ಕನ್ನಡ ಕಥೋಲಿಕ ಬೈಬಲ್
1 : ಒಡನೆ ಕೈ ನೀಡಿ ಕಾಪಾಡು ದೇವಾ /
ಕುತ್ತಿಗೆಗೆ ಬಂದಿದೆ ತುಂಬು
ಪ್ರವಾಹ //
2 : ಮುಳುಗುತಿಹೆನು ಕಳ್ಳುಸುಬಿನಲಿ; ಕಾಲೂರಲೆನಗೆ ನೆಲವಿಲ್ಲ / ಸಿಕ್ಕಿಹೆನು ಆಳ ಮಡುವಿನಲ್ಲಿ, ಹುಚ್ಚುಹೊಳೆ ಕೊಚ್ಚುತ್ತಿದೆಯಲ್ಲಾ //
3 : ಕಾಯ್ದು ಕಾಯ್ದು ಕಣ್ಣು ಗುಳಿಬಿದ್ದಿದೆ ದೇವಾ,
ನಿನಗಾಗಿ /
ಗಂಟಲು ಒಣಗಿದೆ, ಜೀವ ಸೊರಗಿದೆ, ನಿನ್ನ
ಕೂಗಿ ಕೂಗಿ //
4 : ತಲೆ ಕೂದಲಿಗಿಂತ ಮಿಗಿಲಿಹರು ನಿಷ್ಕಾರಣ
ದ್ವೇಷಿಗಳು /
ಬಲಿಷ್ಟರಿಹರು ನನ್ನ ಕೊಲೆಗಡುಕರು,
ನಿರ್ನಿಮಿತ್ತ ಶತ್ರುಗಳು /
ಕಳ್ಳನಾನಲ್ಲನಾದರೂ ದಂಡಕೋರುತಿಹರು
ವೈರಿಗಳು //
5 : ನನ್ನ ಮೂರ್ಖತನವನು ದೇವಾ,
ನೀ ಬಲ್ಲೆಯಯ್ಯಾ /
ನನ್ನಪರಾಧಗಳು ನಿನಗೆ
ಮರೆಯಾಗಿಲ್ಲವಯ್ಯಾ //
6 : ಪ್ರಭು ಸೇನಾಧೀಶ್ವರಾ /
ನನ್ನಿಂದ ನಿರಾಶೆಯಾಗದಿರಲಿ, ನಿನ್ನ
ನಂಬಿದವರಿಗೆ //
ಇಸ್ರಯೇಲರ ದೇವಾ /
ನನ್ನಿಂದ ನಿಂದೆಯಾಗದಿರಲಿ ನಿನ್ನ
ದರ್ಶನಾರ್ಥಿಗಳಿಗೆ //
7 : ನಿನಗಾಗಿಯೇ ನಾ ನಿಂದೆಗೊಳಗಾದೆನಯ್ಯಾ /
ನಾಚಿಕೆಯಿಂದಲೆ ಮುಖ
ಮುಚ್ಚಿಕೊಂಡೆನಯ್ಯಾ //
8 : ನನ್ನವರಿಗೇ ನಾನನ್ಯನಾದೆನಯ್ಯಾ /
ಒಡ ಹುಟ್ಟಿದವರಿಗೇ
ಹೊರಗಿನವನಾದೆನಯ್ಯಾ //
9 : ಅಗ್ನಿಯಂತೆನ್ನ ದಹಿಸುತ್ತಿದೆ
ನಿನ್ನಾಲಯದಭಿಮಾನ /
ಎನ್ನ ಮೇಲೆರಗಿದೆ ನಿನ್ನ ಕಡುದ್ರೋಹಿಗಳ
ದೂಷಣ //
10 : ಅತ್ತತ್ತು ನಾ ಒಪ್ಪೊತ್ತಿದ್ದುದೆಲ್ಲಾ /
ಚುಚ್ಚುಮಾತಿಗೆ ಕಾರಣವಾಯಿತಲ್ಲಾ //
11 : ಗೋಣಿತಟ್ಟನು ನಾನುಟ್ಟುಕೊಂಡೆನಯ್ಯಾ /
