ಕನ್ನಡ ಕಥೋಲಿಕ ಬೈಬಲ್
1 : ದೇವರಿಗೆ ಭಯಪಡುವವನೇ ಹೀಗೆ
ಮಾಡುವವನು
ಧರ್ಮನಿಷ್ಟೆಯುಳ್ಳವನು ಸುಜ್ಞಾನವನ್ನು
ಪಡೆಯುವನು.
2 : ಅದು ಅವನನ್ನು ಸೇರಿಕೊಳ್ಳುವುದು
ತಾಯಿಯಂತೆ
ಅವನಿಗೆ ಉಪಚಾರಮಾಡುವುದು ತರುಣ
ಸತಿಯಂತೆ.
3 : ಅವನಿಗೆ ವಿವೇಕವೆಂಬ ಅನ್ನವನ್ನು
ಉಣ್ಣಕೊಡುವುದು
ಜ್ಞಾನಜಲವನ್ನು ಕುಡಿಯಕೊಡುವುದು.
4 : ಅವನು ಅದರಲ್ಲಿ ನೆಲೆಗೊಂಡಿರುವನು,
ಕದಲುವುದಿಲ್ಲ;
ಅದನ್ನೇ ಆತುಕೊಂಡಿರುವವನು,
ಆಶಾಭಂಗಪಡುವುದಿಲ್ಲ.
5 : ಅವನ ನೆರೆಮನೆಯವರಿಗಿಂತಲೂ ಹೆಚ್ಚಾಗಿ
ಅದು ಅವನನ್ನು ಮೇಲಕ್ಕೆತ್ತುವುದು
ಸಭಾಮಧ್ಯದಲ್ಲಿ ಅವನು ಬಾಯಿತೆರೆಯುವಂತೆ
ಮಾಡುವುದು.
6 : ಅವನು ಆನಂದ ಆಮೋದಗಳನ್ನು
ಹೊಂದುವನು
ಚಿರಕಾಲ ಹೆಸರುವಾಸಿಯಾಗಿ ಬಾಳುವನು.
7 : ಅದನ್ನು ಹೊಂದಲಾರರು ಮಂದಮತಿಗಳು
ಅದನ್ನು ಕಾಣುವುದೇ ಇಲ್ಲ ಪಾಪಾತ್ಮರು.
8 : ಅಹಂಕಾರಕ್ಕೆ ಅದು ಬಲು ದೂರ
ಸುಳ್ಳುಗಾರರು ಅದನ್ನು ಸ್ಮರಿಸುವುದೇ ಇಲ್ಲ.
9 : ಪಾಪಾತ್ಮನ ಬಾಯಿಂದ ಹೊರಟ ಸ್ತುತಿ
ಇಂಪಾಗಿರುವುದಿಲ್ಲ
ಏಕೆಂದರೆ ಅದು ಅವನಿಗೆ ದೇವರಿಂದ
ಬಂದುದಲ್ಲ.
10 : ಜ್ಞಾನದಿಂದ ಮಾಡಿದ ಸ್ತುತಿ ಇಂಪು
ಅದನ್ನು ವೃದ್ಧಿಗೊಳಿಸುವರು ದೇವರು.
11 : ‘ನನ್ನ ಪಾಪಕ್ಕೆ ದೇವರೇ ಕಾರಣ’ ಎಂದು
ಕೊಳ್ಳಬೇಡ
ಅವರು ಹಗೆಮಾಡುವುದನ್ನು ನೀನು
ನಡೆಸಬೇಡ.
12 : ‘ತಪ್ಪುಮಾಡುವಂತೆ ನನಗೆ ದಾರಿ ತಪ್ಪಿಸಿದವರು
ದೇವರೇ’ ಎನ್ನಬೇಡ
ಏಕೆಂದರೆ ಪಾಪಾತ್ಮರ ನೆರವು ದೇವರಿಗೆ
ಬೇಕಾಗಿಲ್ಲ.
13 : ಸರ್ವೇಶ್ವರ ಪ್ರತಿಯೊಂದು ಹೀನಕೃತ್ಯವನ್ನು
ದ್ವೇಷಿಸುತ್ತಾರೆ
ಆತನಿಗೆ ಭಯಪಡುವವರು ಕೂಡ
ಅದನ್ನು ಹೀನೈಸುತ್ತಾರೆ.
14 : ಆದಿಯಲ್ಲಿ ದೇವರು ಮನುಷ್ಯನನ್ನು
ಸೃಷ್ಟಿಸಿದರು
ಸ್ವಂತ ಇಚ್ಛಾನುಸಾರ ನಡೆಯಲು
ಅವನನ್ನು ಬಿಟ್ಟರು.
15 : ನೀನು ಇಚ್ಛಿಸಿದೆಯಾದರೆ ಆತನ ಆಜ್ಞೆಗಳನ್ನು
ಅನುಸರಿಸಿ ನಡೆವೆ
ಹೀಗೆ ನಂಬಿಗಸ್ಥನಾಗಿ ದೇವರ ಚಿತ್ತಾನುಸಾರ
ಬಾಳುವೆ.
16 : ನಿನ್ನ ಮುಂದೆ ಇಟ್ಟಿರುವರು ಬೆಂಕಿಯನ್ನು
ಹಾಗು ನೀರನ್ನು
ನೀನು ಆಯ್ದುಕೊಳ್ಳಬಹುದು ನಿನಗೆ
ಬೇಕಾದುದನ್ನು.
17 : ಜೀವನ್ಮರಣಗಳು ಇರಿಸಲಾಗಿವೆ ಮನುಷ್ಯನ
ಎದುರಿನಲ್ಲೆ
ಅವನು ಇಷ್ಟಪಟ್ಟದ್ದನ್ನು ಕೊಡಲಾಗುವುದು
ಅವನಿಗೆ.
18 : ಏಕೆಂದರೆ ದೇವರ ಜ್ಞಾನ ಅಪರಿಮಿತ
ಆತ ಅಪೂರ್ವ ಬಲವಂತ, ಎಲ್ಲವನು
ವೀಕ್ಷಿಸುವಂಥವ.
19 : ದೇವರಿಗೆ ಭಯಪಡುವವರ ಮೇಲಿದೆ
ಆತನ ಕೃಪಾಕಟಾಕ್ಷ
ಮನುಷ್ಯನು ಮಾಡುವ ಪ್ರತಿಯೊಂದೂ
ಆತನಿಗೆ ವ್ಯಕ್ತ.
20 : ದುರುಳನಾಗೆಂದು ದೇವರು ಯಾರಿಗೂ
ಆಜ್ಞಾಪಿಸಲಿಲ್ಲ,
ಪಾಪಮಾಡಲು ಯಾರಿಗೂ ಅನುಮತಿ
ಕೊಟ್ಟಿಲ್ಲ.