ಕನ್ನಡ ಕಥೋಲಿಕ ಬೈಬಲ್
1 : “ಇಂತಿರಲು, ಯೋಬನೇ, ನನ್ನ
ಮಾತುಗಳಿಗೆ ಕಿವಿಗೊಡು:
ನಾನು ಹೇಳುವುದನ್ನೆಲ್ಲಾ ಗಮನವಿಟ್ಟು ಕೇಳು.
2 : ಇಗೋ, ಮಾತಾಡಲು ತೊಡಗಿದ್ದೇನೆ
ನನ್ನ ನಾಲಿಗೆ ಬಾಯಲ್ಲಿ ತುಡುಕುತ್ತಿದೆ.
3 : ನನ್ನ ನುಡಿ ವ್ಯಕ್ತಪಡಿಸುತ್ತದೆ ಹೃದಯದ
ಯಥಾರ್ಥತೆಯನು
ನನ್ನ ತುಟಿ ನುಡಿಯುತ್ತದೆ ಸತ್ಯವೆಂದು
ಅರಿತವುಗಳನು.
4 : ನಾನು ನಿರ್ಮಿತನಾಗಿದ್ದೇನೆ ದೇವರಾತ್ಮನಿಂದ
ನನಗೆ ಜೀವ ಉಂಟಾಗಿದೆ ಸರ್ವಶಕ್ತನ
ಶ್ವಾಸದಿಂದ.
5 : ನಿನಗೆ ಸಾಮಥ್ರ್ಯವಿದ್ದರೆ ನನಗೆ ಉತ್ತರ ಕೊಡು
ನನ್ನ ಎದುರಿನಲ್ಲೇ ನಿಂತು ವಾದಮಾಡು.
6 : ನೋಡು, ನಾನು ಕೂಡ ಜೇಡಿಮಣ್ಣಿನಿಂದ
ರೂಪಿತನು
ದೇವರ ದೃಷ್ಟಿಯಲ್ಲಿ ನಿನ್ನ ಹಾಗೆಯೇ
ಇರುವವನು.
7 : ಆದ್ದರಿಂದ ನೀನು ನನಗೆ ಅಂಜಬೇಕಾಗಿಲ್ಲ
ನನ್ನ ಕೈ ಬಲ ನಿನಗೆ ಹೊರೆಯಾಗಿರುವುದಿಲ್ಲ
8 : ನನಗೆ ಸ್ಪಷ್ಟವಾಗಿ ಕೇಳಿಸುವಂತೆ ನೀನು
ಮಾತಾಡಿರುವೆ
ನನ್ನ ಕಿವಿಗೆ ಬಿದ್ದ ಈ ಮಾತುಗಳು ನಿನ್ನವೇ
ಆಗಿವೆ.
9 : ‘ನಾನು ಪರಿಶುದ್ಧನು, ನಿರ್ದೋಷಿ
ನಾನು ನಿರ್ಮಲನು, ನಿರಪರಾಧಿ.
10 : ‘ಆದರೂ ನನ್ನಲ್ಲಿ ದೇವರು
ತಪ್ಪುಕಂಡು ಹಿಡಿಯಬೇಕೆಂದಿದ್ದಾನೆ
ನನ್ನನ್ನು ತನ್ನ ಶತ್ರುವೆಂದೇ ಭಾವಿಸಿದ್ದಾನೆ.
11 : ‘ನನ್ನ ಕಾಲುಗಳಿಗೆ ಕೋಳತೊಡಿಸಿದ್ದಾನೆ
ನನ್ನ ಎಲ್ಲ ಹಾದಿಗಳನ್ನು ಕಂಡುಕೊಂಡಿದ್ದಾನೆ.’
12 : ಹೀಗೆ ನೀನು ನುಡಿದದ್ದು ಸರಿಯಲ್ಲವೆಂಬುದೇ ನನ್ನ ಉತ್ತರ; ದೇವರು ಮನುಷ್ಯರಿಗಿಂತ ದೊಡ್ಡವನು ಎಂಬುದೇ ಇದಕ್ಕೆ ಆಧಾರ.
13 : ಆತ ನಿನ್ನ ಯಾವ ಮಾತಿಗೂ ಉತ್ತರ ಕೊಡಲಿಲ್ಲ ಎಂದ ಮಾತ್ರಕ್ಕೆ ನೀನು ಆತನೊಡನೆ ವ್ಯಾಜ್ಯವಾಡುವುದು ಸರಿಯಲ್ಲ.
14 : ದೇವರು ಪದೇ ಪದೇ ಮಾತನಾಡಿದರೂ
ನರಮಾನವನು ಗ್ರಹಿಸಿಕೊಳ್ಳುವುದಿಲ್ಲ.
15 : ಮಾನವನಿಗೆ ಗಾಢನಿದ್ರೆ ಬಂದಾಗ
ಹಾಸಿಗೆಮೇಲೆ ಮಲಗಿರುವಾಗ
ಸ್ವಪ್ನಬಿದ್ದಾಗ, ಕನಸುಕಾಣುವಾಗ,
16 : ದೇವರು ಅವನ ಕಿವಿಗಳನ್ನು ತೆರೆಯುತ್ತಾನೆ ಉಪದೇಶಮಾಡಿ ಎಚ್ಚರಿಕೆ ನೀಡುತ್ತಾನೆ.
17 : ಹೀಗೆ ದುಷ್ಕಾರ್ಯದಿಂದ ಮನುಷ್ಯನನ್ನು
ತಪ್ಪಿಸುತ್ತಾನೆ
ಅವನ ಅಹಂಕಾರ ಗರ್ವವನು ಅಡಗಿಸುತ್ತಾನೆ.
