ಕನ್ನಡ ಕಥೋಲಿಕ ಬೈಬಲ್
1 : “ಸದ್ಧರ್ಮಾರ್ಥಿಗಳಾದ
ಸರ್ವೇಶ್ವರನ ಶರಣರೇ ಕೇಳಿ:
ನೀವು ಯಾವ ಬಂಡೆಗಲ್ಲಿನಿಂದ ರೂಪು
ಪಡೆದಿರಿ,
ಯಾವ ಕಲ್ಲುಗುಂಡಿಯಿಂದ ಅಗೆಯಲ್ಪಟ್ಟಿರಿ,
ಎಂಬುದನ್ನು ಪರಿಭಾವಿಸಿ ನೋಡಿರಿ.
2 : ನೆನೆಯಿರಿ ನಿಮ್ಮ ಮೂಲಪುರುಷ
ಅಬ್ರಹಾಮನನು
ಅವನ ಸತಿ ಸಾರಳನು.
ಅಬ್ರಹಾಮನನ್ನು ನಾ ಕರೆದಾಗ ಆತನು
ಒಬ್ಬಂಟಿಗನು
ಆಶೀರ್ವಾದದಿ ನಾ ಬೆಳೆಸಿದೆ
ಆತನ ಸಂತಾನವನು.
3 : ಸರ್ವೇಶ್ವರನಾದ ನಾನು ಸಂತೈಸದೆ ಬಿಡೆನು
ಸಿಯೋನನ್ನು,
ಉದ್ಧರಿಸುವೆನು ಆ ಹಾಳುಬಿದ್ದ
ಸ್ಥಳಗಳೆಲ್ಲವನು.
ಮಾರ್ಪಡಿಸುವೆನು ಕಾಡುನೆಲವನು
ಏದೆನ್ ಉದ್ಯಾನದಂತೆ
ಮರುಭೂಮಿಯನು, ದೇವತೆಗಳ
ಉದ್ಯಾನವಾಗುವಂತೆ
ಹರ್ಷೋಲ್ಲಾಸ, ಸ್ತುತಿಸ್ತೋತ್ರ, ಮಧುರಗಾನ
ಅಲ್ಲಿ ನೆಲೆಸುವಂತೆ.
4 : ಆಲಿಸಿರಿ ನನ್ನ ಜನರೆ; ಕಿವಿಗೊಡಿ ನನ್ನ
ಪ್ರಜೆಗಳೆ:
ಧರ್ಮೋಪದೇಶ ಹೊರಡುವುದು
ರಾಷ್ಟ್ರಗಳಿಗೆ ನನ್ನಿಂದಲೆ;
ಬೆಳಗುವುದು ಜಗಜ್ಯೋತಿಯಾಗಿ ನನ್ನ
ನ್ಯಾಯಬೋಧೆ.
5 : ಹತ್ತಿರದಲ್ಲೇ ಇದೆ ನಾ ನೀಡುವ ಮುಕ್ತಿ
ಸಿಗುವುದು ನನ್ನಿಂದ ವಿಮೋಚನಾ ಶಕ್ತಿ
ನ್ಯಾಯನೀಡುವೆನು ರಾಷ್ಟ್ರಗಳಿಗೆ ನನ್ನ
ಭುಜಬಲದಿಂದ
ನನ್ನನ್ನು ನಿರೀಕ್ಷಿಸಿಕೊಂಡಿರುವರು ಜನರು
ದೂರದೇಶಗಳಿಂದ
ಕಾದಿರುವರು ಆ ಭುಜಬಲ ಸಾಧನೆಗಾಗಿ
ನಂಬಿಕೆಯಿಂದ.
6 : ಆಕಾಶಮಂಡಲವನು ನೋಡಿ ಕಣ್ಣೆತ್ತಿ
ಭೂಮಂಡಲದತ್ತ ನೋಡಿ ಕೆಳಗೆ ದಿಟ್ಟಿಸಿ.
ಆಕಾಶ ಚದರಿಹೋಗುವುದು ಹೊಗೆಯಂತೆ
ಭೂಮಿ ಹರಿದುಹೋಗುವುದು ಬಟ್ಟೆಯಂತೆ
ಸಾಯುವರು ಭೂನಿವಾಸಿಗಳು ಅದರಂತೆ.
ನಾ ಕೊಡುವ ವಿಮೋಚನೆಯೋ
ನಿಲ್ಲುವುದು ಶಾಶ್ವತವಾಗಿ
ನಾ ನೀಡುವ ಮುಕ್ತಿಯೋ ಅಳಿದುಹೋಗದು
ಭಂಗವಾಗಿ.
7 : “ಕಿವಿಗೊಟ್ಟು ಕೇಳಿರಿ ಸದ್ಧರ್ಮದ
ಸುಜ್ಞಾನಿಗಳೇ,
ನನ್ನ ಬೋಧೆಯಲ್ಲಿ ಶ್ರದ್ಧೆಯಿಡುವವರೇ,
ಹೆದರಬೇಡಿ ಮನುಜರಾಡುವ ದೂರಿಗೆ
ಅಂಜದಿರಿ ಅವರ ನಿಂದೆದೂಷಣೆಗೆ.
