ಕನ್ನಡ ಕಥೋಲಿಕ ಬೈಬಲ್
1 : ಪವಿತ್ರ ಪ್ರವಾದಿಯೊಬ್ಬನ
ಮುಖಾಂತರ
ಸಫಲಗೊಳಿಸಿದಳು ಅವರ
ಕಾರ್ಯಗಳನ್ನೆಲ್ಲಾ.
2 : ನಿರ್ಜನ ಮರುಭೂಮಿಯಲ್ಲವರು
ಪ್ರಯಾಣ ಮಾಡಿದರು
ಹಾದಿಗಳೇ ಇಲ್ಲದ ಪ್ರದೇಶಗಳಲಿ
ಗುಡಾರ ಹಾಕಿದರು.
3 : ಶತ್ರುಗಳನ್ನು ಎದುರಿಸಿದರು
ವೈರಿಗಳನು ಹಿಂದಕ್ಕಟ್ಟಿದರು.
4 : ಬಾಯಾರಿದಾಗ ನಿಮ್ಮನ್ನು
ಬೇಡಿಕೊಂಡರು
ಸೀಳಿದ ಬಂಡೆಯಿಂದ ಅವರಿಗೆ ನೀರು
ಸಿಕ್ಕಿತು
ಗಡಸು ಕಲ್ಲಿಂದ ನೀರು ಬಂದು
ದಣಿವಾರಿಸಿತು.
5 : ಯಾವುದರಿಂದ ಶತ್ರುಗಳಿಗೆ ದಂಡನೆ
ಆಯಿತೋ
ಅದರಿಂದಲೇ ಇಸ್ರಯೇಲರ ಕಷ್ಟ
ಪರಿಹಾರವಾಯಿತು.
6 : ನಿತ್ಯವೂ ಹರಿಯುವ ನದಿ ನೀರು
ನೆತ್ತರಾಗಿ ಹೆಪ್ಪುಗಟ್ಟಲು ಕಂಗಾಲಾದರು
ವೈರಿಗಳು.
7 : ಹಸುಮಕ್ಕಳನು ಸಂಹರಿಸಬೇಕೆಂಬ
ರಾಜಾಜ್ಞೆಯನ್ನು ಹೀಗೆ ಧಿಕ್ಕರಿಸಿದಿರಿ
ನಿಮ್ಮವರಿಗೋ ನಿರೀಕ್ಷೆ ಮೀರಿದ ವಿಫುಲ
ನೀರನ್ನು ಹೀಗೆ ಒದಗಿಸಿದಿರಿ.
8 : ನಿಮ್ಮವರು ದಾಹತಾಪವನು
ಅನುಭವಿಸುವಂತೆ ಮಾಡಿದಿರಿ
ಈ ಪರಿ ಅವರ ವಿರೋಧಿಗಳನ್ನು
ದಂಡಿಸಿದ ರೀತಿಯನು ತೋರಿದಿರಿ.
9 : ನಿಮ್ಮವರು ಪರೀಕ್ಷೆಗೆ ಗುರಿಯಾದರು;
ಇದು ನಿಮ್ಮ ಕರುಣಾನುಸಾರ
ಸುಶಿಕ್ಷಣವಾಗಿತ್ತು.
ದುರುಳರು ನಿಮ್ಮ ಕುಪಿತ
ನ್ಯಾಯತೀರ್ಪಿಗೆ ಗುರಿಯಾದರು
ಈ ಮೂಲಕ ದುಷ್ಟರ ಶಿಕ್ಷೆಯ
ತೀವ್ರತೆಯನು ಕಲಿತುಕೊಂಡರು.
10 : ಇವರನ್ನು ಒರೆಗೆ ಹಚ್ಚಿದಿರಿ
ತಂದೆ ಮಕ್ಕಳನು ಗದರಿಸುವಂತೆ
ಅವರನ್ನಾದರೋ ಪರಿಶೋಧಿಸಿದಿರಿ
ಕಠೋರನಾದ ರಾಜನಂತೆ.
