ಕನ್ನಡ ಕಥೋಲಿಕ ಬೈಬಲ್
1 : ತೊಬೀತನು ಹೀಗೆಂದು
ಪ್ರಾರ್ಥಿಸಿದನು:
ಚಿರಂಜೀವಿಯಾದ ಸರ್ವೇಶ್ವರನಿಗೆ
ಸ್ತುತಿ ಸ್ತೋತ್ರ
ಚಿರಕಾಲವಿರುವುದು ಆತನ ಸಾಮ್ರಾಜ್ಯ.
2 : ಶಿಕ್ಷಿಸುವವನೂ ಕ್ಷಮಿಸುವವನೂ ಆತನೇ
ಪಾತಾಳಕ್ಕಿಳಿಸುವವನೂ ಮೇಲಕ್ಕೆತ್ತುವವನೂ
ಆತನೇ
ಆತನ ಕೈಯಿಂದ ತಪ್ಪಿಸಿಕೊಳ್ಳುವವನು
ಯಾವನಿದ್ದಾನೆ?
3 : ಇಸ್ರಯೇಲಿನ ಕುಲಪುತ್ರರೇ,
ದೇವಸ್ತುತಿಮಾಡಿ ಜನಾಂಗಗಳ ಮುಂದೆ
ಚದರಿಸಿಹನು ನಿಮ್ಮನ್ನು ಅವರ ಮಧ್ಯೆ.
4 : ಅಲ್ಲೂ ತೋರ್ಪಡಿಸಿರುವನು ತನ್ನ ಪ್ರಭೆಯನು
ಗುಣಗಾನ ಮಾಡಿರಿ, ಸರ್ವಜೀವಿಗಳ ಮುಂದೆ
ಆತನನು.
ಆತನೇ ನಮ್ಮ ಸರ್ವೇಶ್ವರ, ಆತನೇ ನಮ್ಮ
ದೇವ
ಆತನೇ ನಮ್ಮ ತಂದೆ; ಆತನೇ ನಮ್ಮ ದೇವ
ಅನವರತ.
5 : ದಂಡನೆ ನೀಡದೆ ಬಿಡನು ನಿಮ್ಮ
ದುಷ್ಕøತ್ಯಗಳಿಗೆ
ಮರಳಿ ಕರುಣೆ ತೋರುವನು ನಿಮ್ಮೆಲ್ಲರಿಗೆ.
ಒಂದುಗೂಡಿಸುವನು ನಿಮ್ಮನ್ನು ಎಲ್ಲಾ
ರಾಷ್ಟ್ರಗಳಿಂದ,
ತಂದು ಸೇರಿಸುವನು ಚದರಿಹೋದ
ನಾಡುಗಳಿಂದ.
6 : ಅಭಿಮುಖರಾದರೆ ನೀವು ಪೂರ್ಣ
ಹೃದಯದಿಂದ ಪೂರ್ಣಪ್ರಾಣದಿಂದ
ನಡೆದರೆ ಆತನ ಸಮ್ಮುಖದಲ್ಲಿ
ಸತ್ಯತೆಯಿಂದ,
ಮರೆಮಾಚಿಕೊಳ್ಳನಾತ ಮುಖವನ್ನು
ನಿಮ್ಮಿಂದ,
ಸ್ತುತಿಸಿರಿ ಸತ್ಯಸ್ವರೂಪಿಯಾದ ಸರ್ವೇಶ್ವರನನು
ಯುಗಯುಗಾಂತರಕ್ಕೂ ಆಳುವ ಅರಸನನು.
ನಾನಾತನ ಭಕ್ತನು, ಗಡೀಪಾರಾದ ಈ
ನಾಡಿನಲೂ
ಆತನ ಶಕ್ತಿಸಾಮಥ್ರ್ಯವನು ಸಾರುವೆನು
ದುಷ್ಟರ ಈ ರಾಷ್ಟ್ರದಲೂ.
