ಕನ್ನಡ ಕಥೋಲಿಕ ಬೈಬಲ್
1 : ನನ್ನ ಜನರೇ, ಕಿವಿಗೊಡಿ ನನ್ನ
ಬೋಧನೆಗೆ /
ಗಮನಕೊಡಿ ನಾ ಹೇಳುವ ಮಾತುಗಳಿಗೆ /
2 : ಸಾಮತಿಯೊಂದಿಗೆ
ಬೋಧನೆಯನಾರಂಭಿಸುವೆನು /
ಹೊರಪಡಿಸುವೆನು ಪೂರ್ವಕಾಲದ
ಗೂಡಾರ್ಥಗಳನು //
3 : ಪೇಳ್ವೆವು ನಾವು ಕೇಳಿ ತಿಳಿದುಕೊಂಡವುಗಳನೆ /
ಪೂರ್ವಜರೆಮಗೆ ತಿಳಿಸಿದ ಸಂಗತಿಗಳನೆ /
ಪ್ರಭುವಿನ ಮಹಿಮೆ ಪರಾಕ್ರಮದ
ಪವಾಡಗಳನೆ //
4 : ಮರೆಮಾಡೆವು ಅವರ ಸಂತತಿಯಾದ ನಿಮಗೆ /
ವಿವರಿಸುವೆವು ಮುಂಬರಲಿರುವ ಪೀಳಿಗೆಗೆ //
5 : ನೇಮವಿತ್ತನು ಯಕೋಬವಂಶಕೆ /
ಶಾಸನಕೊಟ್ಟನು ಇಸ್ರಯೇಲರಿಗೆ //
ವಿಧಿಸಿದ ನಿಂತು ನಮ್ಮ ಪೂರ್ವಜರಿಗೆ /
“ಕಲಿಸಿರಿ ಇವನ್ನು ನಿಮ್ಮ ಮಕ್ಕಳಿಗೆ” //
6 : “ಗೊತ್ತಾಗಲಿ ಇವೆಲ್ಲ ಮುಂದಿನ
ತಲೆಮಾರಿಗೆ /
ತಿಳಿಸುತ್ತ ಹೋಗಲಿ ಮಕ್ಕಳು
ಮೊಮ್ಮಕ್ಕಳಿಗೆ” //
7 : ಆಗ ತಮ್ಮ ಪ್ರಾಚೀನ ಪೂರ್ವಿಕರಂತೆ
ಅವರಾಗರು /
ಮೊಂಡರು, ಅವಿಧೇಯರು,
ದೈವದ್ರೋಹಿಗಳು, ಚಪಲಚಿತ್ತರು //
8 : ಮರೆಯರು ನನ್ನ ಮಹಾತ್ಕಾರ್ಯಗಳನು /
ಇಡುವರು ನನ್ನಲ್ಲೇ ಭರವಸೆಯನು /
ಕೈಗೊಳ್ಳುವರು ನನ್ನ ಆಜ್ಞೆಗಳನು //
9 : ಎಫ್ರಯಿಮರು ಹೋದರು ಧನುರ್ಧಾರಿಗಳಾಗಿ /
ಯುದ್ಧವೇಳೆಯಲಿ ಓಡೋಡಿದರು
ಹಿಂದಿರುಗಿ //
10 : ಪಾಲಿಸಲಿಲ್ಲ ಅವರು ದೇವರ ನಿಬಂಧನೆಯನು /
ಅನುಸರಿಸಲಿಲ್ಲ ಆತನ ಧರ್ಮಶಾಸ್ತ್ರವನು //
11 : ಮರೆತುಬಿಟ್ಟರವರು ಆತನ
ಮಹತ್ಕಾರ್ಯಗಳನು /
ತಮ್ಮೆದುರಿನಲ್ಲೇ ಸಾಧಿಸಿದ ಅದ್ಭುತಗಳನು: //
12 : ಆ ಈಜಿಪ್ಟ್ ದೇಶದೊಳು, ಸೋನ್ ಬಯಲು
ಸೀಮೆಯೊಳು /
ಆತನೆಸಗಿದ ಪವಾಡಗಳು ಪೂರ್ವಜರ
ಇದಿರೊಳು //
13 : ದಾಟಿಸಿದನವರನು ಸಮುದ್ರವನೆ ಭೇದಿಸಿ /
ಅದರತುಳ ನೀರನು ರಾಶಿಯಾಗಿ ನಿಲ್ಲಿಸಿ //
14 : ಹಗಲಲಿ ಕರೆದೊಯ್ದನು ಮೇಘದ ನೆರಳಲಿ /
