ಕನ್ನಡ ಕಥೋಲಿಕ ಬೈಬಲ್
1 : ಕನಿಕರವಿಲ್ಲದಾ ಕೋಪ
ದುರುಳರನು ಕಾಡಿತು
ಕೊನೆಯವರೆಗೂ
ದೇವಾ, ಮೊದಲೇ ನೀವು ಅರಿತಿದ್ದಿರಿ
ಅವರು ಮಾಡುವುದೇನೆಂಬುದನು.
2 : ನಿಮ್ಮ ಜನರಿಗೆ ನಾಡನು ಬಿಟ್ಟುಹೋಗಲು
ಅನುಮತಿಕೊಟ್ಟು
ತ್ವರಿತವಾಗಿ ಹೋಗಬೇಕೆಂದು ಅವರನು
ಬೀದಿಗೆ ಅಟ್ಟಿಬಿಟ್ಟು
ಮತ್ತೆ ಮನಬದಲಾಯಿಸಿಕೊಂಡು
ಅವರನು ಬೆನ್ನಟ್ಟುವರೆಂದು ನಿಮಗೆ
ತಿಳಿದಿತ್ತು.
3 : ಈಜಿಪ್ಟರು ಸತ್ತವರ ಸಮಾಧಿ ಬಳಿ
ಕಣ್ಣೀರಿಡುತ್ತಾ ಶೋಕಾಚರಣೆಯಲ್ಲಿ
ಇದ್ದಾಗಲು
ಹುಚ್ಚು ಯೋಜನೆಯೊಂದನು
ಮಾಡಿಕೊಂಡರು:
ಯಾರನು ಬೇಡಿಕೊಂಡರೋ ಬಿಟ್ಟು
ಹೋಗಬೇಕೆಂದು
ಅವರನೇ ಬೆನ್ನಟ್ಟಿದರು
ಓಡಿಹೋದರೆಂದು.
4 : ಯಾವ ದಂಡನೆಗೆ ಅವರು
ಪಾತ್ರರಾಗಿದ್ದರೋ
ಅದೇ ದಂಡನೆ ಅವರನ್ನೆಳೆದು ತಂದಿತು
ಈ ಕಡೆಗೆ:
ಈವರೆಗೆ ಅನುಭವಿಸಿದ್ದೆಲ್ಲವನು
ಮರೆವಂತೆ ಮಾಡಿತು.
ಇನ್ನೂ ಕಡಿದಾದ ಶಿಕ್ಷೆಯನು
ಸವಿಯುವಂತೆ ಮಾಡಿತು.
5 : ನಿಮ್ಮ ಜನರು ಅದ್ಭುತಕರ ಮಾರ್ಗದಲಿ
ನಡೆದು ಹೋಗುವಂತಾಯಿತು
ಶತ್ರುಗಳು ವಿಚಿತ್ರ ಮರಣವನು
ಅನುಭವಿಸುವಂತಾಯಿತು.
ದೇವಜನರ ವಿಮೋಚನೆ
6 : ನಿಮ್ಮ ದಾಸರು ದೇವಾ,
ಹಾನಿಗೀಡಾಗದಂತೆ
ತಲೆಬಾಗಿತು ಸಮಗ್ರ ಸೃಷ್ಟಿ
ನಿಮ್ಮ ಆಜ್ಞೆಗೆ
ಬದಲಾಯಿಸಿಕೊಂಡಿತು
ತನ್ನ ಸಹಜ ರೂಪವನೆ.
7 : ಪಾಳೆಯಕ್ಕೆ ನೆರಳು ನೀಡಲು ಮೇಘ
ಕವಿಯಿತು
ಜಲರಾಶಿಯಿದ್ದಲ್ಲಿ ಒಣನೆಲವು
ಮೇಲೆದ್ದಿತು
ಕೆಂಪು ಸಮುದ್ರದ ನಡುವೆ ಸುರಕ್ಷಿತ
ಹೆದ್ದಾರಿ ಕಾಣಿಸಿತು
ಮೊರೆಯುತ್ತಿದ್ದ ಅಲೆಗಳ ಮಧ್ಯೆ
ಹುಲ್ಲುಗಾವಲುಂಟಾಯಿತು.
8 : ಒಂದೇ ಸಮೂಹದಂತೆ ನಿಮ್ಮ
ಹಸ್ತಾಶ್ರಯ ಪಡೆದ ಜನರು
ನಾನಾ ಅದ್ಭುತ ಕಾರ್ಯಗಳನು ನೋಡಿ,
ಆ ಸಮುದ್ರವನೆ ದಾಟಿದರು.
9 : ತಮ್ಮನ್ನು ಬಿಡುಗಡೆ ಮಾಡಿದ ನಿಮ್ಮನು
ಹೇ ಸರ್ವೇಶ್ವರಾ, ಕೊಂಡಾಡಿದರು
ಕುರಿಮರಿಗಳಂತೆ ಕುಣಿದಾಡಿದರು,
ಬಿಚ್ಚಿದ ಕುದುರೆಗಳಂತೆ ಓಡಾಡಿದರು.
10 : ನೆನಪಿಗೆ ತಂದುಕೊಂಡರು ತಮ್ಮ
ಪ್ರವಾಸಕಾಲದಲಿ ನಡೆದವುಗಳನು
ದನಕರುಗಳಿಗೆ ಬದಲಾಗಿ ಮಿಡಿತೆಗಳನಿತ್ತ
ಭೂಮಿಯನು
ಮೀನುಗಳಿಗೆ ಪ್ರತಿಯಾಗಿ ಕಪ್ಪೆಗಳನಿತ್ತ
ನದಿಯನು.
