ಕನ್ನಡ ಕಥೋಲಿಕ ಬೈಬಲ್
1 : ತಿಳಿಸು ನಿನ್ನ ನ್ಯಾಯವನು ದೇವಾ,
ರಾಜನಿಗೆ /
ಕಲಿಸು ನಿನ್ನ ನೀತಿಯನು ರಾಜಕುವರನಿಗೆ //
2 : ಆತನಾಳಲಿ ನಿನ್ನ ಪ್ರಜೆಯನು ನೀತಿಯಿಂದ /
ಪರಿಪಾಲಿಸಲಿ ದೀನದಲಿತರನು ನ್ಯಾಯದಿಂದ //
3 : ಬೆಟ್ಟಗುಡ್ಡಗಳಿಂದ ಬರಲಿ ಸಮೃದ್ಧಿ /
ನಿನ್ನ ಪ್ರಜೆಗೆ ಫಲಿಸಲಿ ನ್ಯಾಯನೀತಿ //
4 : ದೀನದಲಿತರನಾತ ಉದ್ಧರಿಸಲಿ /
ಬಡಬಗ್ಗರಿಗೆ ನ್ಯಾಯ ದೊರಕಿಸಲಿ /
ಪ್ರಜಾಹಿಂಸಕರನು ಸದೆಬಡಿಯಲಿ //
5 : ಆತನು ಬಾಳಲಿ ಆಚಂದ್ರಾರ್ಕನಾಗಿ /
ತಲತಲಾಂತರಕು ಭಯಭಕುತಿಯಿಂದಿರಲಿ //
6 : ಹುಲ್ಲುಕೊಯ್ದ ಹೊಲದ ಮೇಲೆ ಸುರಿವ
ವೃಷ್ಟಿಯಂತೆ /
ಬರಲಿ ಆತ ಒಣನೆಲವ ತೋಯ್ವ ಹದ
ಮಳೆಯಂತೆ //
7 : ಬೆಳೆಯಲಿ ಆತನ ಪಾಲನೆಯಲಿ ನ್ಯಾಯನೀತಿ /
ಬೆಳಗಲಿ ಚಂದ್ರನಂತೆ ಸದಾ ಸಂಪೂರ್ಣ
ಶಾಂತಿ //
8 : ಸಾಗರದಿಂದ ಸಾಗರದವರೆಗಿರಲಿ ಆತನ
ಆಧಿಪತ್ಯ /
ಮಹಾ ನದಿಯಿಂದ ಬುವಿ ಎಲ್ಲೆಯವರೆಗಿರಲಿ
ಆತನ ಪ್ರಭುತ್ವ //
9 : ಅರಣ್ಯವಾಸಿಗಳು ಅರಸನಿಗೆ ಅಡ್ಡಬೀಳಲಿ /
ಆತನ ಕಡುವೈರಿಗಳು ನೆಲದ ಮಣ್ಣುಮುಕ್ಕಲಿ //
10 : ಕಷ್ಟಗಳನರ್ಪಿಸಲಿ ತಾರ್ಷಿಷ್ ಹಾಗೂ
ದ್ವೀಪದ್ವೀಪದ ರಾಜರುಗಳು /
ಕಾಣಿಕೆಗಳ ತಂದೊಪ್ಪಿಸಲಿ ಶೆಬಾ ಹಾಗೂ
ಸೆಬಾದ ರಾಜರುಗಳು //
11 : ರಾಜರುಗಳು ಸಾಷ್ಟಾಂಗವೆರಗಲಿ ಆತನಿಗೆ /
ರಾಷ್ಟ್ರ, ಘನರಾಷ್ಟ್ರಗಳು ಸೇವೆಸಲ್ಲಿಸಲಿ
ಆತನಿಗೆ //
12 : ಏಕೆನೆ ಕಾಪಾಡುವನಾತ ಮೊರೆಯಿಡುವ
ಬಡವರನು /
ಉದ್ಧರಿಸುವನಾತ ದಿಕ್ಕಿಲ್ಲದ ದೀನದಲಿತರನು //
13 : ದೀನದರಿದ್ರರಿಗೆ ದಯೆಯ ತೋರುವನು /
ದಲಿತರ ಪ್ರಾಣವನು ಕಾಪಾಡುವನು //
14 : ಅವರ ಜೀವ ಆತನ ದೃಷ್ಟಿಯಲಿ ಅಮೂಲ್ಯ /
ಜುಲುಮೆ ಶೋಷಣೆಗಳ ನೀಗಿಪುದು ಆತನ
ಕಾರ್ಯ //
15 : ಅರಸ ಬಾಳಲಿ ಚಿರಕಾಲ; ದೊರಕಲಿ ಆತನಿಗೆ
ಶೆಬಾದ ಬಂಗಾರ /
ಜರುಗಲಿ ಪ್ರಾರ್ಥನೆ ಸದಾಕಾಲ; ಆಶೀರ್ವಾದ
ಸಿಗಲಿ ಅನವರತ //
16 : ಸಮೃದ್ಧಿಯಾಗಲಿ ನಾಡಿನ ದವಸಧಾನ್ಯ
ನೆಲಮಲೆಗಳ ಮೇಲೆ /
ಸೊಂಪಾಗಲಿ ಅದರ ಹಣ್ಣುಹಂಪಲು
ಲೆಬನೋನಿನ ಮರಗಳಂತೆ /
ಹುಲುಸಾಗಲಿ ನಗರ ನಿವಾಸಿಗಳ ಸಂಖ್ಯೆ
ಬಯಲಿನ ಹುಲ್ಲಿನಂತೆ //
17 : ಶಾಶ್ವತವಾಗಲಿ ಶ್ರೀನಾಮ ಆತನಿಗೆ /
ಬೆಳಗಲಿ ಆತನ ಕೀರ್ತಿ ಸೂರ್ಯನಿರುವವರೆಗೆ /
ಆತನಾಶೀರ್ವಾದ ಕೋರಲಿ ಸರ್ವರು ತಮಗೆ /
ಶುಭವೆನ್ನಲಿ ಸಕಲ ರಾಷ್ಟ್ರಗಳು ಆತನಿಗೆ //
18 : ಸುತ್ಯರ್ಹನು ಸ್ವಾಮಿದೇವನು, ಇಸ್ರಯೇಲರ
ದೇವನು /
ಆತನೋರ್ವನೇ ಮಹತ್ಕಾರ್ಯಗಳನು
ಎಸಗುವಂತವನು //
19 : ಮಹಿಮಾಯುಕ್ತ ಆತನ ನಾಮಕೆ
ಸದಾ ಕಾಲವು ಸ್ತುತಿ /
ಆಮೆನ್ ಆಮೆನ್ ಭೂಮಂಡಲವೆಲ್ಲಾ ಆತನ
ಪ್ರಭಾವ ಪೂರ್ತಿ /
20 :
ಇತಿ, ಜೆಸ್ಸೆಯನ ಕುವರ ದಾವೀದನ
ಪ್ರಾರ್ಥನೆಗಳ ಸಮಾಪ್ತಿ /