ಇರುಳೊಳು ನಡೆಸಿದನು ಜ್ವಾಲೆಯ ಬೆಳಕಲಿ //
15 : ಕಾಡಿನಾ ಕಗ್ಗಲ್ಲನು ಸೀಳಿ ಹೊರಡಿಸಿದನು
ನೀರನು /
ಆಳದ ಸರಸಿಯಿಂದೊ ಎಂಬಂತೆ ಅದನು
ಕುಡಿಯಲಿತ್ತನು //
16 : ಬಂಡೆಗಳಿಂದಲೆ ಹೊರಡಿಸಿದನು ನೀರನು /
ನದಿಗಳಂತೆಯೇ ಹರಿಯಮಾಡಿದನು
ಅದನು //
17 : ಆದರೂ ಪಾಪಮಾಡುತ್ತಲೆ ಬಂದರು
ದೇವರಿಗೆದುರಾಗಿ /
ಪ್ರತಿಭಟಿಸಿದರು ಅಡವಿಯಲಿ ಪರಾತ್ಪರನಿಗೆ
ವಿರುದ್ಧವಾಗಿ //
18 : ಕೋರಿದರು ತನುಗಿಷ್ಟವಾದ ಆಹಾರವನೇ /
ಪರೀಕ್ಷಿಸಿದರು ಮನದಲಿ ಆ ದೇವರನೇ //
19 : ಜರೆವ ಮಾತಿನಲಿ ಆಡಿಕೊಂಡರಿಂತು:/
“ಅಡವಿಯಲ್ಲಿ ದೇವನೂಟ
ಬಡಿಸುವನೆಂತು?” //
20 : “ಹೊಡೆದನು ಆಸರೆಯನು, ಚಿಮ್ಮಿತು ನೀರು,
ಹರಿಯಿತು ನೆರೆಯು /
ಆದರೆ ಕೊಡಬಲ್ಲನೆ ರೊಟ್ಟಿ, ಒದಗಿಸುವನೆ
ಮಾಂಸವನು?” //
21 : ಇದನ್ನು ಕೇಳಿ ಸಿಡಿದೆದ್ದನು ಪ್ರಭು
ರೋಷದಿಂದಲೆ /
ಉಕ್ಕೇರಿತಾತನ ಕೋಪ ಇಸ್ರಯೇಲರ ಮೇಲೆ /
ಕಾರಿದನು ಕೋಪಾಗ್ನಿಯನು ಯಕೋಬಕುಲದ
ಮೇಲೆ //
22 : ಏಕೆನೆ, ಅವರಿಗಿರಲಿಲ್ಲ ವಿಶ್ವಾಸ ದೇವರಲಿ /
ಇರಲಿಲ್ಲ ನಂಬಿಕೆ ಆತನಾ ಸಲಹುವ
ಶಕ್ತಿಯಲಿ //
23 : ಆದರು ಮೇಘಮಂಡಲಕೆ ಆಜ್ಞೆಯಿತ್ತನಾತ /
ಅಂತರಿಕ್ಷದಾ ದ್ವಾರಗಳನು ತೆರೆದನಾತ //
24 : ಸುರಿಸಿದನು ಅವರ ಮೇಲೆ ಉಣಲು ಅನ್ನವನು /
ಅನುಗ್ರಹಿಸಿದನು ಸ್ವರ್ಗದ ದವಸಧಾನ್ಯವನು //
25 : ನರರಿಗುಣಲುಕೊಟ್ಟನು ದೇವದೂತರ
ಆಹಾರವನು /
ಇತ್ತನವರಿಗೆ ತೃಪ್ತಿಕರವಾದ ಭೂರಿ
ಔತಣವನು //
26 : ಆಕಾಶದಲೆಬ್ಬಿಸಿದನು ಮೂಡಣ ಗಾಳಿಯನು /
ಒಲುಮೆಯಿಂದ ಹೊರಡಿಸಿದನು ತೆಂಕಣ
ಗಾಳಿಯನು //
27 : ಧೂಳಿನಷ್ಟು ಸುರಿಸಿದನು ಮಾಂಸವೃಷ್ಟಿಯನು /
ಸಮುದ್ರದ ಮರಳಿನಷ್ಟು ರೆಕ್ಕೆ ಹಕ್ಕಿಗಳನು //
28 : ಬೀಳ್ವಂತೆ ಮಾಡಿದನು ಪಾಳೆಯದ
ಮಧ್ಯದಲೂ /
