್ನುವುದೆಲ್ಲಾ ರುಚಿಯಾಗಿರುತ್ತದೆ ಜಾರನಿಗೆ
ಅದನ್ನು ಬಿಡನವನು ಸಾಯುವವರೆಗೆ.
18 : “ನನ್ನನು ನೋಡುವವರು ಯಾರಿದ್ದಾರೆ?
ನನ್ನ ಸುತ್ತಲೂ ಕತ್ತಲೆ ಮುತ್ತಿದೆ;
ಗೋಡೆಗಳು ನನ್ನನ್ನು ಮರೆಯಾಗಿಸಿವೆ
ನನ್ನನು ನೋಡುವವರಾರೂ ಇಲ್ಲ;
ನಾನಂಜುವುದೇಕೆ?
ಮಹೋನ್ನತನು ನನ್ನ ಪಾಪಗಳನ್ನು ಲೆಕ್ಕಿಸನು”
ಈ ಪರಿ ಹೇಳಿಕೊಳ್ಳುವನು ವ್ಯಭಿಚಾರ
ಗೈಯುವವನು.
19 : ಇಂಥವನು ಭಯಪಡುವುದು
ಜನರ ಕಣ್ಣಿಗೆ ಮಾತ್ರ
ಆದರೆ ಸರ್ವೇಶ್ವರನ ದೃಷ್ಟಿ ಸೂರ್ಯನಿಗಿಂತ
ಹತ್ತು ಸಾವಿರ ಹೊಳೆತ!
ಮನುಷ್ಯನ ಮಾರ್ಗಗಳೆಲ್ಲ ಆತನಿಗೆ ಪರಿಚಿತ
ಆತ ಬಲ್ಲ ಅತಿಗುಪ್ತವಾಗಿರುವ ಎಲ್ಲ
ಸ್ಥಳಗಳ ಇಂಗಿತ.
ಇದನ್ನು ಆ ವ್ಯಭಿಚಾರಿ ಗ್ರಹಿಸಲಾರ.
20 : ಸೃಷ್ಟಿಗಿಂತಲೂ ಮೊದಲೇ ಸಕಲವನ್ನು
ಅರಿತಿದ್ದನು ಸರ್ವೇಶ್ವರ
ಸೃಷ್ಟಿಕಾರ್ಯ ಮುಗಿದಮೇಲೂ
ಬಲ್ಲನು ಅವುಗಳನ್ನೆಲ್ಲಾ.
21 : ಈ ಕಾಮುಕನು ದಂಡನೆಗೆ ಗುರಿಯಾಗುವನು
ನಗರಬೀದಿಗಳಲ್ಲೇ
ಸಿಕ್ಕಿಬೀಳುವನು ನೆನೆಸದಿದ್ದ ಗಳಿಗೆಯಲ್ಲೇ.
22 : ವ್ಯಭಿಚಾರಿಣಿ
ಅದೇ ಗತಿಯಾಗುವುದು ಗಂಡನನ್ನು
ಬಿಡುವವಳಿಗೆ
ಪರಪುರುಷರಿಂದ ಮಕ್ಕಳನ್ನು ಹೆರುವವಳಿಗೆ.
23 : ಕಾರಣ, ಮೊದಲನೆಯದಾಗಿ,
ಆಕೆ ಮಹೋನ್ನತನ ಆಜ್ಞೆ ಮೀರಿದಳು
ಎರಡನೆಯದಾಗಿ, ತನ್ನ ಗಂಡನ ವಿರುದ್ಧ
ದ್ರೋಹಮಾಡಿದಳು
ಮೂರನೆಯದಾಗಿ ಹಾದರಮಾಡಿ
ಪರಪುರುಷನಿಂದ ಮಕ್ಕಳನ್ನು ಹೆತ್ತಳು.
24 : ಇಂಥವಳನ್ನು ತರುವರು ಸಭೆಯ ಮುಂದೆ
ವಿಚಾರಣೆಗೆ ಗುರಿಪಡಿಸುವರು ಅವಳ ಮಕ್ಕಳ ಬಗ್ಗೆ.
25 : ಇಂಥವಳ ಮಕ್ಕಳು ಬೇರೂರುವುದಿಲ್ಲ
ಅವಳ ಕೊಂಬೆಗಳು ಫಲಿಸುವುದಿಲ್ಲ.
26 : ಅವಳ ಸ್ಮರಣೆ ನಿಂದಾಸ್ಪದವಾಗಿ ಉಳಿಯುವುದು
ಅವಳ ಕಳಂಕ ಮಾಸಿಹೋಗದು.
27 : ಆಗ ಇತರರಿಗೆ ಗೊತ್ತಾಗುವುದು:
“ದೇವರ ಭಯಭಕ್ತಿಗಿಂತ ಉತ್ತಮವಾದುದು
ಯಾವುದೂ ಇಲ್ಲ
ಸರ್ವೇಶ್ವರನ ಆಜ್ಞೆಗಳಿಗೆ ಗಮನಕೊಡು
ವುದಕ್ಕಿಂತ ಮಧುರವಾದುದು ಇಲ್ಲ,” ಎಂದು.