ಕನ್ನಡ ಕಥೋಲಿಕ ಬೈಬಲ್
1 : ಕಿವಿಗೊಡು ಪ್ರಭು, ನನ್ನ
ಪ್ರಾರ್ಥನೆಗೆ /
ನನ್ನ ಕೂಗು ಸೇರಲಿ ನಿನ್ನ ಬಳಿಗೆ //
2 : ಕಷ್ಟಕಾಲದೊಳು ವಿಮುಖನಾಗಬೇಡ
ನೀನೆನಗೆ /
ಕಿವಿಗೊಡು, ಮೊರೆಯಿಡುವಾಗಲೆ, ಸದುತ್ತರಿಸು
ಬೇಗನೆ //
3 : ಮಾಯವಾಗುತ್ತಿದೆ ನನ್ನೀ ಜೀವಮಾನ
ಹೊಗೆಯಂತೆ /
ಉರಿಯುತ್ತಿವೆ ಎನ್ನೆಲುಬುಗಳು ಒಲೆಯಲ್ಲಿಟ್ಟ
ಕೊರಡಿನಂತೆ //
4 : ಬಿಸಿಲಿಗೆ ಬಾಡಿದ ಹುಲ್ಲಿನಂತಿದೆ ಎನ್ನೆದೆ /
ತಿಂಡಿತೀರ್ಥವನುಣ್ಣಲೂ ನಾ ಮರೆತು
ಹೋದೆ //
5 : ಕೂಗಿ ನಾ ನಿಟ್ಟುಸಿರಿಟ್ಟೆ |
ಎಲುಬು ತೊಗಲು ಆಗಿಬಿಟ್ಟೆ ||
6 : ಅಡವಿಯ ರಣಹದ್ದಿಗೆ ಸಮನಾದೆ /
ಹಾಳೂರಿನ ಗೂಗೆಯ ಹಾಗಾದೆ //
7 : ಮನೆಮೇಲಿನ ಒಂಟಿ ಪಕ್ಷಿಯಾದೆ /
ಬಳಲುತ್ತಿರುವೆನು ನಿದ್ರೆಯಿಲ್ಲದೆ //
8 : ವೈರಿಗಳು ದಿನವಿಡೀ ನನ್ನ ನಿಂದಿಸುತ್ತಿಹರು /
ದ್ವೇಷಿಗಳು ನನ್ನ ಹೆಸರೆತ್ತಿ ಶಪಿಸುತ್ತಿಹರು //
9 : ಬೂದಿಯೇ ನನಗೆ ಆಹಾರವಾಯಿತು /
ಪಾನದಲಿ ಕಣ್ಣೀರು ಮಿಶ್ರವಾಯಿತು //
10 : ನಿನ್ನ ಕೋಪತಾಪಗಳೆ ಕಾರಣ ಇದಕ್ಕೆಲ್ಲಾ /
ನನ್ನನು ಮೇಲಕೆತ್ತಿ ಬಿಸಾಡಿಬಿಟ್ಟರುವೆಯಲ್ಲಾ //
11 : ನನ್ನ ಬಾಳು ಬೈಗಿನ ನೆರಳಂತೆ / ನಾನಿರುವೆ ಬಾಡಿದ ಹುಲ್ಲಿನಂತೆ //
12 : ನೀನಾದರೋ ಪ್ರಭು, ಸದಾ ಸಿಂಹಾಸನಾರೂಢ /
ಮಾಳ್ಪರು ತಲತಲಾಂತರಕು ನಿನ್ನ
ನಾಮಸ್ಮರಣ //
13 : ಎದ್ದು ಸಿಯೋನಿಗೆ ತೋರು ಸೌಜನ್ಯತೆ /
ಅದಕ್ಕೆ ದಯೆತೋರಿಸುವ ಸಮಯವಿದೇ /
ನಿಯಮಿತ ಕಾಲವಿದೋ ಬಂದುಬಿಟ್ಟಿದೆ //
14 : ಕಲ್ಲುಕುಪ್ಪೆಯಾಗಿದ್ದರೂ ನಿನ್ನ ಭಕ್ತರಿಗದು
ಪ್ರಿಯ /
ಅದರ ವಿನಾಶವನು ಕಂಡು ಕರಗಿಹೋಗಿದೆ
ಹೃದಯ /
