ಕನ್ನಡ ಕಥೋಲಿಕ ಬೈಬಲ್
1 : ಹೇ ಪ್ರಭು, ಮುಯ್ಯಿತೀರಿಸುವ
ದೇವಾ /
ಮುಯ್ಯಿತೀರಿಸಲು ಎದ್ದುಬಾರಯ್ಯಾ //
2 : ಪ್ರಭೂ, ಲೋಕದ ನ್ಯಾಯಾಧಿಪತಿ /
ಏಳು, ಗರ್ವಿಗಳಿಗೆ ಮಾಡು ತಕ್ಕಶಾಸ್ತಿ //
3 : ಎಲ್ಲಿಯವರೆಗೆ ಪ್ರಭು, ಎಲ್ಲಿಯವರೆಗೆ?/
ದುರುಳರು ಹಿಗ್ಗುತ್ತಲೆ ಇರಬೇಕು ಹೀಗೆ? //
4 : ಉಬ್ಬಿ ಹೋಗಿಹರು ಕೆಡುಕರೆಲ್ಲರು /
ಜಂಬ ಕೊಚ್ಚಿಕೊಳ್ಳುತ್ತಿಹರು ಅವರು //
5 : ನಸುಕಿ ಹಾಕುತಿಹರು ನಿನ್ನ ಪ್ರಜೆಯನು /
ಹಿಂಸಿಸುತಿಹರು ನಿನ್ನ ಸ್ವಕೀಯರನು //
6 : ವಧಿಸುತಿಹರು ವಿಧವೆಯರನು,
ಪರದೇಶಿಯರನು /
ಹತ್ಯಮಾಡುತಿಹರು ಗತಿಯಿಲ್ಲದ
ಅನಾಥರನು //
7 : ಅವರಾಡಿಕೊಳ್ಳುತಿಹರು ಪ್ರಭು ನೋಡನೆಂದು /
ಯಕೋಬ್ಯರ ಸ್ವಾಮಿದೇವ ವಿಚಾರಿಸನೆಂದು //
8 : ಮೂರ್ಖರೇ, ನಿಮಗೆ
ಜ್ಞಾನೋದಯವಾಗುವುದಾವಾಗ? /
ಪಶುಪ್ರಾಯರಾದ ಪ್ರಜೆಗಳು
ಗಮನಿಸುವುದಾವಾಗ? //
9 : ಕಿವಿಮಾಡಿದವನು ಕೇಳದಿರುವನೋ? /
ಕಣ್ಣುಕೊಟ್ಟವನು ನೋಡದಿರುವನೋ? //
10 : ರಾಷ್ಟ್ರಗಳನು ಖಂಡಿಸುವವನು
ದಂಡಿಸದಿರುವನೋ? |
ಮನುಜರಿಗೆ ಬುದ್ಧಿಕಲಿಸುವವನು
ಬುದ್ಧಿಹೀನನೋ? ||
11 : ಮನುಜರಾಲೋಚನೆಗಳು ತಿಳಿದೇ ಇವೆ
ಪ್ರಭುವಿಗೆ /
ಉಸಿರಿನಷ್ಟೇ ವ್ಯರ್ಥವೆಂದು ಗೊತ್ತಿದೆ ಆತನಿಗೆ //
12 : ಪ್ರಭು, ನಿನ್ನಿಂದ ಶಿಕ್ಷಿತನಾದ ಮಾನವ ಧನ್ಯ /
ನಿನ್ನಿಂದ ಧರ್ಮೋಪದೇಶ ಪಡೆದವನು ಧನ್ಯ //
13 : ನೆಮ್ಮದಿ ನೀಡುವೆ ಅವನು ಸಂಕಟದಲಿರುವಾಗ /
ದುರುಳರಿಗೆ ನೀನು ಗುಂಡಿಯನು
ತೋಡುವಾಗ //
14 : ತಳ್ಳಿಬಿಡಲು ಪ್ರಭು ತನ್ನ ಜನರನು /
ಕೈಬಿಡನವನು ತನ್ನ ಸ್ವಕೀಯರನು //
15 : ನ್ಯಾಯತೀರ್ಪು ಮರಳಿ ತಿರುಗುವುದು
ನೀತಿಯತ್ತ /
ನೇರಮನಸ್ಕರೆಲ್ಲ ಮಾಡುವರು ಅದನು
ಸಮರ್ಥ //
16 : ದುರುಳರಿಗೆದುರಾಗಿ ನನ್ನ ಪಕ್ಷ
ವಹಿಸುವರಾರು? /
ಕೆಡುಕರಿಗೆ ವಿರುದ್ಧ ನನ್ನ ಪರ
ನಿಲ್ಲುವವರಾರು? //
17 : ನನಗಿಲ್ಲದಿದ್ದರೆ ಪ್ರಭುವಿನ ಮರುಕ /
ಮನೆಯಾಗುತ್ತಿತ್ತೆನಗೆ ಅಧೋಲೋಕ //
18 : ನನ್ನ ಕಾಲು ಜಾರಿಹೋಯಿತು
ಎನ್ನುವುದರೊಳಗೆ /
ನಿನ್ನ ಅಚಲಪ್ರೀತಿ, ಪ್ರಭು ನೆರವಾಯಿತೆನಗೆ //
19 : ನನ್ನ ಅಂತರಂಗದಲಿ ಏಳಲು ಆಂದೋಲನ /
ತಂದಿತೆನ್ನ ಮನಕೆ ಆನಂದ ನಿನ್ನ ಸಾಂತ್ವನ //
20 : ಅನ್ಯಾಯಸ್ಥಾಪಕರಿಗೂ ನಿನಗೂ
ಸಂಬಂಧವೆಲ್ಲಿ /
ಕೇಡನು ಕಲ್ಪಿಸುತ್ತಾರವರು ಶಾಸನದ
ಹೆಸರಿನಲ್ಲಿ //
21 : ಹೊಂಚು ಹಾಕುವರವರು ನೀತಿವಂತರ
ಪ್ರಾಣಕೆ /
ಮರಣಶಿಕ್ಷೆ ವಿಧಿಸುವರವರು
ನಿರಪರಾಧಿಗಳಿಗೆ //
22 : ನನಗೋ ಪ್ರಭುವೇ ಕಲ್ಲು ಕೋಟೆ |
ನನಗಾಶ್ರಯ ನೀಡುವ ಪೊರೆಬಂಡೆ ||
23 : ದಂಡಿಸುವನಾ ಕೆಡುಕರನು ಅವರ
ಕೆಟ್ಟತನಕ್ಕಾಗಿ /
ನಿರ್ಮೂಲ ಮಾಡುವನಾ ಜನರ
ದುಷ್ಟತನಕ್ಕಾಗಿ /
ನಮ್ಮೊಡೆಯ ದೇವನು ಸಂಹರಿಸಿ ಬಿಡುವನು
ಈ ಕಾರಣಕ್ಕಾಗಿ //