8 : ನುಸಿ ಅವರನ್ನು ತಿಂದುಹಾಕುವುದು
ಬಟ್ಟೆಯಂತೆ
ಹುಳು ಅವರನ್ನು ಮೆದ್ದುಬಿಡುವುದು
ಉಣ್ಣೆಯಂತೆ.
ನಾ ನೀಡುವ ಮುಕ್ತಿಯೋ ನಿಲ್ಲುವುದು
ಶಾಶ್ವತವಾಗಿ
ನಾ ಕೊಡುವ ವಿಮೋಚನೆ ಸದಾ ಇರುವುದು
ನೆಲೆಯಾಗಿ.”
9 : ಎಚ್ಚರಗೊಳ್ಳು ಸರ್ವೇಶ್ವರನ ಭುಜವೇ,
ಎಚ್ಚರಗೊಂಡು ಬಲವನು ತಂದುಕೊ
ಭುಜವೇ,
ಪೂರ್ವಕಾಲದೊಳು ಪುರಾತನ
ಪೀಳಿಗೆಯೊಳು
ಎಚ್ಚರಗೊಂಡಂತೆ ಎಚ್ಚೆತ್ತುಕೊ ಈಗಲು.
ರಹಬನ್ನು ಛೇದಿಸಿಬಿಟ್ಟ ಭುಜ ನೀನಲ್ಲವೆ?
ಘಟಸರ್ಪವನು ಅಪ್ಪಳಿಸಿದ ಭುಜ
ನೀನಲ್ಲವೆ?
10 : ಸಮುದ್ರ ಜನರಾಶಿಗಳನು ಬತ್ತಿಸಿದ ಬಾಹು
ನೀನು
ವಿಮುಕ್ತ ಜನ ಹಾಯುವಂತೆ ಸಮುದ್ರದಲಿ
ದಾರಿಮಾಡಿದೆ ನೀನು.
11 : ಹಿಂದಿರುಗುವರು ಸರ್ವೇಶ್ವರನಿಂದ ರಕ್ಷಣೆ ಪಡೆದವರು ಉತ್ಸಾಹ ಗೀತೆಯೊಂದಿಗೆ ಸಿಯೋನನ್ನು ಸೇರುವರವರು. ಧರಿಸಿಕೊಳ್ಳುವರು ಶಾಶ್ವತ ಸಂತಸವೆಂಬ ಕಿರೀಟವನು ಅನುಭವಿಸುವರು ಹರ್ಷಾನಂದಗಳನು ತೊಲಗಿ ಓಡುವುವು ದುಃಖದುಗುಡಗಳು.
12 : “ನಾನೆ, ನಾನೆ ನಿನ್ನನು ಸಂತೈಸುವವನಾಗಿರೆ,
ನೀ ಭಯಪಡುವುದೇಕೆ ಮತ್ರ್ಯನಾದ
ಮಾನವನಿಗೆ?
ನೀ ಹೆದರಿ ನಡುಗುವುದೇಕೆ
ಹುಲುಮಾನವನಿಗೆ?
13 : ಆಕಾಶವನು ಹರಡಿ ಭೂಮಿಯನು ಸ್ಥಾಪಿಸಿದಾ
ನಿನ್ನ ಸೃಷ್ಟಿಕರ್ತ ಸರ್ವೇಶ್ವರನನು
ಮರೆತುಬಿಟ್ಟೆಯಾ?
ನಾಶಮಾಡಲು ಹವಣಿಸುವ ಹಿಂಸಕನ ಕ್ರೋಧಕೆ
ನೀ ಎಡೆಬಿಡದೆ ದಿನವೆಲ್ಲ ಅಂಜುತ್ತಿರಬೇಕೆ?
ಆ ಹಿಂಸಕನ ಕ್ರೋಧವು ಈ ಗ ಹೋದುದೆಲ್ಲಿಗೆ?
14 : ಸೆರೆಯಲ್ಲಿ ಸೊರಗಿದವನು ಸಾಯನು;
ಇಳಿಯನವನು ಪಾತಾಳಕ್ಕೆ,
ಬಿಡುಗಡೆಯಾಗುವನು ಬೇಗನೆ, ಇರದವನಿಗೆ
ಅನ್ನದ ಕೊರತೆ.
15 : ನಿನ್ನ ದೇವರಾದ ಸರ್ವೇಶ್ವರ ನಾನೆ
ಸಮುದ್ರವನು ಕಲ್ಲೋಲಗೊಳಿಸುವವನು ನಾನೆ
ಅದರ ಅಲೆಗಳನು ಭೋರ್ಗರೆಸುವವನು ನಾನೆ
ನನ್ನ ಹೆಸರು ಸೇನಾಧೀಶ್ವರ ಸರ್ವೇಶ್ವರ !
