ಕನ್ನಡ ಕಥೋಲಿಕ ಬೈಬಲ್
1 : ನನ್ನೊಡನೆ ವ್ಯಾಜ್ಯ ಮಾಡುವವ
ರೊಡನೆ ವ್ಯಾಜ್ಯ ಮಾಡು /
ನನ್ನೊಡನೆ ಕದನ ಮಾಡುವವರೊಡನೆ ಪ್ರಭು,
ಕದನ ಮಾಡು //
2 : ಖಡ್ಗ ಗುರಾಣಿಗಳನು ಧರಿಸಿಕೊ /
ನನಗೆ ರಕ್ಷಣೆಯಾಗಿ ನಿಂತುಕೊ //
3 : ತಡೆ ನೀನು ಬಿಲ್ಲು ಬರ್ಜಿಯಿಂದ ಬೆನ್ನಟ್ಟಿ
ಬರುವ ವೈರಿಯನು /
ನೀಡೆನ್ನ ಮನಕೆ, ನೀನೆ ರಕ್ಷಕನೆಂಬ
ಅಭಯವನು //
4 : ನನ್ನ ಕೊಲೆಗೆ ಯತ್ನಿಸುವವನು ತಲೆ ತಗ್ಗಿಸಲಿ
ನಿರಾಶೆಗೊಂಡು /
ನನಗೆ ಕೇಡನು ಮಾಡುವವರು ಓಡಿಹೋಗಲಿ
ಗಲಿಬಿಲಿಗೊಂಡು //
5 : ಬಿರುಗಾಳಿಗೆ ತರಗೆಲೆಯಂತೆ ತೂರಿಹೋಗಲಿ |
ಪ್ರಭುವಿನ ದೂತನವರನು ಬೆನ್ನಟ್ಟಿ
ಹೋಗಲಿ |
6 : ಇಳಿಜಾರು, ಕಾರಿರುಳು ಇರುವ ಹಾದಿಯಲಿ /
ಪ್ರಭುವಿನ ದೂತನವರನು ಓಡಿಸಿಬಿಡಲಿ //
7 : ನಿಷ್ಕಾರಣ ಕೊಲೆಮಾಡಲೆನ್ನ ಬಲೆ
ಯೊಡ್ಡಿಹರು /
ಆ ಕಾರಣ ಪ್ರಾಣ ತೆಗೆಯಲು ಗುಂಡಿ
ತೋಡಿಹರು //
8 : ಒಡ್ಡಿದ ಬಲೆಯಲಿ ಒಡ್ಡಿದವನೇ ಪಟಕ್ಕನೆ ಸಿಕ್ಕಿ
ಬೀಳಲಿ /
ತೋಡಿದ ಗುಣಿಯಲಿ ತೋಡಿದವನೇ ತಟಕ್ಕನೆ
ಬಿದ್ದು ಹೋಗಲಿ //
9 : ಆಗೆನ್ನ ಮನವು ಆನಂದಗೊಳ್ಳುವುದು
ಪ್ರಭುವಿನಲಿ /
ಆಹ್ಲಾದಗೊಳ್ಳುವುದು ಆತನಿತ್ತಾ
ರಕ್ಷಣೆಯಲಿ //
10 : “ಬಿಡಿಸಿದೆ ಬಡವನನು ದರೋಡೆಗಾರ
ರಿಂದ /
ರಕ್ಷಿಸಿದೆ ದುರ್ಬಲನನು ಬಲಾಢ್ಯರಿಂದ /
ಹೇ ಪ್ರಭು, ನಿನಗೆ ಸಮಾನರಾರೆಂದು” /
ಹೊಗಳುವುವು ನನ್ನೆಲುಬುಗಳೊಂದೊಂದು //
11 : ಸುಳ್ಳು ಸಾಕ್ಷಿಗಳೆದ್ದಿಹರು ನನಗೆ ವಿರುದ್ಧ /
ಹೊರಿಸುತಿಹರು ನನಗೇ ತಿಳಿಯದ
ಅಪರಾಧ //
12 : ಎಸಗುತಿಹರು ಉಪಕಾರಕೆ ಅಪಕಾರ /
ಮಾಡಿಹರೆನ್ನನು ನಿರ್ಗತಿಕ ಪಿಂಜಾರ //
13 : ಅವರು ಅಸ್ವಸ್ಥರಾಗಿರಲು
ಶೋಕವಸ್ತ್ರಧಾರಿಯಾದೆ /
ತಲೆಬಾಗಿ ಜಪಿಸಿದೆ, ನಾ ಮನನೊಂದು
ಉಪವಾಸವಿದ್ದೆ //
14 : ಶೋಕತಪ್ತನಾದೆ ಗೆಳೆಯನಿಗೊ
ಬಳಗದವನಿಗೊ ಎಂಬಂತೆ /
ಅತ್ತು ಪ್ರಲಾಪಿಸಿದೆ ತಾಯನು ಕಳೆದುಕೊಂಡ
ತಬ್ಬಲಿಯಂತೆ //
