ಕನ್ನಡ ಕಥೋಲಿಕ ಬೈಬಲ್
1 : ಕುಡುಕನಾದ ಕೆಲಸಗಾರನು
ಧನವಂತನಾಗನು
ಸಣ್ಣ ವಿಷಯಗಳನ್ನು ತಾತ್ಸಾರ ಮಾಡುವವನು
ಕ್ರಮೇಣ ಬಿದ್ದುಹೋಗುವನು.
2 : ಮದ್ಯವೂ ಮಹಿಳೆಯೂ ವಿನಾಶಕಾರಿ
ವಿವೇಕಿಗಳಿಗೆ,
ನಾಚಿಕೆಗೇಡು ಸೂಳೆಯ ಸಹವಾಸ
ಮಾಡುವವನಿಗೆ.
3 : ಅಂಥವನು ನುಸಿಹುಳುಗಳ ಪಾಲಾಗುವನು
ಆ ನಾಚಿಕೆಗೀಡಾದವನು ನಾಶವಾಗುವನು.
4 : ಹರಟೆ
ಬೇಗನೇ ನಂಬುವುದು ಹಗುರ ಮನಸ್ಸಿನ
ಲಕ್ಷಣ
ಪಾಪಮಾಡುವವನು ತನಗೆ ತಾನೆ
ತಂದುಕೊಳ್ಳುವನು ನಾಶನ.
5 : ಪಾಪದಲ್ಲಿ ಹಿಗ್ಗುವವನು
ದಂಡನೆಗೆ ಗುರಿಯಾಗುವನು.
6 : ಹರಟೆಮಾತನ್ನು ಹೇಸುವವನಿಗೆ
ಕಡಿಮೆಯಾಗುವುದು ತರಕಾರು ತಂಟೆ.
7 : ನಿನಗೆ ಕೇಳಿಸಿದ್ದನು ಹೇಳಬೇಡ
ಇನ್ನೊಬ್ಬನ ಮುಂದೆ
ಅದರಿಂದ ನಿನಗೆಂದಿಗೂ ಆಗದು ಕೊರತೆ.
8 : ಅದು ಸ್ನೇಹಿತನ ವಿಷಯವಾಗಿರಲಿ, ವೈರಿಯ
ವಿಷಯವಾಗಿರಲಿ ತಿಳಿಸಬೇಡ
ತಿಳಿಸದಿರುವುದು ಪಾಪವಾದರೆ ಹೊರತು
ಬಯಲು ಮಾಡಬೇಡ.
9 : ನೀನಾಡುವುದನ್ನು ಕೇಳಿ ಗುರುತಿಟ್ಟು
ಕೊಂಡವರು
ಸಮಯ ಒದಗಿದಾಗ ನಿನ್ನನು ದ್ವೇಷಿಸುವರು.
10 : ಗಾಳಿಸುದ್ದಿಯನು ಕೇಳಿರುವಿಯೋ
ಅದು ಸಾಯಲಿ ನಿನ್ನೊಂದಿಗೆ
ಹೆದರಬೇಡ; ಅದು ಸಿಡಿಯಾಗದು ನಿನ್ನ
ಒಡಲಿಗೆ.
11 : ಮೂರ್ಖನು ಪ್ರಸವವೇದನೆಯ ಸ್ತ್ರೀಯಂತೆ
ವೇದನೆಪಡುತ್ತಾನೆ ಆ ಒಂದು ಸುದ್ದಿಗೆ.
12 : ಮೂರ್ಖನ ಒಡಲಿಗೆ ಬಿದ್ದಾ ಮಾತು
ತೊಡೆಗೆ ತಾಕಿಕೊಂಡ ಬಾಣದ ಮೊನಚು.