ಪಾಪಾತ್ಮರೇ, ಹಿಂದಿರುಗಿ ಬನ್ನಿರಿ
ಆತನಿಗೆ ನ್ಯಾಯವಾದುದನ್ನೇ ಮಾಡಿರಿ
ಕಟಾಕ್ಷಿಸಿಯಾನು ನಿಮಗೆ ಕೃಪೆತೋರಿ.
7 : ನಾನಾದರೋ ಗುಣಗಾನ ಮಾಡುವೆನು ನನ್ನ
ದೇವನನು,
ಸಂಕೀರ್ತಿಸುವುದು ನನ್ನ ಮನ ಪರಲೋಕ
ರಾಜನನು.
8 : ದೇವರ ಮಹಿಮಾಸ್ತುತಿ ಇರಲಿ ಸರ್ವರ
ಬಾಯಲಿ,
ಆತನನು ಸಂಕೀರ್ತಿಸಲಿ ಜೆರುಸಲೇಮಿನಲಿ.
9 : ಎಲೈ ಜೆರುಸಲೇಮೇ, ಪವಿತ್ರ ನಗರಿಯೇ,
ಶಿಕ್ಷಿಸುವನು ದೇವನು ನಿನ್ನ ಮಕ್ಕಳ
ದುಷ್ಕøತ್ಯಗಳ ನಿಮಿತ್ತ,
ಕರುಣೆ ತೋರುವನು ಮರಳಿ ಸಜ್ಜನರ
ಸಂತತಿಯ ಪ್ರಯುಕ್ತ.
10 : ವಂದಿಸಿರಿ ಸದ್ಗುಣಶೀಲ ಸರ್ವೇಶ್ವರನನು
ಸ್ತುತಿಸಿರಿ ಯುಗಯುಗಕ್ಕೂ ಆಳುವ
ಅರಸನನು,
ಆಗ ನಿರ್ಮಿಸಲಾಗುವುದು ಸಂತಸದಿ
ದೇವಾಲಯವನು.
ಹರ್ಷಗೊಳಿಸುವನಾತ ನಿಮ್ಮಲ್ಲಿ
ಸೆರೆಹೋದವರನು,
ಪ್ರೀತಿಸುವನು ನಿತ್ಯಕ್ಕೂ ನಿಮ್ಮ ದಲಿತರೆಲ್ಲರನು.
11 : ಉಜ್ವಲ ಜ್ಯೋತಿಯೊಂದು ಬೆಳಗುವುದು
ಜಗಕೆಲ್ಲ,
ನಿನ್ನಲ್ಲಿಗೆ ಬರಲಿರುವುವು ದೂರದ
ರಾಷ್ಟ್ರಗಳೆಲ್ಲ.
ಧರೆಯ ಕಟ್ಟಕಡೆಯಿಂದ ಬರುವರು
ಶ್ರೀ ನಾಮದ ನಿವಾಸಕೆ,
ಕೈತುಂಬ ಕಾಣಿಕೆಯನು ತರುವರು
ಸ್ವರ್ಗಾಧಿಪತಿಗೆ.
ಸನ್ನುತಿಗಳ ಸಲ್ಲಿಸುವರು ನಿನ್ನೊಳು
ತಲತಲಾಂತರಕೂ
ಈ ಭವ್ಯ ನಗರದ ನಾಮ ಉಳಿಯುವುದು
ಸದಾಕಾಲಕೂ.
12 : ಧಿಕ್ಕಾರ ನಿನ್ನ ವಿರುದ್ಧ ಮಾತೆತ್ತುವವರಿಗೆ !
ನಿನ್ನ ಸೋಲಿಸಿ, ಕೋಟೆಗಳ ನಾಶ
ಪಡಿಸುವವರಿಗೆ,
ನಿನ್ನ ಗೋಪುರಗಳ ಕೆಡವಿ, ಗೃಹಗಳನು
ಸುಡುವವರಿಗೆ.
