ಕನ್ನಡ ಕಥೋಲಿಕ ಬೈಬಲ್
1 : ನಿಜವಾದ ಆನಂದ
ಧನ್ಯನು ! ತನ್ನ ಮಾತಿನಲಿ
ಜಾರದವನು;
ಅವನು ಪಶ್ಚಾತ್ತಾಪದ ಅವಶ್ಯಕತೆ
ಇಲ್ಲದವನು.
2 : ಧನ್ಯನು ! ತನ್ನ ಮನಸ್ಸಾಕ್ಷಿಯಿಂದ
ದೋಷಾರೋಪಣೆ ಹೊಂದದವನು;
ಸರ್ವೇಶ್ವರನಲ್ಲಿಟ್ಟ ನಿರೀಕ್ಷೆಯಿಂದ ಆತ
ತಪ್ಪಿಬೀಳನು.
3 : ಐಶ್ವರ್ಯ ತಕ್ಕುದಲ್ಲ ಜಿಪುಣನಿಗೆ
ಹಣತೆಗೆದುಕೊಂಡರೆ ಪ್ರಯೋಜನವಿಲ್ಲ
ಸ್ವಾರ್ಥಿಗೆ.
4 : ತನ್ನನ್ನು ತಾನೇ ಸವೆಸಿ ಕೂಡಿಡುವವನು,
ಕೂಡಿಡುತ್ತಾನೆ ಪರರಿಗಾಗಿ
ಅವರು ದುಂದುವೆಚ್ಚ ಮಾಡುತ್ತಾರೆ
ಅವನ ಆಸ್ತಿಯನ್ನೇ ಬಳಸಿ.
5 : ತನಗೆ ತಾನೇ ಜಿಪುಣನಾಗಿರುವವನು
ಯಾರಿಗೆ ತಾನೆ ಉದಾರಿಯಾಗಿರುತ್ತಾನೆ?
ತನ್ನ ಸ್ವಂತ ಆಸ್ತಿಯಿಂದ ತಾನಾದರು
ಸುಖಪಡುತ್ತಾನೆಯೇ?
6 : ತನಗೆ ತಾನೆ ಜಿಪುಣನಾಗಿರುವವನಿಗಿಂತ
ನೀಚನಿಲ್ಲ
ಇದು ಅವನ ದುಷ್ಟತನದ ಫಲ !
7 : ಇಂಥವನು ಒಳ್ಳೆಯದನ್ನು ಮಾಡಿದರೆ,
ಅದು ಆಕಸ್ಮಿಕ
ಕಡೆಗೆ ತನ್ನ ದುಷ್ಟತನವನ್ನು ಬಯಲು
ಮಾಡುವುದು ದಿಟ.
8 : ಮತ್ಸರವುಳ್ಳವನ ಕಣ್ಣು ಕೆಟ್ಟದು
ಇತರರನ್ನು ಹೀಯಾಳಿಸುವನವನು,
ಮುಖ ತಿರುವಿಕೊಂಡು.
9 : ಜಿಪುಣನ ಕಣ್ಣಿಗೆ ಎಷ್ಟೇ ಇದ್ದರೂ ತೃಪ್ತಿಯಿಲ್ಲ
ಜಿಪುಣತನದಿಂದ ಒಣಗಿಹೋಗುವುದು
ಅವನ ಅಂತರಂಗ.
10 : ಕೆಟ್ಟ ಕಣ್ಣುಳ್ಳವನು ಅನ್ನದಲ್ಲಿಯೂ ಜಿಪುಣನು
ಅವನು ಹೊಟ್ಟೆಗೆ ಸರಿಯಾಗಿ ಉಣ್ಣನು.
11 : ಮಗನೇ, ನಿನ್ನ ಯೋಗ್ಯತೆಯ ಪ್ರಕಾರ
ಸುಖವಾಗಿರು
ಸರ್ವೇಶ್ವರನಿಗೆ ಯೋಗ್ಯವಾದ ಕಾಣಿಕೆ
ಸಲ್ಲಿಸುತ್ತಿರು.
12 : ನೆನೆಸಿಕೊ, ಸಾವು ಬರಲು ವಿಳಂಬ
ಮಾಡುವುದಿಲ್ಲವೆಂದು
ಸಾವಿನ ಸಮಯ ನಿನಗೆ ತಿಳಿದಿಲ್ಲವೆಂದು.
13 : ಸ್ನೇಹಿತರಿಗೆ ಸಹಾಯಮಾಡು
ನೀನು ಸಾಯುವುದರೊಳಗಾಗಿ
ಅವರಿಗೆ ಕೈಯೆತ್ತಿಕೊಡು ನಿನ್ನ ಶಕ್ತಿಗೆ
ಅನುಸಾರವಾಗಿ.
14 : ಒಳ್ಳೆಯ ದಿನದ ಸುಖವನ್ನು
ಕಳೆದುಕೊಳ್ಳಬೇಡ
ಯೋಗ್ಯ ಮನದಾಶೆಯು ಓರೆಯಾಗಿ
ಹೋಗಲು ಬಿಡಬೇಡ.
