ಕನ್ನಡ ಕಥೋಲಿಕ ಬೈಬಲ್
1 : ಸರ್ವೇಶ್ವರ ಮನುಷ್ಯನನ್ನು
ಮಣ್ಣಿನಿಂದ ಸೃಷ್ಟಿಸಿದರು
ಪುನಃ ಮಣ್ಣಿಗೇ ಅವನು ಸೇರುವಂತೆ
ಮಾಡಿದರು.
2 : ಮಾನವನಿಗೆ ನಿಯಮಿತ ಕಾಲಗಳನ್ನೂ
ದಿನಗಳನ್ನೂ ನೇಮಿಸಿದರು
ಭೂಮಿಯ ಮೇಲಿರುವ ಸಕಲದರ ಮೇಲೆ
ಅವನಿಗೆ ಅಧಿಕಾರ ವಹಿಸಿದರು.
3 : ತಮ್ಮ ಪ್ರತಿರೂಪದಲ್ಲಿಯೇ ಮಾನವನನ್ನು
ಸೃಷ್ಟಿಸಿದರು
ಅವನಿಗೆ ಬೇಕಾದ ಶಕ್ತಿಯನು ಅನುಗ್ರಹಿಸಿದರು.
4 : ಮಾಡಿದರು ಎಲ್ಲಾ ಜೀವಿಗಳು ಮನುಷ್ಯನಿಗೆ
ಭಯಪಡುವಂತೆ
ಅಂತೆಯೇ ಮನುಷ್ಯನು ಪಶುಪಕ್ಷಿಗಳ ಮೇಲೆ
ಒಡೆತನ ಮಾಡುವಂತೆ.
5 : ಪಂಚೇಂದ್ರಿಯಗಳನ್ನು ಸರ್ವೇಶ್ವರ
ಮನುಷ್ಯನಿಗೆ ದಯಪಾಲಿಸಿದರು
ಆರನೇದಾಗಿ, ತನ್ನ ಬುದ್ಧಿಶಕ್ತಿಯಲ್ಲಿ ಅವನು
ಪಾಲುಗಾರನನ್ನಾಗಿ ಮಾಡಿದರು
ಇವುಗಳನ್ನೆಲ್ಲಾ ವಿಚಾರಿಸಿ ಗ್ರಹಿಸಿಕೊಳ್ಳಲು
ಏಳನೇ ವರವನ್ನು ನೀಡಿದರು.
6 : ಇದಲ್ಲದೆ, ತಿಳಿದುಕೊಳ್ಳಲು ಅವರಿಗೆ
ಬುದ್ಧಿಮತಿಯನ್ನು ನೀಡಿದರು
ನಾಲಗೆ, ಕಣ್ಣು, ಕಿವಿ, ಹೃದಯಗಳನು
ದಯಪಾಲಿಸಿದರು.
7 : ಜ್ಞಾನವನ್ನೂ ಅರಿವನ್ನೂ ಅವನಲ್ಲಿ
ತುಂಬಿಸಿದರು
ಒಳ್ಳೆಯದು ಕೆಟ್ಟದು ಯಾವುದೆಂಬುದನ್ನು
ವಿವೇಚಿಸುವಂತೆ ಮಾಡಿದರು.
8 : ತನ್ನ ಕಾರ್ಯಗಳ ಮಹತ್ವವನ್ನು ಅವನಿಗೆ
ತೋರಿಸಬೇಕೆಂದು
ಇರಿಸಿದರು ಅವನ ಅಂತಃಕರಣದ ಮೇಲೆ
ತಮ್ಮ ದೃಷ್ಟಿಯನು.
9 : ತಮ್ಮ ಈ ಎಲ್ಲ ಕಾರ್ಯಗಳನು ಮನುಷ್ಯ
ಹೊಗಳುವಂತೆ
ಅನುಗ್ರಹಿಸಿದರು ಸೌಲಭ್ಯವನ್ನು ಅವನಿಗೆ.
10 : ವಂದಿಸುವರು ಜನರು ಆತನ
ಪವಿತ್ರ ನಾಮವನು
ಹೊಗಳುವರು ಆತನ ಕಾರ್ಯಗಳ
ಮಹಿಮೆಯನು.