16 : ಆಕಾಶವನ್ನು ಹರಡಿದೆ; ಭುವಿಯನ್ನು
ಸ್ಥಾಪಿಸಿದೆ;
ಸಿಯೋನಿಗೆ ‘ನೀನೆನ್ನ ಜನತೆ’ ಎಂದೆ
ನಾನಾಡುವುದನೆ ನಿನ್ನಿಂದ ಮಾತನಾಡಿಸಿದೆ,
ನಿನ್ನನು ನನ್ನ ಅಂಗೈಯಲಿ ಕೊರೆದು ಕಾದಿಟ್ಟೆ.”
ಚೇತರಿಸಿಕೊಳ್ಳಲು ಜೆರುಸಲೇಮಿಗೆ ಕರೆ
17 : ಎಚ್ಚೆತ್ತುಕೊ, ಎಚ್ಚೆತ್ತುಕೊ, ನೀನೆದ್ದು ನಿಲ್ಲು
ಜೆರುಸಲೇಮೆ !
ಕುಡಿದುಬಿಟ್ಟಿರುವೆ ನೀ ಮತ್ತುತರುವ ಪಾನ
ಪಾತ್ರೆಯಿಂದ
ತೊಟ್ಟನ್ನೂ ಬಿಡದೆ ಹೀರಿರುವೆ ಸರ್ವೇಶ್ವರನ
ಕೋಪ ತುಂಬಿದಾ ಕೊಡದಿಂದ!
18 : ಅವಳನ್ನು ಕರೆದುಕೊಂಡು ಹೋಗುವವನಾರೂ
ಇಲ್ಲ, ಆಕೆ ಹೆತ್ತಾ ಮಕ್ಕಳೊಳು;
ಅವಳ ಕೈಹಿಡಿದು ನಡೆಸುವವನು ಒಬ್ಬನೂ
ಇಲ್ಲ, ಆಕೆ ಸಾಕಿದ ಕುವರರೊಳು.
19 : ಬಂದೊದಗಿವೆ ಇಮ್ಮಡಿ ಬಾಧೆ ನಿನಗೆ
ಪ್ರಲಾಪಿಸಿ ಗೋಳಿಡುವವರಾರು
ನಿನ್ನೊಂದಿಗೆ?
ನಾಡು ಹಾಳುಪಾಳಾಗಿದೆ, ತುತ್ತಾಗಿದೆ ಪ್ರಜೆ
ಕ್ಷಾಮಕ್ಷೋಭೆಗೆ;
ನಿನ್ನನು ಸಂತೈಸುವುದಾದರು ಹೇಗೆ?
20 : ನಿನ್ನ ಮಕ್ಕಳು ಬಿದ್ದರು ಬೀದಿ ಚೌಕಗಳಲಿ
ಬಲೆಗೆ ಬಿದ್ದ ಜಿಂಕೆಯಂತಿಹರು ಪ್ರಜ್ಞೆತಪ್ಪಿ.
ನಿನ್ನ ದೇವರನು ಮೂದಲಿಸಿಹರು
ಸರ್ವೇಶ್ವರನ ರೋಷವನ್ನನುಭವಿಸಿಹರು.
21 : ಇಂತಿರಲು ಶೋಷಿತಳೇ, ಕೇಳು ನನ್ನ ಮಾತನು
ದ್ರಾಕ್ಷಾರಸದಿಂದಲ್ಲ ನೀ ಅಮಲೇರಿರುವುದು.
22 : ಕೇಳು, ಸ್ವಾಮಿ ಸರ್ವೇಶ್ವರ ಆದ ನಾ
ಹೇಳುವ ಮಾತನು:
ತನ್ನ ಜನರ ಪರವಾಗಿ ವಾದಿಸುವ
ನಿನ್ನ ದೇವರು ನಾನು:
“ಇಗೋ, ಅಮಲೇರಿಸುವ ಪಾತ್ರೆಯನು
ನನ್ನ ಕೋಪದಿಂದ ತುಂಬಿತುಳುಕುವಾ
ಕೊಡವನು
ನೀ ಕುಡಿಯಬಾರದೆಂದು ನಿನ್ನಿಂದ
ತೆಗೆದುಬಿಡುವೆನು.
23 : ಕೊಡುವೆ ಆ ಕೋಪದ ಕೊಡವನು
ನಿನ್ನನು ಶೋಷಿಸಿದವರಿಗೆ
‘ನಾವು ತುಳಿದು ಹಾದುಹೋಗುವಂತೆ
ನೆಲಕಚ್ಚಿ ಬೀಳು ಕೆಳಗೆ’
ಎಂದು ನಿಮ್ಮ ಬೆನ್ನನೆ ನೆಲವಾಗಿಸಿ,
ಬೀದಿಕಸವನ್ನಾಗಿಸಿದವರಿಗೆ.”