ಕನ್ನಡ ಕಥೋಲಿಕ ಬೈಬಲ್
1 : ಕೇಡು ಮಾಡುವವರ ನೋಡಿ
ಸಿಡಿಮಿಡಿಯಾಗಬೇಡ /
ದುರಾಚಾರಿಗಳ ಕಂಡು ಮಚ್ಚರಗೊಳ್ಳಬೇಡ //
2 : ಅವರು ಒಣಗಿ ಹೋಗುವರು ಕಾಡುಗರಿಕೆ
ಯಂತೆ /
ಬೇಗ ಬಾಡಿಹೋಗುವರು ಕಾಯಿಪಲ್ಯದಂತೆ //
3 : ಒಳಿತನು ಮಾಡು ಪ್ರಭುವಿನಲಿ ಭರವಸೆ
ಇಟ್ಟು /
ಸುರಕ್ಷಿತವಾಗಿ ಬಾಳು ಸಿರಿನಾಡಿನಲ್ಲಿದ್ದು //
4 : ಪ್ರಭುವಿನಿಂದಲೆ ಬಯಸು ನಿನ್ನಾನಂದವನು /
ನೆರವೇರಿಸುವನಾತ ನಿನ್ನ ಮನದಾಸೆಯನು //
5 : ಪ್ರಭುವಿಗೆ ಬಿಡು ಜೀವನಯಾತ್ರಾ ಚಿಂತೆಯನು /
ಭರವಸೆಯಿಂದಿರು, ಆತನದನು ಸಾಗಿಸುವನು //
6 : ಬೆಳಗಿಸುವನು ನಿನ್ನ ಸತ್ಯಸಂಧತೆಯನು
ಸೂರ್ಯೋದಯದಂತೆ /
ಪ್ರಕಟಿಸುವನು ನಿನ್ನಾ ನ್ಯಾಯನಿಷ್ಠೆಯನು
ನಡುಹಗಲಿನಂತೆ //
7 : ಪ್ರಭುವಿನ ಮುಂದೆ ಪ್ರಶಾಂತನಾಗಿರು,
ಆತನಿಗೋಸ್ಕರ ಕಾದಿರು /
ಸ್ವಾರ್ಥಿಗಳ, ಕುತಂತ್ರಿಗಳ ಏಳಿಗೆಯ ಕಂಡು
ಉರಿಗೊಳ್ಳದಿರು //
8 : ಅಡಗಿಸು ಕೋಪವನು; ವರ್ಜಿಸು ಕ್ರೋಧವನು /
ಕಿಡಿಕಿಡಿಯಾಗಬೇಡ, ತರುವುದದು ಕೇಡನು //
9 : ವಧಿತರಾಗಿ ನಾಶವಾಗುವರು,
ಕೇಡು ಮಾಡುವವರು
ಪ್ರಭುವಿಗಾಗಿ ಕಾಯುವವರು
ನಾಡಿಗೊಡೆಯರಾಗುವರು //
10 : ದುರುಳನು ಕಾಣದೆ ಹೋಗುವನು
ಕೊಂಚಕಾಲದೊಳು /
ಹುಡುಕಿದರು ಕಾಣಸಿಗನಾಗ ಊರು
ಕೇರಿಗಳೊಳು //
11 : ದೀನದಲಿತರು ಬಾಧ್ಯಸ್ಥರಾಗುವರು ನಾಡಿಗೆ /
ಆನಂದಿಸುವರು ಅಲ್ಲಿ ದೊರಕುವ
ಸುಖಶಾಂತಿಗೆ //
12 : ದುರ್ಜನನು ಹೂಡಿಹನು ಒಳಸಂಚು ಸಜ್ಜನನ
ವಿರುದ್ಧ /
ಕಟಕಟನೆ ಹಲ್ಲು ಕಡಿಯುತಿಹನಿದೋ ಆತನ
ವಿರೋಧ //
13 : ಅಂಥವನ ಕಂಡು ಪ್ರಭು ನಸುನಗುತಿಹನು /
ಅವನಿಗೊದಗಲಿಹ ಗತಿಯನು ಕಾಣುತಿಹನು //