15 : ನನಗೆ ಆಪತ್ತೊದಗಲದೊ ಸಂತೋಷಿಸಿದರು
ಸಭೆಗೂಡಿ /
ಸೂರೆಮಾಡಿದರು ತಿರುತಿರುಗಿ ಆ
ಭ್ರಷ್ಟರೊಟ್ಟುಗೂಡಿ //
16 : ಅಣಕಿಸಿ ಹಾಸ್ಯ ಮಾಡಿದರು ಕೀಟಲೆಗಾರರಂತೆ /
ಕಟಕಟನೆ ಹಲ್ಲುಕಡಿದರು
ಕಡುಕೋಪಿಗಳಂತೆ //
17 : ಇನ್ನೆಷ್ಟರವರೆಗೆ ಪ್ರಭು, ನೀ ಸುಮ್ಮನಿರುವೆ
ನೋಡುತ? /
ಬಿಡಿಸೆನ್ನ ಹಾವಳಿಯಿಂದ, ಸಿಂಹಗಳ
ಬಾಯಿಂದ //
18 : ಮಹಾಸಭೆಯಲ್ಲಾಗ ನಿನ್ನನು ಕೊಂಡಾಡುವೆ /
ಬಹುಜನರ ಮುಂದೆ ನಿನ್ನ
ಗುಣಗಾನಮಾಡುವೆ //
19 : ಕಳ್ಳ ವೈರಿಗಳೆನ್ನ ನೋಡಿ ಹಿಗ್ಗಲು ಬಿಡಬೇಡ /
ಈ ಕಾರಣ ಶತ್ರುಗಳು ಕಣ್ಣು
ಮಿಟುಕಿಸುವುದು ಬೇಡ //
20 : ಸಮಾಧಾನಕರವಲ್ಲ ಅವರಾಡುವ ನುಡಿಗಳು /
ಮುಗ್ಧನಾಡಿಗರನು ಮೋಸಗೊಳಿಸುವಾ
ಮಾತುಗಳು //
21 : ಎನ್ನೀ ಪರಿಸ್ಥಿತಿಯನು ಕಂಡು ಅವರು ಬಾಯಿ ಕಿಸಿದು / ನುಡಿದರು, “ಆಹಾ! ಕಣ್ಣಾರೆ ಕಂಡೆವಲ್ಲಾ” ಎಂದು //
22 : ನೀನೇ ನೋಡಿರುವೆ ಪ್ರಭು, ಇನ್ನು
ಸುಮ್ಮನಿರಬೇಡ /
ನನ್ನೊಡೆಯಾ, ನನಗಿನ್ನಾದರು
ದೂರವಾಗಿರಬೇಡ //
23 : ನನ್ನ ನ್ಯಾಯವನು ನಿರ್ಣಯಿಸು ದೇವಾ
ಎಚ್ಚೆತ್ತು /
ನನ್ನ ವಿವಾದವನು ವಿಚಾರಿಸು ಪ್ರಭು ನೀನೆದ್ದು
ನಿಂತು //
24 : ಹೇ, ದೇವಾ, ನಿನ್ನ ನೀತಿಗನುಸಾರ
ತೀರ್ಪುಕೊಡು /
ಶತ್ರುಗಳೆನ್ನ ವಿಷಯದಲ್ಲಿ ಹರ್ಷಗೊಳ್ಳದಂತೆ
ಮಾಡು //
25 : ತಮ್ಮಾಸೆ ಕೈಗೂಡಿತೆನಲು ಅವರಿಗಿರಬಾರದು
ಅವಕಾಶ /
ಅವನನು ಕಬಳಿಸಿಬಿಟ್ಟೆವು ಎಂದು ಕೊಚ್ಚಿ
ಕೊಳ್ಳುವ ಸಂತೋಷ //
26 : ನನಗಾದ ಕೇಡನು ನೋಡಿ ಹಿಗ್ಗುವವರಿಗಾಗಲಿ
ಸಿಗ್ಗು /
ನನ್ನನು ಕುಗ್ಗಿಸಿ ಮೆರೆವವರನು ಮುಚ್ಚಲಿ
ಲಜ್ಜೆಯ ಮುಸುಕು //
27 : ನನಗೆ ನ್ಯಾಯ ಬಯಸುವವರು ನಲಿದು
ಮಾಡಲಿ ಜಯಕಾರ /
“ದಾಸನ ಹಿತೈಷಿ ಪ್ರಭುಗೆ, ಜೈ” ಎಂಬ ನಿರಂತರ
ಪ್ರಚಾರ //
28 : ಆಗೆನ್ನ ಜಿಹ್ವೆ ಸಾರುವುದು ನಿನ್ನ ನೀತಿಯನು /
ದಿನವೆಲ್ಲಾ ವರ್ಣಿಸುವುದು ನಿನ್ನ ಕೀರ್ತಿಯನು //