ಕನ್ನಡ ಕಥೋಲಿಕ ಬೈಬಲ್
1 : “ಸರ್ವಶಕ್ತ ಸರ್ವೇಶ್ವರಾ, ಇಸ್ರಯೇಲಿನ ದೇವರೇ, ಇಕ್ಕಟ್ಟಿನಲ್ಲಿ ಸಿಕ್ಕಿರುವ ನಮ್ಮ ಪ್ರಾಣವು, ನೊಂದಿರುವ ನಮ್ಮ ಮನವು ನಿಮಗೆ ಮೊರೆಯಿಡುತ್ತಿದೆ.
2 : ಸರ್ವೇಶ್ವರಾ, ನಮಗೆ ದಯೆತೋರಿ. ನೀವು ಕರುಣಾಳು ದೇವರಲ್ಲವೆ? ನಾವು ನಿಮ್ಮ ಸನ್ನಿಧಿಯಲ್ಲಿ ಪಾಪಮಾಡಿದ್ದೇವೆ, ನಮ್ಮ ಮೇಲೆ ನಿಮ್ಮ ಕೃಪಾಕಟಾಕ್ಷವಿರಲಿ.
3 : ಸದಾಕಾಲವು ಸಿಂಹಾಸನಾರೂಢರಾಗಿರುವಂಥವರು ನೀವು; ನಾವಾದರೋ ಸತ್ತು ಅಳಿದು ಹೋಗುವಂಥವರೇ
4 : ಸರ್ವಶಕ್ತ ಸರ್ವೇಶ್ವರಾ, ಇಸ್ರಯೇಲಿನ ದೇವರೇ, ಸತ್ತವರಂತೆ ಆಗಿಬಿಟ್ಟಿರುವ ಇಸ್ರಯೇಲರಾದ ನಮ್ಮ ಬಿನ್ನಹವನ್ನು ಕೇಳಿರಿ. ನಮ್ಮ ದೇವರಾದ ನಿಮ್ಮ ಮಾತನ್ನು ಆಲಿಸದೆ, ನಿಮ್ಮ ಸನ್ನಿಧಿಯಲ್ಲಿ ಪಾಪಮಾಡಿದವರ ಮಕ್ಕಳಾದ ನಮ್ಮ ಪ್ರಾರ್ಥನೆಯನ್ನು ಆಲಿಸಿರಿ. ಆ ಪಾಪಗಳ ಕಾರಣದಿಂದಲೇ ಇಂಥ ವಿಪತ್ತುಗಳು ನಮಗೆ ಅಂಟಿಕೊಂಡಿವೆ.
5 : ಈ ಕಾಲದಲ್ಲಿ ನಮ್ಮ ಪೂರ್ವಜರ ಅಪರಾಧಗಳನ್ನು ನೆನಪಿಗೆ ತಂದುಕೊಳ್ಳದೆ, ನಿಮ್ಮ ಪರಾಕ್ರಮವನ್ನೂ ನಿಮ್ಮ ನಾಮವನ್ನೂ ನೆನೆಸಿಕೊಳ್ಳಿರಿ.
6 : ನೀವೇ ನಮ್ಮ ದೇವರಾದ ಸರ್ವೇಶ್ವರ.
8 : “ಸರ್ವೇಶ್ವರಾ, ನಾವು ನಿಮ್ಮನ್ನೇ ಕೊಂಡಾಡುತ್ತೇವೆ. ನಾವು ನಿಮ್ಮ ನಾಮವನ್ನು ಕೀರ್ತಿಸಬೇಕೆಂತಲೇ ನಮ್ಮ ಹೃದಯದಲ್ಲಿ ನಿಮ್ಮ ಭಯಭಕ್ತಿಯನ್ನುಂಟು ಮಾಡಿದ್ದೀರಿ. ನಾವಿರುವ ಈ ಪರದೇಶದಲ್ಲೇ ನಿಮ್ಮನ್ನು ಕೊಂಡಾಡುವೆವು. ಏಕೆಂದರೆ, ನಿಮ್ಮ ಸನ್ನಿಧಿಯಲ್ಲಿ ಪಾಪಮಾಡಿದ ನಮ್ಮ ಪೂರ್ವಜರ ದ್ರೋಹಗಳನ್ನೆಲ್ಲ ನಮ್ಮ ಹೃದಯದಿಂದ ತೆಗೆದುಹಾಕಿದ್ದೇವೆ
8 : ನೋಡಿ, ನೀವು ನಮ್ಮನ್ನು ಚದರಿಸಿಬಿಟ್ಟಿರುವ ಈ ಪರದೇಶದಲ್ಲೇ ನಾವಿನ್ನೂ ಉಳಿದಿದ್ದೇವೆ. ನಮ್ಮ ದೇವರಾದ ಸರ್ವೇಶ್ವರಸ್ವಾಮಿಯನ್ನು ಬಿಟ್ಟು ಅಗಲಿದ ನಮ್ಮ ಪೂರ್ವಜರ ಅಪರಾಧಗಳ ನಿಮಿತ್ತ ನಾವು ದೂಷಣೆ, ಶಾಪ ಹಾಗು ದಂಡನೆಗೆ ಗುರಿ ಆಗಿದ್ದೇವೆ.
