ಕನ್ನಡ ಕಥೋಲಿಕ ಬೈಬಲ್
1 : ಪೊಡವಿಯೂ ಅದರಲ್ಲಿರುವುದೆಲ್ಲವೂ
ಪ್ರಭುವಿನದೇ /
ಜಗವೂ ಅದರ ಜೀವಜಂತುಗಳೆಲ್ಲವೂ
ಆತನದೇ //
2 : ಕಡಲನು ತಳಪಾಯವನಾಗಿಸಿದವನು ಆತನೆ /
ಜಲರಾಶಿ ನಡುವೆ ಅದನು
ಸ್ಥಿರಗೊಳಿಸಿದವನಾತನೆ //
3 : ಪ್ರಭುವಿನ ಶಿಖರವನು ಏರಬಲ್ಲವನಾರು? /
ಆ ನಿವಾಸದಲಿ ನಿಲ್ಲಲು ಯೋಗ್ಯನಾರು? //
4 : ಅಂಥವನಿರಬೇಕು ಶುದ್ಧ ಹಸ್ತನು,
ಸುಮನಸ್ಕನು /
ಅನಾಚಾರಕೆ, ಅಪಮಾಣಿಕತೆಗೆ
ಒಲಿಯನವನು //
5 : ಲಭಿಸುವುದಾತನಿಗೆ ಶುಭ ಪ್ರಭುವಿನಿಂದ /
ನೀತಿಯ ಸತ್ಫಲ ರಕ್ಷಕ ದೇವನಿಂದ //
6 : ಇಂಥವರೆ ದೇವರ ದರ್ಶನಾಭ್ಯರ್ಥಿಗಳು /
ಇಂಥವರೆ ಯಕೋಬ ದೇವನ ಭಕ್ತಾದಿಗಳು //
7 : ಆಗಮಿಸುತಿಹನಿದೋ ಮಹಿಮಾವಂತ
ರಾಜಾಧಿರಾಜನು /
ತೆರೆದು ಸ್ವಾಗತಿಸಲಿ ಕದಗಳು, ಸನಾತನ
ದ್ವಾರಗಳು //
8 : ಯಾರಿವನು ಮಹಿಮಾವಂತ
ರಾಜಾಧಿರಾಜನು? /
ಇವನೇ ಪ್ರಭು, ಯುದ್ಧವೀರನು,
ಶಕ್ತಿಸಮರ್ಥನು!//
9 : ಆಗಮಿಸುತಿಹನಿದೋ ಮಹಿಮಾವಂತ
ರಾಜಾಧಿರಾಜನು /
ತೆರೆದು ಸ್ವಾಗತಿಸಲಿ ಕದಗಳು, ಸನಾತನ
ದ್ವಾರಗಳು //
10 : ಯಾರಿವನು ಮಹಿಮಾವಂತ
ರಾಜಾಧಿರಾಜನು? /
ಇವನೇ ಸೇನಾಧೀಶ್ವರನು,
ಮಹಿಮಾರಾಜನು //