ಕನ್ನಡ ಕಥೋಲಿಕ ಬೈಬಲ್
1 : ಮೋಸದ ವೇಷ
ಸುಜ್ಞಾನಿಯಾದ ದೀನನು ತಲೆಯೆತ್ತಿ
ನಿಲ್ಲುವನು
ಮಹಾಪುರುಷರ ಮಧ್ಯೆ ಆಸೀನನಾಗಲು
ಅರ್ಹನಾಗುವನು.
2 : ಒಬ್ಬನ ಚೆಲುವಿನ ನೋಟಕ್ಕಾಗಿ ಅವನನ್ನು
ಹೊಗಳಬೇಡ
ಒಬ್ಬನ ಹೊರನೋಟವನ್ನೆ ಮುಂದಿಟ್ಟು
ಹೀನೈಸಬೇಡ.
3 : ರೆಕ್ಕೆಯುಳ್ಳವುಗಳಲ್ಲಿ ಚಿಕ್ಕದು ಜೇನುಹುಳ
ಆದರೆ ಸಿಹಿಗಳಲ್ಲಿ ಸಿಹಿ ಅದರ ಫಲ.
4 : ಉಡುಗೆತೊಡುಗೆಗಳಲ್ಲಿ ಹೆಚ್ಚಳಪಡಬೇಡ
ಕೀರ್ತಿ ಪ್ರತಿಷ್ಟೆ ಬಂದಾಗ ಉಬ್ಬಿಕೊಳ್ಳಬೇಡ.
ಕಾರಣ, ದೇವರ ಕಾರ್ಯಗಳು ಅಗಾಧ
ಮಾನವರಿಗೆ ಅವು ಅಗೋಚರ.
5 : ಪ್ರಭುಗಳನೇಕರು ನೆಲದ ಮೇಲೆ ಪವಡಿಸಿಹರು
ಗಣನೆಗೆ ಬಾರದವರು ಕಿರೀಟಧಾರಿಗಳು
ಆಗಿಹರು.
6 : ಬಲವಂತರನೇಕರು ನಾಚಿಕೆಗೀಡಾಗಿಹರು
ಘನವಂತರನೇಕರು ಇತರರ ಕೈವಶವಾಗಿಹರು.
7 : ಆಲೋಚನೆ-ಪರಿಶೀಲನೆ
ದೂಷಣೆ ಮಾಡಬೇಡ ಯಾವುದನ್ನೂ
ತೂಗಿನೋಡುವ ತನಕ
ಬೇಕಾದರೆ ಗದರಿಸು ಸಂಪೂರ್ಣವಾಗಿ
ಅರಿತುಕೊಂಡನಂತರ.
8 : ಹೇಳಿದ ಮಾತನ್ನು ಕೇಳಿ ತಿಳಿದುಕೊಳ್ಳುವ
ತನಕ ಉತ್ತರಿಸಬೇಡ
ಒಬ್ಬನು ಮಾತನಾಡುತ್ತಿರುವಾಗಲೇ
ಬಾಯಿ ತೆರೆಯಬೇಡ.
9 : ನಿನಗೆ ಸಂಬಂಧವಿಲ್ಲದ ಚರ್ಚೆಯಲ್ಲಿ
ತಲೆಹಾಕಬೇಡ
ದುರುಳರು ನ್ಯಾಯಕ್ಕೆ ಕೂರುವಾಗ
ಅವರ ಜೊತೆ ಕೂರಬೇಡ.
10 : ಮಗನೇ, ಕೈಹಾಕಬೇಡ ಕಂಡಕಂಡ ಕೆಲಸಗಳಿಗೆ
ಕೇಡು ತಪ್ಪದು ಅನೇಕ ಕೆಲಸಗಳಿಗೆ
ಕೈ ಹಾಕುವವರಿಗೆ;
ನೀನವುಗಳನ್ನು ಹಿಮ್ಮೆಟ್ಟದಿದ್ದರೆ ಏನನ್ನೂ
ಸಾಧಿಸಲಾರೆ
ಬಿಟ್ಟು ಓಡಿದರೆ ಅವುಗಳಿಂದ ತಪ್ಪಿಸಿ
ಕೊಳ್ಳಲಾರೆ.
