ಕನ್ನಡ ಕಥೋಲಿಕ ಬೈಬಲ್
1 : ವೀಣೆಯನು ನುಡಿಸುತ, ಗೀತೆಯ
ಹಾಡಿರಿ ನನ್ನ ದೇವನಿಗೆ
ಝಲ್ಲರಿ ಬಾರಿಸಿ, ಸ್ತುತಿಮಾಡಿರಿ
ಸರ್ವೇಶ್ವರನಿಗೆ
ಕೀರ್ತನೆಗಳನು, ಗೀತೆಗಳನು ಹಾಡಿರಿ
ಆ ಪರಮನಿಗೆ
ಆತನ ನಾಮಸ್ತುತಿ ಮಾಡುತ, ಪ್ರಾರ್ಥನೆ
ಸಲ್ಲಿಸಿರಿ ಆತನಿಗೆ.
2 : ಯೋಧಪಂಕ್ತಿಗಳನು ಧ್ವಂಸಮಾಡುವ
ಸರ್ವೇಶ್ವರನೆ
ಬಾಧಕರ ಕೈಯಿಂದ ನನ್ನನ್ನು ತಪ್ಪಿಸಲೆಂದೆ
ಗುಡಾರವನ್ನೆಬ್ಬಿಸಿದ ತನ್ನ ಜನರ ಮಧ್ಯೆ.
3 : ಉತ್ತರದ ಗುಡ್ಡಗಾಡುಗಳಿಂದ ಇಳಿದರು
ಅಸ್ಸೀರಿಯರು
ಅವರೊಡನೆ ಬಂದ ಸೇನೆಗಳೋ
ಸಹಸ್ರಾರು.
ಅಡ್ಡಗಟ್ಟಿದರಾ ಯೋಧರು ಕಣಿವೆಯ
ಹಾದಿಗಳನು.
ಕುದುರೆಗಳು ಆವರಿಸಿದವು
ಗುಡ್ಡಗಾಡುಗಳನು.
4 : ‘ಬೆಂಕಿಗೆ ಆಹುತಿಯಾಗಿಸುವೆ ನಿನ್ನ ನಾಡನು
ಕತ್ತಿಗೆ ತುತ್ತಾಗಿಸುವೆ ನಿನ್ನ ಯುವಕರನು
ನೆಲಕ್ಕಪ್ಪಳಿಸುವೆ ನಿನ್ನ ಹಸುಳೆಗಳನು
ಮೃಗಗಳ ಬಾಯಿಗೆ ಹಾಕುವೆ ನಿನ್ನ
ಪುಟಾಣಿಗಳನು
ಸೆರೆಹಿಡಿಯುವೆ ನಿನ್ನ ಯುವತಿಯರನು’
ಈ ಪರಿ ಬೆದರಿಕೆ ಒಡ್ಡಿದನಾ
ಅಸ್ಸೀರಿಯನು.
5 : ಆದರೆ ಸರ್ವಶಕ್ತ ಸರ್ವೇಶ್ವರನು
ಒಬ್ಬ ಮಹಿಳೆಯ ಕೈಯಿಂದಲೇ,
ಸೋಲಿಸಿದನವರನು.
6 : ಅವರ ವೀರನಾಯಕ ಪತನವಾದುದು
ಯುವಕರ ಕೈಯಿಂದಲ್ಲ
ಅವನು ಹತನಾದುದು
ಸೂರ್ಯದೇವತೆಯ ಕುವರರಿಂದಲ್ಲ
ಘನರಾಕ್ಷಸನಾದವನೂ ಮಾಡಲಿಲ್ಲ
ಅವರ ಮೇಲೆ ಆಕ್ರಮಣ.
ಆದರೆ ಮೆರಾರಿಯ ಕುವರಿಯಿಂದ
ನಿರಾಯುಧಕಳಾದ
ಜೂಡಿತಳ ಮುಖದ ಬೆಡಗು
ಬಿನ್ನಾಣದಿಂದ ಪತನನಾದ !
7 : ಇಸ್ರಯೇಲಿನಲಿ ದೀನದಲಿತರನು
ಉದ್ಧರಿಸಲೆಂದು
ಬದಿಗಿಟ್ಟಳವಳು ತನ್ನ ವಿಧವಾವಸ್ತ್ರಗಳನು
ಪರಿಮಳ ತೈಲದಿಂದ ಅಭ್ಯಂಗಿಸಿದಳು ತನ್ನ
ಮೊಗವನು.