ಉದುರಿದವು ಅವರಿದ್ದ ಗುಡಾರಗಳ
ಸುತ್ತಲೂ //
29 : ಸಿಕ್ಕಿತು ಅವರಿಗೆ ತಾವು ಬಯಸಿದ್ದು /
ತೃಪ್ತರಾದರು ಹೊಟ್ಟೆತುಂಬ ತಿಂದು //
30 : ಆದರೆ ಆ ಜನಕೆ ಆಶೆ ಕೈಗೂಡುವುದಕೆ
ಮುನ್ನ /
ಬಾಯಿಗೆ ಬಂದ ತುತ್ತು ಹೊಟ್ಟೆಗಿಳಿಯುವುದಕ್ಕೆ
ಮುನ್ನ //
31 : ದೈವಕೋಪವೆದ್ದಿತು ಅವರಿಗೆ ವಿರುದ್ಧ /
ಮಾಡಿತವರಲಿ ಕೊಬ್ಬಿದವರ ವಧ /
ನೆಲಕುರುಳಿತು ಇಸ್ರಯೇಲ ಸಿರಿಜನ //
32 : ಇಷ್ಟಾದರೂ ಪಾಪಮಾಡುತ ಬಂದವರು ಪದೇ
ಪದೇ /
ದೇವರ ಅದ್ಭುತ ಕಾರ್ಯಗಳನು ತೊರೆದರು
ನಂಬದೆ //
33 : ಆರಿಸಿದನು ಊದಿ ಅವರ ಬಾಳ ಹಣತೆಯನು /
ಬರಮಾಡಿದನು ಅವರಿಗೆ ಭೀಕರ
ಮರಣವನು //
34 : ಆತನನು ನೆನಸಿಕೊಂಡರವರು
ವಧೆಯಾಗುವಾಗ /
ಪರಿತಾಪಗೊಂಡು ದೇವರಿಗೆ
ಅಭಿಮುಖರಾದಾಗ //
35 : ನೆನೆದರಾಗ ದೇವರೇ ತಮಗಾಶ್ರಯ
ದುರ್ಗವೆಂದು /
ಆ ಪರಾತ್ಪರ ದೇವರೇ ತಮಗೆ
ಉದ್ಧಾರಕನೆಂದು //
36 : ಆದರೆ ಅವರ ನಾಲಿಗೆಯಾಡಿತು ಅಸತ್ಯ /
ಅವರ ಬಾಯಿ ಮಾಡಿತು ಕೇವಲ
ಮುಖಸ್ತುತಿಯ //
37 : ನೆಲೆಯಾಗಿರಲಿಲ್ಲ ಅವರ ಹೃದಯ ಆತನಲಿ /
ಬದ್ಧರಾಗಿರಲಿಲ್ಲ ಆತನ ನಿಬಂಧನೆಗಳಲಿ //
38 : ಆದರೂ ಕ್ಷಮಿಸಿದನವರನು ಆ ದಯಾಳು,
ನಾಶಮಾಡದೆ /
ಕೋಪವ ತಾಳಿಕೊಂಡನು ಹಲವು ವೇಳೆ,
ಉದ್ರೇಕಗೊಳ್ಳದೆ //
39 : ನೆನೆದುಕೊಂಡನಾತ ಅವರು ಕೇವಲ ನರರೆಂದು /
ತಿಳಿದುಕೊಂಡನು ಮರಳಿಬಾರದ
ಉಸಿರವರೆಂದು //
40 : ಎಷ್ಟೋ ಸಾರಿ ಅವಿಧೇಯರಾಗಿ
ನಡೆದುಕೊಂಡರು ಅರಣ್ಯದಲಿ /
ಎಷ್ಟೋ ಸಾರಿ ಆತನ ಮನನೋಯಿಸಿದರು
ಮರುಭೂಮಿಯಲಿ //
41 : ಪದೇಪದೇ ಪರೀಕ್ಷಿಸಿದರು ದೇವರನು /
ಕೆಣಕಿದರು ಇಸ್ರಯೇಲರ ಸದಮಲನನು //
42 : ಮರೆತೇಬಿಟ್ಟರು ಆತನ ಭುಜಬಲವನು /
ವೈರಿಗಳಿಂದ ಬಿಡುಗಡೆಯಾದಾ ಸಮಯವನು //
43 : ಕಡೆಗಣಿಸಿದರು ಈಜಿಪ್ಟಿನಲಿ ಮಾಡಿದ
