ಕನ್ನಡ ಕಥೋಲಿಕ ಬೈಬಲ್
1 : ಮಕ್ಕಳಿಲ್ಲದ ಸದ್ಗುಣಿಯ ಬಾಳು ಲೇಸು
ಸದ್ಗುಣ ಸ್ಮರಣೆಯಲೆ ಅಮರತ್ವ
ಅಡಗಿರುವುದು
ದೇವಮಾನವರ ಮುಂದೆ ಅದು
ಮನ್ನಣೆ ಪಡೆವುದು.
2 : ಸದ್ಗುಣವು ಸಮೀಪವಿರುವಾಗ ಜನರು
ಅದನ್ನು ಅನುಸರಿಸುತ್ತಾರೆ.
ಅದು ದೂರಹೋಗಿಬಿಟ್ಟಾಗ
ಅದನ್ನು ಬಯಸುತ್ತಾರೆ.
ಅಮರ ಬಹುಮಾನಕ್ಕಾಗಿ ನಡೆವ
ಸ್ಪರ್ಧೆಯಲ್ಲಿ ಅದು ಜಯಗಳಿಸುತ್ತದೆ
ಎಲ್ಲ ಕಾಲದೊಳು ಅದು ಜಯಮಾಲೆ
ಹೊಂದಿ ಮೆರೆಯುತ್ತದೆ.
3 : ದುರುಳರ ಬಹುಸಂಖ್ಯೆಯಲ್ಲಿ
ಲಾಭವೇನೂ ಇಲ್ಲ
ಆ ಕಳ್ಳ ಸಸಿಗಳು ಆಳವಾಗಿ
ಬೇರೂರುವುದಿಲ್ಲ
ಸ್ಥಿರವಾದ ನೆಲೆಯನ್ನು ಅವು
ಮಾಡಿಕೊಳ್ಳುವುದಿಲ್ಲ.
4 : ಕೊಂಬೆಬಿಟ್ಟು ಕೆಲಕಾಲ ಚೆಂದವಾಗಿ
ಅವು ಬೆಳೆದರೂ
ನೆಲೆಯಿಲ್ಲದ ಕಾರಣ ಗಾಳಿಗೆ
ಹೊಯ್ದಾಡುವುವು
ರಭಸಗಾಳಿಗೆ ಬೇರುಸಹಿತ
ಕಿತ್ತುಬೀಳುವುವು.
5 : ಬಲಿಯುವುದಕ್ಕೆ ಮುಂಚೆಯೇ
ಮುರಿಯುತ್ತವೆ ಆ ರೆಂಬೆಗಳು
ಯಾವ ಪ್ರಯೋಜನಕ್ಕೂ ಬಾರವು ಅದರ
ಹಣ್ಣಾಗದ ಕಾಯಿಗಳು.
6 : ಹೆತ್ತವರ ತಪ್ಪನ್ನು ಪರಿಶೋಧಿಸುವ
ಕಾಲದಲಿ
ವ್ಯಭಿಚಾರಕ್ಕೆ ಹುಟ್ಟಿದ ಮಕ್ಕಳೇ
ನೀಡುವರು ಸಾಕ್ಷಿ.
ಸಜ್ಜನರ ಅಕಾಲ ಮರಣ
7 : ಸಜ್ಜನನು ಕಾಲಕ್ಕೆ ಮುಂಚೆ ಸತ್ತರೂ
ವಿಶ್ರಾಂತಿಯನ್ನು ಕಳೆದುಕೊಳ್ಳನು.
8 : ವರ್ಷಗಳು ಹೆಚ್ಚಾದಷ್ಟೂ ಘನತೆ
ಹೆಚ್ಚಾಗದು
ಕೇವಲ ದೀರ್ಘಾಯುಸ್ಸು
ಮುಪ್ಪಿಗೆ ಮಾನ್ಯತೆ ತರದು.
9 : ಜ್ಞಾನಾರ್ಜನೆಯೇ ಮನುಷ್ಯನ
ನರೆಗೂದಲು
ನಿರ್ಮಲ ಜೀವನವೇ ವೃದ್ಧಾಪ್ಯದ ಗುರುತು.
ಹನೋಕನ ಆದರ್ಶ
10 : ದೇವರ ಮೆಚ್ಚಿಗೆಗೂ ಪ್ರೀತಿಗೂ
ಪಾತ್ರನಾದವನೊಬ್ಬನಿದ್ದನು.
ಪಾಪಿಗಳ ಮಧ್ಯೆ ವಾಸಿಸುವಾಗಲೆ
ಮೇಲಕ್ಕೊಯ್ಯಲ್ಪಟ್ಟನು.
