ಕನ್ನಡ ಕಥೋಲಿಕ ಬೈಬಲ್
1 : ಮಾತನಾಡದೆ ದೇವಾ,
ಸುಮ್ಮನಿರಬೇಡ /
ಮೌನದಿಂದ ಸ್ವಾವಿೂ, ನಿಶ್ಚಿಂತನಿರಬೇಡ //
2 : ದಂಗೆಯೆದ್ದಿಹರಿದೋ ನಿನ್ನ ಶತ್ರುಗಳು / ತಲೆಯೆತ್ತಿಕೊಂಡಿಹರು ನಿನ್ನ ದ್ವೇಷಿಗಳು //
3 : ಕುತಂತ್ರಮಾಡುತಿಹರು ನಿನ್ನ ಪ್ರಜೆಗೆ ವಿರುದ್ಧ /
ಆಲೋಚಿಸುತಿಹರು ನಿನ್ನ ಶರಣರಿಗೆ
ವಿರುದ್ಧ //
4 : ಇಂತೆನ್ನುತಿಹರು: “ಬನ್ನಿ ಸಂಹರಿಸೋಣ /
ಆತನ ಜನಾಂಗ ಉಳಿಯದಂತೆ ಮಾಡೋಣ /
ಇಸ್ರಯೇಲೆಂಬ ನಾಮವನಳಿಸಿಬಿಡೋಣ”//
5 : ಎದೋಮ್ಯರ ಪಾಳೆಯದವರು,
ಇಷ್ಮಾಯೇಲ್ಯರು, /
ಗೇಬಾಲ್ಯರು, ಅಮ್ಮೋನಿಯರು,
ಅಮಾಲೇಕ್ಯರು, //
6 : ಮೊವಾಬ್ಯ, ಹಗ್ರೀಯ, ಫಿಲಿಷ್ಟಿಯ, ಟೈರ್ ಜನರು / ಒಮ್ಮತದಿಂದಿವರೆಲ್ಲರು ಒಟ್ಟುಗೂಡಿಹರು /
7 : ನಿನ್ನ ವಿರುದ್ಧವಾಗಿ ಒಳಸಂಚು ಮಾಡಿಹರು //
8 : ಇವರೊಡನೆ ಕೂಡಿಕೊಂಡಿಹ ಅಸ್ಸೀರ್ಯರು /
ಲೋಟನ ವಂಶಕ್ಕೆ ಭುಜಬಲವಾಗಿಹರು //
9 : ಮಾಡವರಿಗೆ ಪ್ರಭೂ, ನೀ ಮಿದ್ಯಾನ್ಯರಿಗೆ
ಮಾಡಿದಂತೆ /
ಕಿಷೋನ್ ನದಿಯಬಳಿ ಸೀಸೆರ್‍ಯಾಬೀನರಿಗೆ
ಮಾಡಿದಂತೆ //
10 : ಎಂದೋರಿನಲ್ಲವರು ಕೊಲೆಯಾದರು /
ಹೊಲಗದ್ದೆಗಳಿಗೆ ಗೊಬ್ಬರವಾದರು //
11 : ಒರೆಬ್, ಜೇಬ್ ಎಂಬವರ
ಗತಿಯೊದಗಲಿ ಇವರ ಸಿರಿವಂತರಿಗೆ /
ಜೇಬಹ, ಚೆಲ್ಮುನ್ನರ ಪಾಡು ಬರಲಿರುವ ಸಕಲ
ರಾಜರಿಗೆ /
12 :
“ಬನ್ನಿ, ದೇವರ ನಾಡುಬೀಡನು
ಆಕ್ರಮಿಸೋಣ” ಎಂದವರಿಗೆ //
13 : ಮಾಡಿವರನು ದೇವಾ, ಗಾಳಿಗೆ ತೂರುವ
ಹೊಟ್ಟಿನಂತೆ /
ಸುಂಟರಗಾಳಿಯಲಿ ಮೇಲೇಳುವ
ದೂಳೀಪಟದಂತೆ //
14 : ಕಾಡುಮೇಡನು ಸುಡುವಾ ಬೆಂಕಿಯಂತೆ /
ಪರ್ವತವನೆ ಉರಿಸುವ ಜ್ವಾಲೆಯಂತೆ //
15 : ಓಡಿಸೋಡಿಸವರನು ನೀ ಬೀಸುವ
ಬಿರುಗಾಳಿಗೆ /
ಗುರಿಪಡಿಸವರನು ನಿನ್ನಾ ಚಂಡಮಾರುತಕೆ //
16 : ಕವಿಯಲಿ ಅವಮಾನ ನಿಂದೆ ಇವರ
ಮುಖವನು /
ಅರಸುವರಾಗ ಪ್ರಭೂ, ನಿನ್ನ ಸಿರಿನಾಮವನು //
17 : ಕಳವಳಗೊಳ್ಳಲಿ ಅವರು ಸತತವು ಲಜ್ಜೆಯಿಂದ /
ಅವರಳಿದುಹೋಗಲಿ
ಅವಮಾನ ನಿಂದೆಗಳಿಂದ //
18 : ಇವರು ಅರಿಯಲಿ ಪ್ರಭುವೆಂಬ ನಾಮ
ನಿನ್ನದೆಂದು
ಧರೆಯಲ್ಲೆಲ್ಲಾ ಸರ್ವೋನ್ನತ ನೀನೇ ಎಂದು //