ಸುಜ್ಞಾನದ ಸ್ತುತಿ:
ಸುಜ್ಞಾನ ದೊರಕುವ ಮಾರ್ಗ
9 : ಇಸ್ರಯೇಲೇ, ಜೀವದಾಯಕ ಆಜ್ಞೆಗಳನ್ನು ಕೇಳು,
ಸುಜ್ಞಾನವನ್ನು ಕಲಿತುಕೊ ಕಿವಿಗೊಟ್ಟು.
10 : ಇಸ್ರಯೇಲೇ, ಇದು ಸಂಭವಿಸಿದ್ದು ಹೇಗೆ?
ನಿನ್ನ ಶತ್ರುಗಳ ದೇಶದೊಳಕ್ಕೆ ನೀನು
ಬಂದುದು ಹೇಗೆ?
ಪರದೇಶದಲ್ಲಿ ನೀನು ಮುಪ್ಪಾದುದು ಹೇಗೆ?
ಸತ್ತವರಂತೆ ನೀನು ಹೊಲೆಯಾದುದು ಹೇಗೆ?
11 : ಪಾತಾಳಲೋಕ ಸೇರಿದವರಂತೆ ನೀನು
ಪರಿಗಣಿತನಾದುದು ಹೇಗೆ?
12 : ಸುಜ್ಞಾನದ ಬುಗ್ಗೆಯನ್ನೇ ನೀ ಮರೆತು
ಬಿಟ್ಟಿರುವೆ.
13 : ದೇವರ ಮಾರ್ಗದಲ್ಲಿ ನೀನು ನಡೆದಿದ್ದರೆ
ನಿರಂತರ ಶಾಂತಿಸಮಾಧಾನದಿಂದ
ವಾಸಿಸುತ್ತಿದ್ದೆ.
14 : ಸುಜ್ಞಾನವೆಲ್ಲಿದೆ, ಶಕ್ತಿಯೆಲ್ಲಿದೆ,
ವಿವೇಕವೆಲ್ಲಿದೆ
ಎಂಬುದನ್ನು ಕಲಿ; ಆಗ ಕಂಡುಕೊಳ್ಳುವೆ
ದೀರ್ಘಾಯುಸ್ಸು ಮತ್ತು ಜೀವ ಎಲ್ಲಿವೆಯೆಂದು
ದಾರಿತೋರುವ ಬೆಳಕು ಮತ್ತು ಶಾಂತಿ
ಎಲ್ಲಿವೆಯೆಂದು.
15 : ಸುಜ್ಞಾನದ ನೆಲೆಯನ್ನು ಕಂಡು
ಹಿಡಿದಿರುವವರಾರು?
ಅದರ ನಿಧಿಗೃಹವನ್ನು ಪ್ರವೇಶಿಸಿರುವವರಾರು?
16 : ರಾಷ್ಟ್ರಗಳ ನಾಯಕರು ಎಲ್ಲಿದ್ದಾರೆ?
ಜೀವಜಂತುಗಳನ್ನು ಆಳಿದವರೆಲ್ಲಿದ್ದಾರೆ?
17 : ಎಲ್ಲಿ ಆಕಾಶಪಕ್ಷಿಗಳೊಂದಿಗೆ
ಆಟವಾಡಿದವರು?