11 : ಅವರು ದೇವಜನರಿಗೆ ಹತ್ತಿರವಿದ್ದರೂ
ದೂರವಿದ್ದರೂ
ಒಂದೇ ಸಮನೆ ಸಂಕಟವನು
ಅನುಭವಿಸುತ್ತಿದ್ದರು.
12 : ಇಂದಿನ ಸ್ಥಿತಿಯನು, ಹಿಂದಿನ
ಸ್ಥಿತಿಯನು ನೆನೆದು
ಅವರು ಪಡುತ್ತಿದ್ದ ಪಾಡು
ಇಮ್ಮಡಿಯಾಗಿತ್ತು.
13 : ತಮಗಾದ ಶಿಕ್ಷೆಯಿಂದ ಇಸ್ರಯೇಲರಿಗೆ
ಲಾಭವಾಯಿತೆಂದು ಕೇಳಲು
ಸರ್ವೇಶ್ವರನಿಂದಲೇ ಇದಾಯಿತೆಂದು
ಅವರಿಗೆ ಮನದಟ್ಟಾಯಿತು.
14 : ಹಿಂದೊಮ್ಮೆ ಅವನನ್ನು ಕೂಸಾಗಿ ಬಿಸಾಡಿ
ಬಿಟ್ಟಿದ್ದರು; ಪರಿಹಾಸ್ಯ ಮಾಡಿದ್ದರು.
ಈಗ ಸಜ್ಜನರಿಗಿಂತಲು ಬೇರೆ ವಿಧದಲಿ
ಬಾಯಾರಿದವರಾಗಿ, ನಿಬ್ಬೆರಗಾದರು.
15 : ಅವರು ದುಷ್ಟ ಹಾಗು ವ್ಯರ್ಥ
ಆಲೋಚನೆಗಳಿಂದ ದಾರಿತಪ್ಪಿದರು
ಬುದ್ಧಿಹೀನ ಸರ್ಪವನು ಹಾಗು ವಿಕಾರ
ಪ್ರಾಣಿಗಳನು ಪೂಜಿಸಿದರು
ಆ ಪ್ರಾಣಿಗಳ ಗುಂಪನೇ ಅವರ ಮೇಲೆ
ಕಳಿಸಿದಿರಿ ಮುಯ್ಯಿ ತೀರಿಸಲು.
16 : ಹೀಗೆ ಮಾನವ ಯಾವುದರಿಂದ
ಪಾಪಮಾಡುತ್ತಾನೋ
ಅದರಿಂದಲೇ ದಂಡಿಸಲ್ಪಡುತ್ತಾನೆ
ಎಂಬುದನು
ಕಲಿತುಕೊಳ್ಳಲು ಒದಗಿಸಿದಿರಿ
ಸದವಕಾಶವನು.
17 : ಸರ್ವೇಶ್ವರಾ, ಸರ್ವಶಕ್ತಿಯಿಂದ ಕೂಡಿದ
ನಿಮ್ಮ ಹಸ್ತವು
ಆಕಾರರಹಿತ ಪ್ರಕೃತಿಯಿಂದ ಜಗತ್ತನ್ನು
ನಿರ್ಮಿಸಿತು
ಆ ಜನರನು ದಂಡಿಸಲು ನಿಮಗೇನು
ಕೊರೆತೆಯಿತ್ತು?
ಕರಡಿಗಳ, ಭೀಕರ ಸಿಂಹಗಳ ಗುಂಪನು
ಕಳುಹಿಸಬಹುದಿತ್ತು.
18 : ಅಗ್ನಿಶ್ವಾಸ ಬಿಡುವಂಥ, ಮೂಗಲಿ ಹೊಗೆ
ಭುಗಿಲೇಳಿಸುವಂಥ,
ಕಣ್ಣುಗಳಿಂದ ಭೀಕರ ಕಿಡಿಕಾರುವಂಥ,
ಹೊಸದಾಗಿ ನಿರ್ಮಾಣವಾದಂಥ,
ಯಾರಿಗೂ ಗುರುತೇ ಇಲ್ಲದಂಥ
ಮೃಗಗಳು ನೀವು
ಕಳುಹಿಸಬಹುದಿತ್ತಲ್ಲಾ !