11 : ದೇವರಲ್ಲಿ ಭರವಸೆ
ಒಬ್ಬನು ದುಡಿಯುತ್ತಾನೆ; ಕಷ್ಟಪಡುತ್ತಾನೆ
ಅವಸರಪಡುತ್ತಾನೆ; ಎಷ್ಟು ಮಾಡಿದರೂ
ಕೊರತೆಯಿಂದಿರುತ್ತಾನೆ;
12 : ಇನ್ನೊಬ್ಬನು ಮಂಕುತಿಮ್ಮ,
ಇತರರ ಸಹಾಯದ ಅಗತ್ಯವುಳ್ಳವನು
ಆತನು ಬಲಹೀನನು ಹಾಗು ದಟ್ಟದರಿದ್ರನು;
ಸರ್ವೇಶ್ವರನ ಕಟಾಕ್ಷ ಬೀಳುತ್ತದೆ ಅವನ ಮೇಲೆ
ಹೀನಸ್ಥಿತಿಯಿಂದ ಮೇಲುಸ್ಥಿತಿಗೆ ಅವನನ್ನು
ಏರಿಸುತ್ತದೆ.
13 : ಅದು ಮಾಡುತ್ತದೆ ನಾಲ್ಕು ಜನರಲ್ಲಿ
ಅವನು ತಲೆಯೆತ್ತಿ ನಡೆವಂತೆ
ಅನೇಕರು ಅವನನ್ನು ಕಂಡು
ಆಶ್ಚರ್ಯಪಡುವಂತೆ.
14 : ಜಯ, ಅಪಜಯ, ಜೀವ, ಸಾವು
ಸರ್ವೇಶ್ವರನಿಂದಲೇ
ಬಡತನ, ಸಿರಿತನ ಎಲ್ಲವು ಆತನಿಂದಲೇ.
15 : ಜ್ಞಾನ, ತಿಳುವಳಿಕೆ, ಧರ್ಮಶಾಸ್ತ್ರದ ಅರಿವು
ಸರ್ವೇಶ್ವರನಿಂದಲೆ
ಪ್ರೀತಿ, ಸತ್ಕಾರ್ಯವೆಸಗುವ ಆಸಕ್ತಿ ಸಹ,
ಆತನಿಂದಲೆ.
16 : ಮೂರ್ಖತನ, ಕತ್ತಲು ಇರುವುವು
ಪಾಪಿಗಳೊಂದಿಗೆ
ಕೇಡಿನಲ್ಲಿ ನಲಿವವನಲ್ಲಿ ಅವು ಇರುವುವು
ಮುಪ್ಪಿನವರೆಗೆ.
17 : ದೇವರ ವರ ನೆಲೆಗೊಳ್ಳುವುದು ಸದ್ಭಕ್ತರಲ್ಲಿ
ಆತ ಮೆಚ್ಚುವಂಥಾದ್ದು ವೃದ್ಧಿಯಾಗುವುದು
ಸತತವಾಗಿ.
18 : ಒಬ್ಬನು ದುಡಿದು ದುಡಿದು ಗಂಟಿಕ್ಕಿ
ಸಿರಿವಂತನಾಗಬಹುದು
ಇಂಥವನ ಪಾಲಿಗೆ ಬರತಕ್ಕ ಪ್ರತಿಫಲ
ಹೀಗಿರುವುದು:
19 : ‘ನನಗೆ ಬಂತು ನೆಮ್ಮದಿ, ಈಗ
ಅನುಭವಿಸುವೆ ಆಸ್ತಿ’ ಎಂದರೂ
Wಳಿಯದು ಅವನಿಗೆ ಅದು ಎಷ್ಟು ಕಾಲ
ಇರುವುದೆಂದು
ಅದನ್ನು ಇತರರಿಗೆ ಬಿಟ್ಟು ತಾನು
ಸಾಯಬೇಕೆಂದು.
20 : ನೀನು ಕೈಗೊಂಡ ಕಾರ್ಯದಲಿ ಸ್ಥಿರವಾಗಿರು,
ನಿರತನಾಗಿರು
ಹಳಬನಾಗುವವರೆಗೂ ಅದನ್ನೆ
ಮಾಡುತ್ತಿರು.
21 : ಪಾಪಾತ್ಮರ ಕಾರ್ಯಗಳನ್ನು ಕಂಡು ಆಶ್ಚರ್ಯ
ಪಡದಿರು;
ದೇವರನ್ನು ನಂಬಿ, ನಿನ್ನ ಕಾರ್ಯದಲಿ
ನಿರತನಾಗಿರು;
ಆತನಿಗೆ ಕಠಿಣವೇನೂ ಅಲ್ಲ, ಬಡವನನ್ನು
ಬಲ್ಲಿದವನನ್ನಾಗಿಸಲು ಕ್ಷಣಮಾತ್ರದೊಳು.
22 : ದೇವರ ಆಶೀರ್ವಾದವಿದೆ
ಭಕ್ತರಿಗೆ ದೊರಕುವ ಫಲದಲ್ಲಿ
ಆ ಆಶೀರ್ವಾದವನ್ನು ಬೆಳಗಿಸುವನಾತ
ಒಂದೇ ಕ್ಷಣದಲ್ಲಿ.
23 : ‘ನನ್ನ ಬಾಳಿನಿಂದ ಪ್ರಯೋಜನವೇನು?’