8 : ಆತನನು ವಂಚಿಸಲೆಂದೇ ಧರಿಸಿದಳು
ಉತ್ತಮ ಉಡಿಗೆಯನು
ರುಮಾಲಿನಿಂದ ಕಟ್ಟಿಕೊಂಡಳು ತನ್ನ
ಕೇಶರಾಶಿಯನು.
9 : ಅವಳ ಪಾದರಕ್ಷೆ ಆಕರ್ಷಿಸಿತು ಆತನ
ಕಣ್ಣನು
ಅವಳ ಬೆಡಗು ಸೂರೆಮಾಡಿತು ಆತನ
ಮನಸ್ಸನು
ಅವಳ ಕತ್ತಿ ಇರಿಯಿತು ಆತನ
ಕುತ್ತಿಗೆಯನು.
10 : ಪರ್ಷಿಯನ್ನರು ನಡುಗಿದರು ಅವಳ ಕೆಚ್ಚಿಗೆ
ಮಿದ್ಯಾನರು ಬೆದರಿದರು ಅವಳ
ಶೌರ್ಯಕೆ.
11 : ತಲ್ಲಣಗೊಂಡರೆಲ್ಲರು, ನನ್ನ ದಲಿತರು
ಕಹಳೆಮೊಳಗಿದಾಗ
ದಿಗ್ಭ್ರಮೆಗೊಂಡರು, ನನ್ನ ದುರ್ಬಲ
ಜನರು ಕೂಗಿದಾಗ
ಹಿಂಜರಿದರೆಲ್ಲರು, ನನ್ನವರೆಲ್ಲರು
ಆರ್ಭಟಿಸಿದಾಗ.
12 : ಕೇವಲ ದಾಸಿಯರ ಮಕ್ಕಳು
ಬೆನ್ನಟ್ಟಿದರವರನು
ದ್ರೋಹಿಗಳ ಸಂತಾನವೋ ಎಂಬಂತೆ
ಇರಿದರವರನು
ಸರ್ವೇಶ್ವರನ ಕಾಳಗದಲಿ ಹತಮಾಡಿದರು
ಎಲ್ಲರನು.
13 : ಹಾಡುವೆನು ನಾ ದೇವನಿಗೆ ನೂತನ
ಕೀರ್ತನೆಯನು:
ಸರ್ವೇಶ್ವರಾ, ಭಗವಂತ, ಮಹಿಮಾವಂತ
ನೀನು
ಮಹಾಶಕ್ತಿಶಾಲಿ, ಅಜೇಯನು ನೀನು,
14 : ಸೃಷ್ಟಿಸಮಸ್ತವು ಸೇವೆಸಲ್ಲಿಸಲಿ ನಿನಗೆ
ಸೃಷ್ಟಿಯಾಯಿತೆಲ್ಲಾ ನಿನ್ನ ನುಡಿಮಾತ್ರಕೆ
ಒಟ್ಟುಗೂಡಿದವೆಲ್ಲವು ನಿನ್ನ ಉಸಿರಾಟಕೆ
ಪ್ರತಿಭಟಿಸುವವರಾರೂ ಇಲ್ಲ ನಿನ್ನ
ಮಾತಿಗೆ.
15 : ಬೆಟ್ಟಗಳು ಕದಲಿ ಸಾಗರದೊಳು
ಮುಳುಗಿದರೂ
ಬಂಡೆಗಳು ಮೇಣದಂತೆ ಕರಗಿಹೋದರೂ
ದಯೆತೋರುವೆ ನೀನು
ನಿನಗಂಜುವವರೆಲ್ಲರಿಗೂ.
16 : ನನ್ನ ಜನಾಂಗಕೆ ವಿರುದ್ಧ ನಿಲ್ಲುವವರಿಗೆ
ಧಿಕ್ಕಾರ !
ತೀರ್ಪಿನ ದಿನದಲಿ ದಂಡಿಸುವನವರನು
ಸರ್ವಶಕ್ತ ಸರ್ವೇಶ್ವರ.
17 : ಕಬಳಿಸುವುದು ಅವರ ದೇಹವನು
ಅಗ್ನಿ ಹಾಗೂ ಕ್ರಿಮಿಕೀಟ
ವೇದನೆಯಿಂದ ರೋಧಿಸುವರವರು
ಅನವರತ.