ಮಾನವರು ಮೆಚ್ಚುವ ಬೆಳ್ಳಿಬಂಗಾರವನ್ನು
ಸಂಗ್ರಹಿಸಿದವರು?
ಇವುಗಳ ಸಂಪಾದನೆಗೆ ಇತಿಮಿತಿ ಇದೆಯೆ?
18 : ಯಾರು ಬೆಳ್ಳಿಯ ಕೆಲಸದಲ್ಲೇ ನಿರತರಾಗಿ
ಹಂಬಲಿಸಿದರೋ
ಅವರ ಆ ಕೆಲಸದ ಗುರುತನ್ನಾದರೂ ಕಂಡು
ಹಿಡಿಯಲು ಸಾಧ್ಯವೋ?
19 : ಅವರು ಕಣ್ಮರೆಯಾಗಿ ಪಾತಾಳವನ್ನು ಸೇರಿದರು
ಅವರ ಸ್ಥಳವನ್ನು ಆಕ್ರಮಿಸಿಕೊಂಡಿದ್ದಾರೆ
ಇತರರು.
20 : ಆ ಬಳಿಕ ಬಂದವರು ಕಣ್ಣಿಗೆ ಕಾಣಿಸಿಕೊಂಡರು
ಸರದಿಯ ಪ್ರಕಾರ ಧರೆಯಲ್ಲಿ ವಾಸಿಸಿದರು.
ಆದರೆ ಕಂಡುಹಿಡಿಯಲಿಲ್ಲ ಜ್ಞಾನದ
ಮಾರ್ಗವನ್ನು
ಅರಿಯಲಿಲ್ಲ ಅದು ಹಿಡಿಯುವ ಹಾದಿಯನ್ನು.
21 : ಅವರ ಮಕ್ಕಳಾದರೋ ಅದನ್ನು ಕಾಣದೆ
ಹೋದರು.
ಆ ಮಾರ್ಗದಿಂದ ಬಲುದೂರದಲ್ಲೇ
ಉಳಿದರು.
22 : ಕಾನಾನಿನಲ್ಲಿ ಅದರ ವಿಷಯವನ್ನು
ಕೇಳಿದವರಿಲ್ಲ
ತೇಮಾನಿನಲ್ಲೂ ಅದನ್ನು ಕೇಳಿ
ನೋಡಿದವರಿಲ್ಲ.
23 : ಲೌಕಿಕ ಜ್ಞಾನ ಹುಡುಕುವ ಹಾಗರಳ
ಸಂತತಿಯವರು
ಮಿದ್ಯಾನಿನ ಹಾಗು ತೇಮಾನಿನ ವರ್ತಕರು
ಕಟ್ಟುಕತೆಗಾರರು ಮತ್ತು ತತ್ವಶಾಸ್ತ್ರಜ್ಞರು
ಇವರಾರೂ ಸುಜ್ಞಾನದ ಮಾರ್ಗವನ್ನು
ಕಂಡುಕೊಳ್ಳಲಿಲ್ಲ,
ಅದು ಹಿಡಿಯುವ ಹಾದಿಯನ್ನು
ಜ್ಞಾಪಿಸಿಕೊಳ್ಳಲಿಲ್ಲ.
24 : ಇಸ್ರಯೇಲೇ, ದೇವರ ಲೋಕ
ಎಷ್ಟು ದೊಡ್ಡದು !
ಆತನ ಆಧಿಪತ್ಯ ಎಷ್ಟು ವಿಶಾಲವಾದುದು !
25 : ಹೌದು, ಅದು ದೊಡ್ಡದು, ಅಪಾರ
ಅಳೆಯಲಾಗದಷ್ಟು ವಿಶಾಲ, ಗ್ರಹಿಸಲಾಗದಷ್ಟು
ಉನ್ನತ.
26 : ಇದರಲ್ಲಿ ಜನಿಸಿದ್ದರು ಹಿಂದೆ ಹೆಸರಾಂತ
ಮಹಾನ್ ವ್ಯಕ್ತಿಗಳು
ದೇಹಾಕಾರದಲ್ಲಿ ಬಲಾಢ್ಯರು, ಯುದ್ಧದಲ್ಲಿ
ನಿಪುಣರು.