ಅಣಕ ಅವಹೇಳನಕೆ ಗುರಿಯಾದೆನಯ್ಯಾ //
12 : ಊರ ಬಾಗಿಲಲಿ ಕೂರುವವರ ಹರಟೆಗೆ
ಕಾರಣನಾದೆನಯ್ಯಾ /
ಸಾರಾಯಿ ಮದ್ಯಸಾರ ಕುಡಿವವರ
ಪದ್ಯವಸ್ತುವಾದೆನಯ್ಯಾ //
13 : ಪ್ರಸನ್ನಕಾಲದಲ್ಲಿ ಪ್ರಭು, ನಾ
ಮೊರೆಯಿಡುತ್ತಿರುವೆ ನಿನಗೆ /
ಪ್ರೀತಿಮಯ ದೇವಾ, ಜೀವೋದ್ಧಾರಕ,
ಸದುತ್ತರ ನೀಡೆನಗೆ //
14 : ಕಳ್ಳುಸುಬಿನಲಿ ನಾನಿಳಿದು ಹೋಗದಂತೆ
ಸೆಳೆದುಕೊ /
ಪೊಳ್ಳು ದುರುಳರ ಮಡುವಿನಲಿ ನಾ
ಮುಳುಗದಂತೆ ಎಳೆದುಕೊ //
15 : ಹುಚ್ಚು ಹೊಳೆಯು ಎನ್ನ ಕೊಚ್ಚದಿರಲಯ್ಯಾ /
ಮಡುವು ಎನ್ನ ಸೆಳೆದುಕೊಳ್ಳದಿರಲಯ್ಯಾ /
ಪಾತಾಳವೆನ್ನನು ನುಂಗದಿರಲಯ್ಯಾ //
16 : ಆಲಿಸೆನ್ನ ಪ್ರಭು, ನಿನ್ನ ಪ್ರೀತಿ ಸುಮಧುರ /
ಕಟಾಕ್ಷಿಸೆನ್ನನು ದೇವಾ, ಕರುಣಾಸಾಗರ //
17 : ನಿನ್ನ ದಾಸನಿಗೆ ವಿಮುಖನಾಗಬೇಡಯ್ಯಾ /
ಆಪತ್ತಿನಲ್ಲಿರುವೆ, ತಡಮಾಡಬೇಡಯ್ಯಾ //
19 : ಹತ್ತಿರ ಬಂದೆನ್ನ ಉದ್ಧರಿಸಯ್ಯಾ /
ಶತ್ರುಗಳ ಕೈಯಿಂದ ರಕ್ಷಿಸಯ್ಯಾ //
19 : ನನಗಾದ ನಿಂದೆ, ಅಪಮಾನ, ಲಜ್ಜೆ ನಿನಗೆ
ತಿಳಿದಿದೆಯಯ್ಯಾ /
ನನ್ನ ವೈರಿ ವಿರೋಧಿಗಳು ನಿನಗೆ
ಮರೆಯಾಗಿಲ್ಲವಯ್ಯಾ //
20 : ನಿಂದೆಯಿಂದ ಮನನೊಂದು
ಹತಾಶನಾಗಿರುವೆನಯ್ಯಾ /
ಹಾತೊರೆದರೂ ದಯೆತೋರುವನಾರೂ
ಸಿಗಲಿಲ್ಲ /
ಅರಸಿದರೂ ಸಾಂತ್ವನನೀಡುವವನು
ದೊರಕಲಿಲ್ಲ //
21 : ಹಸಿದ ನನಗೆ ವಿಷಬೆರೆತ ಆಹಾರವಿತ್ತ
ರಯ್ಯಾ /
ಬಾಯಾರಿದೆನಗೆ ಕಹಿ ಕಾಡಿಯನು
ಕೊಟ್ಟರಯ್ಯಾ //
22 : ಅವರಿಗೆ ಬಡಿಸಿದ ಊಟವೇ ಅವರಿಗೆ
ಉರುಲಾಗಲಿ /
ಅವರ ಹಬ್ಬದೌತಣವೇ ಅವರಿಗೆ
ಬೋನಾಗಲಿ //