ಸರ್ವದಾ ಶುಭವಾಗಲಿ, ನಿನ್ನನ್ನು ಪುನರ್
ನಿರ್ಮಿಸುವವರಿಗೆ.
13 : ಸಂತೋಷಿಸಿರಿ ಸಜ್ಜನರ ಸಂತತಿಗಾಗಿ
ಸ್ತುತಿಸುವರವರು ಸತ್ಯ ದೇವರನು
ಒಟ್ಟಾಗಿ.
14 : ನಿನಗೆ ಪ್ರೀತಿ ತೋರಿಸುವವರು ಧನ್ಯರು
ನಿನ್ನ ಏಳಿಗೆಗಾಗಿ ನಲಿವವರು ಧನ್ಯರು
ನಿನಗಾದ ಶಿಕ್ಷೆಗಾಗಿ ಶೋಕಿಸುವವರು
ಧನ್ಯರು!
ಏಕೆನೆ ನಲಿದಾಡುವರು ನಿನ್ನೊಂದಿಗೆ,
ನಿನ್ನ ಸೌಭಾಗ್ಯವನೆಲ್ಲ
ಕಾಣುವರು ಸರ್ವಕಾಲಕೆ.
15 : ನನ್ನ ಮನವೇ, ಸ್ತುತಿಸ್ತೋತ್ರಗೈ
ರಾಜಾಧಿರಾಜನಾದ ಸರ್ವೇಶ್ವರನಿಗೆ.
16 : ಏಕೆನೆ, ಪುನರ್ ನಿರ್ಮಾಣವಾಗುವುದು
ಜೆರುಸಲೇಮ್ ನಗರ,
ಅದಾಗುವುದು ಆತನ ಶಾಶ್ವತ ಮಂದಿರ;
ನಿನ್ನ ವೈಭವ ನೋಡಲು, ಸ್ವರ್ಗರಾಜನಿಗೆ
ತಲೆಬಾಗಲು
ನನ್ನ ಸಂತಾನದ ಕುಡಿ ಉಳಿವುದಾದರೆ
ಅದೆಂಥ ಭಾಗ್ಯ ನನ್ನದು !
17 : ನಿರ್ಮಿಸಲಾಗುವುದಾ ಜೆರುಸಲೇಮಿನ
ದ್ವಾರಗಳನು ಇಂದ್ರನೀಲ ಮತ್ತು
ಪಚ್ಚೆಗಳಿಂದ,
ಅದರ ಗೋಡೆಗಳನ್ನೆಲ್ಲ ಅಮೂಲ್ಯ
ರತ್ನಗಳಿಂದ,
ಅದರ ಗೋಪುರಗಳನು ಬಂಗಾರದಿಂದ,
ಅದರ ಕೋಟೆಗಳನು ಅಪ್ಪಟ ಚಿನ್ನದಿಂದ,
ಅದರ ಬೀದಿಗಳನು ಹೊದಿಸಲಾಗುವುದು
ಪೀತರತ್ನ ಓಫೀರಿನ ರತ್ನಗಳಿಂದ.
18 : ಹಾಡಲಾಗುವುದು ಸಂತಸ ಗೀತೆಗಳನು
ಜೆರುಸಲೇಮಿನ ದ್ವಾರಗಳಲಿ
ಅಲ್ಲೆಲೂಯ ಘೋಷಿಸಲಾಗುವುದು
ಅದರ ಮನೆಗಳಲಿ.
ಇಸ್ರಯೇಲಿನ ದೇವರಿಗೆ ಸ್ತೋತ್ರವಾಗಲಿ
ನಿತ್ಯಕೂ ಆತನ ಶ್ರೀನಾಮ ಅಲ್ಲಿ
ಪೂಜಿತವಾಗಲಿ!
ಇತಿ ತೊಬೀತನ ಸ್ತುತಿಗೀತೆ.