ಕನ್ನಡ ಕಥೋಲಿಕ ಬೈಬಲ್
1 : ಆಶ್ರಯಕೋರಿ ಹೇ ಪ್ರಭು,
ನಾ ಬಂದಿರುವೆ /
ಆಶಾಭಂಗವಾಗದಿರಲೆಂದು ನಾ ಬೇಡುವೆ //
2 : ಸತ್ಯಸ್ವರೂಪನೆ, ನನ್ನ ಬಿಡಿಸಿ ರಕ್ಷಿಸಯ್ಯಾ /
ನನಗೆ ಕಿವಿಗೊಟ್ಟು ಪ್ರಭು
ನನ್ನನುದ್ಧರಿಸಯ್ಯಾ //
3 : ನೀನಾಗಿರು ನನಗಾಶ್ರಯದುರ್ಗ,
ಕೋಟೆಕೊತ್ತಲು /
ನೀನೇ ನನ್ನ ದುರ್ಗ, ಕೋಟೆ ನನ್ನನು
ರಕ್ಷಿಸಲು //
4 : ದುರುಳರ ಕೈಯಿಂದೆನ್ನನು ದೇವಾ, ಬಿಡಿಸಯ್ಯಾ /
ಕ್ರೂರ ಕೇಡಿಗರ ವಂಶದಿಂದೆನ್ನನು
ತಪ್ಪಿಸಯ್ಯಾ //
5 : ಸ್ವಾಮಿ ದೇವಾ, ನೀನೇ ನನ್ನ ಭರವಸೆ /
ಬಾಲ್ಯದಿಂದಲೂ ನೀನೇ ನನ್ನ ನಂಬಿಕೆ //
6 : ಹುಟ್ಟಿನಿಂದಲೆ ನಾ ನಿನಗಂಟಿ
ಕೊಂಡಿರುವೆನಯ್ಯಾ /
ಗರ್ಭದಿಂದಲೆ ನೀ ಎನ್ನನು
ಕರೆದುತಂದೆಯಯ್ಯಾ /
ನಿರಂತರವೂ ನಿನ್ನನು
ಕೊಂಡಾಡುತ್ತಿರುವೆನಯ್ಯಾ //
7 : ಹಲವರಿಗೆ ನಾನೊಂದು ಒಗಟು /
ನೀನೆನಗೆ ಬಲವಾದ ನೆಲೆಗಟ್ಟು //
8 : ನಿನ್ನ ಗುಣಗಾನ ನನ್ನ ಬಾಯ್ತುಂಬ /
ನಿನ್ನ ಘೋಷಣೆ ನನಗೆ ದಿನವಾದ್ಯಂತ //
9 : ವೃದ್ಧಾಪ್ಯದಲಿ ನನ್ನ ತಳ್ಳಿ ಬಿಡಬೇಡಯ್ಯಾ /
ಶಕ್ತಿ ಕುಂದುತ್ತಿರುವಾಗ ಕೈ ಬಿಡಬೇಡಯ್ಯಾ //
10 : ನನಗೆದುರಾಗಿ ಶತ್ರುಗಳಾಲೋಚಿಸುತಿ
ಹರಯ್ಯಾ /
ನನ್ನ ಕೊಲೆಗಾಗಿ ಒಂದುಗೂಡಿ
ಹೊಂಚಿಸುತಿಹರಯ್ಯಾ //
11 : “ಹಿಡಿಯಿರಿ ಬೆನ್ನಟ್ಟಿ, ದೇವನವನನ್ನು
ಕೈಬಿಟ್ಟಿಹನು /
ರಕ್ಷಿಸುವಂಥವರಾರು ಇನ್ನಿಲ್ಲ” ಎನ್ನುತಿಹರು //
12 : ಓ ದೇವಾ, ದೂರವಾಗಿರಬೇಡಯ್ಯಾ /
ನೆರವಾಗಲು ಬೇಗ ತ್ವರೆಮಾಡಯ್ಯಾ //
13 : ಆಶಾಭಂಗವು ದಹಿಸಿಬಿಡಲಿ ನನ್ನ ಪ್ರಾಣ
ಕಂಟಕರನು /
ನಿಂದಾಪಮಾನ ಕವಿದುಬಿಡಲಿ ನನಗೆ ಕೇಡು
ಬಗೆವವರನು //