15 : ನಿನ್ನ ದುಡಿಮೆಯ ಫಲವನ್ನು ಇನ್ನೊಬ್ಬರಿಗೆ
ಬಿಡಬೇಕಾಗುತ್ತದಲ್ಲವೆ?
ನಿನ್ನ ಕಷ್ಟದ ಫಲವನ್ನು ಪರರು
ಹಂಚಿಕೊಳ್ಳುವರಲ್ಲವೆ?
16 : ಕೊಡು, ಕೊಳ್ಳು; ಹೀಗೆ ಸಂತೋಷಪಡಿಸು
ನಿನ್ನ ಮನವನ್ನು
ಹುಡುಕಲಾಗದು ಮೃತ್ಯುಲೋಕದಲ್ಲಿ
ಮೃಷ್ಟಾನ್ನವನ್ನು.
17 : ಎಲ್ಲ ಜೀವಿಗಳೂ ಮುಪ್ಪಾಗುವುವು ವಸ್ತ್ರದಂತೆ
ಆದಿಯಿಂದ ಇರುವ ಒಪ್ಪಂದವೆಂದರೆ
‘ನೀ ಸತ್ತೇ ಸಾಯುವೆ’ ಎಂಬುದೆ.
18 : ಬೆಳೆದ ಮರದೆಲೆಗಳಲ್ಲಿ ಕೆಲವು ಉದುರುತ್ತವೆ,
ಕೆಲವು ಚಿಗುರುತ್ತವೆ
ರಕ್ತಮಾಂಸದ ಪ್ರಾಣಿಗಳಲ್ಲೂ ಒಂದು
ಗತಿಸುತ್ತದೆ, ಮತ್ತೊಂದು ಜನಿಸುತ್ತದೆ.
19 : ಮಾನವ ಕೈಕೃತಿಗಳೆಲ್ಲ ಅಳಿದುಹೋಗುತ್ತವೆ
ಜೀರ್ಣವಾಗಿ
ಅವುಗಳನ್ನು ಮಾಡಿದವನೂ ಹೋಗುತ್ತಾನೆ
ಲಯವಾಗಿ.
20 : ಸುಜ್ಞಾನಿಗಳ ಸಂತಸ
ಧನ್ಯನು ! ಸುಜ್ಞಾನದ ಬಗ್ಗೆ ಧ್ಯಾನಿಸುವವನು
ಧನ್ಯನು ! ವಿವೇಕದಿಂದ ಮಾತಾಡುವವನು.
21 : ಸುಜ್ಞಾನದ ಮಾರ್ಗಗಳನ್ನು ಮನನ
ಮಾಡುವವನು
ಅದರ ರಹಸ್ಯಗಳನ್ನು ಕಂಡುಕೊಳ್ಳುವನು.
22 : ಹೆಜ್ಜೆಯ ಜಾಡು ಹಿಡಿದು ಹೋಗುವವನಂತೆ
ಅದನ್ನು ಬೆನ್ನಟ್ಟಿಹೋಗುವನು
ಅದು ಹೋಗುವ ಮಾರ್ಗದಲ್ಲಿ ಅದಕ್ಕಾಗಿ
ಹೊಂಚಿಕೊಂಡಿರುವನು.
23 : ಸುಜ್ಞಾನದ ಕಿಟಕಿಯಲ್ಲಿ ಆತ ಇಣಿಕಿ
ನೋಡಬಲ್ಲನು
ಅದರ ಬಾಗಿಲಲ್ಲಿಯೂ ನಿಂತು ಆಲಿಸಬಲ್ಲನು.
24 : ಸುಜ್ಞಾನದ ಮನೆಯ ಪಕ್ಕದಲ್ಲಿ ತಂಗುವವನು
ಅದರ ಗೋಡೆಯಲ್ಲಿ ಮೊಳೆಯನ್ನು
ಜಡಿಯಬಲ್ಲನು;
25 : ಸುಜ್ಞಾನದ ನೆರೆಯಲ್ಲಿ ಗುಡಾರವನ್ನು
ಕಟ್ಟುವವನು
ಸೌಭಾಗ್ಯವಿದ್ದಲ್ಲಿಯೇ ಇಳಿದುಕೊಳ್ಳುವನು.
26 : ತನ್ನ ಮಕ್ಕಳನ್ನು ಅದರ ಆಶ್ರಯದಲ್ಲಿರಿಸುವನು
ಅದರ ಕೊಂಬೆಗಳ ಕೆಳಗೆ ವಸತಿಮಾಡುವನು.
27 : ಬಿಸಿಲು ತಗಲದಂತೆ ಅದರ ನೆರಳಿನಲ್ಲಿರುವನು
ಅದರ ಪ್ರಭಾವದಲ್ಲಿ ತಂಗುವನು.