13 : ಕೇಳಿದ್ದೆಲ್ಲವನ್ನು ನಂಬದಿರು
ನಿನ್ನ ಸ್ನೇಹಿತನನ್ನು ವಿಚಾರಿಸು; ಅವನು
ಅಲ್ಲದ್ದೇನೂ ಮಾಡಿರಲಿಕ್ಕಿಲ್ಲ
ಒಂದು ವೇಳೆ ಮಾಡಿದ್ದರೆ, ಬುದ್ಧಿಹೇಳು;
ಪುನಃ ಅವನು ಹಾಗೆ ಮಾಡುವುದಿಲ್ಲ.
14 : ನಿನ್ನ ನೆರೆಯವನನ್ನು ವಿಚಾರಿಸು; ಅವನು
ಅಲ್ಲದ್ದೇನೂ ಹೇಳಿರಲಿಕ್ಕಿಲ್ಲ
ಒಂದು ವೇಳೆ ಹೇಳಿದ್ದರೆ, ಬುದ್ಧಿಹೇಳು;
ಪುನಃ ಅವನು ಹಾಗೆ ಹೇಳುವುದಿಲ್ಲ.
14 : ನಿನ್ನ ನೆರೆಯವನನ್ನು ವಿಚಾರಿಸು; ಅವನು
ಅಲ್ಲದ್ದೇನೂ ಹೇಳಿರಲಿಕ್ಕಿಲ್ಲ
ಒಂದು ವೇಳೆ ಹೇಳಿದ್ದರೆ, ಬುದ್ಧಿಹೇಳು;
ಪುನಃ ಅವನು ಹಾಗೆ ಹೇಳುವುದಿಲ್ಲ.
15 : ನಿನ್ನ ಸ್ನೇಹಿತನನ್ನು ವಿಚಾರಿಸು; ನೀನು ಕೇಳಿದ್ದು
ಚಾಡಿ ಮಾತಾಗಿರಬಹುದು
ಒಂದು ವೇಳೆ ಚಾಡಿ ಹೇಳಿದ್ದರೆ, ಬುದ್ಧಿ ಹೇಳು;
ನೀ ಕೇಳಿದ್ದೆಲ್ಲವನು ನಂಬಬಾರದು.
16 : ತಪ್ಪು ಮಾಡುವುದು ಸಹಜ; ಆದರೆ
ಉದ್ದೇಶಪೂರ್ವಕವಾಗಿ ಅಲ್ಲ
ತನ್ನ ನಾಲಗೆಯಿಂದ ತಪ್ಪು ಮಾಡದವನು
ಯಾರೂ ಇಲ್ಲ.
17 : ನೆರೆಯವನಿಗೆ ನೀಡು ಎಚ್ಚರಿಕೆ,
ಬೆದರಿಕೆ ಹಾಕುವ ಪ್ರಸಂಗ ಬರುವ ಮುನ್ನ
ಕೋಪಿಸಿಕೊಳ್ಳದೆ, ಪರಾತ್ಪರನ ನಿಯಮಕ್ಕೆ
ಬಿಡು ಸಮಸ್ಯೆಯನ್ನು.
18 : ಸುಜ್ಞಾನದ ಗುರುತು
ಸರ್ವೇಶ್ವರನಿಗೆ ಭಯಪಡುವುದೇ
ಕರುಣೆಗೆ ನಾಂದಿ
ಸುಜ್ಞಾನಿಗೆ ದೊರಕುವುದು ಪ್ರೀತಿ.
19 : ಸರ್ವೇಶ್ವರನ ಆಜ್ಞೆಗಳನ್ನು ಕಲಿತವರು
ಪಡೆವರು ಜೀವದಾಯಕ ಶಿಕ್ಷಣವನ್ನು
ಆತನ ಇಷ್ಟಾರ್ಥ ನೆರವೇರಿಸುವವರು,
ಪಡೆವರು ಅಮರಜೀವ ವೃಕ್ಷದ ಫಲವನ್ನು.
20 : ಎಲ್ಲಾ ಜ್ಞಾನವು ಅಡಗಿರುತ್ತದೆ
ಸರ್ವೇಶ್ವರನ ಭಯಭಕ್ತಿಯಲ್ಲಿ
ಎಲ್ಲಾ ಜ್ಞಾನವು ಲಭ್ಯವಾಗುತ್ತದೆ
ಧರ್ಮಶಾಸ್ತ್ರದ ಅನುಸರಣೆಯಲ್ಲಿ.