ಪವಾಡಗಳನು /
ಸೋನ್ ಬಯಲು ಸೀಮೆಯಲಾತ ಮಾಡಿದ
ಮಹತ್ಕಾರ್ಯಗಳನು //
44 : ಅಲ್ಲಿ ಆತ ರಕ್ತವಾಗಿಸಿದನು ನದಿನೀರನು /
ಕುಡಿಯಲಾಗದಂತೆ ಮಾಡಿದನಾ
ತೊರೆನೀರನು //
45 : ಕಳುಹಿಸಿದನು ವಿನಾಶಕರ ಹುಳುಗಳನು /
ಹಾಳುಮಾಡುವ ವಿಷಮಂಡೂಕಗಳನು //
46 : ಬಿಟ್ಟನು ಬೆಳೆಗಳನು ಚಿಟ್ಟೆಗಳಿಗೆ /
ಕಷ್ಟದ ಫಲಗಳನು ಮಿಡತೆಗಳಿಗೆ //
47 : ದ್ರಾಕ್ಷಾಲತೆಗಳನು ಹಾಳುಮಾಡಿದನು
ಆಲಿಕಲ್ಲಿನಿಂದ /
ಅವರ ಅತ್ತಿಮರಗಳನು ನಾಶಮಾಡಿದನು
ಕಲ್ಮಳೆಯಿಂದ //
48 : ಅವರ ದನಕರುಗಳನೊಪ್ಪಿಸಿದ ಕಲ್ಮಳೆಗೆ /
ಅವರ ಕುರಿಮಂದೆಗಳನೊಪ್ಪಿಸಿದ ಸಿಡಿಲಿಗೆ //
49 : ಸುರಿಸಿದನು ಕೋಪರೌದ್ರಗಳನು,
ಉಗ್ರಹಿಂಸೆಗಳನು /
ಕಳಿಸಿದನವರಮೇಲೆ ಸಂಹಾರಕ
ದೂತಗಣಗಳನು //
50 : ತೂಬೆತ್ತಿಬಿಟ್ಟನು ತನ್ನ ಕ್ರೋಧಕೆ /
ತುತ್ತಾಗಿಸಿದನು ದೇಹಗಳನು ಜಾಡ್ಯಕೆ /
ಅಡ್ಡಿತರಲಿಲ್ಲ ಆತನು ಅವರ ಮರಣಕೆ //
51 : ಸಂಹರಿಸಿದನು ಈಜಿಪ್ಟಿನ ಚೊಚ್ಚಲ
ಮಕ್ಕಳನು /
ಹಾಮನ ಮನೆತನದ ಮೊತ್ತಮೊದಲ
ಸಂತಾನವನು //
52 : ತನ್ನ ಜನರನೋ ಹೊರತಂದನು
ಕುರಿಮಂದೆಯಂತೆ /
ಅಡವಿಯೊಳು ಪರಿಪಾಲಿಸಿದನು
ಕುರಿಗಾಹಿಯಂತೆ //
53 : ಅವರು ಅಂಜದಂತೆ ನಡೆಸಿದನು ಸುರಕ್ಷಿತವಾಗಿ /
ಶತ್ರುಗಳನೋ ಆವರಿಸಿತು ಸಮುದ್ರವು ನುಂಗಿ //
54 : ಕರೆತಂದನವರನು ತನ್ನ ಪವಿತ್ರನಾಡಿಗೆ /
ಭುಜಬಲದಿಂದ ಗಳಿಸಿದಾಪರ್ವತ ಸೀಮೆಗೆ //
55 : ಓಡಿಸಿದನು ಅವರಿಗೆದುರಾಗಿದ್ದ
ಜನಾಂಗಗಳನು /
ಸೊತ್ತಾಗಿ ಹಂಚಿದನು ಇಸ್ರಯೇಲರಿಗಾ
ನಾಡನು /
ನೆಲೆಗೊಳಿಸಿದನಾ ಜನಾಂಗದ ಬಿಡಾರದಲಿ
ಇವರನು //
56 : ಆದರೂ ಬಂಡೆದ್ದು ಪರೀಕ್ಷಿಸಿದರು ಪರಾತ್ಪರ
ದೇವರನು /
ಕೈಗೊಂಡು ನಡೆಯದೆ ಹೋದರು ಆತನ
ವಿಧಿನಿಯಮಗಳನು //
57 : ನಂಬಿಕೆಗೆಟ್ಟ ದ್ರೋಹಿಗಳಾದರು ತಮ್ಮ