11 : ದಯಪಾಲಿಸಿದನಾತ ಅವರಿಗೆ ವಿವೇಕವನು
ಸ್ವಾಸ್ತ್ಯವಾಗಿ ನೀಡಿದನು ಜೀವದಾಯಕ
ಧರ್ಮಶಾಸ್ತ್ರವನು.
12 : ನರರೊಂದಿಗೆ ಮಾಡಿಕೊಂಡನಾತ ಶಾಶ್ವತ
ಒಡಂಬಡಿಕೆಯನು
ತೋರಿಸಿಕೊಟ್ಟನು ಅವರಿಗೆ ತನ್ನ
ವಿಧಿವಚನಗಳನು.
13 : ಮಾನವರ ಕಣ್ಣುಗಳು ಕಂಡವು ಆತನ
ಮಹಿಮೆಯ ಪ್ರಭಾವವನು
ಅವರ ಕಿವಿಗಳು ಕೇಳಿದವು ಆತನ
ಧ್ವನಿಯ ಗಾಂಭೀರ್ಯವನು.
14 : ‘ಎಲ್ಲಾ ದುಷ್ಟಕಾರ್ಯಗಳ ಬಗ್ಗೆ ಎಚ್ಚರಿಕೆ’
ಎಂದು ವಿಧಿಸಿದನಾತ
ನೆರೆಯವನನ್ನು ಕುರಿತ ನಿಯಮವನು
ಆಜ್ಞಾಪಿಸಿದನಾತ.
15 : ಸರ್ವೇಶ್ವರಸ್ವಾಮಿಯೇ ನ್ಯಾಯಾಧೀಶ
ಮನುಷ್ಯರ ಮಾರ್ಗಗಳಿವೆ ನಿತ್ಯವೂ
ದೇವರ ಎದುರಿಗೆ
ಅವು ಮರೆಯಾಗಿರಲಾರವು ಆತನ ದೃಷ್ಟಿಗೆ.
16 : ಬಾಲ್ಯದಿಂದಲೇ ಕೇಡಿಗೆ ಒಯ್ಯುತ್ತವೆ
ಮಾನವರ ಮಾರ್ಗಗಳು
ಅವುಗಳಿಂದಾಗದು ಕಲ್ಲು ಹೃದಯವನ್ನು
ಮಾಂಸದ ಹೃದಯವನ್ನಾಗಿ ಮಾಡಲು.
17 : ಒಬ್ಬೊಬ್ಬ ದೊರೆಯನ್ನು ನೇಮಿಸಿದನಾತ
ಸಕಲ ರಾಷ್ಟ್ರಗಳಿಗೆ
ತಾನೇ ದೊರೆಯಾದನು ಇಸ್ರಯೇಲರಿಗೆ.
18 : ಇಸ್ರಯೇಲೇ ಆತ ಶಿಸ್ತಿನಿಂದ ಬೆಳೆಸುವ
ಚೊಚ್ಚಲು ಮಗನು
ಅವನನ್ನು ನಿರಾಕರಿಸದೆ ನೀಡುವನವನಿಗೆ
ಪ್ರೀತಿಯ ಬೆಳಕನ್ನು.
19 : ಆತನ ಮುಂದೆ ಅವರ ಕಾರ್ಯಗಳೆಲ್ಲ
ಸೂರ್ಯನ ಬೆಳಕಿನಂತೆ
ಆತನ ದೃಷ್ಟಿಯಿರುವುದು ಸದಾ ಅವರ
ಮಾರ್ಗಗಳ ಮೇಲೆ.
20 : ಮರೆಯಾಗಿಲ್ಲ ಆತನಿಗೆ ಅವರ
ಅಧರ್ಮಗಳೆಲ್ಲ
ಆತನ ಎದುರಿನಲ್ಲಿವೆ ಅವರ ಪಾಪಗಳೆಲ್ಲ.
21 : ಸರ್ವೇಶ್ವರ ಒಳ್ಳೆಯವರು,
ತಮ್ಮ ಸೃಷ್ಟಿಗಳನ್ನು ಕೈ ಬಿಡುವುದಿಲ್ಲ;
ಬದಲಿಗೆ ಅವುಗಳನ್ನು ಕಾಪಾಡುವರು,
ತೊರೆದುಬಿಡುವುದಿಲ್ಲ.
