ಕನ್ನಡ ಕಥೋಲಿಕ ಬೈಬಲ್
1 : ಸುಜ್ಞಾನವೆಂಬಾಕೆ ಸಂಪೂರ್ಣ
ಶಕ್ತಿಯಿಂದ ಸರಿಯುವಳು
ಜಗದ ಒಂದು ಕಡೆಯಿಂದ ಇನ್ನೊಂದು
ಕಡೆಯವರೆಗು,
ಅನುಕೂಲಕರವಾಗಿಯೆ ನಡೆಸುವಳು
ಎಲ್ಲವನು.
2 : ಯೌವನಾರಭ್ಯ ಸುಜ್ಞಾನಿಯನ್ನೆ ಪ್ರೀತಿಸಿ
ಅರಸಿದೆ
ಅವಳನ್ನೇ ಸಹಧರ್ಮಿಣಿಯನ್ನಾಗಿಸಿಕೊಳ್ಳ
ಬಯಸಿದೆ
ಅವಳ ಚೆಲುವಿಗೆ ಮರುಳಾಗಿ
ಮನಸೋತು ಹೋದೆ.
3 : ಆಕೆ ವಾಸಮಾಡುತ್ತಾಳೆ ದೇವರ ಸಂಗಡ
ಎಂದೇ ತನ್ನ ಕುಲೀನತೆಯ ಬಗ್ಗೆ ಆಕೆಗೆ
ಹೆಚ್ಚಳ
ಸರ್ವಕ್ಕೂ ಒಡೆಯನಾದ ದೇವರಿಗೆ
ಆಕೆಯ ಮೇಲೆ ಒಲವರ.
4 : ಆಕೆ ದೇವಜ್ಞಾನದಲ್ಲಿ
ದೀಕ್ಷೆಹೊಂದಿದವಳು
ಆತನ ಕಾರ್ಯಗಳನ್ನು ಆತನಿಗಾಗಿ
ಆಯ್ಕೆ ಮಾಡುವಳು.
5 : ಜೀವನದಲ್ಲಿ ಸಿರಿಸಂಪತ್ತು
ಇಷ್ಟಾರ್ಥವಾದುದಾದರೆ
ಸರ್ವವನು ಮಾಡುವ ಸುಜ್ಞಾನಕ್ಕಿಂತ
ಮಿಗಿಲಾದ ಸಿರಿ ಯಾವುದಿದೆ?
6 : ವಿವೇಕವು ಕಾರ್ಯಸಾಧಿಸಬಲ್ಲುದಾದರೆ
ಸರ್ವನಿರ್ಮಾಣಿಕಳಾದ ಈಕೆಯಿಲ್ಲದೆ
ವಿವೇಕವೆಲ್ಲಿದೆ?
7 : ಯಾವನಾದರು ನ್ಯಾಯನೀತಿಯನ್ನು
ಪ್ರೀತಿಸುವುದಾದರೆ
ಸದ್ಗುಣಗಳು ಸುಜ್ಞಾನದ ಪರಿಶ್ರಮದ
ಫಲಗಳೇ ಅಲ್ಲವೆ?
ಚಿತ್ತಸ್ವಾಸ್ಥ್ಯ, ವಿವೇಕ, ನೀತಿ, ಧೈರ್ಯ
ಇವುಗಳನ್ನು ಕಲಿಸುತ್ತಾಳೆ
ಬಾಳಿನಲ್ಲಿ ಇವಕ್ಕಿಂತ ಲಾಭಕರವಾದುದು
ಯಾವುದಿದೆ ನರರಿಗೆ?
8 : ಮಾನವನು ಹೆಚ್ಚಿನ ಅನುಭವವನ್ನು
ಬಯಸುವುದಾದರೆ
ಸುಜ್ಞಾನ ಹಿಂದಿನ ವಿಷಯಗಳನ್ನು
ಅರಿತವಳಾಗಿದ್ದಾಳೆ
ಮುಂದಿನವುಗಳನ್ನು ಊಹಿಸಿ
ಹೇಳಬಲ್ಲವಳಾಗಿದ್ದಾಳೆ
ಮಾತಿನ ಚಮತ್ಕಾರ ಹಾಗು ಒಗಟಿನ
ಒಳಾರ್ಥವನ್ನೂ ತಿಳಿದಿದ್ದಾಳೆ;
ಪೂರ್ವಸಂಕೇತಗಳ, ಅದ್ಭುತಗಳ, ಕಾಲ
ಋತುಗಳ ಮುನ್ನರಿವು ಅವಳಿಗಿದೆ.
9 : ಆದುದರಿಂದ ಆಕೆ ನನಗೆ ಸದಾಲೋಚನೆ
ಕೊಡುವಳು
ಚಿಂತೆವ್ಯಸನಗಳಲ್ಲಿ ಸಂತೈಸುವಳು
ಎಂದು ತಿಳಿದು
ನನ್ನ ಜೊತೆಯಲ್ಲೇ ವಾಸಿಸುವಂತೆ
ಕರೆದುಕೊಳ್ಳಲು ನಿಶ್ಚಯಿಸಿದೆ.
