ಕನ್ನಡ ಕಥೋಲಿಕ ಬೈಬಲ್
1 : ನಿಮ್ಮ ನ್ಯಾಯವಿಧಿಗಳು ದೇವಾ,
ಮಹತ್ತರವಾದುವು
ವಿವರಿಸಲು ಕಷ್ಟ ಸಾಧ್ಯವಾದುವು.
ಎಂದೇ, ಅಶಿಕ್ಷಿತ ಆತ್ಮಗಳು ಅಡ್ಡಹಾದಿ
ಹಿಡಿವುವು.
2 : ದುರುಳರು ಪವಿತ್ರ ಜನಾಂಗವನು
ಅಧೀನದಲ್ಲಿರಿಸಿದ್ದೇವೆಂದು
ಭಾವಿಸಿದರು.
ಆದರೆ ತಾವೇ ಕಾರ್ಗತ್ತಲಿನ
ಸೆರೆಯಾಳಾದರು,
ಭೀಕರ ಇರುಳಿನ ಖೈದಿಗಳಾದರು.
3 : ತಮ್ಮ ಗುಪತ್ತಪಾಪಗಳನು ಯಾರು ಪತ್ತೆ
ಹಚ್ಚಾರೆಂದುಕೊಂಡಿದ್ದರು
ಮರೆವು ಎಂಬ ಕಪ್ಪಾದ ತೆರೆಯು ಅವರನು
ಮುಚ್ಚಿಕೊಂಡಿತ್ತು.
ಆದರೆ ಭಯಂಕರ ದರ್ಶನಗಳ ನಿಮಿತ್ತ
ಕಂಗೆಟ್ಟು ದಿಗಿಲುಗೊಂಡರು.
4 : ಆ ಭಯದಿಂದ ತಪ್ಪಿಸಿ ಕಾಪಾಡಲಿಲ್ಲ
ಅವರನು ಸೆರೆಹಿಡಿದಿದ್ದಾ ಗುಪ್ತಸ್ಥಳವು
ಬದಲಿಗೆ ಕಳವಳಗೊಳಿಸುವ ಸಪ್ಪಳಗಳು
ಕೇಳಿಸಿದವು ಸುತ್ತಲು
ಅವರಿಗೆ ಕಾಣಿಸಿಕೊಂಡವು ಆ ಪ್ರಸನ್ನ
ವಿಕಾರ ಮುಖದ ಬೇತಾಳಗಳು.
5 : ಯಾವ ಬೆಂಕಿಯ ಬಲವೂ ಅವರಿಗೆ ಬೆಳಕು
ನೀಡಲಾರದೆ ಹೋಯಿತು
ಥಳಥಳಿಸುವ ನಕ್ಷತ್ರಗಳ ಜ್ವಾಲೆಗೂ
ಆ ರಾತ್ರಿಯನು ಬೆಳಗಿಸಲಾಗದೆ
ಹೋಯಿತು.
6 : ತಾನಾಗಿಯೇ ಉರಿಯುತ್ತಿದ್ದ ದೊಡ್ಡ
ಪಂಜೊಂದು ಅವರ ಮುಂದಿತ್ತು
ದೃಷ್ಟಿಸಿ ನೋಡಲು ಅಸಾಧ್ಯವಾದಾ
ನೋಟಕ್ಕೆ ಅವರು ಅಳುಕಿದರು
ತಾವು ಕಂಡುದು ಕಾಣುವುದಕ್ಕಿಂತಲೂ
ಭಯಂಕರವಾಗಿದೆ ಎಂದುಕೊಂಡರು.
7 : ಅವರ ಮಂತ್ರವಾದಿಗಳ ಕೈವಾಡವೆಲ್ಲವು
ಕುಸಿದು ಬಿದ್ದಿತು
ಅವರ ತಂತ್ರಮಂತ್ರಗಳಾಂಬರವು
ನಿಂದೆ ಅವಮಾನಕ್ಕೀಡಾಯಿತು.
8 : ಸಂಕಟಪಡುವವರ ಭಯಬಾಧೆಗಳನು
ದೂರವಾಗಿಸುವುದಾಗಿ ಹೇಳಿದ್ದರು
ಆದರೀಗ ತಾವೇ ನಗೆಪಾಟಲಿಗೆ
ಈಡಾಗುವಷ್ಟು ಅಂಜಿಕೊಂಡಿದ್ದರು.
9 : ಅವರನು ಗಾಬರಿಪಡಿಸುವಂಥ
ಘಟನೆ ಯಾವುದು ನಡೆಯದಿದ್ದರೂ
ಕ್ರಿಮಿಕೀಟಗಳ ಹರಿದಾಟಕ್ಕೂ, ಹಾವುಗಳ
ಬುಸುಗುಟ್ಟುವಿಕೆಗೂ ಬೆದರಿದರು.
10 : ಯಾವ ವಿಧದಲ್ಲೂ ತಪ್ಪಿಸಿಕೊಳ್ಳಲಾಗದ
ಗಾಳಿಯನು ಕೂಡ
ನೋಡಲೊಲ್ಲದೆ ನಡುನಡುಗಿ ಸತ್ತರು
ಭಯಭೀತಿಯಿಂದ.
