ಕನ್ನಡ ಕಥೋಲಿಕ ಬೈಬಲ್
1 : ಸಿಯೋನಿನಲ್ಲಿ ಸಲ್ಲತಕ್ಕವು ನಿನಗೆ
ಸ್ತುತಿಸ್ತೋತ್ರಗಳು /
ಪೂರೈಸತಕ್ಕವು ದೇವಾ, ಜನರು ನಿನಗೆ ಹೊತ್ತ
ಹರಕೆಗಳು //
2 : ದೇವಾ, ನೀ ನಮ್ಮೆಲ್ಲರ ಪ್ರಾರ್ಥನೆಗೆ
ಕಿವಿಗೊಡುವಾತ /
ನರರೆಲ್ಲರು ಬರುವರು ನಿನ್ನ ಬಳಿಗೆ ಪಾಪದ
ಪ್ರಯುಕ್ತ //
3 : ಪಾಪದ ಹೊರೆಹೊತ್ತವರು ನಾವಯ್ಯಾ /
ಅವುಗಳ ಪರಿಹಾರಕನು ನೀನಯ್ಯಾ//
4 : ನಿನ್ನ ಆಸ್ಥಾನದಲಿ ನೆಲೆಸಲು ನೀನಾಯ್ದು ತಂದ
ದೈವಭಕ್ತ ಧನ್ಯ /
ನಮಗೆ ತರಲಿ ತೃಪ್ತಿ ನೀ ವಾಸಿಸುವ
ಪವಿತ್ರಾಲಯದ ಸೌಭಾಗ್ಯ //
5 : ದೇವಾ, ನೀನೆ ನಮ್ಮೆಲ್ಲರ ಜೀವೋದ್ಧಾರ /
ದೂರದ ಸಾಗರ ಸೀಮೆಗಳಿಗೂ ಆಶಾಧಾರ /
ಗಂಭೀರ ಕಾರ್ಯವೆಸಗಿ ನೀಡುವೆ
ವಿಜಯದುತ್ತರ //
6 : ಬಿಗಿದುಕೊಂಡಿರುವೆ ಶಕ್ತಿಶೌರ್ಯದ ನಡುಗಟ್ಟನು /
ಬಿಗಿಯಾಗಿ ನಿಲ್ಲಿಸಿರುವೆ ನೀ
ಗುಡ್ಡಬೆಟ್ಟಗಳನು //
7 : ಭೋರ್ಗರೆವ ಸಮುದ್ರಗಳನು, ಗರ್ಜಿಸುವ ತರಂಗಗಳನು / ದೊಂಬಿಯೇಳುವ ಜನಾಂಗಗಳನು ಶಮನಗೊಳಿಸುವವನು ನೀನು //
8 : ಅಚ್ಚರಿಗೊಳ್ಳುವುವು ನಿನ್ನ ಮಹತ್ಕಾರ್ಯಗಳ
ಕಂಡು ಎಲ್ಲೆ ಎಲ್ಲೆಗಳು /
ಹರ್ಷಾನಂದಗೊಳ್ಳುವರು ಅದಕಂಡಾ
ಪೂರ್ವಪಶ್ಚಿಮ ಪ್ರವಾಸಿಗಳು //
9 : ಇಳೆಯನು ಸಂಧಿಸಿ, ಮಳೆಯನು ಸುರಿಸಿ,
ನೆಲವನು ನೀ ಸಿರಿಗೊಳಿಸುವಾತ /
ನಾಲೆ ತುಂಬ ನೀರಹರಿಸಿ, ಹೊಲ ತುಂಬ ನೀ
ಧಾನ್ಯನೀಡುವಾತ //
10 : ನೇಗಿಲ ಗೆರೆಯನು ತೋಯಿಸಿ ಮಣ್ಣಿನ
ಹೆಂಟೆಯನು ಕರಗಿಸುತಿ /
ಪೊಡವಿಯ ಹೊಲವ ಮಾಚಿಸಿ, ಹುಲುಸಾಗಿ
ಪೈರನು ಬೆಳೆಸುತಿ //
11 : ಋತು ಶಿಶಿರಕೆ ಸುಗ್ಗಿಯ ಸೊಬಗಿನ ಮುಕುಟವ
ಮುಡಿಸಿದ್ದೀ /
ನೀ ನಡೆವ ಹಾದಿಯಲ್ಲೆಲ್ಲಾ ತುಳುಕುತಿದೆ
ಸಮೃದ್ಧಿ //
12 : ಮೇವುಗಾಡುಗಳು ಕಂಗೊಳಿಸುತಿವೆ
ಪಚ್ಚೆಪಸಿರಿಂದ /
ಗುಡ್ಡಗಾಡುಗಳು ಶೋಭಿಸುತಿವೆ
ಹರ್ಷಾಡಂಬರದಿಂದ //
13 : ಹುಲ್ಲುಗಾವಲುಗಳು ತುಂಬಿತುಳುಕುತಿವೆ
ಕುರಿಹಿಂಡುಗಳಿಂದ /
ಕಣಿವೆ ಕಂದರಗಳಿದೊ ಕಂಗೊಳಿಸುತ್ತಿವೆ
ತೆನೆಕಾಳುಗಳಿಂದ /
ಇಳೆ ಮೊಳಗುತಿದೆ ಆನಂದಘೋಷ, ಸಂತಸ
ಗೀತೆಗಳಿಂದ //