ಕನ್ನಡ ಕಥೋಲಿಕ ಬೈಬಲ್
1 : ಹೇ ಪ್ರಭು, ನೀಡೆನಗೆ ಸದುತ್ತರವನು /
ಕಿವಿಗೊಡು, ದೀನನು, ದಲಿತನು
ನಾನು //
2 : ಕಾಪಾಡು ಪ್ರಭು, ನಾ ನಿನ್ನ ಭಕ್ತನು /
ಉದ್ಧರಿಸು ನಿನ್ನ ನಂಬಿದ ದಾಸನನು //
3 : ನೀನೆನಗೆ ದೇವನು, ಕರುಣಿಸೆನ್ನನು /
ದಿನವೆಲ್ಲ ಪ್ರಭು, ನಿನಗೆ ಮೊರೆಯಿಡುವೆನು //
4 : ನಿನ್ನ ದಾಸನಿಗೆ ನೀಡು ಮನದಾನಂದವನು /
ನಿನಗೆ ಅಭಿಮುಖವಾಗಿಸಿರುವೆ ಎನ್ನಾತ್ಮವನು //
5 : ಪ್ರಭು, ನೀನು ದಯಾವಂತನು, ಕ್ಷಮಿಸುವವನು /
ಮೊರೆಯಿಡುವವರಿಗೆ ನೀನು ಕೃಪಾಪೂರ್ಣನು //
6 : ಕಿವಿಗೊಡು ಪ್ರಭು, ನನ್ನ ಪ್ರಾರ್ಥನೆಗೆ /
ನನ್ನ ವಿಜ್ಞಾಪನೆಗಳ ಕೋರಿಕೆಗೆ //
7 : ಸಂಕಟಬಂದಾಗ ನಿನಗೆ ಮೊರೆಯಿಡುವೆ /
ಸದುತ್ತರ ಪಾಲಿಸುವೆಯೆಂದು ನಂಬಿರುವೆ //
8 : ದೇವರುಗಳಲಿ ಪ್ರಭು, ನಿನ್ನಂಥವನಿಲ್ಲ /
ನಿನ್ನ ಮಹತ್ಕಾರ್ಯಗಳಿಗೆ ಸಾಟಿಯೇ ಇಲ್ಲ //
9 : ಬರುವುವು ನೀನುಂಟುಮಾಡಿದ ಸಕಲ
ಜನಾಂಗಗಳು /
ನಿನ್ನ ನಾಮವನು ಘನಪಡಿಸಲು, ನಿನಗೆ
ಅಡ್ಡಬೀಳಲು //
10 : ಪ್ರಭು, ನೀನೊಬ್ಬನೇ ದೇವನು /
ಅದ್ಭುತಶಾಲಿ, ಮಹೋನ್ನತನು //
11 : ನಿನ್ನ ಸತ್ಯಪಥದಲಿ ನಾ ನಡೆವಂತೆ /
ಬೋಧಿಸೆನಗೆ ಪ್ರಭು, ನಿನ್ನ ಮಾರ್ಗವನು //
ನಿನ್ನ ನಾಮದಲಿ ಭಯಭಕ್ತಿಯಿರುವಂತೆ /
ಅನುಗ್ರಹಿಸೆನಗೆ ನೀ ಏಕಾಗ್ರತೆಯನು //
12 : ಮಾಡುವೆ ದೇವಾ, ನಿನ್ನ ಗುಣಗಾನವನು
ಶ್ರದ್ಧೆಯಿಂದ /
ಘನಪಡಿಸುವೆ ಸ್ವಾಮಿ, ನಿನ್ನ ಶ್ರೀನಾಮವನು
ಅನವರತ //
13 : ನೀನೆನಗೆ ತೋರಿಸಿರುವ ಕರುಣೆ
ಮಹತ್ತರವಾದುದಯ್ಯಾ |
ಪಾತಾಳದಿಂದ ನನ್ನ ಪ್ರಾಣವನು
ಉಳಿಸಿದೆಯಯ್ಯಾ ||
14 : ಗರ್ವಿಗಳೆದ್ದಿಹರು ದೇವಾ, ನನ್ನ ವಿರುದ್ಧವಾಗಿ /
ನನ್ನ ಪ್ರಾಣಕೆ ಕಾದಿಹರು ಕ್ರೂರಿಗಳು
ಗುಂಪಾಗಿ /
ಕಾಣುತ್ತಿಹರವರು ನಿನ್ನನು ಪ್ರಭು,
ಅಲಕ್ಷ್ಯವಾಗಿ //
15 : ಪ್ರಭು, ನೀ ದಯಾಳು, ದೇವಾ ನೀ
ಕರುಣಾಮೂರ್ತಿ /
ಸಹನಶೀಲನು, ಸತ್ಯಸ್ವರೂಪಿ,
ಪ್ರೇಮಮೂರ್ತಿ //
16 : ಕಟಾಕ್ಷವಿಟ್ಟು ಕರುಣಿಸೆನ್ನನು /
ನೀಡು ನಿನ್ನ ದಾಸನಿಗೆ ಬಲವನು /
ರಕ್ಷಿಸು ನಿನ್ನ ದಾಸಿಯ ಮಗನನು //
17 : ನಿನ್ನ ನೆರವು, ಸಾಂತ್ವನ, ನನಗಿದೆಯೆಂದು /
ನೀಡೊಂದು ಪ್ರಭು, ಶುಭಸೂಚನೆಯನು /
ಅದನೋಡಿ ಶತ್ರು ಪಡಲಿ ಲಜ್ಜೆಯನು //