11 : ಮನಸ್ಸಾಕ್ಷಿ ಖಂಡಿಸುವ ದುಷ್ಟತನವು
ಸಹಜವಾಗಿ ತರುತ್ತದೆ ಅಂಜಿಕೆಯನ್ನೇ
ಅದು ಮನಸ್ಸಾಕ್ಷಿಯ ಒತ್ತಡದಿಂದ
ಮುಂದಿಡುತ್ತದೆ ಕೆಟ್ಟದ್ದನ್ನೇ.
12 : ವಿವೇಕ ನೀಡುವ ನೆರವನು ಕೈಬಿಡುವುದು,
ಅಂಜಿಕೆಯೆಂಬುದು ಒಂದೇ ಆಗಿರುವುವು.
13 : ವಿವೇಕದ ಮೇಲಿರುವ ನಂಬಿಕೆಯನು
ಕಳೆದುಕೊಂಡಷ್ಟು
ಕಷ್ಟಗಳಿಗೆ ಕಾರಣ ತಿಳಿಯದಿರುವುದು
ಸಂಕಟವಾಗುವುದು ಮತ್ತಷ್ಟು.
14 : ಶಕ್ತಿಯಿಲ್ಲದ ಬಲಹೀನ ಪಾತಾಳದಿಂದ
ಬಂದ ಆ ಕತ್ತಲಲಿ
ಅವರೆಲ್ಲರು ಒಂದಾಗಿದ್ದರು ಅದೇ
ನಿದ್ರೆಯಲಿ.
15 : ಒಮ್ಮೆ ಭಯಾನಕ ರೂಪಗಳನ್ನು ಕಂಡು
ಬೆಚ್ಚುಬೀಳುತ್ತಿದ್ದರು
ಇನ್ನೊಮ್ಮೆ ಎದೆಗುದಿಯಿಂದ
ಕಳವಳಪಡುತ್ತಿದ್ದರು.
ಅಂಥ ಆಕಸ್ಮಿಕ ಹಾಗು ಅನಿರೀಕ್ಷಿತ ಭಯ
ಅವರ ಮೇಲೆ ಬಂದಿತ್ತು.
16 : ಹೀಗೆ ಪ್ರತಿಯೊಬ್ಬನು ಇದ್ದಲ್ಲಿಯೇ
ಬಿದ್ದುಕೊಂಡಿದ್ದನು
ಕಬ್ಬಿಣದ ಕಂಬಿಗಳಿಲ್ಲದ ಸೆರೆಯಲಿ
ಬಂಧಿತನಾಗಿದ್ದನು.
17 : ರೈತನಾಗಲಿ, ಕುರುಬನಾಗಲಿ, ಅಡವಿ
ಯಲ್ಲಿನ ಆಳಾಗಲಿ, ಎಲ್ಲರು
ತಪ್ಪಿಸಿಕೊಳ್ಳಲಾಗದಂಥ ಬಂಧನವನು
ಅನುಭವಿಸುತ್ತಿದ್ದರು
ಎಲ್ಲರನು ಕತ್ತಲೆಂಬ ಒಂದೇ
ಸರಪಣಿಯಿಂದ ಬಿಗಿಯಲಾಗಿತ್ತು.
18 : ಸಿಳ್ಳು ಗಾಳಿಯಾಗಲಿ, ಹರಿವ ಪ್ರವಾಹದ
ಭೋರ್ಗರೆತವಾಗಲಿ
ಹರಡಿದ ಕೊಂಬೆಗಳ ಮೇಲಿನ ಹಕ್ಕಿಗಳ
ಇಂಚರವಾಗಲಿ,
19 : ಕೆಳಕ್ಕೆ ಉರುಳಿದ ಬಂಡೆಗಳ ಕರ್ಕಶ
ನಾದವಾಗಲಿ
ಕಣ್ಣಿಗೆ ಕಾಣದಂತೆ ಜಿಗಿದು ಓಡಾಡುವ
ಪ್ರಾಣಿಗಳ ಸದ್ದಾಗಲಿ
ಕಾಡುಮೃಗಗಳು ಗೂಳಿಡುವ ಗರ್ಜನೆ ಆಗಲಿ
ಗುಡ್ಡದ ಬಿರುಕುಗಳಿಂದ ಬರುವ
ಮಾರ್ದನಿಯಾಗಲಿ,
ಇವೆಲ್ಲವು ಸಾಕಾಗಿದ್ದವು ಅವರನು
ಮೂರ್ಛೆಗೊಳಿಸಲು ಭಯಹುಟ್ಟಿಸಿ.
20 : ಜಗದ ಬೇರೆ ಕಡೆಯಲ್ಲಾದರೋ
ತಿಳಿಬೆಳಕು ಹರಡಿತ್ತು
ನಿರಾತಂಕ ಕೆಲಸಕಾರ್ಯಗಳಲ್ಲಿ ತೊಡಗಿದ್ದರು
ಜನರೆಲ್ಲರು.
20 : ಇವರ ಮೇಲೆ ಮಾತ್ರ ಕವಿದಿತ್ತು
ಕಾರ್ಗತ್ತಲು
ಮುಂದೆ ಬರಲಿರುವ ಗಾಢಕತ್ತಲ
ಛಾಯೆಯಾಗಿತ್ತದು
ಇವರು ತಮಗೆ ತಾವೇ ಹೊರಲಾಗದ
ಹೊರೆಯಾಗಿದ್ದರು ಆ ಕತ್ತಲಿಗಿಂತಲು.
ಇಸ್ರಯೇಲರಿಗೆ ಬೆಳಕು