15 : ಹೆದರುವುವು ಪ್ರಭುವೆಂಬ ನಿನ್ನ ನಾಮಕೆ
ಜನಾಂಗಗಳು /
ಭಯಪಡುವರು ನಿನ್ನ ಪ್ರತಾಪಕೆ ಭೂ
ರಾಜರುಗಳು //
16 : ಏಕೆನೆ ಪುನರುದ್ಧರಿಸುವನು ಸಿಯೋನನು /
ಪ್ರತ್ಯಕ್ಷಮಾಡುವನಾತ ತನ್ನ ಮಹಿಮೆಯನು //
17 : ತಿರಸ್ಕರಿಸನಾತ ನಿರ್ಗತಿಕರ ಮೊರೆಯನು /
ನೆರವೇರಿಸದೆ ಬಿಡನು ಅವರ ಕೋರಿಕೆಯನು //
18 : ಮುಂದಣ ಸಂತತಿಗಿದು ಶಾಸನವಾಗಿರಲಿ /
ಮುಂದೆ ಹುಟ್ಟುವ ಪ್ರಜೆ ಪ್ರಭುವನು
ಹೊಗಳಲಿ //
19 : ಭೂಲೋಕವನು ವೀಕ್ಷಿಸಿದನು ಪ್ರಭು
ಪರಲೋಕದಿಂದ /
ದೃಷ್ಟಿಸಿದನು ತನ್ನ ಉನ್ನತ ಪವಿತ್ರಸ್ಥಾನದಿಂದ //
20 : ಆಲಿಸಿದಾತನು ಬಂಧಿತರ ಗೋಳಾಟವನು /
ಬಿಡಿಸಿಹನು ಮರಣತೀರ್ಪಿಗೆ
ಗುರಿಯಾದವರನು //
21 : ಹೀಗೆ ಪ್ರಭುವಿಗಾರಾಧನೆ ಸಲ್ಲಿಸಲು /
ಜನಾಂಗಗಳೂ ರಾಜ್ಯಗಳೂ ಕೂಡಿರಲು /
22 : ಹೊಗಳಲಾಗುವುದು ಪ್ರಭುವಿನ ನಾಮ
ಸಿಯೋನಿನಲಿ /
ಆತನ ಗುಣಗಾನವಿರುವುದು ಆ
ಜೆರುಸಲೇಮಿನಲಿ //
23 : ನಡುಹಾದಿಯಲೆ ಕುಂದಿಸಿಹನು ಪ್ರಭು ನನ್ನ
ಬಲವನು /
ಕಡಿಮೆಮಾಡಿಬಿಟ್ಟಿಹನು ಆತ ನನ್ನ
ಆಯುಷ್ಯವನು //
25 : ಆದಿಯಲೆ ನೀ ಭುವಿಗೆ ಅಸ್ತಿವಾರ ಹಾಕಿದೆ /
ಗಗನಮಂಡಲವು ಸಹ ನಿನ್ನ ಸೃಷ್ಟಿಯಾಗಿದೆ //
26 : ನೀನಾದರೋ ಉಳಿದಿರುವೆ, ಅವೋ
ಅಳಿದುಹೋಗುವುವು /
ಹಳೆಯದಾಗುತ್ತವೆ ಬಟ್ಟೆಯಂತೆ ಅವೆಲ್ಲವು /
ಉಡುಪಿನಂತೆ ಬದಲಿಸುತ್ತ, ಮಾರ್ಪಡುತ್ತವೆ
ಅವು //
27 : ನೀನಂತೂ ಬದಲಾಗದೆ ಇರುವೆಯಯ್ಯಾ /
ನಿನ್ನ ವರುಷಗಳಿಗೆ ಮುಗಿವೇ ಇಲ್ಲವಯ್ಯಾ //
28 : ಬಾಳುವರು ನಿನ್ನ ದಾಸರ ಮಕ್ಕಳು
ಸುರಕ್ಷಿತವಾಗಿ /
ಇರುವುದವರ ಸಂತತಿ ನಿನ್ನ ಸಮ್ಮುಖದಲಿ
ಸ್ಥಿರವಾಗಿ //