11 : ಬಳಿಕ ಮೃಷ್ಟಾನ್ನವನು ಕೋರಿಕೊಳ್ಳಲು
ಕಾಣಿಸಿಕೊಂಡವು ಹೊಸತರದ ಹಕ್ಕಿಗಳು.
12 : ಅವರ ಆಶೆಯನು ಪೂರೈಸಲು
ಸಮುದ್ರದಿಂದೇರಿ ಬಂದವು ಲಾವಕ್ಕಿಗಳು.
ಶತ್ರುಗಳಿಗಾದ ಶಿಕ್ಷೆ
13 : ದುರುಳರ ಮೇಲಾದರೋ ಎರಗಿತು
ದಂಡನೆ
ಎರಗಿತದು ಗುಡುಗಿನಂಥ ಅಬ್ಬರದ
ಮುಂಗುರುತೊಡನೆ.
ಅತಿಥಿಗಳ ಸಂಗಡ ಹಗೆತನದಿಂದ
ನಡೆದುಕೊಂಡದ್ದರಿಂದ
ಅನುಭವಿಸಿದರವರು ನ್ಯಾಯವಾದ ಕಷ್ಟ,
ಆ ದುಷ್ಟತನದ ನಿಮಿತ್ತ.
14 : ಸೊದೋಮಿನವರು ಸೇರಿಸಿಕೊಳ್ಳಲಿಲ್ಲ
ಪರಕೀಯರು ಬಂದಾಗ
ಈಜಿಪ್ಟಿನವರಾದರೋ ಗುಲಾಮರನ್ನಾಗಿಸಿ
ಕೊಂಡರು ಹಿತೈಷಿಗಳು ಬಂದಾಗ.
15 : ಪರಕೀಯರನು ಶತ್ರುಗಳಂತೆ
ಭಾವಿಸಿದ್ದರಿಂದ
ಶಿಕ್ಷೆಗೆ ಗುರಿಯಾದರವರು ನಾನಾ
ವಿಧದಿಂದ.
16 : ಇವರಾದರೋ ತಮಗೆ ಸಮಾನ
ಹಕ್ಕಿನವರನು
ಮೊದಲು ಸಂತಸದಿಂದ
ಬರಮಾಡಿಕೊಂಡರಾದರು
ತರುವಾಯ ಭಯಂಕರವಾಗಿ ಹಿಂಸಿಸಿದರು.
17 : ನೀತಿವಂತನ ಮನೆಯ ಮುಂದೆ
ಸೊದೋಮಿನವರು ದೃಷ್ಟಿಹೀನರಾದಂತೆ
ಪ್ರತಿಯೊಬ್ಬನು ಬಾಗಿಲ ಮೂಲಕ
ದಾರಿಹುಡುಕುತ್ತಾ ತಡವರಿಸಿದಂತೆ
ಇವರನು ಕಾರ್ಗತ್ತಲು ಆವರಿಸಿ
ಗುರಿಪಡಿಸಿತು ದೃಷ್ಟಿಹೀನತೆಗೆ.
ದೇವರ ಅದ್ಭುತ ಶಕ್ತಿ
18 : ಕಿನ್ನರಿಯ ತಂತಿಗಳು ರಾಗದ ಧಾಟಿಯನು
ಬದಲಾಯಿಸುವಂತೆ
ಪಂಚಭೂತಗಳು ಮಾರ್ಪಡಿಸಿಕೊಂಡವು
ತಮ್ಮ ಗುಣಲಕ್ಷಣಗಳನೆ
ಇದ ಗಮನಿಸಬಹುದು ಸಂಭವಿಸಿದ
ಘಟನೆಗಳಲೆ.
19 : ಭೂಚರ ಪ್ರಾಣಿಗಳಾದವು ಜಲಚರ
ಪ್ರಾಣಿಗಳಾಗಿ
ಜಲಚರ ಪ್ರಾಣಿಗಳು ಮಾರ್ಪಟ್ಟವು
ಭೂಚರ ಪ್ರಾಣಿಗಳಾಗಿ.
20 : ಬೆಂಕಿ ಸ್ವಾಭಾವಿಕವಾಗಿ ಉರಿಯಿತು
ನೀರಿನಲ್ಲೂ
ನಂದಿಸುವ ತನ್ನ ಗುಣಧರ್ಮವನಾ ನೀರು
ಮರೆತುಬಿಟ್ಟಿತು.
21 : ಜ್ವಾಲೆಗಳು ಸುಡಲಿಲ್ಲ ತಮ್ಮೊಳು
ನಡೆದಾಡಿದಾ ಮೃದು ದೇಹಗಳನು
ಕರಗಿಸಲಿಲ್ಲ ಮಂಜಿನಂತೆ ಸುಲಭವಾಗಿ
ಕರಗಬಲ್ಲ ಅಮೃತಾಹಾರವನು.
22 : ಸರ್ವೇಶ್ವರಾ, ಎಲ್ಲ ವಿಧದಲು ಉದ್ಧರಿಸಿ
ಘನಪಡಿಸಿದಿರಿ ನಿಮ್ಮ ಜನರನು
ಉಪೇಕ್ಷಿಸದೆ ಅವರಿಗೆ ನೆರವಾದಿರಿ,
ಎಲ್ಲಾ ಕಾಲದಲು, ಸ್ಥಳದಲು.