ಕನ್ನಡ ಕಥೋಲಿಕ ಬೈಬಲ್
1 :
ಸರ್ವೇಶ್ವರಸ್ವಾಮಿ ಯೆರೆಮೀಯನಿಗೆ ಮತ್ತೊಮ್ಮೆ ಈ ಸಂದೇಶವನ್ನು ದಯಪಾಲಿಸಿದರು:
2 : “ಇಸ್ರಯೇಲರ ದೇವರಾದ ಸರ್ವೇಶ್ವರ ಹೀಗೆನ್ನುತ್ತಾರೆ – ‘ನಾನು ನಿನಗೆ ಹೇಳಿರುವ ಮಾತುಗಳನ್ನೆಲ್ಲ ಗ್ರಂಥ ರೂಪವಾಗಿ ಬರೆ.
3 : ಇಗೋ, ನಾನು ನನ್ನ ಪ್ರಜೆಯಾದ ಇಸ್ರಯೇಲರನ್ನೂ ಯೆಹೂದ್ಯರನ್ನೂ ಅವರ ದುರವಸ್ಥೆಯಿಂದ ಬಿಡುಗಡೆಮಾಡುವ ದಿನಗಳು ಬರುವುವು. ಆಗ ನಾನು ಅವರನ್ನು ಅವರ ಪೂರ್ವಜರಿಗೆ ಅನುಗ್ರಹಿಸಿದ ನಾಡಿಗೆ ಬರಮಾಡುವೆನು. ಅವರು ಅದನ್ನು ಅನುಭವಿಸುವರು. ಇದು ಸರ್ವೇಶ್ವರನಾದ ನನ್ನ ನುಡಿ’.”
4 : ಸರ್ವೇಶ್ವರ ಇಸ್ರಯೇಲಿನ ಮತ್ತು ಜುದೇಯದ ವಿಷಯವಾಗಿ ಈ ಮಾತುಗಳನ್ನು ಹೇಳಿದರು:
5 : “ಸರ್ವೇಶ್ವರ ಹೀಗೆನ್ನುತ್ತಾರೆ:
ಕೇಳಿಸಿದೆ ಭಯದಿಂದ ಕೂಡಿದ ಶಬ್ಧ
ಹೌದು, ಅದು ಕೂಡಿದೆ ಭೀತಿಯಿಂದ,
ಶಾಂತಿಯಿಂದಲ್ಲ.
6 : ಗಂಡಸು ಪ್ರಸವವೇದನೆ ಪಡುವುದುಂಟೆ,
ಹೇಳು?
ಆದರೂ ಪ್ರತಿಯೊಬ್ಬನು ಹೆರುವ
ಮಹಿಳೆಯಂತೆ
ಸೊಂಟ ಹಿಸಿಕಿಕೊಳ್ಳುವುದು ನನ್ನ ಕಣ್ಣಿಗೆ
ಬೀಳುತ್ತಿದೆ ಏಕೆ?
ಅವರ ಮುಖಗಳು ಬಿಳಿಚಿಕೊಂಡಿವೆ ಏಕೆ?
7 : ಹೌದು, ಭಯಂಕರವಾದ ದಿನ ಬರಲಿದೆ,
ಅದಕ್ಕಿರದು ಎಣೆ !
ಅದು ಇಕ್ಕಟ್ಟಿನ ದಿನ,
ಆದರೂ ಅದರಿಂದ ಯಕೋಬ್ಯರಿಗಿದೆ
ಬಿಡುಗಡೆ.”
8 :
(ಸೇನಾಧೀಶ್ವರರಾದ ಸರ್ವೇಶ್ವರ ಹೇಳುವುದನ್ನು ಕೇಳು: “ಅವರ ಮೇಲೆ ಹೇರಲಾಗಿರುವ ನೊಗವನ್ನು ನಾನು ಆ ದಿನದಂದು ಮುರಿದು ಬಿಡುವೆನು. ಕಣ್ಣುಗಳನ್ನು ಕಿತ್ತುಹಾಕುವೆನು. ಅನ್ಯ ಕುಲದವರು ಇನ್ನು ಅವರನ್ನು ಗುಲಾಮರನ್ನಾಗಿ ಮಾಡಿಕೊಳ್ಳಲಾರರು.
9 : ಅವರು ತಮ್ಮ ದೇವರಾದ ಸರ್ವೇಶ್ವರನೆಂಬ ನನಗೆ ಮತ್ತು ಅವರಿಗಾಗಿ ನಾನು ಏರ್ಪಡಿಸಲಿರುವ ರಾಜ ದಾವೀದನಿಗೆ ಸೇವೆಸಲ್ಲಿಸುವರು.)