14 : ಹಿಡಿದಿಹರು ದುರುಳರು ಕತ್ತಿಯನು, ಎತ್ತಿಹರು
ಬಿಲ್ಲನು /
ಕೆಡಹಲು ದೀನದಲಿತರನು, ಕೊಲ್ಲಲು
ಸಜ್ಜನರನು //
15 : ಹಿಡಿದ ಕತ್ತಿ ಹಿಡಿದವರೆದೆಯನೆ ಇರಿವುದು /
ಎತ್ತಿದ ಬಿಲ್ಲುಬಾಣ ಸಿಡಿದು ಮುರಿವುದು //
16 : ದುರುಳರ ವಿಪುಲ ಆಸ್ತಿಪಾಸ್ತಿಗಿಂತಲು /
ಸತ್ಯವಂತರ ಬಡತನವೆನಿತೊ ಮಿಗಿಲು //
17 : ಬತ್ತಿಹೋಗುವುದು ದುರ್ಜನರ ಭುಜಬಲ /
ಸತ್ಯವಂತರಿಗೆ ಪ್ರಭುವೇ ಉನ್ನತಬಲ //
18 : ಸಜ್ಜನರಿಗೆ ಸಿಗುವ ಸೊತ್ತು ಶಾಶ್ವತ /
ಪ್ರಭುವಿಗೆ ಗೊತ್ತು ಅವರ ಬಾಳಿನಂತ್ಯ //
19 : ಮಾನನಷ್ಟವಿರದು ಕಷ್ಟಕಾಲದಲಿ /
ಕುಂದುಕೊರತೆಯಿರದು ಬರಗಾಲದಲಿ //
20 : ದುರುಳರ ಬೆಡಗೋ ಬಾಡಿಹೋಗುವುದು
ಹುಲ್ಲಿನಂತೆ /
ಪ್ರಭುವಿನ ಶತ್ರುಗಳು ತೇಲಿಹೋಗುವರು
ಹೊಗೆಯಂತೆ //
21 : ಕೊಂಡ ಸಾಲವನು ತೀರಿಸಲಾರನಾ
ದುರ್ಜನನು /
ಉದಾರವಾಗಿ ದಾನ ಧರ್ಮಮಾಳ್ಪನಾ
ಸಜ್ಜನನು //
22 : ಪ್ರಭುವಿನಿಂದ ಆಶೀರ್ವದಿತರು ನಾಡಿಗೆ
ಬಾಧ್ಯಸ್ಥರು /
ಆತನಿಂದ ಶಾಪಗ್ರಸ್ಥರು ಬಹಿಷ್ಕøತರು //
23 : ಪ್ರಭುವಿಗೆ ಪ್ರಿಯವು ಮಾನವನ ಪ್ರವರ್ತನ /
ಅವನ ನಡತೆಗೆ ಆತನೆ ಮಾರ್ಗದರ್ಶನ //
23 : ಪ್ರಭುವಿಗೆ ಪ್ರಿಯವು ಮಾನವನ ಪ್ರವರ್ತನ /
ಅವನ ನಡತೆಗೆ ಆತನೆ ಮಾರ್ಗದರ್ಶನ //
24 : ಬಿದ್ದರೂ ಅವನೆದ್ದೇ ತೀರುವನು /
ಪ್ರಭು ಅವನಿಗೆ ಊರುಗೋಲಾಗಿಹನು //
25 : ಸಜ್ಜನ ದಿಕ್ಕಿಲ್ಲದಿರುವುದನು, ಅವನ ಸಂತತಿ
ಭಿಕ್ಷೆ ಬೇಡುವುದನು /
ನಾ ಕಾಣೆನು, ವೃದ್ಧ ನಾನೆಂದೂ ಕಾಣೆನು,
ಬಾಲ್ಯದಿಂದ ಕಾಣೆನು //
26 : ದಾನ ನೀಡುವನು, ಸಾಲ ನಿರಾಕರಿಸನು
ಸಜ್ಜನನು /
ಆತನ ಸಂತಾನ ಹೊಂದುವುದು
ಆಶೀರ್ವಾದವನು //