22 : ಮನುಜರು ಮಾಡುವ ದಾನಧರ್ಮ,
ಆತನಿಗೆ ಮುದ್ರಯುಂಗುರದಂತೆ;
ಅವರ ಸತ್ಕಾರ್ಯಗಳನ್ನು ಕಾಪಾಡುವನು,
ಕಣ್ಣುಗುಡ್ಡೆಯಂತೆ.
23 : ತದನಂತರ ಆತನೆದ್ದು ಅವರಿಗೆ ಕೊಡುವನು
ಸಂಭಾವನೆಯನ್ನು
ಹೊರಿಸುವನು ಅವರ ಮೇಲೆ ಅವರವರ
ಪ್ರತಿಫಲವನ್ನು.
24 : ಮನಪರಿವರ್ತನೆ
ತನ್ನಲ್ಲಿಗೆ ಬರಗೊಡಿಸುವನು ಪಶ್ಚಾತ್ತಾಪ
ಪಡುವವನನ್ನು
ಸಂತೈಸುವನು ತಾಳ್ಮೆಗೆಡುತ್ತಿರುವವರನ್ನು.
25 : ಸರ್ವೇಶ್ವರನ ಕಡೆ ತಿರುಗಿಕೊಂಡು, ಪಾಪವನ್ನು
ತೊರೆದುಬಿಡು;
ಆತನನ್ನು ಪ್ರಾರ್ಥಿಸಿ, ಅಪರಾಧಗಳ
ಅಡ್ಡಿಯನ್ನು ಕಡಿಮೆಮಾಡು.
26 : ಮಹೋನ್ನತನ ಕಡೆ ಹಿಂದಿರುಗಿ,
ಅಧರ್ಮವನ್ನು ಬಿಡು
ಅಸಹ್ಯ ಕೃತ್ಯಗಳನ್ನು ಸಂಪೂರ್ಣವಾಗಿ
ಹಗೆಮಾಡು.
27 : ಜೀವಿಸುತ್ತಾ ಮಹೋನ್ನತನಿಗೆ ಉಪಕಾರ
ಸ್ತುತಿಮಾಡುವವರನ್ನು ಬಿಟ್ಟರೆ
ಪಾತಾಳದಲ್ಲಿ ಆತನಿಗೆ
ಸ್ತುತಿಹಾಡುವವರಾರಿದ್ದಾರೆ?
28 : ಕೃತಜ್ಞತಾಸ್ತುತಿ ಇರುವುದಿಲ್ಲ ಜೀವಿಸದೆ
ಇದ್ದವನಲ್ಲಿ
ಅಂತೆಯೇ ಅದು ಲಯವಾಗುತ್ತದೆ
ಮೃತರಾದವರಲ್ಲಿ
ಸರ್ವೇಶ್ವರನ ಸ್ತುತಿಗೈವನು ಜೀವಂತನು
ಹಾಗು ಆರೋಗ್ಯಶಾಲಿ.
29 : ನಮ್ಮ ದೇವರಾದ ಸರ್ವೇಶ್ವರನ ಕೃಪೆ
ಎಷ್ಟು ಘನವಾದುದು
ಶುದ್ಧರಾಗಿ ಆತನ ಕಡೆ ತಿರುಗುವವರ ಮೇಲೆ
ಆತನ ಕನಿಕರ ಎಷ್ಟು ವಿಶೇಷವಾದುದು !
30 : ಸರ್ವವೂ ಇರಲಾರದು ಮನುಷ್ಯ
ಮಾತ್ರದವರಲ್ಲಿ
ಕಾರಣ, ಅಮರತ್ವವು ಇಲ್ಲ ಅವರಲ್ಲಿ.
31 : ಸೂರ್ಯನಿಗಿಂತ ಪ್ರಕಾಶಮಾನವಾದುದು
ಏನಿದೆ?
ಆದರೂ ಅದರ ಬೆಳಕು ಕುಂದುತ್ತದೆ
ಕೆಡುಕನ ಆಲೋಚನೆ ಕೇವಲ ರಕ್ತಮಾಂಸದಂತಿದೆ.
32 : ದೇವರ ದೃಷ್ಟಿಯಲ್ಲಿವೆ ಉನ್ನತಾಕಾಶದ
ಶಕ್ತಿಗಳು
ನರಮಾನವರೆಲ್ಲರು ಕೇವಲ ಮಣ್ಣು –
ಬೂದಿಯು.