ಎಂದು ಹೇಳದಿರು
‘ಮುಂದೆ ನನಗೆ ಬರುವ ಗತಿಯೇನು?’
ಎಂದು ಕೊರಗದಿರು.
24 : ಅಂತೆಯೇ, ‘ಸಾಕಷ್ಟು ಆಸ್ತಿ ನನಗಿದೆ’ ಎಂದು
ಆಡಿಕೊಳ್ಳಬೇಡ
‘ಇನ್ನು ಮುಂದೆ ನನಗೆ ಯಾವ ಕೊರತೆ?’
ಎಂದು ಉಬ್ಬಿಕೊಳ್ಳಬೇಡ.
25 : ಸುಖಕಾಲದಲ್ಲಿ ದುಃಖದ ನೆನಪಾಗುವುದಿಲ್ಲ
ವಿಪತ್ಕಾಲದಲ್ಲಿ ಸುಖದ ನೆನಪಾಗುವುದಿಲ್ಲ.
26 : ಮರಣದ ವೇಳೆಯಲ್ಲಿ ದೇವರಿಗೆ ಅತಿ
ಸುಲಭವಾಗಿರುವುದು
ಮನುಷ್ಯನ ನಡತೆಗೆ ಸರಿಯಾದ
ಪ್ರತಿಫಲವೀಯಲು.
27 : ವಿಪತ್ತು ಸಂತೋಷವನ್ನೆ ಮರೆಯಿಸಿ
ಬಿಡುತ್ತದೆ ಒಂದೇ ಗಳಿಗೆಯಲ್ಲಿ
ಮನುಷ್ಯನ ಕಾರ್ಯಗಳೆಲ್ಲ ಬಯಲಿಗೆ
ಬೀಳುವುವು ಅಂತ್ಯಕಾಲದಲ್ಲಿ.
28 : ಒಬ್ಬನನ್ನು ಧನ್ಯನೆನಬೇಡ ಅವನು
ಸಾಯುವುದಕ್ಕೆ ಮೊದಲೇ
ಅವನೆಂಥವನೆಂಬುದು ತಿಳಿದು ಬರುವುದು
ಅವನ ಮಕ್ಕಳಿಂದಲೆ.
29 : ಪ್ರತಿಯೊಬ್ಬನನ್ನು ಕರೆದು ತರಬೇಡ
ಮನೆಯೊಳಗೆ
ಯುಕ್ತಿ ಬಹಳವಾಗಿರುವುದು ವಂಚಕನಿಗೆ.
30 : ಕೆಡುಕರ ಬಗ್ಗೆ ಎಚ್ಚರಿಕೆ
ಗರ್ವಿಯು ಆತ್ಮ ಪಂಜರದಲ್ಲಿರುವ
ಕವುಜುಗ ಹಕ್ಕಿಯಂತೆ
ಅವನು ನಿನ್ನ ಅಳಿವಿಗಾಗಿ ಹೊಂಚುಹಾಕುತ್ತಾನೆ.
ಗೂಢಾಚಾರನಂತೆ;
31 : ಹೊಂಚಿಕೊಂಡಿರುವನವನು ಒಳ್ಳೆಯದನ್ನು
ಕೆಟ್ಟದ್ದನ್ನಾಗಿಸಲು
ಸ್ತುತ್ಯಾರ್ಹವಾದುದನ್ನು ಖಂಡನೆಗೆ ಒಳಪಡಿಸಲು.
32 : ಕಿಡಿಯೊಂದರಿಂದ ಹೊತ್ತಿಕೊಳ್ಳುವುದು
ದೊಡ್ಡ ಬೆಂಕಿ
ಅಧರ್ಮಿ ಹೊಂಚಿಕೊಂಡೇ ಇರುವನು
ರಕ್ತಪಾತಕ್ಕಾಗಿ.
33 : ಕೆಡುಕನ ವಿಷಯದಲ್ಲಿ ಎಚ್ಚರಿಕೆ!
ಕಾರಣ, ಅವನು ಮಾಡುವುದೆಲ್ಲ ಕೆಡುಕೇ
ಅಂಥವನು ನಿತ್ಯಕಳಂಕ ಹಚ್ಚಾನು ನಿನಗೆ!
34 : ಮನೆಯಲ್ಲಿ ಇಟ್ಟುಕೊಳ್ಳಬೇಡ
ಅಪರಿಚಿತನನ್ನು
ಅವನು ಇಲ್ಲಸಲ್ಲದ ಗದ್ದಲವನ್ನು
ಎಬ್ಬಿಸಿಯಾನು
ನಿನಗೂ ನಿನ್ನವರಿಗೂ ಮನಸ್ತಾಪ
ಹುಟ್ಟಿಸಿಯಾನು.