ಕನ್ನಡ ಕಥೋಲಿಕ ಬೈಬಲ್
1 : ಎತ್ತಿರುವೆ ಪ್ರಭೂ, ಹೃನ್ಮನಗಳನು
ನಿನ್ನತ್ತ /
ಇಟ್ಟಿರುವೆ ಭರವಸೆ ನಿನ್ನಲೆ ದೇವಾ ಸನ್ನುತ //
2 : ಶತ್ರುಗಾಗದಿರಲಿ ಸಡಗರ /
ನನಗೊದಗದಿರಲಿ ಮುಜಗರ //
3 : ಆಗಲಿ ಆಶಾಭಂಗ ನಿನ್ನೆದುರಾಳಿಗಳಿಗೆ /
ಹಾಗಾಗದಿರಲಿ ನಿನ್ನ ನಿರೀಕ್ಷಿಸುವವರಿಗೆ //
4 : ನಿನ್ನ ಮಾರ್ಗವನು ಪ್ರಭು ನನಗೆ ತೋರಿಸು /
ನೀನೊಪ್ಪುವ ಪಥದಲಿ ನಾ ನಡೆಯ ಕಲಿಸು //
5 : ಸನ್ಮಾರ್ಗದಲಿ ಮುನ್ನಡೆಸೆನ್ನ ದೇವಾ,
ಮುಕ್ತಿದಾತ /
ಕಲಿಸೆನಗೆ, ನಿನಗಾಗಿ ಕಾದಿರುವೆ ಸತತ //
6 : ನೆನೆಸಿಕೋ ಪ್ರಭು, ನಿನ್ನ ನಿರಂತರ
ಕರುಣೆಯನು /
ಆದಿಯಿಂದ ನೀ ತೋರಿದಚಲ ಪ್ರೀತಿಯನು //
7 : ಯೌವನದೆನ್ನ ಪಾಪ ಪ್ರವೃತ್ತಿಗಳ
ಮನದಲ್ಲಿಟ್ಟುಕೊಳ್ಳಬೇಡ /
ನಿನ್ನೊಲುಮೆ ನಲ್ಮೆಗಳ ನಿಮಿತ್ತ ಪ್ರಭು, ನನ್ನ
ನೆನೆಯದಿರಬೇಡ //
8 : ತ್ಯಸ್ವರೂಪನು, ದಯಾವಂತನು ಪ್ರಭು /
ದಾರಿತಪ್ಪಿದವರಿಗೆ ಬೋಧಕನು ವಿಭು //
9 : ದೀನರನು ನಡೆಸುವನು ತನ್ನ
ವಿಧಿಗನುಸಾರ /
ದಲಿತರಿಗೆ ಕಲಿಸುವನು ತನ್ನ ಧರ್ಮಾಚಾರ //
10 : ಪ್ರಭುವಿನೊಪ್ಪಂದಗಳ ಪಾಲಕರಿಗೆ ಆತನ
ಮಾರ್ಗಗಳು ಸನ್ನುತ /
ಆತನ ವಿಧಿ ನಿಬಂಧನೆಗಳ ಪರಿಪಾಲಕರಿಗೆ
ಅವುಗಳು ಸುಪ್ರೀತ //
11 : ನಿನ್ನ ನಾಮದ ನಿಮಿತ್ತ ನನ್ನನು ಈಕ್ಷಿಸು /
ಎನ್ನ ಘೋರ ಪಾಪವನು ಪ್ರಭು ಕ್ಷಮಿಸು //
12 : ಪ್ರಭುವಿನ ಭಯಭಕುತಿಯುಳ್ಳವನಿಗೆ /
ಲಭಿಪುದು ಖಚಿತ ಋಜುಮಾರ್ಗದ ಕಲಿಕೆ //
13 : ಬಾಳುವನಂಥವನು ಸುಖಸೌಭಾಗ್ಯದಿಂದ
ಬದುಕುವುದವನ ಸಂತತಿ
ನಾಡಿನೊಡೆತನದಿಂದ //
14 : ಬಾಳುವನಂಥವನು ಸುಖಸೌಭಾಗ್ಯದಿಂದ
ಬದುಕುವುದವನ ಸಂತತಿ
ನಾಡಿನೊಡೆತನದಿಂದ //
15 : ತಿರುಗಿದೆ ಎನ್ನ ನಯನ ಪ್ರಭುವಿನತ್ತ /
ಉರುಲಿಂದ ಕಾಲನು ಕಳಚಿದನಾತ //
16 : ಒಬ್ಬೊಂಟಿಗನಾದೆ, ಸಿಕ್ಕಿಕೊಂಡೆ ಸಂಕಟಕೆ /
ಕಟಾಕ್ಷಿಸೋ ಪ್ರಭು, ಕರುಣೆತೋರೋ
ತಬ್ಬಲಿಗೆ //
17 : ನಿವಾರಿಸೆನ್ನ ಮನಕ್ಲೇಶವನು /
ಪರಿಹರಿಸೆನ್ನ ದುಃಖದುಗುಡವನು //
18 : ನೋಡೆನ್ನ ಬಾಧೆ ಬವಣೆಗಳನು /
ತೊಡೆದು ಹಾಕೆನ್ನ ಪಾಪಗಳನು //
19 : ಶತ್ರುಗಳಿಹರು ನೋಡು ಸಹಸ್ರಾರು /
ಕ್ರೋಧದಿಂದೆನ್ನ ಹಗೆ ಮಾಡುತಿಹರು //
20 : ಕಾಪಾಡು ಪ್ರಭು, ರಕ್ಷಿಸೆನ್ನ ಪ್ರಾಣವನು /
ನಿರಾಶೆಗೊಳಿಸಬೇಡ, ಶರಣಾಗತನು ನಾನು //
21 : ನಿರ್ದೋಷ, ನಿಷ್ಕಪಟ ನಡತೆ ನನಗೆ ರಕ್ಷೆ /
ನೀನೆ ಪ್ರಭು ನನಗಿರುವ ದೃಢ ನಿರೀಕ್ಷೆ //
22 : ಉದ್ಧರಿಸು ದೇವಾ, ಇಸ್ರಯೇಲರನು /
ಸಮಸ್ತ ಬೇನೆ ಬವಣೆಗಳಿಂದವರನು //