10 : ಆಕೆಯ ನಿಮಿತ್ತ ನಾ ಹೊಂದಿದೆ
ಗೌರವವನು ಜನಸಮುದಾಯದಲಿ
ಕಿರಿಯವನಾಗಿದ್ದರೂ ಪಡೆದೆ ಸನ್ಮಾನ
ಹಿರಿಯರ ದೃಷ್ಟಿಯಲಿ.
11 : ತೀರ್ಪುಕೊಡುವಾಗ ಚುರುಕು
ಬುದ್ಧಿಯುಳ್ಳವನಾಗಿರುವೆ
ಅಧಿಪತಿಗಳ ಮುಂದೆ ಶ್ಲಾಘನೆ
ಪಡೆದುಕೊಳ್ಳುವೆ.
12 : ನಾ ಮೌನದಿಂದಿರುವಾಗ ಅವರು
ನನಗಾಗಿ ಕಾದಿರುವರು
ನಾ ಮಾತಾಡುವಾಗ ನನ್ನ ಕಡೆಗೆ
ಗಮನ ಕೊಡುವರು
ಮಾತು ಮುಂದುವರಿಸಿದಾಗ ಬಾಯಮೇಲೆ
ಕೈಯಿಟ್ಟುಕೊಳ್ಳುವರು!
13 : ಆಕೆಯ ನಿಮಿತ್ತವೇ ನನಗೆ
ಪ್ರಾಪ್ತವಾಗುವುದು ಅಮರತ್ವ
ನನ್ನ ಹಿಂದೆ ಬರುವವರಿಗೆ ನಾ ಬಿಟ್ಟು
ಹೋಗುವೆನು ಚಿರಸ್ಮಾರಕ.
14 : ನಾನಾಳುವೆನು ಜನಗಳನ್ನು
ನನಗೊಳಗಾಗುವರು ಜನಾಂಗಗಳು.
15 : ಭೀಕರ ಅರಸುಗಳೂ ನನಗಂಜುವರು
ನನ್ನ ವಿಷಯ ಕೇಳಿ
ನಾ ಕಾಣಿಸಿಕೊಳ್ಳುವೆ ಒಳ್ಳೆಯವನಾಗಿ,
ಯುದ್ಧಪರಾಕ್ರಮಿಯಾಗಿ.
16 : ನಾನು ವಿಶ್ರಮಿಸಿಕೊಳ್ಳುವೆ ಆಕೆಯೊಂದಿಗೆ
ಮನೆ ಸೇರಿ
ಬಿರುಸುತನವಿಲ್ಲ ಅವಳ ಒಡನಾಟದಲ್ಲಿ,
ನೋವಿಲ್ಲ ಸಹವಾಸದಲ್ಲಿ
ಆನಂದವಿದೆ, ಸಂತೋಷವಿದೆ ಅವಳ
ಜೊತೆಯಲ್ಲಿ.
17 : ಸುಜ್ಞಾನ ಸಂಬಂಧದಲ್ಲಿ ಅಮರತ್ವ,
ಆಕೆಯ ಸ್ನೇಹದಲ್ಲಿ ಆನಂದ
ಅವಳ ಕೈಕೆಲಸಗಳಿಂದ ಎಂದೂ ಅಳಿಯದ
ಸಿರಿತನ
ಅವಳ ಸಂಭಾಷಣಾ ಶಕ್ತಿಯಿಂದ
ಜ್ಞಾನವಿವೇಕ
ಅವಳ ನುಡಿಬಳಕೆಯಿಂದ ಸುಕೀರ್ತಿ ಗೌರವ.
18 : ಇವುಗಳನ್ನೆಲ್ಲಾ ಮನಸ್ಸಿನಲ್ಲಿ
ಆಲೋಚಿಸಿಕೊಂಡು
ತಿರುಗಿದೆ ಆಕೆಯನು ಸಂಪಾದಿಸುವ
ಮಾರ್ಗಹುಡುಕಿಕೊಂಡು.
19 : ಮಗುವಾಗಿದ್ದಾಗ ನಾನು ಚೆಲುವಾಗಿದ್ದೆ
ನನ್ನ ಆತ್ಮವೂ ಚೆನ್ನಾಗಿತ್ತು ನನ್ನ ಅದೃಷ್ಟಕ್ಕೆ.
20 : ನಾನು ಸದ್ಗುಣಿಯಾಗಿದ್ದುದರಿಂದ
ನನಗೆ ದೊರಕಿತು ನಿಷ್ಕಳಂಕ ದೇಹ.
21 : ದೇವರು ಕೊಟ್ಟ ಹೊರತು ಸುಜ್ಞಾನ
ದೊರಕದೆಂದು ಮನಗಂಡೆ
ಅದು ಯಾರ ಕೊಡುಗೆಯೆಂದು ತಿಳಿವುದೇ
ಜ್ಞಾನವಿವೇಕವಲ್ಲವೆ?
ಎಂದೇ ದೇವರನ್ನು ಬೇಡಿಕೊಂಡೆ,
ಮನಸಾರೆ ಹೀಗೆಂದುಕೊಂಡೆ:
ಸುಜ್ಞಾನಕ್ಕಾಗಿ ಪ್ರಾರ್ಥನೆ