27 : ಕೆಟ್ಟದನು ಬಿಡು, ಒಳ್ಳೆಯದನು ಮಾಡು /
ಸಿರಿನಾಡಿನಲಿ ಚಿರಕಾಲ ಬಾಳು //
28 : ಪ್ರಭುವು ನ್ಯಾಯಪ್ರಿಯನು, ಭಕ್ತಜನರ
ಪರಿಪಾಲಕನು /
ಚಿರವುಳಿಸುವನು ಇವರನು, ಅಳಿಸುವನು
ದುರುಳರ ಪೀಳಿಗೆಯನು //
29 : ಸಜ್ಜನರು ಸಿರಿನಾಡಿಗೆ ಬಾಧ್ಯಸ್ಥರು /
ಅಲ್ಲವರು ಶಾಶ್ವತವಾಗಿ ಬಾಳುವರು //
30 : ಸಜ್ಜನರ ಬಾಯಿ ಆಡುವುದು ಸುಜ್ಞಾನವನು /
ಅವನ ನಾಲಿಗೆ ನುಡಿವುದು
ನ್ಯಾಯನೀತಿಯನು //
31 : ಅವನ ಎದೆಯಲ್ಲಿದೆ ದೇವರ ನಿಯಮ /
ನೆಲೆತಪ್ಪದು ಅವನ ನಡತೆಯ ಕ್ರಮ //
32 : ದುಷ್ಟನಿಟ್ಟಿರುವನು ಕಣ್ಣನು ಸಜ್ಜನರ ಮೇಲೆ /
ಹೊಂಚುಹಾಕಿ ನೋಡುತಿಹನು
ಮಾಡಲವರ ಕೊಲೆ //
33 : ಪ್ರಭು ಬಿಡನವನನು ದುಷ್ಟ ಶಕ್ತಿಯ ವಶಕ್ಕೆ /
ಗುರಿಪಡಿಸನು ನ್ಯಾಯಸ್ಥಾನದ ಶಿಕ್ಷೆಗೆ //
34 : ಪ್ರಭುವನು ನಂಬಿ ನಡೆ ಆತನ ಪಥದಲೇ /
ಉದ್ಧಾರವಾಗುವೆ, ನಾಡಿಗೊಡೆಯನಾಗುವೆ /
ದುಷ್ಟರ ವಿನಾಶವನು ಕಣ್ಣಾರೆ ಕಾಣುವೆ //
35 : ದುರುಳನೋರ್ವ ಮಹಾಗರ್ವದಿಂದ
ಬಾಳುತ್ತಿದ್ದ /
ಹುಲುಸಾಗಿ ಬೆಳೆದ ದೇವದಾರು
ಮರದಂತಿದ್ದ //
36 : ಕ್ರಮೇಣ ನಾನು ಆ ಮಾರ್ಗವಾಗಿ ನಡೆಯಲು /
ಕಾಣಲಿಲ್ಲ, ಗುರುತೂ ಇರಲಿಲ್ಲ ಹುಡುಕಲು //
37 : ನಿರಪರಾಧಿಯನ್ನು ಲಕ್ಷಿಸು, ಸತ್ಪುರುಷನನು
ವೀಕ್ಷಿಸು /
ಶಾಂತಿಪ್ರಿಯನಿಗಿದೆ ಸಂತಾನವೃದ್ಧಿ, ಇದ
ಗಮನಿಸು //
38 : ನಾಶವಾಗುವುದು ನಿಜ, ದೋಷಿಗಳ ಮನೆತನ /
ನಿರ್ಮೂಲವಾಗುವುದು ದುರುಳರ ಸಂತಾನ //
39 : ಸಜ್ಜನರ ಜೀವೋದ್ಧಾರ ಪ್ರಭುವಿನಿಂದ /
ಆಪತ್ಕಾಲದಲಿ ಆಶ್ರಯ ಆತನಿಂದ //
40 : ತನ್ನಾಶ್ರಿತರನು ಪ್ರಭು ಕೈ ನೀಡಿ ಕಾಪಾಡುವನು /
ದುಷ್ಟರ ವಶದಿಂದವರನು ತಪ್ಪಿಸಿ
ಉದ್ಧರಿಸುವನು //