ಕನ್ನಡ ಕಥೋಲಿಕ ಬೈಬಲ್
1 : ವಂದನೆ ಹೇ ದೇವಾ, ಕೃತಜ್ಞತಾ ವಂದನೆ / ನೀ ಸಾಧಿಸಿದ ಸತ್ಕಾರ್ಯಗಳ ವಿವರಣೆ / ತಂದಿದೆ ನಮಗೆ ನಿನ್ನ ನಾಮದ ಸ್ಮರಣೆ //
2 : ಈ ಪರಿ ನುಡಿದಿರುವನಾ ದೇವನು : / “ಕ್ಲುಪ್ತಕಾಲದಲಿ ನಾ ನೀಡುವೆನು / ತೀರ್ಪನು, ನ್ಯಾಯವಾದ ತೀರ್ಪನು //
3 : ಇಳೆಯು ಭೂನಿವಾಸಿಗಳ ಸಮೇತ
ತಳಮಳಗೊಳ್ಳಲು /
ಅದರ ತಳಹದಿಯ ಬಿಗಿಹಿಡಿದಿರುವವನು
ನಾನಿಲ್ಲದಿನ್ನಾರು? //
4 : ಗರ್ವಿಗಳೇ, ಸಾಕುಮಾಡಿ ನಿಮ್ಮ
ಸೊಕ್ಕುಮಾತುಗಳನು /
ದುರ್ಜನರೇ, ತೋರಬೇಡಿ ನಿಮ್ಮ
ಕೋರೆಕೊಂಬುಗಳನು //
5 : ಕಾಣಿಸಿಕೊಳ್ಳದಿರಲಿ ನಿಮ್ಮ
ಕೋರೆಕೊಂಬುಗಳು //
ಮಾತೆತ್ತದಿರಲಿ ನಿಮ್ಮಗಳ ಕೊಬ್ಬಿದಾ
ಕಂಠಗಳು” //
6 : ಪೂರ್ವ ಪಶ್ಚಿಮದಿಂದ ಬರುವುದಿಲ್ಲ
ಉದ್ಧಾರ /
ಅರಣ್ಯದಿಂದ ದೊರಕುವುದಿಲ್ಲ
ಜೀವೋದ್ಧಾರ //
7 : ನ್ಯಾಯತೀರ್ಪು ಬರುವುದು ದೇವನಿಂದಲೇ /
ಉನ್ನತಿಯು ಅವನತಿಯು ಆತನಿಂದಲೇ //
8 : ಪ್ರಭುವಿನ ಕರಗಳಲ್ಲಿದೆ ಕೋಪಕೊಡ
ಒಂದು /
ತುಂಬಿದೆ ಅಮಲುಮಿಶ್ರ ರೌದ್ರರಸದಿಂದದು //
ಅದನವನು ಸುರಿಯಲು ಕುಡಿವರು ಜಗದ
ದುರುಳರು /
ಮಡ್ಡಿಯನು ಕೂಡ ಬಿಡದೆ ಕುಡಿವರೆಲ್ಲರು //
9 : ನಾನಾದರೊ ಕೀರ್ತಿಸುವೆನು ಯಕೋಬ
ದೇವರನು /
ಮಾಡುವೆನು ಅನವರತ ಆತನ
ಗುಣಗಾನವನು //
10 : ಕತ್ತರಿಸುವನು ಕೆಡುಕರ ಕೋರೆಕೋಡು
ಗಳನು /
ಎತ್ತರಿಸುವನು ಸಜ್ಜನರ
ಕೋರೆಕೊಂಬುಗಳನು //