ಕನ್ನಡ ಕಥೋಲಿಕ ಬೈಬಲ್
1 : ಶತ್ರುಗಳಿಂದ ದೇವಾ, ತಪ್ಪಿಸು /
ಎದುರಾಳಿಗಳಿಂದೆನ್ನ ರಕ್ಷಿಸು //
2 : ಕೇಡಿಗರಿಂದೆನ್ನ ಬಿಡಿಸು / ಕೊಲೆಪಾತಕರಿಂದ ಉಳಿಸು //
3 : ಇಗೋ ನನ್ನ ಪ್ರಾಣಕ್ಕವರು ಹೂಡಿರುವ
ಹೊಂಚು /
ನನ್ನ ಮೇಲೆರಗಲು ಹೂಡಿರುವ ಕ್ರೂರಿಗಳ
ಸಂಚು //
4 : ನಿರಪರಾಧಿ, ನಿರ್ದೋಷಿ ನಾನಾದರು /
ಮೇಲೆ ಬೀಳಲಿದೋ ಸಜ್ಜುಗೊಂಡಿಹರು /
ಎಚ್ಚೆತ್ತು ಪ್ರಭು, ನನಗೆ ನೆರವಾಗಿರು //
5 : ಇಸ್ರಯೇಲರ ದೇವ, ಸೇನಾಧೀಶ್ವರ ಪ್ರಭು,
ನೀನು /
ದಂಡಿಸು ನೀನೆಚ್ಚರಗೊಂಡು ಅನ್ಯ
ಜನರೆಲ್ಲರನು /
ತೋರಬೇಡ ದುರುಳ ದ್ರೋಹಿಗಳಾರಿಗೂ
ದಯೆಯನು //
6 : ಸಂಜೆಯಾದುದೆ ಓಡಿ ಬರುವರು
ನಾಯಿಗಳಂತೆ //
ಗುರುಗುಟ್ಟುತ ಊರ ಸುತ್ತುವರು
ಕುನ್ನಿಗಳಂತೆ //
7 : ಅವರ ಬಾಯಿ ಬೊಗಳುವ ಮಾತುಗಳನು
ಕೇಳು /
ಅವರ ತುಟಿಗಳು ಹರಿತ ಕತ್ತಿಕಠಾರಿಗಳು /
ನಮಗಾರು ಕಿವಿಗೊಡರೆಂಬುದೆ ಅವರ
ಗೋಳು //
8 : ನೀನಾದರೋ ಪ್ರಭು, ಅವರನು ನೋಡಿ ನಗುವೆ /
ಅನ್ಯ ಜನರನು ಅಪಹಾಸ್ಯಕ್ಕೀಡು ಮಾಡುವೆ //
9 : ನನ್ನ ಶಕ್ತಿಯೇ, ನಿನಗಾಗಿ ನಾ ಕಾದಿರುವೆ /
ನನ್ನಾಶ್ರಯ ದುರ್ಗ, ದೇವಾ, ನೀನೇ
ಅಲ್ಲವೆ?//
10 : ಪ್ರೀತಿಯಿಂದ ನೆರವಾಗುವನು ದೇವನೆನಗೆ /
ಶತ್ರುಗಳಿಗಾದ ಸೋಲನು ತೋರಿಸುವನೆನಗೆ //
11 : ಕೊಲಬೇಡಾ ದ್ರೋಹಿಗಳನು ಫಕ್ಕನೆ / ಮರೆತಾರೆನ್ನ ಜನತೆ ಪಾಠ ಕಲಿಯದೆ // ಚದರಿಸು ಶಕ್ತಿಯಿಂದ, ಅಲೆಯಲಿ ದಿಕ್ಕು ತೋಚದೆ / ಈ ಪರಿ ತಗ್ಗಿಸು ಅವರನು; ಪ್ರಭು, ನೀಡೆನಗೆ ರಕ್ಷೆ //
12 : ಪಾಪವಿದೆ ಬಾಯಲಿ, ದೋಷವಿದೆ ತುಟಿಯಲಿ /
ಸುಳ್ಳಿದೆ ಮಾತಲಿ, ಶಾಪವಿದೆ ನುಡಿಯಲಿ /
ಅವರ ಸೊಕ್ಕಿನಲಿ ಅವರೇ ಸಿಕ್ಕ ಬೀಳಲಿ //
13 : ಸುಟ್ಟು ನೀ ಭಸ್ಮಮಾಡು ಕೋಪಾಗ್ನಿಯಿಂದ /
ಸ್ಪಷ್ಟವಾಗಲಿ ಇಡೀ ಲೋಕಕ್ಕಿದರಿಂದ /
ದೇವನಾಳುತಿಹನೆಂದು ಇಸ್ರಯೇಲಿನಿಂದ //
14 : ಸಂಜೆಯಾದುದೆ ಓಡಿ ಬರುವರು ನಾಯಿಗಳಂತೆ /
ಗುರುಗುಟ್ಟುತ ಊರ ಸುತ್ತುವರು ಕುನ್ನಿ
ಗಳಂತೆ //
15 : ಅನ್ನಕ್ಕಾಗಿ ಅಲೆದಾಡುವರು ಅತ್ತಿತ್ತಾ /
ಹೊಟ್ಟೆತುಂಬದಿರೆ ಅಡ್ಡಾಡುವರು
ಬೊಗಳುತ್ತಾ //
16 : ನಾನಾದರೊ ಹೊಗಳಿ ಹಾಡುವೆ ದೇವಾ,
ನಿನ್ನ ಸಾಮಥ್ರ್ಯವನು /
ಉದಯಕಾಲದಲೆ ನಾ ಸಂಕೀರ್ತಿಸುವೆ
ನಿನ್ನ ಪ್ರೀತಿ ಪ್ರೇಮವನು /
ಸಂಕಟದಲ್ಲೆನಗಾದ ಆಶ್ರಯಗಿರಿ, ದುರ್ಗ,
ನಿನಲ್ಲವೇನು?//
17 : ನೀನೆನ್ನ ಶಕ್ತಿದೇವಾ, ನಿನಗೆನ್ನ ಸ್ತುತಿ /
ನೀನೆನ್ನ ದುರ್ಗ, ತೋರಿಸು ಎನಗೆ ಪ್ರೀತಿ //