19 : ಅವು ಹಾನಿಮಾಡಿ ಆ ಜನರನ್ನು
ಧ್ವಂಸಮಾಡಬಹುದಾಗಿತ್ತು;
ಅವುಗಳ ನೋಟದಿಂದಲೆ ದಿಗಿಲುಗೊಂಡು
ಅವರು ಸಾಯಬಹುದಿತ್ತು.
20 : ಇಲ್ಲವೆ, ನಿಮ್ಮ ನೀತಿ ಅವರನ್ನು ಬೆನ್ನಟ್ಟಿ
ಹೋಗಬಹುದಿತ್ತು.
ನಿಮ್ಮ ಶಕ್ತಿಯ ಶ್ವಾಸದಿಂದ ಅತ್ತಿತ್ತ
ಚದರಿಸಬಹುದಿತ್ತು.
ನಿಮ್ಮ ಒಂದೇ ಉಸಿರಿನಿಂದ ಅವರು
ಬಿದ್ದು ಹೋಗಬಹುದಿತ್ತು !
ಆದರೆ ಇದೆಲ್ಲವು ನಿಮ್ಮ ಅಳತೆ, ಅಂಕೆ,
ತೂಕದಂತೆ ನೆರವೇರಿತು.
ದೇವರು ದಯಾಪರ
21 : ನಿಮ್ಮ ಸಾಮಥ್ರ್ಯವನು ಎಂದಾದರು
ತೋರಿಸಬಲ್ಲವರು ನೀವು
ನಿಮ್ಮ ಬಾಹುಬಲವನ್ನು
ಎದುರಿಸಬಲ್ಲವನು ಯಾವನು?
22 : ನಿಮ್ಮ ದೃಷ್ಟಿಯಲಿ ಇಡೀ ವಿಶ್ವವು
ತಕ್ಕಡಿಯಲ್ಲಿನ ಒಂದು ಅಣುವಿನಂತೆ
ಮುಂಜಾನೆ ನೆಲಕ್ಕೆ ಬೀಳುವ ಮಂಜಿನ
ಒಂದು ಹನಿಯಂತೆ.
23 : ಏನು ಮಾಡಲೂ ನಿಮಗೆ ಶಕ್ತಿಯಿದೆ,
ಆದರೂ ಎಲ್ಲರಿಗೂ ಕರುಣೆ
ತೋರುತ್ತೀರಿ.
ಜನರು ನಿಮಗೆ ಅಭಿಮುಖರಾಗಲೆಂದೆ,
ಅವರ ಪಾಪಗಳನು ಕಂಡರೂ
ಕಾಣದಂತಿದ್ದೀರಿ.
24 : ಪ್ರೀತಿಸುತ್ತೀರಿ ಸೃಷ್ಟಿಯನೆಲ್ಲಾ
ನೀವುಂಟು ಮಾಡಿದ್ದನು ಹೇಸುವುದಿಲ್ಲ
ಹೇಸುತ್ತಿದ್ದರೆ ಉಂಟುಮಾಡುತ್ತಿರಲಿಲ್ಲ.
25 : ನಿಮ್ಮ ಚಿತ್ತ ಇದ್ದಹೊರತು,
ಯಾವುದು ಬಾಳೀತು?
ನಿಮ್ಮ ಕರೆ ಇಲ್ಲದಿದ್ದರೆ,
ಉದ್ದುದು ಹೇಗೆ ಉಳಿದೀತು?
26 : ಹೇ ಸರ್ವೇಶ್ವರಾ, ಜೀವಾತ್ಮಗಳ
ಪ್ರಿಯನೇ,
ಎಲ್ಲವೂ ನಿಮ್ಮವಾದುದರಿಂದ,
ಎಲ್ಲಕ್ಕೂ ಇದೆ ನಿಮ್ಮ ರಕ್ಷಣೆ