21 : ‘ನೀವು ಹೇಳಿದ್ದನ್ನು ನಾನು ಮಾಡುವುದಿಲ್ಲ’
ಎನ್ನುತ್ತಾನೆ ಆಳು ದಣಿಗೆ
ಅನಂತರ ಆ ಆಳು ಮಾಡಿದರೂ
ಕಾರಣನಾಗುತ್ತಾನೆ ದಣಿಯ ಕೋಪಕ್ಕೆ.
22 : ಕೆಟ್ಟದ್ದರ ತಿಳುವಳಿಕೆ ನಿಜವಾದ ಜ್ಞಾನವಲ್ಲ
ಪಾಪಾತ್ಮರ ಯೋಚನೆಯಲ್ಲಿ ವಿವೇಕ
ಇರುವುದಿಲ್ಲ.
23 : ಕೇಡು ಮಾಡುವುದರಲ್ಲಿರುವ ಜಾಣತನ
ಹೇಯವಾದುದೇ
ಜ್ಞಾನಹೀನನಾಗಿರುವುದೂ ಮೂರ್ಖತನವೇ.
24 : ಬುದ್ಧಿವಂತನಾಗಿದ್ದು ಧರ್ಮಶಾಸ್ತ್ರವನ್ನು
ಮೀರುವುದಕ್ಕಿಂತಲೂ
ಅಲ್ಪ ತಿಳುವಳಿಕೆಯಿಂದಿದ್ದು ದೇವರಿಗೆ
ಭಯಪಡುವುದೇ ಲೇಸು.
25 : ಸೂಕ್ಷ್ಮವಾದ ಕುಯುಕ್ತಿ ಒಂದಿದೆ;
ಅದು ಅನ್ಯಾಯವಾದುದೇ
ತಮಗೆ ಬೇಕಾದ ತೀರ್ಪನು ಗಿಟ್ಟಿಸಿಕೊಳ್ಳಲು
ನಿರ್ದಯೆಯಿಂದ ವರ್ತಿಸುವವರಿದ್ದಾರೆ.
26 : ದುಷ್ಟನು ತಲೆತಗ್ಗಿಸಿಕೊಂಡು ನಿಲ್ಲುವನು
ಖಿನ್ನವದನದಿಂದ
ಅವನ ಅಂತರಂಗ ತುಂಬಿಕೊಂಡಿರುವುದು
ಮೋಸದಿಂದ.
27 : ಅವನು ತಲೆತಗ್ಗಿಸಿಕೊಂಡು ಕಿವುಡನಂತೆ
ನಟಿಸುತ್ತಾನೆ
ಅವನನ್ನು ಪತ್ತೆಹಚ್ಚದಿದ್ದರೆ, ಅಷ್ಟರಲ್ಲೇ
ನಿನಗೆ ಮೋಸಮಾಡುತ್ತಾನೆ.
28 : ಪಾಪಮಾಡನವನು ಶಕ್ತಿ ಸಾಲದಿದ್ದಾಗ
ಖಂಡಿತ ಮಾಡುವನದನ್ನು ಅವಕಾಶ ಸಿಕ್ಕಿದಾಗ.
29 : ಮನುಷ್ಯನ ಸ್ವಭಾವ ವ್ಯಕ್ತವಾಗುವುದು
ಅವನ ತೋರಿಕೆಯಿಂದ
ಅವನು ಜ್ಞಾನಿಯಾಗಿದ್ದರೆ, ಅದು
ಗೊತ್ತಾಗುವುದು ಮುಖಚರ್ಯೆಯಿಂದ.
30 : ಮನುಷ್ಯನು ಎಂಥವನೆಂಬುದನು ಅರಿಯುವೆ
ಅವನ ಉಡುಗೆ ತೊಡುಗೆ,
ನಗು ನಡಿಗೆಗಳಿಂದಲೆ.