23 : ಅವರ ಕಣ್ಣು ಮಬ್ಬಾಗಿ ಕಾಣದೆ ಹೋಗಲಿ
ಅವರ ಸೊಂಟ ಬಿಡುವಿಲ್ಲದೆ ನಡುಗುತ್ತಿರಲಿ //
24 : ನಿನ್ನ ರೌದ್ರ ಅವರ ಮೇಲೆರಗಲಿ /
ನಿನ್ನ ಕೋಪಾಗ್ನಿ ಅವರನು ದಹಿಸಲಿ //
25 : ಅವರ ಪಾಳೆಯ ಹಾಳು ಬೀಳಲಿ /
ಅವರ ಗುಡಾರ ಬಿಕೋ ಎನಿಸಲಿ //
26 : ನೀ ಗಾಯಪಡಿಸಿದವರನು ಪೀಡಿಸುತಿಹರು /
ಗಾಯದ ಮೇಲೆ ಬರೆಯೆಳೆಯುತಿಹರು //
27 : ದಂಡನೆ ಮೇಲೆ ದಂಡನೆಯನು ಅವರಿಗೆ
ವಿಧಿಸು /
ಅವರು ನಿರಪರಾಧಿಗಳೆಂಬುದನು ತಪ್ಪಿಸು //
28 : ಉಳಿಸಬೇಡವರನು ಜೀವಬಾಧ್ಯರ ಪಟ್ಟಿ
ಯಲಿ /
ಸೇರಿಸಬೇಡವರನು ಸಜ್ಜನರ ಸಂಖ್ಯೆಯಲಿ //
29 : ದೇವಾ, ನಾ ನೊಂದುಬೆಂದಿಹೆನಯ್ಯಾ /
ಉದ್ಧರಿಸಿ ನನ್ನನು ಕಾಪಾಡಯ್ಯಾ //
30 : ದೇವಾ, ನಾ ನೊಂದುಬೆಂದಿಹೆನಯ್ಯಾ /
ಉದ್ಧರಿಸಿ ನನ್ನನು ಕಾಪಾಡಯ್ಯಾ //
31 : ಸ್ವಾಮಿ ದೇವನಿಗಿದುವೇ ಸುಪ್ರೀತ /
ಕೊಂಬುಗೊರಸುಳ್ಳ ಗೂಳಿಬಲಿಗಿಂತ //
32 : ಇದನರಿತು ದೀನದಲಿತರು ಆನಂದಗೊಳ್ಳಲಿ /
ದೇವನನು ಅರಸುವವರು
ಪುನಶ್ಚೇತನಗೊಳ್ಳಲಿ //
33 : ಬಡಬಗ್ಗರ ಮೊರೆಗೆ ಪ್ರಭು ಕಿವಿಗೊಡದಿರನು /
ಸೆರೆಯಲ್ಲಿಹ ತನ್ನವರನು ತಿರಸ್ಕರಿಸನು //
34 : ಭೂಮ್ಯಾಕಾಶಗಳು ಆತನನು ಕೊಂಡಾಡಲಿ /
ಸಾಗರಗಳು, ಜಲಚರಗಳು ಆತನನು
ಭಜಿಸಲಿ //
35 : ರಕ್ಷಿಸುವನು ದೇವನು ಆ ಸಿಯೋನ್
ಪಟ್ಟಣವನು /
ಕಟ್ಟಿಸುವನು ಯೆಹೂದ ನಾಡಿನ ನಗರಗಳನು /
ಸ್ವಂತವಾಗಿರಿಸಿಕೊಂಬರು ಆತನ ಪ್ರಜೆ ಅದನು //
36 : ಅವರ ವಂಶಜರೇ ಬಾಧ್ಯಸ್ಥರಾಗುವರದಕೆ /
ದೇವರನಾಮ ಪ್ರಿಯರೇ ನಿವಾಸಿಗಳು ಅದಕೆ //