11 : ಕಾರಣ – ಕೇಡಿನಿಂದ ಅವನ ಬುದ್ಧಿ
ಮಾರ್ಪಡಬಾರದೆಂದು;
ಮೋಸದಿಂದ ಅವನ ಮನಸ್ಸು
ವಂಚಿತವಾಗಬಾರದೆಂದು.
12 : ಕೆಟ್ಟತನದ ಮೋಹ ಒಳ್ಳೆಯವುಗಳನ್ನು
ಮಂಕಾಗಿಸುತ್ತದೆ
ದುರಾಶೆಯ ಭ್ರಮೆ ನಿರ್ಮಲ ಮನಸ್ಸನ್ನು
ಕೆಡಿಸುತ್ತದೆ.
13 : ಅಲ್ಪಾವಧಿಯಲ್ಲೇ ಅವನು ಸಿದ್ಧಿಯನು
ಗಳಿಸಿದನು
ಸುದೀರ್ಘ ಜೀವನದ ಪುಣ್ಯವನು
ಸಂಪಾದಿಸಿದನು.
14 : ಅವನ ಆತ್ಮ ಸರ್ವೇಶ್ವರನಿಗೆ
ಮೆಚ್ಚುಗೆಯಾಗಿತ್ತು
ಎಂತಲೆ ದುಷ್ಟರ ಮಧ್ಯೆಯಿಂದ ಅದನ್ನು
ಬೇಗನೆ ತೆಗೆಯಲಾಯಿತು.
15 : ದೇವರ ಕೃಪಾಕರುಣೆ ಅವರಿಂದ
ಆಯ್ಕೆಯಾದವರಿಗೆ
ಅವರ ಪರಾಂಬರಿಕೆ ಅವರ ಭಕ್ತಾದಿಗಳ
ಮೇಲೆ.
ಇದನ್ನು ಕಂಡರೂ ಜನರು
ತಿಳಿದುಕೊಳ್ಳುವುದಿಲ್ಲ
ಅಂತರಾಳದಲ್ಲಿ ಅವರು
ಇಟ್ಟುಕೊಳ್ಳುವುದಿಲ್ಲ.
16 : ಸತ್ತ ಸಜ್ಜನನು ಖಂಡಿಸುತ್ತಾನೆ ಜೀವಿಸುವ
ದುರ್ಜನರನು
ಅಂತೆಯೇ, ಅಲ್ಪಾವಧಿಯಲ್ಲೆ
ಸಿದ್ಧಿಸಾಧಿಸಿದಾ ಯುವಕನು
ಖಂಡಿಸುತ್ತಾನೆ ದೀರ್ಘಾಯುಸ್ಸಿನ ದುಷ್ಟ
ಮುದುಕನನು.
17 : ಸಜ್ಜನನು ಯೌವನದಲ್ಲೇ ಸಾಯುವುದನು
ನೋಡುತ್ತಾರೆ ದುರುಳರು.
ಆದರೆ ಅವನ ಬಗ್ಗೆ ದೇವರ
ಚಿತ್ತವೇನೆಂಬುದನು ಅವರರಿಯರು.
ಅವನನ್ನು ಹೇಗೆ ಸುರಕ್ಷಿತನಾಗಿ
ಇರಿಸಿದ್ದರೆಂಬುದನೂ ಅರಿಯರು.
18 : ಅವನ ಮರಣವನ್ನು ನೋಡಿ ಇವರು
ಜರೆಯುತ್ತಾರೆ
ಆದರೆ ದೇವರಿವರನ್ನು ಪರಿಹಾಸ್ಯ
ಮಾಡುತ್ತಾರೆ.
ದುರುಳರು ತಿರಸ್ಕøತ ಶವಗಳಾಗುತ್ತಾರೆ
ಸತ್ತು ನಿತ್ಯದಂಡನೆಗೆ ಗುರಿಯಾಗುತ್ತಾರೆ.
19 : ನೆಲಕ್ಕಪ್ಪಳಿಸಿ ಮೌನವಾಗಿಸುವನು
ದೇವರು ಅವರನು
ಬುಡದಿಂದಲೆ ಅವರನು ಅಲ್ಲಾಡಿಸುವನು.
ಸರ್ವನಾಶದ ದುಃಖ ಅವರದಾಗುವುದು
ಅವರ ಸ್ಮರಣೆಯೂ ಇಲ್ಲದಾಗುವುದು.
20 : ದುರುಳರ ಪಾಪಗಳನ್ನು ಲೆಕ್ಕಿಸುವ
ಕಾಲದಲಿ
ಬರುವರವರು ಅಂಜುಬುರುಕರಾಗಿ
ಅವರ ದುಷ್ಕøತ್ಯಗಳೇ ಸಾಕ್ಷಿನೀಡುವುವು
ಅವರಿಗಿದಿರಾಗಿ.