18 : ಜೆರುಸಲೇಮನ್ನು ಸೇರಿದಾಗ ಆ ಜನರೆಲ್ಲರು ದೇವರ ಸನ್ನಿಧಿಯಲ್ಲಿ ಸಾಷ್ಟಾಂಗ ಎರಗಿದರು. ಅವರು ಮಡಿ ಮಾಡಿಕೊಂಡು ಕಾಣಿಕೆ, ನೈವೇದ್ಯ, ದಹನಬಲಿಗಳೆಲ್ಲವನ್ನು ಅರ್ಪಿಸಿದರು.
19 : ಜನರು ತನಗಿತ್ತ ಹೊಲೊಫರ್ನೆಸನ ಸ್ವತ್ತನ್ನೂ ತಾನೇ ಬಿಚ್ಚಿತಂದಿದ್ದ ಮೇಲು ಚಪ್ಪರದ ಸಾಮಾನುಗಳನ್ನೂ ಜೂಡಿತಳು ಅರ್ಪಿಸಿ, ತನ್ನ ಹರಕೆಯನ್ನು ತೀರಿಸಿದಳು.
20 : ಮೂರು ತಿಂಗಳವರೆಗೆ ಜನರು ಜೆರುಸಲೇಮಿನ ಮಹಾದೇವಾಲಯದ ಮುಂದೆ ಆನಂದದಿಂದ ವಿಜಯೋತ್ಸವ ಕೊಂಡಾಡಿದರು. ಜೂಡಿತಳು ಸಹ ಈ ಉತ್ಸವದಲ್ಲಿ ಭಾಗವಹಿಸಿದಳು.
21 : ಇದಾದನಂತರ ಪ್ರತಿಯೊಬ್ಬರೂ ಮನೆಗೆ ಹಿಂದಿರುಗಿದರು. ಜೂಡಿತಳು ಬೆಥೂಲಿಯಕ್ಕೆ ಹೋಗಿ ತನ್ನ ಸ್ವಂತ ಆಸ್ತಿಯಿಂದಲೇ ಜೀವನ ನಡೆಸಿದಳು. ಜೀವಮಾನಪರ್ಯಂತ ನಾಡಿನಲ್ಲಿ ಎಲ್ಲ ಅವಳ ಕೀರ್ತಿ ಹರಡಿತು.
22 : ಅವಳನ್ನು ವರಿಸುವಂಥವರು ಅನೇಕರಿದ್ದರು. ಆದರೂ, ಅವಳ ಯಜಮಾನ ಮನಸ್ಸೆ ಸತ್ತು ಪಿತೃಗಳೊಂದಿಗೆ ಸೇರಿಕೊಂಡಿದ್ದರಿಂದ, ಯಾವ ಪುರುಷನ ಬಯಕೆಗೂ ಆಕೆ ಶರಣಾಗಲಿಲ್ಲ.
23 : ತನ್ನ ಗಂಡನ ಮನೆಯಲ್ಲಿದ್ದಷ್ಟು ಕಾಲವೂ ಹೆಚ್ಚು ಹೆಚ್ಚು ಗೌರವವನ್ನು ಗಳಿಸಿಕೊಂಡಳು. ತನ್ನ ದಾಸಿಗೆ ಬಿಡುಗಡೆಯಿತ್ತಳು. ಜೂಡಿತಳು ಬದುಕಿದ್ದು 105 ವರ್ಷ. ಅನಂತರ ಬೆಥೂಲಿಯದಲ್ಲಿ ಸ್ವರ್ಗಸ್ಥಳಾದಳು. ಆಕೆಯ ಯಜಮಾನ ಮನಸ್ಸೆಯ ಗುಹೆಯಲ್ಲೇ ಅವಳನ್ನು ಸಮಾಧಿ ಮಾಡಲಾಯಿತು.
24 : ಏಳು ದಿನವಿಡೀ ಇಸ್ರಯೇಲ್ ಮನೆತನ ಶೋಕಾಚರಣೆಯಲ್ಲಿತ್ತು. ಸಾಯುವ ಮುನ್ನ ಆಕೆ ತನ್ನ ಆಸ್ತಿಯನ್ನು ತನ್ನ ಹಾಗೂ ಮನಸ್ಸೆಯ ಬಂಧುಬಳಗದವರಿಗೆ ಹಂಚಿಕೊಟ್ಟಿದ್ದಳು.
25 : ಜೂಡಿತಳ ಉಳಿದ ಜೀವಮಾನಕಾಲದಲ್ಲಾಗಲೀ ಅನಂತರ ಬಹುಕಾಲದವರೆಗಾಗಲೀ ಇಸ್ರಯೇಲರ ಗೋಜಿಗೆ ಯಾರೂ ಬರಲಿಲ್ಲ.