27 : ಆದರೂ ದೇವರು ಅವರನ್ನು
ಆಯ್ದುಕೊಳ್ಳಲಿಲ್ಲ
ಸುಜ್ಞಾನದ ಮಾರ್ಗವನ್ನು ಅವರಿಗೆ
ತೋರಿಸಲಿಲ್ಲ.
28 : ಸುಜ್ಞಾನವಿಲ್ಲದೆ ಅವರು ಸತ್ತುಹೋದರು
ಅವಿವೇಕದಿಂದ ಅವರು ಹಾಳಾಗಿಹೋದರು.
29 : ಅದನ್ನು ಹಿಡಿಯಲು ಆಕಾಶವನ್ನು
ಏರಿದವರುಂಟೆ?
ಮೋಡಗಳಿಂದ ಅದನ್ನು ಕೆಳಕ್ಕೆ ಇಳಿಸಿದ್ದುಂಟೆ?
30 : ಅದನ್ನು ಕಂಡುಹಿಡಿಯಲು ಸಮುದ್ರವನ್ನು
ದಾಟಿದವರುಂಟೆ?
ಚೊಕ್ಕ ಬಂಗಾರವನ್ನು ಕೊಟ್ಟು
ಕೊಂಡುತಂದವರುಂಟೆ?
31 : ಅದನ್ನು ಹಿಡಿಯುವ ಮಾರ್ಗವನ್ನು
ಬಲ್ಲವರಿಲ್ಲ
ಅದರ ಹಾದಿಯನ್ನು ಗ್ರಹಿಸಿದವರಾರೂ ಇಲ್ಲ.
32 : ಆದರೆ ಸುಜ್ಞಾನವನ್ನು ಬಲ್ಲ
ಸರ್ವಜ್ಞನೊಬ್ಬನಿದ್ದಾನೆ.
ಆತ ತನ್ನ ಸ್ವಂತ ಬುದ್ಧಿವಿವೇಕದಿಂದ ಅದನ್ನು
ತಿಳಿದಿದ್ದಾನೆ.
ಜಗತ್ತನ್ನು ಚಿರಕಾಲ ಸ್ಥಿರವಾಗಿರಿಸಿದವನು
ಆತನೆ
ನಾಲ್ಕು ಕಾಲಿನ ಪಶುಪ್ರಾಣಿಗಳಿಂದ ಅದನ್ನು
ತುಂಬಿಸಿದವನು ಆತನೆ.
33 : ಆತ ಬೆಳಕನ್ನು ಕಳುಹಿಸುತ್ತಾನೆ – ಅದು
ಬರುತ್ತದೆ
ಹಿಂದಕ್ಕೆ ಕರೆದಾಗ ಭಯದಿಂದ
ಹಿಂದಿರುಗುತ್ತದೆ.
34 : ತಾರೆಗಳು ನಿಯಮಿತ ಸ್ಥಳದಲ್ಲಿ ಸಂತಸದಿಂದ
ಮಿನುಗುತ್ತವೆ
ಆತ ಕರೆದಾಗ “ಇಗೋ ಇಲ್ಲಿದ್ದೇವೆ,” ಎಂದು
ಹೇಳುತ್ತವೆ,
ತಮ್ಮನ್ನು ಸೃಷ್ಟಿಸಿದಾತನ ಆನಂದಕ್ಕಾಗಿ
ಅವು ಹೊಳೆಯುತ್ತವೆ.
35 : ಆತನೇ ನಮ್ಮ ದೇವರು;
ಯಾರೂ ಇಲ್ಲ ಆತನಿಗೆ ಸಮಾನರು.
36 : ಜ್ಞಾನದ ಇಡೀ ಮಾರ್ಗವನ್ನು ಅರಿತಿದ್ದಾರೆ
ಆ ದೇವರು.
ತಮ್ಮ ದಾಸ ಯಕೋಬನಿಗೂ ತಮ್ಮ ಪ್ರಿಯ
ಇಸ್ರಯೇಲರಿಗೂಹಿಂದಿರುಗುತ್ತದೆ.
37 : ಅನಂತರವೇ ಸುಜ್ಞಾನ ಧರೆಯ ಮೇಲೆ
ಕಾಣಿಸಿಕೊಂಡಿತು,
ಮಾನವರ ಮಧ್ಯೆ ಅದು ವಾಸಮಾಡಿತು.