ಕನ್ನಡ ಕಥೋಲಿಕ ಬೈಬಲ್
1 : ಜಗವೆಲ್ಲ ಮಾಡಲಿ ಜಯಕಾರ
ದೇವನಿಗೆ /
2 :
ಹಾಡಲಿ ಆತನ ಶ್ರೀನಾಮ ಮಹಿಮೆಗೆ //
3 : “ನಿನ್ನ ಕಾರ್ಯಗಳೆನಿತೋ ಚೇತೋಹಾರಿ /
ನಿನ್ನ ಪರಾಕ್ರಮಕೆ ಶತ್ರುಗಳು ಪರಾರಿ //
4 : ಜಗವೆಲ್ಲ ಪೂಜಿಪುದು ನಿನ್ನನು /
ಪೊಗಳಿ ಮಾಳ್ಪುದು ಗುಣಗಾನವನು /
ಕೀರ್ತಿಸುವುದು ನಿನ್ನ ನಾಮವನು”//
5 : ಬನ್ನಿ, ದೇವನತಿಶಯ ಕಾರ್ಯಗಳ ನೋಡಬನ್ನಿ /
ಜನತೆಗಾತ ಮಾಡಿದುದು ಅತ್ಯಾಶ್ಚರ್ಯವೆನ್ನಿ //
6 : ಒಣನೆಲವಾಗಿ ಮಾರ್ಪಡಿಸಿದ ಕಡಲನು /
ಕಾಲು ನಡೆಯಲೇ ದಾಟಿಸಿದ ನದಿಯನು /
ಇದ ನಿಮಿತ್ತ ಪಡೆಯೋಣ ಆನಂದವನು //
7 : ಆತನಾಳ್ವಿಕೆ ಶಕ್ತಿಯುತ, ನಿರಂತರ /
ರಾಷ್ಟ್ರಗಳ ಮೇಲೆ ಅವನ ನೇತ್ರ ಕನಿಕರ /
ಜಂಬಕೊಚ್ಚದಿರಲಿ ದಂಗೆಕೋರ //
8 : ಜನಾಂಗಗಳೇ, ನಮಿಸಿರಿ ನಮ್ಮ ದೇವನನು /
ಗಟ್ಟಿಯಾಗಿ ಮಾಡಿರಿ ಅವನ
ಗುಣಗಾನವನು //
9 : ನಮ್ಮ ಪ್ರಾಣವನ್ನಾತ ಉಳಿಸಿದನಯ್ಯಾ /
ಕಾಲೆಡವದಂತೆ ಕಾಪಾಡಿದನಯ್ಯಾ //
10 : ಹೇ ದೇವಾ, ನೀ ನಮ್ಮನ್ನು ಪರಿಶೋಧಿಸಿದೆ /
ಪುಟಕ್ಕಿಟ್ಟ ಚಿನ್ನದಂತೆ ಶುದ್ಧೀಕರಿಸಿದೆ //
11 : ಉರುಲು ಬಲೆಗೆ ನಮ್ಮನು ಸಿಕ್ಕಿಸಿದೆ /
ಭಾರಿ ಹೊರೆಯನು ಬೆನ್ನಿಗೆ ಹೊರಿಸಿದೆ /
12 : ಶತ್ರುಗಳೆಮ್ಮ ತಲೆಮೇಲೆ
ರಥವನೋಡಗೊಳಿಸಿದೆ /
ಅಗ್ನಿಯನೂ ಜಲವನೂ ದಾಟುವಂತೆ
ಮಾಡಿದೆ /
ಕೊನೆಗೆ ಸಮೃದ್ಧ ನಾಡಿಗೆಮ್ಮನು ಸೇರಿಸಿದೆ //
13 : ದಹನ ಬಲಿಯನರ್ಪಿಸೆ ದೇಗುಲಕೆ ಧಾವಿಸುವೆ /
ನಿನಗೆ ನಾ ಹೊತ್ತ ಹರಕೆಗಳನ್ನು ತೀರಿಸುವೆ //
14 : ಪೂರೈಸುವೆನು ಬಾಯಾರೆ ಮಾಡಿದ
ಹರಕೆಯನು /
ಸಂಕಟಕಾಲದಲಿ ನಾ ಮಾಡಿದ ವ್ರತವನು //
15 : ಕೊಬ್ಬಿದ ಪ್ರಾಣಿಗಳನರ್ಪಿಸುವೆನು
ಯಜ್ಞವಾಗಿ /
ಹೋತಹೋರಿಗಳ ಕೊಡುವೆನು ನಿನಗೆ
ಕಾಣಿಕೆಯಾಗಿ /
ಟಗರುಗಳ ಬಲಿಧೂಪವೆತ್ತುವೆನು
ಆರತಿಯಾಗಿ //
16 : ಬಂದು ಕೇಳಿರಿ ದೇವನಲಿ
ಭಯಭಕ್ತಿಯುಳ್ಳವರೆ /
ದೇವನೆನಗೆ ಮಾಡಿದ ಕಾರ್ಯಗಳ ತಿಳಿಸುವೆ
ನಿಮಗೆ //
17 : ದೇವನಿಗೆನ್ನ ಮನ ಸ್ವರವೆತ್ತಿ ಮೊರೆಯಿಟ್ಟಿತು /
ಆತನ ಸ್ತುತಿ ನನ್ನ ಬಾಯಲಿ ತುಳುಕುತ್ತಿತ್ತು //
18 : ಕೆಟ್ಟತನವನು ನಾ ಮನದಲ್ಲಿಟ್ಟಿದ್ದರೆ |
ಮುಟ್ಟುವಂತಿರಲಿಲ್ಲ ಆತನಿಗೆ ಎನ್ನ ಮೊರೆ ||
19 : ಆದರೆನ್ನ ಮೊರೆಯು ದೇವನನು
ಮುಟ್ಟಿರುವುದು ನಿಜ /
ಎನ್ನ ಪ್ರಾರ್ಥನೆಗಾತ ಕಿವಿಗೊಟ್ಟಿರುವುದು
ಸಹಜ//
20 : ಎನ್ನ ಪ್ರಾರ್ಥನೆಯನು ತಿರಸ್ಕರಿಸದ ದೇವನಿಗೆ
ಸ್ತುತಿ /
ತನ್ನ ಪ್ರೀತಿಯನೆನಗೆ ನಿರಾಕರಿಸದಾತನಿಗೆ
ಸನ್ನುತಿ //