ಕನ್ನಡ ಕಥೋಲಿಕ ಬೈಬಲ್
1 : ಕೋಪದಿಂದೆನ್ನ ಪ್ರಭು, ಬೈಯಬೇಡ /
ರೋಷದಿಂದೆನ್ನನು ದಂಡಿಸಲು ಬೇಡ //
2 : ನಿನ್ನ ಬಾಣಗಳು ನಾಟಿವೆ ನನ್ನೊಳಗೆ /
ನಿನ್ನ ಹಸ್ತವು ಎರಗಿದೆ ನನ್ನ ಮೇಲೆ //
3 : ನನ್ನ ದೇಹದಲ್ಲಿಲ್ಲ ಸೌಖ್ಯ ನಿನ್ನ
ಕೋಪದ ನಿಮಿತ್ತ /
ನನ್ನೆಲುಬಿನಲ್ಲಿಲ್ಲ ಕ್ಷೇಮ ನನ್ನ
ಪಾಪದ ಪ್ರಯುಕ್ತ //
4 : ಮುಳುಗಿಸಿಬಿಟ್ಟಿವೆ ನನ್ನ ಅಪರಾಧಗಳೆನ್ನನು /
ಅಮುಕಿಬಿಟ್ಟಿವೆ ಹೊರಲಾರದ
ಹೊರೆಯಂತೆನ್ನನು //
5 : ಕೀವು ಸೋರಿ ನಾರುತ್ತಿವೆ ನನ್ನ ಪಾಪದ
ಗಾಯಗಳು /
ಇದಕ್ಕೆಲ್ಲ ಕಾರಣವು ನನ್ನ ಮೂರ್ಖತನವು//
6 : ಬಾಗಿ ಕುಗ್ಗಿ ಹೋಗಿರುವೆ ಪ್ರಭು
ಬಹಳವಾಗಿ
ದಿನವೆಲ್ಲ ಅಲೆಯುತ್ತಿರುವೆ ದುಃಖಭರಿತನಾಗಿ //
7 : ಉರಿಬಡಿದಂತಿದೆ ಎನ್ನ ಸೊಂಟಕೆ /
ಆರೋಗ್ಯವಿಲ್ಲದಿದೆ ದೇಹಕೆ //
8 : ಜೋಮು ಹಿಡಿದಂತಿದೆ, ಜೀವ ಹಿಂಡಿದಂತಿದೆ /
ಹೃದಯವೇದನೆಯಿಂದ ನರಳಾಡುತ್ತಿರುವೆ //
9 : ನನ್ನ ಗೋಳಾಟ ಪ್ರಭು, ನಿನಗೆ
ಗೊತ್ತಿದೆಯಯ್ಯಾ /
ನನ್ನ ಮನದಾಸೆ ನಿನಗೆ ಬಯಲಾಗಿದೆಯಯ್ಯಾ //
10 : ಬಡಿದುಕೊಳ್ಳುತಿದೆ ಹೃದಯ,
ಹುದುಗಿಹೋಗಿದೆ ಚೇತನ /
ಮಬ್ಬಾಗಿ ಹೋಗಿದೆ ನನ್ನೆರಡು ನಯನಸಾಧನ //
11 : ನನ್ನ ಜಾಡ್ಯ ನೋಡಿ ದೂರ ಸರಿದರು
ನೆಂಟರಿಷ್ಟರು /
ಬಳಿಬಾರದೆ ಅಲ್ಲೇ ನಿಂತರು ಬಂಧು
ಬಳಗದವರು //
12 : ಉರಲನೊಡ್ಡಿಹರು ನನ್ನ ಪ್ರಾಣಹಂತಕರು /
ನಿರ್ಧರಿಸಿಹರು ವಿನಾಶವನ್ನು ಕೇಡು
ಬಗೆವವರು /
ಕುತಂತ್ರವ ಮಾಡುವರು ಸತತ ಮೋಸಗಾರರು //
13 : ನಾನಂತು ಕೇಳದಿದ್ದೆ ಕಿವುಡನಂತೆ /
ಮರು ಉತ್ತರಿಸದೆ ಮೌನವಿದ್ದೆ ಮೂಕನಂತೆ //
14 : ಅಹುದಹುದು ಕಿವಿ ಕೇಳಿಸದವನಂತಿದ್ದೆ /
ಪ್ರತ್ಯುತ್ತರ ಕೊಡಲಾಗದವನಂತಿದ್ದೆ //
15 : ನಿನಗಾಗಿ ಪ್ರಭು, ಕಾದಿರುವೆನಯ್ಯಾ /
ನನಗಾಗಿ ನೀ ಉತ್ತರಿಸೋ, ದೇವಾ //
16 : ಶತ್ರುಗಳು ಹರ್ಷಿಸಬಾರದು ನನ್ನ ವಿಷಯದಲಿ /
ಹಿಗ್ಗಬಾರದವರು ನಾ ಜಾರಿ ಬಿದ್ದಲ್ಲಿ //
17 : ಇಗೋ, ನಾನೆಡವಿ ಬೀಳಲಿರುವೆ /
ಆಪತ್ತಿಗಾಗಿ ಸಂಕಟಪಡುತ್ತಿರುವೆ //
18 : ನಾನಪರಾಧಿಯೆಂದು ನಿವೇದಿಸುವೆ /
ಪಾಪಕ್ಕಾಗಿ ಪಶ್ಚಾತ್ತಾಪ ಪಡುವೆ //
19 : ಬಲಿಷ್ಟ ವೈರಿಗಳು ವಿರೋಧಿಸುತಿಹರು
ನಿಷ್ಕಾರಣವಾಗಿ /
ಶತ್ರುಗಳನೇಕರು ದ್ವೇಷಿಸುತಿಹರು
ಅನ್ಯಾಯವಾಗಿ //
20 : ಎಸಗಿದರು ಉಪಕಾರಕೆ ಪ್ರತಿಯಾಗಿ ಅಪಕಾರ /
ಎದುರಿಸುತಿಹರೀಗ ನಾ ಹಿಡಿದಿರುವ
ಸನ್ಮಾರ್ಗ //
21 : ಹೇ ಪ್ರಭು, ನನ್ನ ಕೈ ಬಿಡಬೇಡಯ್ಯಾ /
ದೇವಾ, ನನಗೆ ದೂರವಾಗಬೇಡಯ್ಯಾ //
22 : ಓ ಪ್ರಭುವೇ, ನನ್ನುದ್ಧಾರಕನೆ, /
ನನಗೆ ನೆರವಾಗಲು ಬಾ ಬೇಗನೆ //