14 : ನಾನಂತು ನಂಬಿರುವೆ ನಿನ್ನ ನಿರಂತರವಾಗಿ /
ನಿನ್ನನು ಕೀರ್ತಿಸುತ್ತಿರುವೆ ಅಧಿಕಾಧಿಕವಾಗಿ //
15 : ವರ್ಣಿಸುವೆನು ದಿನವೆಲ್ಲ ನಿನ್ನ ನ್ಯಾಯ
ನೀತಿಯನು /
ವಿವರಿಸಲು ಅಸದಳವಾದ ನಿನ್ನಗಣಿತ
ರಕ್ಷಣೆಯನು //
16 : ಸ್ವಾಮಿ ದೇವಾ, ಸ್ಮರಿಸುವೆನು ನಿನ್ನ
ಮಹತ್ಕಾರ್ಯಗಳನೆ /
ಪ್ರಕಟಪಡಿಸುವೆನು ನಿನ್ನೊಬ್ಬನ
ನ್ಯಾಯನೀತಿಯನೆ //
17 : ದೇವಾ, ಬಾಲ್ಯಾರಭ್ಯ ನನಗೆ
ಬೋಧಿಸಿರುವೆಯಲ್ಲವೆ?/
ನಿನ್ನ ಅದ್ಭುತ ಕಾರ್ಯಗಳನೆಂದಿಗು ನಾ
ಘೋಷಿಸುತ್ತಿರುವೆ //
18 : ದೇವಾ, ನರೆಯ ಮುದುಕನಾಗಿರುವಾಗ ನನ್ನ
ಕೈ ಬಿಡಬೇಡಯ್ಯಾ /
ನಿನ್ನ ಪರಾಕ್ರಮವನು ಮುಂದಿನ ಪೀಳಿಗೆಗೆ
ಸಾರುವತನಕ ಬೇಡವಯ್ಯಾ /
ನಿನ್ನ ಪ್ರತಾಪವನು ತಲತಲಾಂತರದವರೆಗೆ
ಪ್ರಕಟಿಸುವೆನಯ್ಯಾ //
19 : ನಿನ್ನ ಶಕ್ತಿ, ನಿನ್ನ ನೀತಿ ದೇವಾ, ಗಗನ
ಮುಟ್ಟುತ್ತಿಹವು /
ಮಹತ್ಕಾರ್ಯಗಳೆಸಗಿದ ನಿನಗೆ ದೇವಾ, ಯಾರು
ಸಾಟಿಯು? //
20 : ದೇವಾ, ಈಡು ಮಾಡಿದೆಯೆನ್ನನು ಕಷ್ಟ
ಸಂಕಟಗಳಿಗೆ /
ಪುನಶ್ಚೇತನಗೊಳಿಸೀಗ, ಭೂತಳದಿಂದೆತ್ತು
ಮೇಲಕೆ //
21 : ನನ್ನ ಗೌರವವನು ಅಧಿಕರಿಸಯ್ಯಾ /
ಮರಳಿ ನೆಮ್ಮದಿಯನು ಪಾಲಿಸಯ್ಯಾ //
22 : ನಿನ್ನ ಸತ್ಯತೆಗಾಗಿ ಓ ಎನ್ನ ದೇವಾ /
ಕಿನ್ನರಿಯನು ನುಡಿಸುತಾ ಭಜಿಸುವೆನಯ್ಯಾ //
ಇಸ್ರಯೇಲಿನ ಆ ಪರಮಪಾವನ ಸ್ವಾಮಿಯ /
ವೀಣೆವಾದ್ಯದೊಂದಿಗೆ ಕೀರ್ತಿಸುವೆನಯ್ಯಾ //
23 : ಮಧುರದನಿಗೈವುದು ಎನ್ನಧರ ನಿನ್ನ
ಗುಣಗಾನದಲಿ /
ನೀನುದ್ಧರಿಸಿದ ಎನ್ನ ಮನ ಭಾಗಿಯಾಗುವುದಾ
ಗಾನದಲಿ //
24 : ನನಗೆ ಕೇಡು ಬಗೆದವರಿದೋ ಪಡೆದರು ನಿಂದೆ
ಅಪಮಾನವನು /
ದಿನವೆಲ್ಲ ವರ್ಣಿಪುದೆನ್ನ ನಾಲಿಗೆ ನಿನ್ನೀ
ನೀತಿಸಾಧನೆಯನು //