ಹಿರಿಯರಂತೆ /
ಆತನಿಗೆ ಎದುರುಬಿದ್ದರು ಹಿಮ್ಮುಖವಾದ
ಬಿಲ್ಲಿನಂತೆ //
58 : ಬೇಸರಗೊಳಿಸಿದರು ತಮ್ಮ
ಪೂಜಾಸ್ಥಾನಗಳಿಂದ /
ರೇಗಿಸಿದರಾತನನು ಕೆತ್ತನೆಯ
ವಿಗ್ರಹಗಳಿಂದ //
59 : ರಣರೌದ್ರನಾದನು ಇದನರಿತ ದೇವನು /
ತೊರೆದನು ಅಸಹ್ಯದಿಂದ ಇಸ್ರಯೇಲರನು //
60 : ತ್ಯಜಿಸಿದನು ಸಿಲೋವಿನಲಿ ತನಗಿದ್ದ
ಆಲಯವನು /
ಜನರ ಮಧ್ಯೆ ವಾಸಿಸಲು ತನಗಿದ್ದಾ
ಗುಡಾರವನು //
61 : ಒಪ್ಪಿಸಿದನು ತನ್ನ ಬಲುಮೆಯನು ಕೈಸೆರೆಗೆ /
ತನ್ನ ಮಹಿಮೆಯನು ವಿರೋಧಿಗಳ ಕೈವಶಕೆ //
63 : ಆಹುತಿಯಾದರವರ ಯುವಜನ ಅಗ್ನಿಗೆ /
ವಿವಾಹವಾಗಲಿಲ್ಲ ಅವರ ಕನ್ಯೆಯರಿಗೆ //
64 : ಬಲಿಯಾದರವರ ಯಾಜಕರು ಶತ್ರುಕತ್ತಿಗೆ /
ವಿಧವೆಯರು ರೋದಿಸಲಿಲ್ಲ ಅವರ ಸಾವಿಗೆ //
65 : ಪ್ರಭುವೆದ್ದನು ನಿದ್ರೆಯಿಂದಲೋ ಎಂಬಂತೆ /
ಮಧುವಿನ ಅಮಲಿನಿಂದೆಚ್ಚೆತ್ತ ಬಲಿಷ್ಠ
ನಂತೆ //
66 : ಸದೆಬಡಿದನಾತ ತನ್ನ ಶತ್ರುಗಳನು /
ನಿತ್ಯನಿಂದೆಗೆ ಈಡುಮಾಡಿದನವರನು //
67 : ವರ್ಜಿಸಿದನು ಜೋಸೆಫ್ ಕುಲದ ಗುಡಾರವನು /
ತ್ಯಜಿಸಿದನು ಎಫ್ರಯಿಮ್ ಕುಲದಾ
ಗುಡಾರವನು //
68 : ಆರಿಸಿಕೊಂಡನು ಯೆಹೂದರ ಗೋತ್ರವನು /
ತನಗತಿಪ್ರಿಯವಾದ ಸಿಯೋನ್ ಗಿರಿಯನು //
69 : ನಿರ್ಮಿಸಿದನು ತನ್ನ ಮಂದಿರವನು
ಪರ್ವತದಂತೆ /
ಶಾಶ್ವತವಾಗಿ ತಾನು ಸ್ಥಾಪಿಸಿದ
ಭೂಮಿಯಂತೆ //
70 : ಆರಿಸಿಕೊಂಡನು ದಾಸ ದಾವೀದನನು /
ತೆಗೆದುಕೊಂಡನು ಕುರಿಹಟ್ಟಿಯಿಂದವನನು //
71 : ಕುರಿಮೇಯಿಸುವಾ ಕಸಬಿನಿಂದವನನು
ಬಿಡಿಸಿದನು /
ಸ್ವಪ್ರಜೆ ಯಕೋಬ್ಯರನು, ಸ್ವಜನ
ಇಸ್ರಯೇಲರನು /
ಪರಿಪಾಲಿಸುವಂತೆ ನೇಮಕ ಮಾಡಿದನು
ಆತನನು //
72 : ದಾವೀದನು ಪೋಷಿಸಿದನವರನು ನೇರ
ಮನದಿಂದ /
ಪರಿಪಾಲಿಸಿದನವರನು ರಾಜ್ಯಾಧಿಕಾರ
ಕುಶಲತೆಯಿಂದ //