18 : ಅವನ ಆತ್ಮ ಅಧೋಲೋಕಕ್ಕಿಳಿಯದಂತೆ
ತಡೆಯುತ್ತಾನೆ
ಅವನ ಪ್ರಾಣ ಕತ್ತಿಗೆ ತುತ್ತಾಗದಂತೆ
ಕಾಪಾಡುತ್ತಾನೆ.
19 : ಇದಲ್ಲದೆ, ಮಾನವ ವ್ಯಾಧಿಯಿಂದ ಹಾಸಿಗೆ
ಹಿಡಿದಿರುವಾಗ
ಅವನನ್ನು ತಿದ್ದುತ್ತಾನೆ ಅವನ ದೇಹ
ನರಳುತ್ತಿರುವಾಗ.
20 : ಅವನಿಗೆ ಆಹಾರವೂ ಬೇಸರವಾಗುವುದು
ಮೃಷ್ಟಾನ್ನವೂ ಅಸಹ್ಯವಾಗುವುದು.
21 : ಅವನ ಮಾಂಸಖಂಡ ಕರಗಿಹೋಗುವುದು
ಅವನ ಅಸ್ಥಿಪಂಜರ ಎದ್ದು ಕಾಣುವುದು.
22 : ಅವನ ಆತ್ಮ ಅಧೋಲೋಕವನ್ನು
ಸಮೀಪಿಸುವುದು
ಅವನ ಪ್ರಾಣ ಮೃತ್ಯುದೂತರಿಗೆ
ಹತ್ತಿರವಾಗುವುದು.
23 : ಆದರೆ ಸಹಸ್ರ ದೂತರಲ್ಲೊಬ್ಬ ಮಧ್ಯಸ್ಥನಾಗಿ
ಅವನ ಪಕ್ಕದಲ್ಲಿ ನಿಂತು ಅವನ
ಕರ್ತವ್ಯವೇನೆಂದು ತಿಳಿಸಿ,
24 : ‘ಇವನನ್ನು ಕಾಪಾಡಿ; ಅಧೋಲೋಕಕ್ಕೆ
ತಳ್ಳಬೇಡಿ,
ಬಿಡುಗಡೆ ಬೇಕಾದ ಈಡು ಇದೋ ಇಲ್ಲಿ!’
ಎಂದು ಹೇಳಿದರೆ,
25 : ಅವನ ದೇಹ ಬಾಲ್ಯಕಿಂತಲೂ
ಕೋಮಲವಾಗುವುದು
ಎಳೆತನದ ಚೈತನ್ಯವನ್ನು ಮತ್ತೆ
ಅನುಭವಿಸುವನು.
26 : ಆಗ ಅವನು ದೇವರಿಗೆ ಪ್ರಾರ್ಥನೆ ಮಾಡುವನು
ಆತನ ಒಲುಮೆಗೆ ಪಾತ್ರನಾಗುವನು.
ಹರ್ಷೋದ್ಗಾರದಿಂದ ಆತನ ಸನ್ನಿಧಿಗೆ
ಬರುವನು
ಮತ್ತೆ ಆತನಿಂದ ಸತ್ಯಂತ ಎನಿಸಿಕೊಳ್ಳುವನು.
27 : ಆಗ ಅವನು ಜನರ ಮುಂದೆ ಈ ಪರಿ
ಹಾಡುವನು:
‘ಪಾಪ ಮಾಡಿದೆ; ಸನ್ಮಾರ್ಗ ಬಿಟ್ಟು ನಡೆದೆ
ಆದರೂ ದಂಡಿಸಲಿಲ್ಲ ದೇವರು ನನ್ನ ಪಾಪಕ್ಕೆ
ತಕ್ಕಂತೆ.
28 : ವಿಮೋಚಿಸಿದ್ದಾನೆ ನನ್ನ ಆತ್ಮ ಅಧೋಲೋಕ
ಸೇರದಂತೆ
ನನ್ನ ಜೀವವು ಜ್ಯೋತಿಯನು ಕಾಣುವಂತೆ.’
29 : ಇದನ್ನೆಲ್ಲ ನೀಡುವವನು ಆ ದೇವರೇ
ಇಮ್ಮಡಿ ಮುಮ್ಮಡಿಯಾಗಿ ನೀಡುವನು
ಮನುಜನಿಗೆ.
30 : ಅವನ ಆತ್ಮವನು ಅಧೋಲೋಕದಿಂದ
ಹಿಂದಿರುಗಿಸುವನು
ಜೀವಲೋಕದ ಬೆಳಕನು ಅನುಭವಿಸುವಂತೆ
ಮಾಡುವನು.
31 : ಯೋಬನೇ, ನನ್ನ ಮಾತಿಗೆ ಕಿವಿಗೊಡು,
ಮೌನದಿಂದ ಕೇಳು, ನಾನೇ ಮಾತಾಡಲಿರುವೆ:
32 : ಏನಾದರೂ ಹೇಳಬೇಕೆಂದಿದ್ದರೆ ಹೇಳು,
ಉತ್ತರಕೊಡು ನನಗೆ,
ನೀನು ಸತ್ಯವಂತನೆಂದು ಸ್ಥಾಪಿಸಬೇಕೆಂಬುದೇ
ನನ್ನ ಬಯಕೆ.
33 : ಇಲ್ಲವಾದರೆ ಸುಮ್ಮನಿದ್ದು ಕಿವಿಗೊಡು
ನಿನಗೆ ಬೋಧಿಸುವೆನು ಸುಜ್ಞಾನವನು.”