10 : “ನನ್ನ ದಾಸ ಯಕೋಬನೇ, ಅಂಜಬೇಡ !
ಇಸ್ರಯೇಲೇ, ಭಯಪಡಬೇಡ” ಎನ್ನುತ್ತಾರೆ
ಸರ್ವೇಶ್ವರ.
“ದೂರ ನಾಡಿನಿಂದ ನಿನ್ನನ್ನು
ಮುಕ್ತನನ್ನಾಗಿಸುವೆನು
ನಿನ್ನ ಸಂತಾನ ಸೆರೆಹೋದ ಸೀಮೆಯಿಂದ
ನಿನ್ನನ್ನು ಉದ್ಧರಿಸುವೆನು.
ಹಿಂದಿರುಗಿ, ಹಾಯಾಗಿ
ನೆಮ್ಮದಿಯಿಂದಿರುವುದು ಯಕೋಬು
ಯಾರಿಂದಲೂ ಅದನ್ನು ಹೆದರಿಸಲಾಗದು.
11 : ನಿನ್ನನ್ನು ರಕ್ಷಿಸಲು ನಿನ್ನೊಂದಿಗೆ ನಾನಿರುವೆನು
ನಿನ್ನನ್ನು ಯಾವ ರಾಷ್ಟ್ರಗಳಿಗೆ ಅಟ್ಟಿ
ಚದರಿಸಿದೆನೋ
ಆ ರಾಷ್ಟ್ರಗಳನ್ನೆಲ್ಲ ನಿರ್ಮೂಲ ಮಾಡುವೆನು.
ನಿನ್ನನ್ನು ನಿರ್ಮೂಲ ಮಾಡೆನು, ಮಿತಿಮೀರಿ
ಶಿಕ್ಷೆಸೆನು;
ಆದರೆ ಶಿಕ್ಷಿಸದೆ ಮಾತ್ರ ಬಿಡೆನು –
ಇದು ಸರ್ವೇಶ್ವರನಾದ ನನ್ನ ನುಡಿ.”
12 : ಹೌದು, ಸರ್ವೇಶ್ವರ ಹೀಗೆನ್ನುತ್ತಾರೆ:
“ನಿನ್ನ ಗಾಯಗಳು ಗುಣಹೊಂದವು
ನಿನ್ನ ಹುಣ್ಣನ್ನು ವಾಸಿಮಾಡಲಾಗದು.
13 : ನಿನ್ನ ಪರ ವಾದಿಸುವವರಿಲ್ಲ, ನಿನ್ನ ವ್ರಣಕ್ಕೆ
ಔಷಧವಿಲ್ಲ
ನಿನ್ನನ್ನು ಆರೈಕೆ ಮಾಡುವವರಿಲ್ಲ.
14 : ನಿನ್ನ ನಲ್ಲರೆಲ್ಲರು ಮರೆತುಬಿಟ್ಟರು, ನಿನ್ನನ್ನು
ಹುಡುಕದಿರುವರು
ಶತ್ರುವಿನಂತೆ ನಿನ್ನನ್ನು ಥಳಿಸಿದೆನು, ಕ್ರೂರವಾಗಿ
ದಂಡಿಸಿದೆನು.
ಏಕೆಂದರೆ, ನಿನ್ನ ಅಪರಾಧ ಹೆಚ್ಚಿದೆ
ನಿನ್ನ ಪಾಪಗಳು ಲೆಕ್ಕವಿಲ್ಲದಿವೆ.
15 : ‘ಅಯ್ಯೋ ನೋವು ನಿಲ್ಲದಿದೆ,’ ಎಂದು
ನಿನ್ನ ಗಾಯಕ್ಕಾಗಿ ಗೋಳಿಡುತ್ತಿರುವೆ ಏಕೆ?
ನಿನ್ನ ಅಪರಾಧ ಹೆಚ್ಚಿದೆ, ಪಾಪಗಳು ಬಹಳವಿವೆ
ಎಂದೇ ಇದನ್ನೆಲ್ಲ ನಿನಗೆ ಮಾಡಿದೆ.
16 : ಕಬಳಿಸಲಾಗುವುದು
ನಿನ್ನ ಶತ್ರುಗಳೆಲ್ಲ ತಪ್ಪದೆ ಸೆರೆಹೋಗುವರು
ನಿನ್ನನ್ನು ಸೂರೆಮಾಡುವವರು
ಸೂರೆಯಾಗುವರು
ನಿನ್ನನ್ನು ಕೊಳ್ಳೆಹೊಡೆಯುವವರು ಕೊಳ್ಳೆಗೆ
ಈಡಾಗುವರು.
