ಕನ್ನಡ ಕಥೋಲಿಕ ಬೈಬಲ್
1 : ನಿನ್ನಾಶ್ರಯವನರಸಿ ಹೇ ಸ್ವಾಮಿ ದೇವಾ,
ನಾ ಬಂದಿಹೆನು /
ಬೆನ್ನಟ್ಟಿ ಬರುವವರ ಕೈಯಿಂದ ತಪ್ಪಿಸಿ,
ಕಾಪಾಡೆನ್ನನು //
2 : ಇಲ್ಲದಿರೆ ಶತ್ರು ತಿಳಿದಾನು ನನಗೆ
ರಕ್ಷಕನಿಲ್ಲವೆಂದು /
ಝಲ್ಲನೆ ಸೀಳಿಬಿಟ್ಟಾನು ಸಿಂಹದಂತೆ
ಮೇಲೆಬಿದ್ದು //
3 : ಸ್ವಾಮಿ ದೇವಾ, ನಾನೀಪರಿ ನಡೆದಿರೆ :
ಅಕ್ರಮಕ್ಕೆ ಕೈ ಹಾಕಿರೆ /
4 :
ಮಿತ್ರದ್ರೋಹಿ ಆಗಿರೆ, ನಿಷ್ಕಾರಣ ಶತ್ರು ಸುಲಿಗೆ
ಮಾಡಿರೆ /
5 : ಎನ್ನ ಬೆನ್ನಟ್ಟಿ ಬರಲಿ ವೈರಿ, ಕಾಲಿಂದೆನ್ನ ಮೆಟ್ಟಿ
ತುಳಿಯಲಿ /
ಎನ್ನ ಮಾನವನು ಮಣ್ಣು ಪಾಲಾಗಿಸಲಿ, ನನ್ನನು
ಸೋಲಿಸಿಬಿಡಲಿ //
6 : ಹೇ ಪ್ರಭು, ಎಚ್ಚರಗೊಳ್ಳು : ನ್ಯಾಯವನು
ದೇವಾ, ನಿರ್ಣಯಿಸು /
ಕೋಪದಿಂದೆದ್ದು ವಿರೋಧಿಗಳ ಕ್ರೋಧವನು
ಭಂಗಪಡಿಸು //
7 : ಸಭೆಸೇರಲಿ ಸಕಲ ಜನಾಂಗಗಳು ನಿನ್ನ
ಸುತ್ತಲು /
ನೀ ಆಸ್ಥಾನವನೇರು, ಅವರನು
ಪರಿಪಾಲಿಸಲು //
8 : ಹೇ ಪ್ರಭು, ಜಗದ ಜನಾಂಗಕೆ ನ್ಯಾಯ
ದೊರಕಿಸುವವನು ನೀನು /
ನನಗೂ ನ್ಯಾಯ ದೊರಕಿಸು: ನಿರಪರಾಧಿ,
ನೀತಿವಂತ ನಾನು //
9 : ಮಾನವರ ಹೃನ್ಮನವನರಿತಿಹ
ಸತ್ಯ ಸ್ವರೂಪಿ ದೇವಾ, /
ದುರುಳರ ಕೆಡುಕನಳಿಸಯ್ಯಾ, ಸತ್ಯವಂತರನು
ನೀ ಉಳಿಸಯ್ಯಾ /
10 : ನನಗೆ ರಕ್ಷೆನೀಡುವ ಗುರಾಣಿ, ದೇವನೇ /
ನೇರಮನಸ್ಸರಿಗೆ ಸಂರಕ್ಷಣೆ ಆತನೆ //
11 : ನ್ಯಾಯಕ್ಕನುಸಾರ ತೀರ್ಪನಿಡುವಂಥವನು
ದೇವನು /
ದುರುಳರ ಮೇಲೆ ದಿನಬಿಡದೆ ಕೋಪವುಳ್ಳವನು
ಆತನು //
12 : ತೀಡುವನು ಕತ್ತಿಯನು, ಹೂಡುವನು
ಬಾಣವನು /
ಪಡೆಯದಿರೆ ದುರುಳನು ಮನ
ಪರಿವರ್ತನೆಯನು //
13 : ಸೇರಿಸಿಟ್ಟಿರುವನಾತ ಮಾರಕಾಸ್ತ್ರಗಳನು /
ಗುರಿಯಿಟ್ಟು ನಿಂತಿರುವನು
ಅಗ್ನಿಬಾಣಗಳನು //
14 : ಕೇಡನು ಹಡೆಯಲು ದುರುಳನು ಪಡುವ
ಬೇನೆಯನು ನೋಡು /
ಹಾನಿಯ ಹಡೆವನೆಂದೆಣಿಸಿ ಶೂನ್ಯವ
ಹೆರುವುದ ನೋಡು //
15 : ಗುಣಿಯನು ತೋಡಿದನು; ಮಣ್ಣನು
ಹೊರದೂಡಿದನು /
ತೋಡಿದ ಗುಣಿಯಲಿ ತಾನೆ ತಟ್ಟನೆ
ಬೀಳುವನು //
16 : ತಾನು ಮಾಡಿದ ಕುತಂತ್ರ ತನ್ನ ತಲೆಗೆ
ಗಂಡಾಂತರ /
ತಾನು ಕೊಟ್ಟ ಉಪದ್ರವ ತನ್ನ ಬುರುಡೆಗೆ
ಅವಾಂತರ //
17 : ಸತ್ಯ ಸ್ವರೂಪನಾದ ಸ್ವಾಮಿಗೆ ನನ್ನ ವಂದನೆ /
ಪರಾತ್ಪರ ಪ್ರಭುವಿನ ನಾಮಕ್ಕೆ ಸ್ತುತಿ
ಸಂಕೀರ್ತನೆ //