17 : ‘ಇಗೋ, ಸಿಯೋನ್ ಯಾರಿಗೂ
ಬೇಡವಾದವಳು, ಭ್ರಷ್ಟಳಾದಳು’
ಎಂದು ಜನರು ನಿನ್ನನ್ನು ಜರೆವುದು ನನಗೆ
ಹಿಡಿಸದು.
ನಿನ್ನನ್ನು ಗುಣಪಡಿಸುವೆನು
ನಿನ್ನ ಗಾಯಗಳನ್ನು ವಾಸಿಮಾಡುವೆನು
- ಇದು ಸರ್ವೇಶ್ವರನಾದ ನನ್ನ ನುಡಿ.
18 : ಯಕೋಬನ ಮನೆಗಳ ದುರವಸ್ಥೆಯನ್ನು
ತಪ್ಪಿಸುವೆನು
ಜೆರುಸಲೇಮಿನ ನಿವಾಸಗಳನ್ನು ನಿಶ್ಚಯವಾಗಿ
ಕರುಣಿಸುವೆನು.
ಅದರ ಹಾಳುದಿಬ್ಬಗಳ ಮೇಲೆ ಹೊಸನಗರ
ಕಟ್ಟುವೆನು
ಅದರ ಅರಮನೆ ಮೊದಲಿದ್ದ ಸ್ಥಳದಲ್ಲೆ
ನೆಲೆಯಾಗಿ ನಿಲ್ಲುವುದು.
19 : ಅವುಗಳಿಂದ ಸ್ತುತಿಸ್ತೋತ್ರ ಕೇಳಿಬರುವುದು
ಅಲ್ಲಿಂದ ನಲಿವುನಾದ ಕೇಳಿಸುವುದು.
ಆ ಜನರನ್ನು ಹೆಚ್ಚಿಸುವೆನು, ಅವರು
ಕೊಂಚವಾಗಿರರು.
ಅವರನ್ನು ಘನಪಡಿಸುವೆನು, ಅವರು
ಹೀನರಾಗಿರರು.
20 : ಅವನ ಸಂತಾನ ಹಿಂದಿನ ಸುಸ್ಥಿತಿಯನ್ನು
ಹೊಂದುವುದು
ಅವರ ಸಮಾಜ ನನ್ನ ಮುಂದೆ ನೆಲೆಯಾಗಿ
ನಿಲ್ಲುವುದು
ಅವರನ್ನು ಬಾಧಿಸುವವರನ್ನೆಲ್ಲ ನಾನು
ದಂಡಿಸುವೆನು.
21 : ಅವರಲ್ಲೇ ಒಬ್ಬನು ಅವರಿಗೆ ಪ್ರಭುವಾಗುವನು
ಅವರ ವಂಶದವನೇ ಅವರನ್ನು ಆಳುವನು.
ಅವನನ್ನು ನಾನು ನನ್ನ ಹತ್ತಿರ
ಬರಗೊಡಿಸುವೆನು
ಅವನು ನನ್ನ ಸನ್ನಿಧಾನಕ್ಕೆ ಸೇರುವನು.
ಇಲ್ಲದಿದ್ದಲ್ಲಿ, ನನ್ನನು ಸಮೀಪಿಸಲು
ಧೈರ್ಯಗೊಳ್ಳುವವನಾರು?
- ಇದು ಸರ್ವೇಶ್ವರನಾದ ನನ್ನ ನುಡಿ.
22 : ನೀವು ನನಗೆ ಪ್ರಜೆಯಾಗಿರುವಿರಿ
ನಾನು ನಿಮಗೆ ದೇವರಾಗಿರುವೆನು.
23 : ಇಗೋ, ಹೊರಟಿದೆ ಬಡಿದುಕೊಂಡು
ಹೋಗುವ ಗಾಳಿ
ಸರ್ವೇಶ್ವರನ ರೋಷವೆಂಬ ಬಿರುಗಾಳಿ
ದುರುಳರ ತಲೆಯ ಮೇಲೆ ಬಡಿದೋಡುವ
ಸುಂಟರ ಗಾಳಿ
24 : ಆತನ ಮನದಾಲೋಚನೆಗಳನ್ನು ನಡೆಸಿ
ನೆರವೇರಿಸುವ ತನಕ
ಹಿಂದಿರುಗದು ಆತನ ರೋಷವೆಂಬಾ
ಬಿರುಗಾಳಿ,
ಇದನ್ನು ನೀವು ಗ್ರಹಿಸುವಿರಿ ಕಟ್ಟಕಡೆಯ
ದಿನಗಳಲ್ಲಿ.